GENESIS 49
49
Jéíkab biye'ké náásgóó ádaat'ée dooígíí yee yił hoolne'
1Áko Jéíkab haye'ké hágo bizhdííniidgo ábijiní, Ahąh óhnééh, áko náás yidiiską́ą́góó nihich'į' ádahodooníłígíí bee nihił hodeeshnih.
2Jéíkab biye'ké danohłíinii, ahąh óhnéehgo da'íísółts'ą́ą́';
nihizhé'é Ízrel deísółts'ą́ą́'.
3Rúben, ni alą́ąjį' shá yizhchíinii nílį́; shidziil áádóó shitsxe' bee deezt'i'ii nílį́;
Diné aláahgo baa ha'niihii índa alą́ąjį' hoo'áałii nílį́.
4Tó naanáálk'ołígíí nahonílinígíí biniinaa doo alą́ąjį' hoo'áałii nílį́į da doo,
Háálá nizhé'é bitsásk'ehgi baa díí'nílá, áko yíníłchxǫ'; shibikáá' dah antéhí bikáa'jį' ííníyá.
5Símiyan índa Líívai ałk'is nidlį́; bidiltłish yee be'ádíláhígíí doo yits'íidii ádaat'é.
6Shii' sizíinii nílíinii, t'áá nahont'inee naha'áhígíí t'áadoo bich'į' nanináhí;
Bee ayóó ánísht'éii bee t'áadoo bił łá'í nílíní, háálá báháchįįhgo diné yiyiiłhééh,
Áádóó t'áá bí íinízinii bik'ehgo kin biná'ástł'in yiyaa e'enił.#49:6 Éí doodaii', t'áá bí íinízinii bik'ehgo béégashii bitsáts'id yiyiizhgizh.
7Báháchįįhígíí hóyée'go bá ha'iidziih, háálá t'áá íiyisí hashké
Áádóó t'áá íiyisí doo jooba'góó báháchįįh; Jéíkab dine'é bitahgi ałts'ą́ąjį' ho'deesh'nih áádóó Ízrel dine'é bitahgi taizhdookah.
8Júdah, ni nik'isóó naa dahaniih doo;
Ni'ana'í dabik'os yínítą' doo;
Nizhé'é biye'ké nich'į' yaa áńdaat'įįh doo.
9Júdah éí náshdóítsoh bitsiijį' ditł'ooígíí biyázhí jílį́;
Naniłtseedígíí bits'ą́ą́' dah diniyá, shiye'.
Jishjį́įdgo náshdóítsoh bitsiijį' ditł'ooígíí nahojílingo dzizdá,
Áádóó náshdóítsoh bitsiijį' ditł'ooí sánígi át'éego dzizdá; háishą' tsíbididoołyis?#Num. 24:9; Rev. 5:5.
10Naat'á gish Júdah doo bighadootį́įł da;
Éí Sháíloh níyáajį' naat'áanii bigish bikee' bita'dę́ę́' doo hadootį́įł da,
Áádóó éí bá diné áłashdooleeł.
11Bilé'é yázhí éí ch'il na'atł'o'ii sikaadgo yąąh dah náyiitł'óóh;
Bitélii yázhí éí ch'il na'atł'o'ii agháago yá'át'éehii sikaadgo yąąh dah náyiitł'óóh;
Wáin bii' bi'éé' tánéízgiz áádóó yee hadít'éhígíí ch'il na'atł'o'ii bidił biyi' tánéízgiz;
12Bináá' éí wáin biláahgo dinilzhin doo,
Índa biwoo' éí abe' biláahgo łigai doo.
13Zébyulan éí tónteel bibąąhdi táłts'á'ii'eełgi kééhat'į́į doo;
Ákwe'é tsinaa'eeł dah nídahatł'óoh doo,
Áádóó bikéyah Sáídan kin haal'áii bíighahdi hoodzo dooleeł.
14Ísakar éí télii bidziilii hééł naakiígíí bita'gi dziztíinii jílį́,
15Áko háá'iiyį́į́h yá'áhoot'ééh léi'gi hodziiłtsą́,
Índa kéyah hózhóní yee',
Áko dah azhdidooyééł biniyé hawos yaa ájiilaa,
Áádóó á naal'a'í dzizlį́į'go naanish dabidziilii t'éiyá baa nijighá.
16Dan éí Ízrel dine'é bitahdóó ła' dine'é jílį́įgo hodine'é baa níjít'į́į doo.
17Dan éí honít'i'gi tł'iish sitínígíí jílį́į doo;
Łį́į́' be'atiinígíí bikáá' tł'iish na'ałtseedii jílį́į doo;
Éí łį́į́' bikétalígíí ahijiiłháashgo biniinaa bik'i dah nidadzizdáhígíí t'ą́ąjigo adahizhnidéeh dooleeł.
18Bóhólníihii nílíinii, nibee yisdá'iildéehii biba' ánísht'éego hoolzhiizh.
19Géed éí nidaabaahígíí bik'íidookah, nidi yik'eh nídidoodleeł.
20Ásher bits'ą́ą́dóó ch'iyáán yá'ádaat'éehii hólǫ́ǫ doo,
Índa aláahgo naat'áanii bich'iyą' daalkanii náhoodleeł doo.
21Náftalai éí bįįhtsa'ii bidoochidígíí nilį́;
Éí ílíinii yee yáłti'.
22Jóseph éí tsin bits'áoz'a' bąąh bineest'ą' t'óó ahayóí náhoodleełii jílį́;
Éí tó háálínígíí bíighahgi tsin bits'áoz'a' bąąh t'óó ahayóí náhoodleeł; bits'áoz'a' tsé yítł'inígíí bilááh dahaazyį́.
23Da'diłt'ohii háni' dayiił'a'go hak'ee dadiniihgo dahółt'óóh,
24Ákondi be'ałtį́į́' t'ah bidziil,
Índa Jéíkab biDiyin God Ayóó'át'éii bidziilii bíla' yee bidziilgo ályaa,
Kodóó na'niłkaadii, Ízrel bá tséhígíí át'é.
25Nizhé'é biDiyin God éí lá níká análwo' doo ni,
Índa Aláahgo Ayóó'ábóodziilii éí nik'ijidlíi doo;
Aghánáhóó'áádę́ę́' bee ak'ihojidlíii,
Tónteel biyi'dę́ę́' bee ak'ihojidlíii,
Alt'o'dóó bee ak'ihojidlíii,
Iishch'id bii'dóó bee ak'ihojidlíii yee nik'ijidlíi doo.
26Nizhé'é bee bik'ihojisdli'ii éí dashizhé'é yę́ę bee bik'idahojisdli'ii biláahdi hool'áágóó daadziłígíí nidanees'ą́ąjį' bee bik'ihojisdli';
Éí t'áá át'é Jóseph bitsii'káa'jį' dooleeł,
Áádóó bik'isóó yits'ąą t'áá sahdii naagháhígíí bitsii't'áajį' dooleeł.
27Bénjamin éí mą'iitsoh alghałii nahalin doo;
Abínígo yił hidideełígíí yildeeł doo,
Áádóó niyiisnánígíí e'e'áahgo ałtai'niih doo.
28Díí t'áá ádzíłtso Ízrel dine'é naakits'áadahgo dajílį́; díí lą́ą hazhé'é hach'į' yee hahaasdzíi'go hak'idadzisdli' ni'; t'ááłá'í jinítínígo bee ak'idahwiizhdoodliiłii yee hak'ijisdli'.
Jéíkab daaztsą́ áádóó łeeh bi'dooltį́
29Áko t'áadoo naaki nilíní hach'į' yee haadzíi'go áhodííniid, Shidine'é yę́ę ahikááhgóó deeshłeeł; Het dine'é Íífran bikéyahdi; tséníhoodzání góne' dashizhé'é yę́ę yóó'ádaalyaa yę́ęgi yóó'ádashidoohłííł. 30Kéínan kéyahgi, Mámre hoolyéii bich'į'gi, éí Makpííla kéyah bii'di tséníhoodzání góne', éí Éíbraham ákwii yóó'áda'alne' doo biniyé Het dine'é Íífran éí kéyah tséníhoodzání t'áá bił yaa nayiisnii'.#Gen. 23:3-20. 31Ákwe'é Éíbraham áádóó be'asdzą́ą́ Sarah ałdó' yóó' ábi'diilyaa;#Gen. 25:9,10. Áízak áádóó be'asdzą́ą́ Rebékah ałdó' ákwe'é yóó'ábi'diilyaa,#Gen. 35:29. índa shí ałdó' ákwe'é Líyah yóó'íishłaa. 32Éí dá'ák'ehdóó tséníhoodzánígíí Het dine'é baa nahaaznii'. 33Nít'éé' Jéíkab haye'ké t'áadoo naaki nilíní bił dahojoolne'go, hatsásk'eh bikáa'jį' anízdool'eezgo, haníłch'i hayi'dę́ę́' haalwod,#Acts 7:15. áko hodine'é ahikááhgóó dzizlį́į́'.
Currently Selected:
GENESIS 49: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
