GENESIS 33
33
Jéíkab áádóó Íísa ałch'į' k'énáhásłį́į́'
1Áádóó Jéíkab hajííghalgo jidéé'į́į́'; nít'éé' Íísa aadę́ę́' diné dį́įdi neeznádiin yił yinééł. Áko áłchíní ałts'ájíínilgo Líyah áádóó Réíchel ła' baazhnínil, índa asdzání naaki á naal'a'í ałdó' ła' baazhnínil. 2Áko á naal'a'í índa bada'áłchíní alą́ąjį' nizhnínil, índa náá'ákéé' góne' Líyah áádóó ba'áłchíní nináájí'nil, áádóó Réíchel índa Jóseph éí ts'ídá akéédę́ę́' nizhnínil. 3Áádóó éí oonéłígíí bíighah ch'ízhníyáago hánaaí baazhníyáajį' tsosts'idi ni'jį' yaa ádziidzaa.
4Nidi Íísa hadááh yílwodgo hazénázhchid, áádóó hazts'ǫs, áko t'áá ájíłah jííchah. 5Áádóó Íísa hajííghal, nít'éé' asdzání índa áłchíní yiyiiłtsą́ągo ání, Eiishą' bił yíkahígíí háí ádaat'į́? Áko ájíní, Ná naal'a'í ba'áłchíní éí Diyin God jooba'ii beinínilígíí ádaat'į́. 6Ákohgo asdzání nidaalte' bada'áłchíní yił áháníjį' hach'į' niikaigo yaa ádaadzaa, 7áádóó Líyah ba'áłchíní yił áháníjį' hach'į' niikaigo ałdó' yaa ánáádaadzaa, áádóó bik'ijį' Jóseph índa Réíchel áháníjį' niní'áazhgo yaa ánáánádzaa. 8Áko Íísa ání, Ha'át'íishą' biniyé t'óó ahayóí shidááh da'niiskaad? Áádóó ázhdííniid, Shinanit'a'í nílíinii, díí ajooba' bee shich'oha'néego shaa nitsíníkees doo biniyé danéelkaad. 9Áko Íísa ánáádoo'niid, Shee hólónígíí t'áá ákódígo nisin, shitsilí; éidíígíí bíni'dii t'áá ni dooleeł. 10Áko Jéíkab ádííniid, Dooda, nánooshkąąh, k' ad ajooba' bee shich'oha'nínígíí nił hóshǫ́ǫ́ ládą́ą́', naa diní'ánígíí ni doo biniyé nídiilé; Diyin God binii' jiiłtsą́ nahalingo ninii' yiiłtsą́, háálá shaa nił hózhǫ́. 11T'áá shǫǫdí nánooshkąąh, shibee ak'ihojidlíii naa diní'ánígíí nídiinííł, háálá éí Diyin God yee shaa joozba'; shee hólónígíí t'áá ákódígo shił bíighah. Áádóó bee hozhniiltee'go índa nízhdiinil.
12Áko Íísa ádííniid, Tį' nídidii'néełgo yii'neeł doo; shí nihilą́ąjį' yisháał doo. 13Áko ábizhdííniid, Shinanit'a'í bił bééhózin; áłchíní doo dadijáad da, índa ayázhí dahólǫ́ǫgo bił yishnééł, áko ła'a jį́da tsį́įłgo dínéeskaadgoda ałtso dínóonééł. 14Haa'íshą', shinanit'a'í nílíinii, ná naal'a'í bilą́ąjį' náá'nééł, áko Síyerdi shinanit'a'í baa níyáajį' shilį́į́' índa sha'áłchíní t'áá bik'ehígo yii'néeł doo.
15Áko Íísa ádííniid, Haa'íshą' diné bił naashkaígíí ła' nił ninish'nííł. Áko ájíní, Éíshą' ha'át'íí biniyé? Shinanit'a'í nílíinii, háni'dii ajooba' t'éí bee shich'oha'néego shąąh tsídíkees. 16Áko índa t'áá éí bijį́ Síyergóó Íísa dah nízhdii'ná. 17Áko Sákath hoolyéejį' Jéíkab níná; ákwe'é dahasbį', índa bilį́į́' ałdó' yá chaha'oh ádayiilaa; éí biniinaa ákwe'é Sákath#33:17 Sákath jiníigo éí Hííbrew k'ehjígo chaha'oh jiníigo óolyé. hoosye'.
18Áádóó Kéínan kéyahgi Shííkem kin haal'áajį' t'áadoo át'éhígóó Jéíkab jiníná; Péídan-éíram hoolyéédę́ę́' níjoo'néełgo éí kin haal'áhígíí bíighahgi haníbaal nizhnínil. 19Áko haníbaal nizh'nínil yę́ęgi kéyah ła' nidziis'nii';#Josh. 24:32; Jn. 4:5. Shííkem bizhé'é Héímor wolyéii baa nidziis'nii'; éí neeznádiin béeso bik'é nizhnínil. 20Áko ákwe'é bikáá' náá'iiniihí ájiilaago El Élohi Ízrel#33:20 El Élohi Ízrel jiníigo éí Hííbrew k'ehjígo Diyin God éí Ízrel biDiyin God jiníigo óolyé. hoolyée doo, jidííniid.
Currently Selected:
GENESIS 33: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
