GENESIS 32
32
Jéíkab éí Íísa yidááh doogáałgo hasht'e'ádiilyaa
1Áádóó Jéíkab dah náázhdii'náago joonééł nít'éé'; Diyin God bidiyingo nidaal'a'í hadááh yíkai, 2áko Jéíkab yiyiiłtsą́ągo ádííniid, Dííyee' Diyin God bits'ą́ą́dóó dah oonéełii át'éé lá! Áko ákwe'é Meihanéíyim#32:2 Méíhanéíyim jiníigo éí Hííbrew k'ehjígo naakigo dah oonééł jiníigo óolyé. hoolyée doo, jidííniid.
3Áko Jéíkab éí Síyer nahós'a'jį' t'áá éí kéyah Íídam hoolyéejį' hánaaí Íísa bich'į' hane' nidei'áhí alą́ąjį' adziis'a'. 4Hane' nidei'áhí ábizhdííniid, Shinanit'a'í Íísa kódabididoohniił, Ná naal'a'í Jéíkab kóní, Léíban bił tádíshnééh nít'éé', índa ákwe'é sédáago kojį' ahoolzhiizh, 5áko béégashii áádóó télii áádóó dibé áádóó diné nidaal'a'í índa asdzání nidaal'a'í shee hólǫ́, áko ajooba' bee shich'oha'néego shąąh tsídookos biniyé shinanit'a'í bił hodoonihgo i'ííł'a'.
6Áko hane' nidei'áhí nát'ą́ą́' Jéíkab yaa nákaigo ádaaní, Nínaaí Íísa baa niikai, áko bí ałdó' áádę́ę́' diné dį́įdi neeznádiingo yił nidáahjį' deeskai. 7Ákohgo Jéíkab ayóó át'éego nídzísdzíidgo ádił nisidzídzá, áko diné bił joonéłígíí áádóó dibé áádóó béégashii índa ghą́ą́'ask'idii naakijį' ałts'ádadziznilgo 8ázhdííniid, Íísa t'ááłá'í dah oonééł neistseedgo ła'ígíí éí dadoodzih.
9Áko Jéíkab ádííniid, Shizhé'é Éíbraham biDiyin God nílíinii, shizhé'é Áízak biDiyin God nílíinii Bóhólníihii, shą́ą́' áshidiní, Nikéyahgóó nik'éí bich'į' nídídááh, áko yá'át'éehgo naa nitsískees doo, 10bee a'ááh nínízinii áádóó nit'áá aaníinii t'áá át'é kóníshéhí nidi ná naal'a'í nishłíinii bił bééhosínísįįdígíí nádį́'ídi doo bą́ą́h anishłį́į da, háálá shigish t'éiyá hólǫ́ǫgo díí Jórdan tooh tsé'naa niníyá, áko k'ad yisht'ínígíí naakigo dah oonééł silį́į́'. 11Nánooshkąąh, shínaaí Íísa bits'ą́ąjį' yisdáshíłteeh, háálá binásdzid; shaa doogáałgo shidiyoołhééł, índa amá danilíinii ba'áłchíní t'áá yił ałdó' neidoołtsił. 12Áádóó ádííníniid ni', T'áá aaníí nik'ijishdlíi doo, índa na'áłchíní náás da'ahílchíihii tónteel bibąąhgi séiigi át'éego doo wóolta' ánéelą́ą' da dooleeł.#Gen. 22:17.
13Áko éí bitł'éé' t'áá ákǫ́ǫ́ hwiiską́, áádóó t'áá ákǫ́ǫ́ bił dah joonéłígíí hánaaí Íísa baazhdooniłígíí bá ats'ázhnínil; 14tł'ízí dabi'ádígíí naakidi neeznádiingo áádóó tł'ízíką' naadiingo áádóó dibé dabi'ádígíí naakidi neeznádiingo índa deenásts'aa' naadiingo, 15ghą́ą́'ask'idiitsa'ii tádiingo dabiyázhí t'áá bił, béégashii dabi'ádígíí dízdiingo, dóola neeznáá áádóó téliitsa'ii naadiingo índa dabiyázhí ałdó' neeznáá bóóltą'go bá ats'ázhnínil. 16Áko t'áá da'ał'ąą dah naazhjaa'go há nidaal'a'í bá ats'á'dziiznil, áádóó há nidaal'a'í ábizhdííniid, Shilą́ąjį' tsé'naa nihohnééh; nihita' honí'ą́ągo danóołkaad. 17Alą́ąjį'ígíí ábizhdííniid, Shínaaí Íísa nidááh níyáago áádóó nanídééłkidgo, Háishą' bíí' nílį́? Háágóoshą' díníyá? índa, Díí nííłkałígíishą' háí bí? nidííniidgo 18kódidííniił, Ná naal'a'í Jéíkab bí; shinanit'a'í Íísa yeínííł, áádóó ałdó' t'áá bí nihikéédę́ę́' yinééł. 19Naaki góne'ígíí áádóó náá'ákéédę́'ígíí áádóó t'áá ałtso ałkéé' da'néełkaadígíí ałdó' ákódabizhdidooniił, Íísa bidááh noohkaigo kót'éego bił nidahodoołnih, 20áádóó ánáádadidooh'niił, Ná naal'a'í Jéíkab ałdó' nihikéédę́ę́' yinééł. Háálá ání, Haa deeshniłígíí shilą́ąjį' yikahgo binahjį' shich'į' k'énízdínóodzįįł, áádóó bik'ijį' índa náhwiideestsééł, áko daats'í k'énáshididoo'niił. 21Ákohgo aazhdooléłígíí halą́ąjį' danéelkaad; hó éí oonéłígíí t'áá ákwe'é bił dahwiiską́.
Jéíkab éí Piináíyeldi diné léi' yił na'ahíneestą́ą́'
22T'áá éí bitł'éé' nízhdii'na'go hwe'asdzą́ą́ t'áá áłah dashdii'eezh, índa asdzání á naal'a'í t'áá áłah índa haye'ké ła'ts'áadahígíí ałdó', áádóó tooh Jábak ha'naa nideetiin gónaa ha'naa nijíkai. 23Dah yidii'eezhgo tó nílínígíí tsé'naa ajiis'a' áádóó jit'ínígíí t'áá ałtso tsé'naa ájiilaa. 24Áko Jéíkab t'áá sáhí jiida', áko ákwe'é hayííłką́ąjį' diné léi' hoł na'ahíneeztą́ą́'. 25Áko diné doo hak'eh dódle' át'éégóó bił bééhoozingo hak'ai' hooldzisígi yideelchid, áko bił na'ahízhnítaahgo Jéíkab hak'ai' hááwod. 26Áko áháłní, Shidíchííd, háálá hayííłką́. Nidi ábijiní, Shik'ijiisínídli'go índa nidideeshchił. 27Áko ánááhodi'ní, Haashą' yinílyé? Jéíkab yinishyé, bijiní. 28Áko áháłní, Jéíkab doo náánéinílyée da doo, nidi Ízrel#32:28 Ízrel jiníigo éí Hííbrew k'ehjígo Diyin God yił na'ahínítaah jinínígi át'éego nahalin. yinílyée doo, háálá naat'áanii t'áá aké'égoígíí nahalingo Diyin God bich'į' nidziil; diné ałdó' bich'į' nidziil, áko bíni' bá áhwiinilaa. 29Áko Jéíkab nahódééłkidgo ání, Nízhi' bee shił hólne', t'áá shǫǫdí. Áko áháłní, Ha'át'íishą' biniyé shízhi' bína'ídíłkid? Áádóó ákwe'é hak'ijisdli'. 30Áko Jéíkab ákwe'é Piináíyel#32:30 Piináíyel jiníigo éí Hííbrew k'ehjígo Diyin God binii' jinínígi át'éego nahalin. hoolyée doo jidííniidgo ájíní, Diyin God bił ahiistsą́, nidi t'ah hinishná. 31Áko Piinúwel bitis jííyáago hwee ha'íí'ą́, áko hak'ai' hááwodgo adíznéesxod. 32Áko Ízrel dine'é díí jį́į́góó ak'ai' hooldzisígi ats'idígíí doo deiyą́ą da, háálá Jéíkab bik'ai' hooldzisígi ats'id bizhdeelchidgo ahaneheetah.
Currently Selected:
GENESIS 32: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
