GENESIS 39
39
Jóseph áádóó Pátifer be'asdzą́ą́
1Áko Jóseph éí Ííjip kéyahdi hoł íldee', áádóó Íshmeiyel dine'é hoł yíkaígíí bits'ą́ą́dóó Féro bisiláo binanit'a'í, Pátifer wolyéii nahwiisnii'. 2Áko Jóseph éí Bóhólníihii bił hólǫ́,#Acts 7:9. áádóó diné bohónéedzáanii dzizlį́į́', áko Ííjip diné honanit'a'í nilíinii bighan góne' kééhojit'į́į́ nít'éé'. 3Áko honanit'a'í éí Bóhólníihii hoł hólǫ́ǫgo áádóó baa nijigháhígíí t'áá ałtso Bóhólníihii há náás áyoolíiłgo yiyiiłtsą́. 4Jóseph éí ajooba' bee bich'oha'néego bąąh tsízdeezkééz, áko há naal'a'go haghan índa hwee hólóonii t'áá ałtso yinant'áa doo biniyé bee bíhojoos'níí'. 5Haghan índa jit'ínígíí t'áá ałtso yinant'áago ájiilaadóó wóshdę́ę́' Jóseph biniiłt'aa Bóhólníihii éí Ííjip diné bighan yik'ijisdli', ákohgo bighan góne' hólóonii índa bidá'ák'ehdi hólóonii t'áá ałtso yee Bóhólníihii hak'ijisdli'. 6Jit'ínígíí t'áá ałtso bee Jóseph bíhojoos'níí', áko doo baa nitsídzíkees da; t'áá hazhó'ó jidooyį́įłii t'éiyá.
Jóseph éí diné bíiyisii nilį́ áádóó baa dzólní. 7Ákódzaadóó bik'ijį' Jóseph hananit'a'í be'asdzą́ą́ hadánoos'níi'go áhodííniid, Shił níteesh. 8Nidi doo íiznízingóó hananit'a'í be'asdzą́ą́ ábizhdííniid, Shoo, shinanit'a'í bighan góne' hólóonii baa áháshyáanii doo yaa nitsíkees da, áádóó bee hólóonii t'áá ałtso yee shíhoos'níí'. 9Díí kin biyi' doo ła' shiláahgo ájít'éhí da, índa t'áadoo shąąh yi'íní da, t'áá hazhó'ó ni t'éiyá, háálá be'asdzą́ą́ nílį́. Áko ha'át'éegoshą' díí ts'ídá doo yá'áshónígi ádeeshnííł, áádóó ałdó' Diyin God bich'į' ádił adeesih? 10Áko t'áá ákwíí jį́ hach'į' yáłti'go, Díníitish, doodaii', Shił síníké, ch'ééh hałníigo doo dzíists'ą́ą' da. 11Łah Jóseph náázhdeesh'nishgo wóne'é yah ajííyáago kindóó diné doo ła' ákóne' naagháa da. 12Áko ha'éé' yąąh dah neeshjį́įdgo, Shił níteesh, hałní áádóó ha'éé' t'áá ákǫ́ǫ́ dah yoołtsosgo tł'óó'góó ch'íjílwod. 13Ákódzaago ha'éé' t'áá ákǫ́ǫ́ dah yoołtsosgo t'óó honíł'į́įgo bits'ą́ą́' ch'íjílwodgo 14t'áá áko bikindóó diné yich'į' hadoolghaazhgo ání, Shoo, Hííbrew diné t'óó bee ádílááh t'éiyá yiniyé yił nát'áázh lá. Shił dínóotish yiniyé shił yah ííyá, nidi yéego hadeeshghaazh. 15Áko hadeeshghaazhgo yidiizts'ą́ą'go bi'éé' t'áá ákǫ́ǫgo dah diilwodgo ch'élwod. 16Áko ha'éé' t'áá ákǫ́ǫ́ neiłtsoosgo hananit'a'í nádzá, 17áádóó t'áá éí saadígíí yee yił hoolne'go ání, Hííbrew naal'a'í kwe'é bił néínít'ázhígíí t'óó bee ádíláahgo shił yah ííyá. 18Ákódzaago yéego hadeeshghaazhgo bi'éé' t'áá ákǫ́ǫgo ch'élwod.
19Áádóó ákódzaago hananit'a'í be'asdzą́ą́, Ninaal'a'í kóshiilaa, níigo yił hoolne', áko yidiizts'ą́ą'go t'áá íiyisí yik'ee báhóóchįįd. 20Áko Jóseph hananit'a'í hoł dah dii'áazhgo aláahgo naat'áanii bi'awáalyaaí shijé'é góne' yah ahóółt'e'; ákwe'é awáalyaa dzizdá. 21Nidi Bóhólníihii éí Jóseph yił hólǫ́ǫgo#Acts 7:9. yaa a'áhí nízin, índa awáalyaaí yaa áhályáanii bił jílį́įgo áhoolaa. 22Áko awáalyaaí yaa áhályáanii awáalyaa naazhjé'ígíí t'áá ałtso yee Jóseph yíhoos'níí'; ákwii yaa naakaígíí t'áá ałtso hó hak'ehgo baa na'aldeeh nít'éé'. 23Awáalyaaí yaa áhályáanii éí Jóseph bee hóhólníihii łá'í nidi doo yaa nitsíkees da, háálá Bóhólníihii hoł hólǫ́, áádóó baa nijigháhígíí Bóhólníihii há náás kóyoolííł.
Currently Selected:
GENESIS 39: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
