GENESIS 46
46
Jéíkab áádóó ba'áłchíní Ííjipgóó eekai
1Ákohgo Ízrel bee hólónígíí t'áá ałtso yił dah diináago Bíyer-shííbagi niníná; ákwe'é hazhé'é yę́ę Áízak biDiyin God bich'į' náá'jiisnii'. 2Áko tł'ée'go Diyin God éí Ízrel bił yee yich'į' haadzíi'go ání, Jéíkab, Jéíkab. Áko ázhdííniid, Kǫ́ǫ́ sétį́. 3Áko áháłní, Shí Diyin God ásht'į́; nizhé'é yę́ę biDiyin God; Ííjip kéyahjį' yínéłígíí t'áadoo bik'ee nił yé'í, háálá ákwii dine'é ayóó át'éii ándeeshłíí ł. 4Ííjip kéyahgóó nił deeshnééł, áko áádę́ę́' t'áá aaníí háánihideesh'ish, áádóó dasínítsą́ągo Jóseph nináá' ałch'į' kwíidoolííł. 5Ákohgo Jéíkab éí Bíyer-shííbadóó dashdiináago Ízrel biye'ké dabizhé'é Jéíkab áádóó bada'áłchíní índa bida'asdzą́ą́ yił Féro tsinaabąąs beezhdoonééł biniyé hach'į' áyiilaaígíí bee jiníná. 6Dabilį́į́' índa deit'ínígíí éí Kéínan kéyahdi hwee dahazlį́'ígíí yił dah diiná; Jéíkab índa ba'áłchíní t'áá ałtso bił Ííjip kéyahdi jiníná.#Acts 7:15. 7Biye'ké áádóó bitsi'ké áádóó binálíkéda índa ba'áłchíní t'áá ałtso Ííjip kéyahdi yił níná.
8Díí Ízrel ba'áłchíní Ííjip kéyahdi nínánígíí dabízhi'; Jéíkab áádóó biye'ké: Jéíkab há alą́ąjį' yizhchínígíí Rúben wolyé, 9áádóó Rúben biye'ké éí Héínak áádóó Pálu áádóó Hézran índa Kármii daolyé. 10Símiyan biye'ké éí Jíímyuwel áádóó Jéímin áádóó Óhad áádóó Jéíkin índa Zóhar daolyé. Áádóó Shéíyal éí Kéínan asdzání biyáázh ałdó'. 11Líívai biye'ké éí Gérshan áádóó Kóhath índa Miirárai daolyé. 12Júdah biye'ké éí Er áádóó Ónan áádóó Shíílah áádóó Píírez índa Zíírah daolyé, nidi Er áádóó Ónan éí Kéínan kéyahdi jineezná; Píírez biye'ké éí Hézran índa Héímal wolyé. 13Ísakar biye'ké éí Tóla áádóó Púwa áádóó Job índa Shímran daolyé. 14Zébyulan biye'ké éí Sííred áádóó Íílan índa Jáliyel daolyé. 15Díí Líyah biyáázhké Péídan-éíram hoolyéedi Jéíkab yá niyiishchį́, índa bitsi' Dáínah ałdó'; Jéíkab biye'ké áádóó bitsi' bił t'áá ałtso tádiindóó ba'aan tájílt'é. 16Géed biye'ké éí Zíífan áádóó Hágai áádóó Shúnai áádóó Ézban áádóó Íírai áádóó Éírad índa Aríílai daolyé. 17Ásher biye'ké éí Jímna áádóó Íshowah áádóó Íshowai áádóó Biiráíyah índa bilah Síírah daolyé. Biiráíyah biye'ké éí Hííber índa Málkiyel wolyé; 18Léíban bitsi' Líyah yeiníłtínígíí Zílpah wolyéii éí díí biyáázhké; hastą́'áadah yilt'éego Jéíkab yá niyiishchį́. 19Jéíkab be'asdzą́ą́ Réíchel biyáázhké éí Jóseph índa Bénjamin wolyé. 20Áádóó Jóseph éí Ííjip kéyahdi Manáseh áádóó Íífreiyim éí An hoolyéédóó náá'iiłniihii Potífera bitsi' Ásenath wolyéii há yishchį́.#Gen. 41:50-52. 21Bénjamin biye'ké éí Bíílah áádóó Bííker áádóó Áshbel áádóó Gííra áádóó Néíyaman áádóó Ííhai áádóó Rash áádóó Máppim áádóó Háppim índa Ard daolyé. 22Díí Réíchel biyáázhké Jéíkab yá niyiishchį́; t'áá ałtsogo dį́į́ts'áadah yilt'é. 23Dan biye' éí Húshim wolyé. 24Náftalai biye' ké éí Jáhziyel áádóó Gúnai áádóó Jíízer índa Shíllem daolyé; 25Léíban bitsi' Réíchel yeiníłtínígíí Bílhah wolyéii éí díí biyáázhké; t'áá ałtsogo tsosts'id yilt'éego Jéíkab yá niyiishchį́. 26T'áá ádzíłtso Jéíkab bits'ą́ą́dóó dahodzizlį́į'ii Ííjip kéyahdi bił jinínánígíí, Jéíkab dabizháá'áád t'áágéedgo, hastą́diindóó ba'aan hastą́ą́h jilt'é; 27Jóseph haye'ké Ííjip kéyahgi há yizhchínígíí éí naaki, áko Jéíkab ba'áłchíní t'áá ałtso Ííjip kéyahgi nínánígíí éí tsosts'idiin.#Acts 7:14.
Jéíkab áádóó ba'áłchíní Ííjipdi naakai
28Áko Jéíkab éí Júdah ádílą́ąjį' Jóseph bich'į' ajííł'a'go éí Góshen kéyahgóó hodoo'ishgo áadi nizhdoonééł biniyé i'jííł'a', áádóó Góshen kéyahdi jiníná. 29Áko Jóseph hatsinaabąąs bijáád naakiígíí hasht'ejiilaago Góshendi hazhé'é Ízrel bidááshdoogáałgo dashdiiyá, áko baazhníyáago bizéédzíznii'go jichago t'áá nízaadgóó hodíína'. 30Áko Ízrel éí Jóseph áyidííniid, T'ah hinínáá lágo ná niiłtsánígíí bąą k'ad háni' dadeestsaał. 31Áko Jóseph hak'isóó índa hazhé'é ba'áłchíní t'áá ałtso ábizhdííniid, Féro bich'į' deesháałgo bił hodeeshnihgo ábidideeshniił, Shik'isóó índa shizhé'é ba'áłchíní t'áá ałtso Kéínan kéyahdi kéédahat'į́į́ nít'é'ígíí shaa níná. 32Nida'niłkaadii danilį́; dabilį́į́' yaa ádahalyą́ągo yídaneesdin, áádóó dabidibé índa dabibéégashii índa deit'ínígíí t'áá ałtso yił níná. 33Ákohgo Féro hágo nihidííniidgo ánihididooniił, Ha'át'íí naanish shį́įshą' nihindaanish? 34Áko kódabididoohniił, Ná nidaal'a'í daniidlíinii, nihí áádóó danihizhé'é t'áá áłchíní daniidlį́į́dą́ą́' nihilį́į́' nidaniilkaad, ákohgo Góshen kéyah bii' kéédahoht'į́į dooleeł, háálá Ííjip dine'é nida'niłkaadii t'áá ałtso daabił t'óó badaa'ih.
Currently Selected:
GENESIS 46: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
