GENESIS 45
45
Jóseph bik'isóó yich'į' ádééhoosįįd
1Ákohgo Jóseph hwíighahgóó naazínígíí binááł doo hasht'ezhdit'eehgóó biniinaa yéego hadzoodzíi'go ájíní, Diné t'áá ałtso átsé ch'ínóhkááh, dabidohní. Áko diné doo ła' wóne' nidaaldeehgóó Jóseph hak'isóó bich'į' ádééhojooszįįd.#Acts 7:13. 2Áko ayóó íits'a'go jíícha, áko Ííjip dine'é Féro bighandóó nidaakaígíí dahodiizts'ą́ą́'. 3Áko Jóseph bik'isóó áyidííniid, Shí Jóseph ásht'į́. Da' shizhé'éésh t'ah hiná? Áko hak'isóó bił nidzizínígíí doo hach'į' hadaodziih ádaadzaa da, háálá t'óó bił adahayóigo nídaasdzííd.
4Áko Jóseph bik'isóó áyidííniid, T'áá shǫǫdí, shíighahjį' ninohkááh. Áko hwíighahjį' nijíkaigo áhodííniid, Shí, Jóseph nihik'is, Ííjip kéyahjį' nidahisoołnii'ígíí ásht'į́. 5Áko kojį' nidashiyoołnii'ígíí t'áadoo bąąh danihíni'í, índa t'áadoo ách'į' nihá nídahachįįhí. Háálá Diyin God t'áá nihítséedi shiníł'a'go dahináanii dadoodzih biniyé ádzaa lá. 6Háálá díí kéyah bii' hodichingo k'ad naaki nááhai, áádóó ashdla' nináádoohah hadziih; éí bii' doo nidahwiildlaad da doo, índa doo da'agizh da doo. 7Nidi Diyin God nihítséedi kojį' shiníł'a'; éí niha'áłchíní nahasdzáán bikáá'góó náás da'ahílchíih doo, índa shí shinahjį' ayóó át'éii bee dadoohdzih biniyé ádzaa. 8Áko nihí doo kwe'é dashinooł'a' da, nidi Diyin God át'į́, áko Féro bizhé'é nishłį́įgo índa bighan t'áá át'é áádóó Ííjip kéyah t'áá át'éé nít'éé' binanisht'áago áshiilaa. 9Tsxį́įłgo shizhé'é bich'į' nídóhkáahgo ádabididoohniił, Niye' Jóseph kóní, Diyin God éí Ííjip kéyah t'áá át'éé nít'éé' binanisht'áago áshiilaa; t'áadoo na'áhodílziidí áádę́ę́' shaa díínááł. 10Áko Góshen kéyahgi kéédahoht'į́į doo; ni lá áádóó na'áłchíní áádóó éí banááda'áłchíní índa nidibé, nibéégashii índa nee hólóonii t'áá ałtso bił t'áá áyídígóó kééhoht'į́į doo. 11Ákwii nihaná'ástso' doo, háálá t'áá hodichingo ashdla' nínáádoohah. Áko ni áádóó bił dah yinéełii índa nee hólóonii t'áá ałtso doo nihaa dahojoobá'í dadoohłeeł.#Acts 7:14. 12Áádóó shoo, t'áá nihí índa shitsilí Bénjamin ałdó' bił dashinół'į́; t'áá shí nihich'į' hahasdziih. 13Áko Ííjip kéyahgi bee shaa ha'niihígíí índa daołtsánígíí t'áá ałtso bee shizhé'é bił dahodoołnih, áádóó tsį́įłgo áádę́ę́' bił nídoohkah. 14Ákohgo hatsilí Bénjamin bizééjízhchidgo jíícha; Bénjamin ałdó' yícha. 15Índa hánaaíké t'áá ałtso dadzizts'ǫs, áádóó bizéédajizhchidgo bił dajíícha. Áádóó bik'ijį' hak'isóó bił ahił dahojoolne'.
16Áádóó Jóseph bik'isóó yíkai; ha'níigo Féro bighandi baa hóóne'go Féro índa bá nidaal'a'í yaa bił dahózhǫ́. 17Áko Féro éí Jóseph áyidííniid, Nik'isóó ábididííniił, kódadoohnííł; nihilį́į́' hééł bił bik'i nida'ohtł'o'go Kéínan kéyahgóó dah nídoohkááh. 18Áko nihizhé'é índa nihada'áłchíní áádę́ę́' bił shaa doohnééł; Ííjip kéyahgi ts'ídá aláahdi át'éii nihaa dideesh'ááł, áádóó kéyahgi nidant'ą'ii agháago yá'ádaat'éehii daohsą́ą doo. 19Díí bee bich'į' hanáádíídzih; éí díí bida'ohłééh; niha'áłchíní índa nihida'asdzą́ą́ biniyé Ííjip kéyahdóó tsinaabąąs ch'ídahidoołbąs, áádóó nihizhé'é áádę́ę́' bił doohnééł. 20Áko ałdó' nihiyéél t'áadoo nihida'diił'áhí, háálá Ííjip kéyahgi yá'ádaat'éehii t'áá ałtso nihá dahólǫ́.
21Áko Ízrel biye'ké ákódaadzaa; Féro ádííniidígi át'éego Jóseph tsinaabąąs haa yiiznil, áádóó hast'e' bikiin níjookah dooleełígíí há hasht'éyiilaa. 22Índa t'áá ádzíłtso éé' da'ílíinii ałnáádajiyoo'niłgo biih nídajikah dooleełii hataiznii', nidi Bénjamin éí béésh łigaii táadi neeznádiin bíighahgo índa éé' ashdladi ał'ąą bii' doodáałgo yeinínil. 23Áádóó hazhé'é éí Ííjip kéyahdóó yá'ádaat'éehii télii neeznáá bił bik'i nida'astł'ǫ́ǫgo áádóó télii dabi'ádígíí neeznáago, neest'áanii áádóó ch'iyáán índa bist'e'go áádę́ę́' yikiin doogáałii bił bik'i nida'astł'ǫ́ǫgo, díí yich'į' áyiilaa. 24Ákohgo índa, Nááhkahgóó t'áadoo ahináádoohjahí, bizhdííniidgo hak' isóó béézh'níłnii'. Áádóó dah nídiikai. 25Áko Ííjip kéyahdóó nihééjíkaigo Kéínan kéyahdi hazhé'é Jéíkab baa níjíkai. 26Áko bił dahojoolne'go ádajiní, Jóseph t'ah hináá lá. Ííjip kéyah t'áá át'éé nít'éé' yinant'á. Áko doo joodlą́ą́góó t'óó hoł yée'go bik'ee k'asdą́ą́' háni' ásdįįd. 27Áko Jóseph éí saad yee hach'į' hahaasdzí'ígíí t'áá át'é bee bił dahojoolne', áádóó tsinaabąąs éí hoł nídoobąs biniyé Jóseph hach'į' áyiilaii dziiłtsą́ągo hazhé'é Jéíkab bii' hááhwiisdoh. 28Áko Ízrel ádííniid, K'ad lą́ą, shiye' Jóseph hináá lá; t'ah doo daastsaahdą́ą́' bich'į' deesháałgo néídeestsééł.
Currently Selected:
GENESIS 45: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
