EXODUS 2
2
Mózes bi'dizhchį́
1Diné léi' Líívai dine'é nilį́įgo éí t'áá Líívai dine'é bitsi' ła' be'asdzą́ą́ áyiilaa. 2Éí asdzání i'niiltsąądgo ashkii yishchį́, áko awéé' t'áá íiyisí bíiyisgo jiiłtsą́ągo bąą táá' nídeezidjį' nízdees'į́į́'.#Acts 7:20; Heb. 11:23. 3Doo nahozh'nił'in le' át'éégóó t'óó teełts'aa' bá dziztł'ǫ́ǫgo łeejin dijé'ígíí áádóó tsin bijeeh bee jizhjéé', áko teełts'aa' biyi' góne' awéé' ajííłtį́įgo tooh nílínígíí tábąąhgi teeł bitahgi táłkáa'gi teełts'aa' bił nizhní'ą́. 4Áko bádí éí awéé' haa dashdoonííł nízingo t'áá nízaadę́ę́' sizį́. 5Nít'éé' Féro bitsi' nidoobeeł yiniyé tooh nílínídi níyá, índa at'ééké bá nidaal'a'ígíí ałdó' tábąąhgóó yił yikah, nít'éé' teełts'aa' teeł bitahgóó dah naa'eełgo yiyiiłtsą́, áko at'ééké ła' ábizhdííniid, Haa'íshą' wóshdę́ę́' táłts'ání'aah. 6Áko ąą áyiilaago awéé' jiiłtsą́ áádóó awéé' hááchago baa a'ááh jiniizį́į'go ájíní, Díí Hííbrew dine'é be'awéé' ła' át'į́į́ lá. 7T'áá áko awéé' bádí éí Féro bitsi' áyidííniid, Níláhgóósh deesháałgo Hííbrew asdzání ła' hágo bidideeshniił, áko éí awéé' ná yaa áhályą́ą doo. 8Áko Féro bitsi' áhodííniid, Nílááhánee'. T'áá áko ch'ikę́ę́h dah diilwodgo awéé' bimá hágo yidííniid. 9Áko Féro bitsi' éí asdzání áyidííniid, Díí awéé' nááłtééł; shá baa áhólyą́ą doo, áko bik'é nich'į' ni'iishłée doo. Áko asdzání éí awéé' dah néidiiłtį́įgo yaa áhályą́ą́ nít'éé'. 10Áádóó awéé' i'díít'óodgo Féro bitsi' yaa néiníłtį́įgo biyáázh dzizlį́į́',#Acts 7:21. áko, Mózes#2:10 Mózes jiníigo éí Hííbrew k'ehjígo táłts'ááltíinii jinínígi át'éego diits'a'. joolyée doo, hodííniid, háálá ání, Jó, táyi'dę́ę́' táłts'áníłtį́.
Mózes éí Mídiyan kéyahgóó anííchą́ą́'
11Áádóó nízaad nihoolzhiizhgo Mózes jineeyą́, áko łah hadine'é baazhníyáago naanish bee bide ádahólzingo baa ákozniizį́į́'; nít'éé' Ííjip dine'é éí hodine'é ła' Hííbrew nilį́įgo néiniłhałgo jiiłtsą́.#Heb. 11:24. 12Áko ałts'ą́ą́' jidéé'į́į'go doo naagháhígóó Ííjip dinéhígíí jiisxį́ áádóó séí bii' nízhdees'į́į́'. 13Áko biiskání ch'ínáádzídzáago Hííbrew dine'é nidilt'éego ałk'iilwod lá, áko bik'is doo ákwii ííł'ínígíí ábizhdííniid, Ha'át'éegoshą' t'áá bił ałk'is nídlínígíí náníłhał? 14Áko áhodííniid, Háishą' naat'áanii índa ánihwii'aahii nihá ániilaa? Ííjip dine'é ła' síníłhínígi át'éegoósh shí ałdó' shidiyííłhééł?#Acts 7:23-28. Áko Mózes t'óó hoł hóóyéé' áádóó ájíní, T'áá ga' aaníí bił béédahoozin lá! dziniizį́į́'. 15Áádóó Féro#2:15 Díí Féro éí Exodus 1:11 góne' yaa yáłti'ígíí doo daats'í t'áá éí át'į́į da. yaa hodiizts'ą́ą'go Mózes hodiyeeshxééł niizį́į́'.
Nidi Mózes éí Féro bits'ą́ą́' yóó'ajoolwodgo Mídiyan kéyahgi kééhojit'į́į́ nít'éé',#Acts 7:29; Heb. 11:27. áko tó hahadleeh léi'gi dzineezdá. 16Áko Mídiyan hoolyéédóó náá'iiłniihii léi' bitsi'ké tsosts'id yilt'éé lá, áko éí tó hadeidiyoo'ááł yiniyé yíkai, áko bizhé'é bilį́į́' da'doodlį́į́ł biniyé tsin bii' dibé nída'adlį́hígíí yii' tó hadeidééłbįįd. 17Nida'niłkaadii ła' yíkaigo nahgóó adah honeeskaad, nidi Mózes hach'ą́ą́h nídiidzáago háká aalwodgo biniit'aa dahadibé da'oodlą́ą́'. 18Ákohgo nákaigo bizhé'é Rúwel ábidííniid, Ha'át'éegoshą' díí jį́ t'áadoo hodíína'í nánoohkai? 19Áko ádadííniid, Ííjip dine'é léi' éí nida'niłkaadii nihá yich'ą́ą́h naagháago tó nihá hayiiz'ą́, áko dibé da'oodlą́ą́'. 20T'áá áko bitsi'ké áyidííniid, Áko háadishą' naaghá? Ha'át'éegoshą' diné t'áá áadigo t'óó nánoojéé'? Adooyį́į́ł biniyé hágo bidohní. 21Áádóó Mózes éí ákwe'é diné bighangi há hasih hoo'a', áádóó éí dinéhígíí bitsi' ła', Zipórah wolyéii Mózes yeiníłtį́. 22Áko ashkii há yishchį́, éí Gérsham#2:22 Gérsham jiníigo éí Hííbrew k'ehjígo dé'éyóní jinínígi át'éego diits'a'. wolyée doo, jidííniid, háálá ájíní, Dé'éyóní nishłį́įgo kéyah doo ééhonisindi naashá!
23Áádóó náás hodeeshzhiizhgo Ííjip kéyahdi aláahgo naat'áanii daaztsą́, áádóó Ízrel dine'é naalte' danilį́įgo yik'ee nidadi'ni'go áádóó choo'į́į́łká daachago, áko bich'į' nidahwii'nánígíí yik'ee daachago Diyin God bidiizts'ą́ą́'. 24Áko Diyin God éí nidazhdi'ni'go hodiizts'ą́ą́', áko Diyin God éí Éíbraham áádóó Áízak índa Jéíkab yił ahada'deest'áanii yénálniih.#Gen. 15:13,14. 25Áko Diyin God éí Ízrel dine'é yik'i déez'į́į'go ádajít'éegi yaa ákoniizį́į́'.
Currently Selected:
EXODUS 2: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
