GENESIS 47
47
1Áko Jóseph éí Féro#Gen. 12:15. yaa níyáago áyidííniid, Shizhé'é áádóó shik'isóó áádóó dabilį́į́' índa deit'ínígíí t'áá ałtso Kéínan kéyahdę́ę́' yił nínáago k'ad Góshen kéyahgi niníná. 2Áko hak'isóó ashdla'go bił dashdiikaigo Féro bił baa jíkai. 3Áko Féro éí hak'isóó áyidííniid, Ha'át'íí naanish shį́įshą' nihindaanish? Áko Féro ádabizhdííniid, Ná nidaal'a'í daniidlíinii, na'niłkaadii daniidlį́; danihizhé'é na'nilkaad t'éí yaa nidaakai nít'éé' yę́ęgi át'éego nihí ałdó' ákódeiit'į́. 4Áko Féro ánáádabizhdoo'niid, Kéyah bii' t'óó átsééd kééhwiit'į́į doo biniyé nii'ná, háálá ná nidaal'a'í dabilį́į́' ch'il bá ádaadin, háálá Kéínan kéyahdi t'áá íiyisí dahodííchįįd; éí bąą, t'áá shǫǫdí, ná nidaal'a'í éí Góshen kéyah yii' kéédahat'į́į dooleełgo baa diní'aah. 5Áko Féro éí Jóseph áyidííniid, Nizhé'é índa nik'isóó naa níná. 6Áko Ííjip kéyah nihich'į' ąą át'é; bíni'dii kéyah agháago yá'áhoot'éhígi nizhé'é índa nik'isóó kéédahat'į́į doo; bíni'dii Góshen kéyahgi kééhat'į́į doo, áádóó nik'isóó bitahdóó diné dahayóígíí ła' bééhonísindą́ą́' éí shilį́į́' yaa ádahalyáanii yindant'áago shá ádadíílííł.
7Áko Jóseph éí bizhé'é Jéíkab, Féro yich'į' yił yah íí'áázh, áádóó Jéíkab éí Féro yik'ijisdli'. 8Áko Féro éí Jéíkab áyidííniid, Díkwíishą' ninááhai? 9Jéíkab éí Féro áyidííniid, Shíiníłką́ą́dę́ę́' t'áá tádíshnéehgo neeznádiindóó ba'aan tádiin shinááhai; shíiníłkánígíí t'áá díkwíhí yee' índa shich'į' nahwii'náago tádííná, áko éidí dashizhé'é yę́ę tádadinéehgo nináháhááh áádóó bídeiníłką́ą́dę́ę́' éí t'áadoo yé'éztį́įh da. 10Áko Jéíkab éí Féro yik'ijisdli'go yits'ą́ą́' ch'ínádzá. 11Áádóó Jóseph hazhé'é índa hak'isóó kéyah baa hozhdiní'ánígíí éí Ííjip kéyahgi agháago yá'áhoot'éehgi Rámsiiz hoolyéedi hasht'e'nidahaazná. T'áá Féro ádííniidígi át'éego ádadziidzaa. 12Áko Jóseph hazhé'é áádóó hak'isóó índa hazhé'é bighandóó t'áá ałtso ádanéelt'e'ígíí bik'ehgo ch'iyáán bee baa áhojilyą́ą́ nít'éé'.
Hodííchįįd yę́ędą́ą́' Jóseph bóhólnííh nít'éé'
13Áko t'áá íiyisí hodichinígíí bąą kéyah t'áá át'éé nít'éé' biyi' ch'iyáán ádaasdįįd, áko Ííjip kéyahgi índa Kéínan kéyahgi dine'é t'áá íiyisí dichin yik'ee ti'dahoonííh. 14Áko Jóseph éí Ííjip kéyahgi índa Kéínan kéyahdę́ę́' béeso bik'é doodį́įłii hach'į' nidayiizla'ígíí ahąh ájiilaago Féro bighan góne' yah ajííjaa'. 15Áko Ííjip kéyahgi índa Kéínan kéyahgi béeso ádaasdįįdgo Ííjip dine'é t'áá ałtso Jóseph yaa haaskaigo ádeidííniid, Ch'iyáán nihitaa niniih; ha'át'íishą' biniyé ninááł dadíníi'nééł? Háálá nihibéeso ádaasdįįd. 16Nít'éé' Jóseph ádííniid, Nihibéeso ádaasdįįdgo nihilį́į́' shaa dahohníiłgo nihilį́į́' bideená nihadi'yeestsoł. 17Áko dahalį́į́' Jóseph baa dadziiznil, áko Jóseph éí łį́į́' áádóó dibé áádóó béégashii índa télii bideená ch'iyáán hataiiznii', áko éí bighaí dahalį́į́' ałtso bideená hada'altso' nít'éé'. 18Áko éí nínáánááhaigo baa náádziiskaigo ádabizhdííniid, Nihinanit'a'í, nihibéeso bik'é ida'diilnahgo ałtso ádasiildįįdígíí nihinanit'a'í doo bits'ąą nanóol'į́į́' át'ée da; danihilį́į́' t'áá ałtso nihinanit'a'í bíí' silį́į́'; nihinanit'a'í yoo'į́įgo t'áadoo yiila'í da; t'áá hazhó'ó danihits'íís índa danihikédaayah t'éiyá daadziih. 19Ha'át'íishą' biniyé nihí índa nihikédaayah bił t'áá ninááł ádadiidįįł? Ch'iyáán bideená nihí índa nihikédaayah Féro bá nidaal'a'í dadiidleeł; k'eelyéí nihitaa niniih, áko dahinii'náa dooleeł áádóó doo dadíníi'néeł da índa kéyah doo t'áá bíni' hwiidoo'aał da.
20Áko Jóseph éí Ííjip kéyah t'áá át'é Féro yá nayiisnii', áko hodichinígíí hadeinídiidzáago bąą Ííjip dine'é bidáda'ak'eh baa nidahaaznii'. Ákódzaago kéyah Féro bíí' silį́į́'. 21Nít'éé' Ííjip kéyahgi da'níłts'ą́ą́dę́ę́' diné éí kin hadaas'áhígi kéédahat'į́įgo ájiilaa. 22Nááda'iiłniihii bikédaayah t'éiyá t'áadoo nidziisnii' da, háálá Féro éí nááda'iiłniihii yá ch'iyáán niinínilgo yikiin dahináago nááda'iiłniihii bikédaayah t'áadoo baa nidahaaznii' da. 23Ákohgo Jóseph éí diné áyidííniid, Shoo, díí jį́ nihí índa nihikédaayah bił Féro bá nanihiyéłnii'; k'ad kǫ́ǫ́ k'eelyéí nihá hólǫ́, áko kéyahgi k'idadidoohłééł. 24Áko da'agizhjį' anáhálzhishgo ashdla'go daníjaa'ígíí éí t'ááłá'ígo shijaa' Féro baa nídahohjih doo, áko dį́į́' shijaa' bíighahgo éí t'áá danihí doo: dá'ák'ehgóó k'ééda'dohdléehgo nihí áádóó bił danihighanígíí índa nihada'áłchíní bił danihich'iyą' dooleeł. 25Áko ádadííniid, Yisdánihíínínil; haa'íshą' nihinanit'a'í, ajooba' bee nihich'oha'néego nihąąh tsídíníkééz, áko Féro bá naal'a'í dadiidleeł. 26Áko Jóseph éí Ííjip kéyahgi nínádant'į́įhii ashdla'go daníjaa'ígíí éí t'ááłáhígo shijaa' Féro bí doogo bee haz'áanii áyiilaa, áko éí díí jį́į́góó nidi bee hoogááł; t'áá hazhó'ó nááda'iiłniihii bikédaayahígíí t'áadoo Féro bíí' silį́į' da.
Jéíkab daaztsą́ą́dóó bik'ijį' ábidi'doolníłígíí yee haadzíí'
27Áko Ízrel éí Ííjipdi Góshen kéyahgi kééhat'į́į́ nít'éé'; ákwii naadeełí hwee dahazlį́į́', áádóó lą'í dzizlį́į́'; t'áá íiyisí k'ee'ąą jidínéest'ą́. 28Jéíkab éí Ííjip kéyahgi kééhat'į́įgo tsosts'idts'áadah nááhai; Jéíkab habíyííłką́ą́dóó neeznádiindóó ba'aan dízdiindóó ba'aan tsosts'id binááhai.
29Áko Ízrel dadootsaałjį' k'adę́ę baa hoolzhíishgo haye' Jóseph hágo bizhdííniidgo ábijiní, K'ad ajooba' bee shich'oha'néego shaa nitsíníkees ládą́ą́', t'áá shǫǫdí, shitsoosk'id biyaa adílníihgo shaa jiidííbaał áádóó t'áá aaníí yá'át'éhígi áshidíílííł. T'áá shǫǫdí, t'ááká Ííjip kéyahgi yóó'áshóólééh lágo. 30Nidi dasétsą́ągo Ííjip kéyahdóó ch'íshidííłtéełgo dashizhé'é yóó'ádaalyaa yę́ędi yóó'áshidíílííł. Áko áhozhdííniid, T'áá ádínínígi ádeeshnííł.#Gen. 49:29-32; 50:6. 31Áko ázhdííniid, Diyin God binááł t'áá aaníí shich'į' háínídzíí', áko hó Diyin God binááł t'áá aaníí bich'į' hadzoodzíí'. Áko Ízrel hatsásk'eh bitsii'jigo bikáa'jį' yaa ádziidzaago nahodzisá.
Currently Selected:
GENESIS 47: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
