MATTHEW 17
17
Łahgo ázhnoolningo áho'diilyaa
(Mk. 9:2-13; Lk. 9:28-36)
1Áko hastą́ą́h yiską́ą́dóó bik'ijį' Jesus, éí Peter áádóó James índa bitsilí John ałdó' dziłghą́ą́'góó t'áá sáhí hajizh'eezh. 2Ákohgo t'áá binááł łahgo ázhnoolningo áho'diilyaa, hanii'jį' jį́honaa'éí nahalingo bits'ádi'nílííd silį́į́', ha'éé' łigaigo bee adinídíín nahalin silį́į́'. 3Áádóó jó'akon, Mózes índa Iiláíjah éí Jesus yił ałch'į' yádaałti'go dajiiłtsą́. 4Áko Peter éí Jesus áyidííniid, Bóhólníihii, kwe'é neiikaígíí dooládó' yá'át'éeh da; íinínízin ládą́ą́' kwe'é chaha'oh táa'go nidadii'nił, ła' ni ná, ła' éí Mózes bá, áádóó ła' éí Iiláíjah bá. 5Áko t'ah yájíłti'go jó'akon, k'os bits'ádi'nílíidgo hoł łeeshoogizh, áko biyi'dę́ę́' iinéé' diists'ą́ą'go ání, Díí shiYe' ayóó'óósh'níinii jílį́, t'áá íiyisí hąą shił hózhǫ́;#Gen. 22:2; Ps. 2:7; Is. 42:1; Mt. 3:17; 12:18; Mk. 1:11; Lk. 3:22; 2Pet. 1:17,18. dahwíísółts'ą́ą́'.#Deut. 18:15. 6Hódahooł'aahii díí deidiizts'ą́ą'go, tsé'yaa aníídee'go t'áá íiyisí nídaasdzíidgo bił dahodííyįįd. 7Áko Jesus hach'į' dah diiyáago hohidilchíidgo áháłní, Nídoohjeeh, t'áadoo nídaałdzidí. 8Áko dazhdéé'į́į́', nít'éé' t'áadoo diné ła' dajiiłtsání da, t'áá hazhó'ó Jesus t'éiyá.
9Áko dziłghą́ą́'dę́ę́' hadah níjookahgo Jesus kót'éego hach'į' haadzíí', Nihił ádzaaígíí diné ła'da t'ááká bee bił dahoołne' yíila', Diné Silį́į'ii daaztsą́ą́dę́ę́' náádiidzáago índa. 10Áko hódahooł'aahii kódaaníigo nidahódééłkid, Ákoshą' ha'át'íí biniyé bee haz'áanii yínda'niłtinii éí Iiláíjah áłtsé doogááł daaní?#Mal. 4:5. 11Nít'éé' ánáábizhdoo'niid, Iiláíjah t'áá aaníí áłtsé doogáałgo t'áá ałtsoní hasht'éidoodlííł, 12nidi shí ánihidishní, Iiláíjah t'áá íídą́ą́' níyá,#Mt. 11:14. nidi t'áadoo yéédahoosįįd da, áko t'áá bídanízinígi ádayííł'įįd. T'áá ákót'éego ałdó' Diné Silį́į'ii atídeidoolííł. 13Áko índa John Tó Yee Asį́įhii baa yájíłti'go ídahooł'aahii ak'ida'diitą́.
Jesus éí ashkii níłch'i bi'iiníziinii bii' hólóonii hadaałt'é ánáyiidlaa
(Mk. 9:14-29; Lk. 9:37-43)
14Áko diné yíl'áhígíí baa níjíkaigo diné léi' haa níyá, áádóó kóníigo hach'į' nitsidinígo', 15Bóhólníihii, shiye' baa jiiníbaah, háálá tsi'nídídááh, áko t'áá íiyisí ti'náhoo'nih; jó, t'áá ahą́ą́h tsídza nágoh, áádóó t'áá ahą́ą́h taah nágoh. 16Áko nídahooł'aahii bił baa ní'áazhgo, náádeidiiłáahgo ch'ééh ádayííł'įįd. 17Áko Jesus haadzíi'go áhodííniid, Doo da'iinohdláanii índa diné bízhą́ da'ílį́įgo ahoolchíiłii danohłíinii, haash nízáagi nihił honishłǫ́ǫ doo? Haash nízáagi nihich'į' ha'ííníshníi dooleeł? Níláhdę́ę́' hoł shaa nohkááh. 18Áko Jesus éí níłch'i bi'iiníziinii yideezteh, áko ashkii yiyi'dę́ę́' hahóóle'go t'áá áko ashkii náábi'diilzá. 19Nít'éé' ídahooł'aahii éí Jesus t'áá sáhí yaa yíkaigo ádeidííniid, Hait'éegoshą' nihí hadaniilchéehgo ch'ééh ádeiil'įįd? 20Áko ábijiní, T'įįhdígo nihe'oodlą' bee aa dadzíínóhłíhígíí lá biniinaa ni. Háálá t'áá aaníígóó ánihidishní, Nihe'oodlą' éí ch'il mástad wolyéhígíí bílástsii'gi áníshéii nidi, díí dził si'ánígíí, Kodóó hidí'nááh áádóó níléidi ninílts'ííd, bidooniidgo hidoo'nááł,#Mt. 21:21; Mk. 11:23; 1Cor. 13:2. áko t'áá ałtsoní doo ch'ééh ádaał'į́į da doo. 21[Nidi sohodizingo áádóó hodílzingo doo adą́ą́góó t'éiyá níłch'i bida'iiníziinii kódaat'éhígíí hadínóolkał.]
Jesus bidi'yoolyéłígíí yaa nááhálne'
(Mk. 9:30-32; Lk. 9:43-45)
22Áko Gáliliigi nidzíiztą́ągo Jesus áhodííniid, Diné Silį́į'ii diné bílák'eejį' ninádidoot'áałgo, 23dabidiyoołhééł, áádóó tágí jį́ aleeh góne' náábidi'doodlááł. Áko t'áá íiyisí bąąh daháni'.
Kin bii' sohodizin béeso bá nandeehgo nahalyéii
24Áádóó Kapérniyamgi jíkaigo, kin bii' sohodizin bá béeso ahindéhígíí áłah áńdayiil'įįhii Peter yaa yíkaigo ádeidííniid, Da' Jesus nanihinitiníísh kin bii' sohodizin bá béeso ahindéhígíí nayiilé?#Ex. 30:13; 38:26. 25Áko, Aoo', jidííniid. Áádóó hooghandi nídzídzáago, t'áadoo hadzidziihí Jesus hach'į' haadzíi'go áháłní, Sáíman, díí haa yinízingo baa nitsíníkees? Nahasdzáán bikáá'góó aláahgo naat'áanii danilínígíishą' háí tax bich'į' nidayiilé? Bidine'é daats'í, éí doodago dé'éyóní daats'í? 26Peter t'ą́ą́' hanáádzíi'go ání, Dé'éyóní lą́ą. Jesus ábidííniid, Éí lá bąą bidine'é doo bidahodiit'i' da ni. 27Ákondi doo ákǫ́ǫ́ át'éii doo yee nihaa nídadóot'įįłígíí biniyé be'ek'idgóó dínááh, áádóó áadi łóó' bee hahadleehí taah dííłdił, áko łóó' áłtsé háínílo'ígíí bizéé' ąą íinilaago béeso, shékel wolyéhígíí, bizéé' si'ą́ą doo; éí dah didíí'áałgo bee shá índa t'áá ni ádá ni'díílééł.
Currently Selected:
MATTHEW 17: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
