JOHN 16
16
1Doo dadidoohgoh da biniyé díí t'áá ałtso bee nihił dahweeshne'. 2Jew dine'é áłah nádleehii bitahdóó bits'ánihidi'doo'nił; t'áá aaníí bich'į' hoolzhish, t'áá háiida nihiisxį́įgo éí Diyin God bá nisis'a' nízin doo. 3Áko díí t'áá ałtso nihaa nidookah, háálá aTaa', doodaii' shí éí doo nihéédahósin da. 4Nidi díí t'áá ałtso bee nihił dahweeshne', áko baa hoolzhiizhgo, bee nihił dahweeshne'ígíí béédadoołnih.
Níłch'i Diyinii binaanish
Hodésáádę́ę́' nihił naashkaigo biniinaa díidíígíí t'áadoo bee nihich'į' haasdzíi' da. 5Nidi k'ad shiníł'a'ii bich'į' nídésdzá, ákondi doo ła', Háájísh díníyá? shidohniih da. 6Nidi díí bee nihich'į' hahásdzíi'go biniinaa, danihijéí biyi'di bąąh danihíni'. 7Azhą́ ákót'ée nidi t'áá aaníígóó nihił hashne': nídésdzáhígíí t'áá íiyisí nihá yá'át'ééh, háálá doo nídésdzáágóó, Áká Análwo'ii doo nihee hodooleeł da; nídésdzáago éí nihaa deesh'aał. 8Áko éí nihaa honíle'go, bąąhági át'éii áádóó ts'ídá t'áá ákogi é'ét'é índa ánihodiyoot'ááł nihokáá' dine'é yaa ákodanízingo íidoolííł: 9bąąhági át'éii yaa ákodanízingo íidoolííł, háálá doo dashoodlą́ągo shaa dadzólíi da; 10ts'ídá t'áá ákogi é'ét'é yaa ákodanízingo íidoolííł, háálá shiTaa' bich'į' déyá, áádóó doo dashooh'į́į da dooleeł; 11ánihodiyoot'ááł yaa ákodanízingo íidoolííł, háálá nahasdzáán binanit'a'í baa náhást'įįdgo bá nihoot'ą́.
12Bee nihich'į' hahideesdzihígíí t'ah lą'í nidi, k'ad éí bik'idadi'doohtį́łígíí doo bídanooł'ą́ą da. 13T'áá áko nidi Níłch'i Diyinii t'áá aaníinii ííshją́ą́ áyoolíiłii nihaa honíle'go, éí t'áá aaníinii t'áá ałtso biyi'góó nihoo'ish doo, háálá doo t'áá bíniik'eh yáłti' da doo, nidi yidiits'a'ígíí éí yaa halne' doo, ádahodooníłígíí ałdó' yee nihił halne' doo. 14Áko éí ayóó ánísht'é áshidoolííł, háálá shíhígíí éí néididooléełgo hazhó'ó yee nihił hodoolnih. 15ATaa' bíhígíí t'áá ałtso shí, éí bąą ádíshní, Shíhígíí néididooléełgo hazhó'ó yee nihił hodoolnih.
Yínííł ił hózhǫ́ nídoodleeł
16T'óó hodíína'go doo dashooh'į́į da doo, áádóó t'áá nááhodoo'na'go náádashooht'į́į doo [háálá aTaa' bich'į' déyá]. 17Áko hódahooł'aahii ła' áda'ahidoo'niid, T'óó hodíína'go doo dashooh'į́į da doo, áádóó, T'óó nááhodoo'na'go náádashooht'į́į doo, índa, Háálá aTaa' bich'į' déyá, jiníigo bee nihich'į' hadzoodzí'ígíishą' ha'át'íí ááhjiní? 18Éí bąą ádadííniid, T'óó hodíína'go jinínígíishą' ha'át'íí ááhjiní? Ááhjinínígíí doo nihił béédahózin da. 19Áko Jesus nidabízhdídóołkiłígíí bił bééhoozingo áhodííniid, T'óó hodíína'go doo dashooh'į́į da doo, áádóó t'óó nááhodoo'na'go náádashooht'į́į doo, dishníigo bee haasdzí'ígíísh bínda'ahídółkid? 20T'áá aaníí, t'áá aaníígóó ánihidishní, Nihí daahchago atínídadinohdleeh doo, nidi nihokáá' dine'é éí bił dahózhǫ́ǫ dooleeł; nihí yínííł nidaahkai doo, nidi yínííł nidaahkaígíí ił hózhǫ́ nídoodleeł. 21Asdzání éí awéé' bídii'nahgo bił honeezgai łeh, háálá azhdoołchííł bílátah dahashzhiizh, nidi t'áá ajiłchíhí hoł honeezgai yę́ę doo bééjílniih da łeh, háálá nahasdzáán bikáa'gi awéé' jishchínígíí bąą hoł hózhǫ́. 22T'áá ákót'éego nihí k'ad yínííł danohłį́, nidi náánihiiłtsą́ągo nihijéí bił nídahodoojǫǫł, áko nihił dahózhónígíí éí diné doo ła'da nihighaididoot'áał da. 23Áko éí beiníłką́ądi doo nidashídídóołkił da. T'áá aaníí, t'áá aaníígóó ánihidishní, T'áá ha'át'íhída aTaa' shízhi' bee bídayínóhkeedgo, nihaididoo'ááł. 24Hoolzhishdę́ę́' kojį' t'ah doo shízhi' bee da'díínóhkeed da; da'díínóhkeedgo nihaa doolyééł, áko nihíni' bíighahgo nihił dahózhǫ́ǫ doo.
Nihokáá' bił nidahazt'i'ii bik'eh déshdlį́į́'
25Díí t'áá ałtso hane' bee ak'idi'dootį́įłii binahjį' nihich'į' hahásdzíí', nidi bich'į' hoolzhish, hane' bee ak'idi'dootį́įłii binahjį' doo nihich'į' hanáádeesdzih da, nidi t'áá bééhózínígo aTaa' bee nihił hodeeshnih. 26Áko éí beiníłką́ądi shízhi' bee da'díínóhkeed doo, áko aTaa' nihá néideeshkąął doo nihidishníi da, 27háálá ayóó'ádashíínóh'nínígíí índa Diyin God bits'ą́ą́dę́ę́' níyáago deinohdlánígíí bąą, aTaa' t'áá Bí ayóó'ánihó'ní. 28ATaa' bits'ą́ą́dę́ę́' dah diiyá, áko nahasdzáán bikáa'jį' níyá, k'ad nahasdzáán bits'ą́ąjį' nihéénísdzáago aTaa' bich'į' nídésdzá.
29Hódahooł'aahii ádahodííniid, K'ad éí t'áá bééhózínígo yáníłti', hane' bee ak'idi'dootį́įłii doo bee yáníłti' da! 30K'ad t'áá ałtsoní nił bééhózingo baa ákodaniidzin, índa diné ła'da nanídééłkid nidi doo bee nich'į' anáhóót'i' da; díí bee Diyin God bits'ą́ą́dę́ę́' yíníyáago deiniidlą́. 31Jesus ánáábidoo'niid, Da' k'adísh da'iinohdlą́? 32Jó'akon, díí bich'į' hoolzhish, t'áá aaníí k'ad baa hoolzhiizh, t'ááłá'í nootínígo danihighangóó taidoohkah, áko shí t'éiyá t'áá sáhí deeshłeeł, ákondi doo t'áá sáhí da, háálá aTaa' shił hólǫ́. 33Shí shee nihił dahózhǫ́ǫ doo biniyé díí t'áá ałtso bee nihich'į' haasdzíí'. Nahasdzáán bikáa'gi nihich'į' nidahwii'náa doo, nidi chánah danohłį́, shí nihokáá' bił nidahazt'i'ii bik'eh déshdlį́į́'.
Currently Selected:
JOHN 16: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
