GENESIS 50
50
1Áko Jóseph hazhé'é binii' bik'ijį' jineeshjoolgo jíícha, áádóó dzizts'ǫs. 2Áko Jóseph há nidaal'a'í azee' ádeił'ínígíí, Shizhé'é bik'ídadi'doohdis, bizhdííniid. Áko azee' ádeił'ínígíí Ízrel yik'ídadeezdizgo deisgan; 3éí dízdiin yiską́ąjį' há bihoolyaa, diné daneeznánígíí ákónéelą́ą́' neiłka'jį' dajiłgan. Áko Ííjip dine'é haa daachago tsosts'idiin yiską́.
4Áádóó haa dajichago yoołkááł yę́ędą́ą́' bighá hooshzhiizhgo Jóseph kóníigo Féro bighandóó nidaakaígíí yich'į' haadzíi'go áyidííniid, K'ad ajooba' bee shich'oha'néego shaa nitsídaahkeesdą́ą́', t'áá shǫǫdí, kódadohníigo Féro bich'į' hadadoohdzih, 5Shizhé'é kóníigo Diyin God binááł hashiyííłdzíí', Shoo, dadeestsaał; Kéínan kéyahdi t'áá shí ádá tséní'íígeedgi yóó'áshidíílííł.#Gen. 47:29-31. Éí bąą k'ad, t'áá shǫǫdí, sha'di'ní'aahgo ákǫ́ǫ́ deesháałgo áadi shizhé'é yóó'ádeeshłííł, áádóó índa áádę́ę́' nínáádeeshdááł. 6Áko Féro ádííniid, Nílááh, ákǫ́ǫ́ dínáahgo nizhé'é yóó'ánílééh; Diyin God binááł haniyííłdzí'ígíí bik'ehgo ánílééh. 7Áko Jóseph bizhé'é yóó'íidoolííłgóó dah adii'eezh; Féro bá nidaal'a'í t'áá ałtso, índa bighandóó hastóí danilíinii, índa Ííjip kéyahdóó hastóí danilíinii t'áá ałtso bił ákǫ́ǫ́ jíkai. 8Áádóó Jóseph bighandóó nidaakaígíí t'áá ałtso, índa bik'isóó índa bizhé'é yę́ę bighandóó danilíinii bił jiníná; t'áá hazhó'ó ba'áłchíní ádaałts'ísígíí áádóó dabidibé índa dabibéégashii éí t'áá Góshendi baa ádahayą́. 9Tsindaabąąs bijáád naakiígíí índa łį́į́' bee nida'abaahii bił jiníná, áko t'áá íiyisí t'óó ahojíyóí. 10Áádóó Jórdan tooh nílínígíí biláahdi Átad hoolyéego ha'é'él'ésígi jinínáago ákwe'é t'áá íiyisí yínííł dajílį́įgo yínííł bił t'áá íiyisí dajíícha; Jóseph bizaad k'ehgo tsosts'id yiską́ąjį' dajicha nít'éé'. 11Áko éí kéyahgi kéédahat'íinii, Kéínan dine'é éí Átadgi ha'é'él'ésígi dajichago dahoołtsą́ągo ádadííniid, Díí Ííjip dine'é t'áá íiyisí yínííł danilį́į́ lá; éí bąą Jórdan tooh biláahdi Éíbel-mízreiyim hoosye'. 12Áko haye'ké t'áá ádabizhdííniidígi ádahoolaa, 13háálá haye'ké Kéínan kéyahgóó dahoníłtį́įgo Makpíílah kéyahdi tséníhoodzánígi yóó'ádahoolaa; éí Mámre bich'į'go daahóó'go ákwii yóó'adaho'dilne' doo biniyé Éíbraham éí Het dine'é Íífran tséníhoodzánígíí kéyah t'áá yił yaa nayiisnii'.#Acts 7:16. 14Nít'éé' hazhé'é yóó'ádajiilaadóó bik'ijį' Jóseph áádóó hak'isóó índa t'áá ałtso hazhé'é yóó'ádajilééhgóó hoł yíkaígíí Ííjip kéyahgóó bił níjíkai.
Jóseph bínaaíké yaa jooba'go yich'į' yáłti'
15Áko Jóseph bik'isóó dabizhé'é daaztsą́ągo dayiiłtsą́ągo ádadííniid, Jóseph bich'į' bąąhági ádeiidzaa yę́ę t'áá ałtso biniinaa daats'í nihik'ee didoonihgo k'éénihididoodlííł. 16Áko kódajiníigo Jóseph bich'į' hane' bił ada'jis'a', Nizhé'é t'ah doo daatsaah yę́ędą́ą́' kóníigo haadzíí', dajiníigo 17Jóseph kódabididoohniił, T'áá shǫǫdí, nik'isóó doo ákǫ́ǫ́ ádáát'įįdígíí índa bąąhági ádaadzaaígíí bá yóó'adí'aah, háálá nich'į' bąąhági ádaadzaa, áko nihí k'ad nídaniikąąh, nizhé'é biDiyin God bá nidaal'a'í bąąhági ádáát'įįdígíí bá yóó'adí'aah. Áko Jóseph bich'į' yádajiłti'go Jóseph yícha. 18Áko hak'isóó haa yíkaigo hach'į' daneeshjoolgo ádadííniid, Jó'akon, ná nidaalte' daniidlį́. 19Nidi Jóseph áhodííniid, T'áadoo bik'ee nihił daayé'í. Da' shíísh Diyin God hólónígi sézį́? 20Áko nihí t'éiyá bąąhági át'éego shich'į' tsídasidookééz nít'éé', nidi Diyin God éí yá'át'éehii biniyé yinahaz'ą́; diné lą'í doodzihgo biniyé díí jį́ áhoot'éhígi át'éego áyiilaa. 21Éí bąą k'ad t'áadoo bik'ee nihił daayé'í. Nihí áádóó niha'áłchíní bił niha'astso' doo. Áko bik'íhojiłta'go áádóó baa jijooba'go bich'į' yájíłti'.
Jóseph daaztsą́
22Áádóó Jóseph índa hazhé'é ba'áłchíní bił Ííjip kéyahgi kéédahojit'į́į́ nít'éé', ákohgo Jóseph t'ááłáhídi neeznádiindóó ba'aan neeznáá honááhai. 23Áko Jóseph éí Íífreiyim ba'áłchíní áádóó naakidi nánálígíí jiiłtsą́; Manáseh biye' Méíkir wolyéii ba'áłchíní éí Jóseph náhodiyiiłjéé'. 24Áko Jóseph bik'isóó áyidííniid, Dadeestsaał, nidi Diyin God t'áá aaníí nihaa hodooleełgo díí kéyah bii'dóó Diyin God t'áá bí ádee hadoodzíi'go Éíbraham áádóó Áízak índa Jéíkab kéyah yeidiní'ánígíí yiih nánihidoo'ish. 25Áko Jóseph éí Ízrel dine'é hach'į' hadadidoodzihgo hadadidoo'ááł biniyé ájíní, Diyin God t'áá aaníí nihaa hodooleeł, áádóó kodóó shits'in nídeínóhjáah doo.#Ex. 13:19; Josh. 24:32; Heb. 11:22. 26Áko Jóseph neeznádiindóó ba'aan neeznáá binááhaigo daaztsą́. Áádóó yik'ída'deezdizgo deisgango Ííjip kéyahgi tsits'aa' yiih deistį́.
Currently Selected:
GENESIS 50: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
