MATTHEW 18
18
Háishą' aláahdi ayóó át'éii nilį́?
(Mk. 9:33-37; Lk. 9:46-48)
1Íídą́ą́' Jesus bídahooł'aahii baa yíkaigo ádabidííniid, Háishą' yá'ąąshii bee bóhólníihgo bił haz'áanii biyi'di aláahdi ayóó át'éii nilį́?#Lk. 22:24. 2Nít'éé' áłchíní yázhí ła' hágo bizhdííniidgo, biníi'gi bidziisį', 3áko ájíní, T'áá aaníígóó ánihidishní, Doo łahgo át'éego dahinohnáágóó índa doo áłchínígi át'éego ída'doołyaagóó, yá'ąąshii bee bóhólníihgo bił haz'áanii ts'ídá doo biih dadoohkah da.#Mk. 10:15; Lk. 18:17. 4Éí bąą t'áá háiida díí áłchíní yázhígi át'éego a'ohgo ádaa nitsídzíkeesígíí, éí yá'ąąshii bee bóhólníihgo bił haz'áanii biyi'di aláahgo ayóó át'éii jílį́. 5T'áá háiida áłchíní yázhí kót'éhígíí ła' shízhi' bee bich'į' k'éznídzinígíí, éí shí shich'į' k'éznídzin.
Bąąhági át'į́ ájiilaaígíí
(Mk. 9:42-48; Lk. 17:1,2)
6T'áá háiida díí áłchínígi át'éego a'ohgo ádaa nitsídaakeesgo dashoodlánígíí ła'da bąąhági át'į́ ájiilaaígíí, t'áá hó tsé daashjéé' nitsaii hazéédéet'ą́ągo, tónteel bii' táłtł'ááh ho'dool'ééljí há yá'át'éeh doo nít'éé'. 7Nihokáá' dine'é biniinaa bąąhági áhodooníiłgo na'íhontaah nihwiileehii doo bá hojooba' ájíníi da! Na'íhontaah ts'ídá t'áádóo nídí áánííł, nidi hats'ą́ą́dóó áhooníiłii atihíláane'go há haz'ą́! 8Áko níla' éí doodaii' nikee' bee bąąhági ánít'į́ ánóhsingo, éí k'ínígéeshgo yóó'ahíłhan,#18:8 Díí ts'ídá t'áadoo ni'iyísíhí, níigo ání. nits'íís łahgo ádin nidi, éí doodaii' na'níłhod nidi iiná biih yíníyáájígo doo ná yá'át'éeh da, nidi níla' t'áá ałch'ijígo áádóó nikee' t'áá ałch'ijígo hool'áágóó hodook'ą́ąłjį' andi'yoolghą́ą́łjí agháago doo ná yá'át'éeh da.#Mt. 5:30. 9Áádóó nináá' éí bąąhági ánít'į́ ánóhsingo, éí hani'aahgo yóó'ahíłhan; nináá' t'ááłá'í nidi iiná biih yíníyáájígo doo ná yá'át'éeh da, nidi nináá' t'áá ałch'ijígo hool'áágóó kǫ' bii' ti'hoo'nííh bił haz'ą́ąjį' andi'yoolghą́ą́łjí agháago doo ná yá'át'éeh da.#Mt. 5:29.
Dibé yóó'ííyáii binahjį' hane' bee ak'idi'dootį́įłii
(Lk. 15:3-7)
10Díí áłchínígi át'éego a'ohgo ádaat'éii ła' dajiinohłáa dooleełgi bits'ąą ádaa ádahołyą́, háálá ánihidishní, Éí diyingo nidaal'a'í baa ádahalyáanii#18:10 Diyingo nidaal'a'í baa ádahalyáanii daaníigo diné t'ááłá'í danítínígo bidiyingo nidaal'a'í dahólǫ́, deinízin nít'éé'. yá'ąąshdi dahólǫ́, éí t'áá áłahjį' shiTaa' yá'ąąshdi hólóonii yił da'ahiníl'į́. 11[Háálá Diné Silį́į'ii yóó'adahaaskaígíí yisdéidiyoonił yiniyé níyá.]#Lk. 19:10. 12Haash yit'éego baa nitsídaahkees? Diné ła' dibé neeznádiin bilį́į́', nít'éé' ła' yóó'ííyáago, da' doósh náhást'édiindóó ba'aan náhást'éígíí dah daask'idjį' yi'doo łnihgo yóó'ííyáhígíí haidínóotaał da? 13T'áá aaníígóó ánihidishní, Nínéidiiłtį́įgo éí náhást'édiindóó ba'aan náhást'éígíí t'áadoo yóó'adahaaskaígíí biláahdi át'éego yóó'ííyáhígíí nínéidiiłtį́įgo yaa bił hózhǫ́ǫ doo. 14T'áá ákót'éego nihiTaa' yá'ąąshdi hólóonii díí áłchínígi át'éego a'ohgo ádaat'éii doo ła' ádoodįįł da nízin.
Ak'is ach'į' bąąhági ádzaii
15Áádóó nik'is nich'į' bąąhági ádzaago, baa díínáałgo, yee nich'į' ádąąh dah hast'ánígíí t'áá sáhí bił ch'ídíí'ááł. Áko nidiizts'ą́ą́' ládą́ą́' nik'is k'é nándoo'niid doo. #Lk. 17:3. 16Nidi doo níists'ą́ą́'góó diné t'ááłá'ígo, doodaii' naakigo ákǫ́ǫ́ bił dííkah, áko oo'íinii naakida, táa'da hadahadziihígíí binahjį'#Deut. 19:15. saad t'ááłá'í ní'ánígo há hasht'éédeidoodlííł. 17Áádóó éí doo nááyiyíists'ą́ą́'góó da'oodlání áłah nádleehígíí bił ch'ínáádíít'ááł, áko áłah nádleehígíí ałdó' doo nááyiyíists'ą́ą́'góó, bíni'dii doo Jew dine'é danilíinii ła' índa tax nahalyéhígíí yiniyé naazdáii ła' át'į́įgo bee baa nitsíníkees doo.
Be'estł'ǫ́ǫgo áádóó k'éé'oot'ahgo
18T'áá aaníí ánihidishní, Ha'át'íida nahasdzáán bikáa'gi bee a'di'noo'ánígíí, t'áá éí yá'ąąshdi bee a'deet'ą́ą doo, áádóó ha'át'íida nahasdzáán bikáa'gi doo bee a'di'noo'ánígíí, t'áá éí yá'ąąshdi ałdó' doo bee a'deet'ą́ą da dooleeł.#Mt. 16:19; Jn. 20:23. 19Áádóó ánáánihidish'ní, Nahasdzáán bikáa'gi nihitahgi nidinołt'éego ha'át'íida bee aha'di'nooht'ą́ągo yínóhkeedígíí, shiTaa' yá'ąąshdi hólóonii nihá yi'doolííł. 20Háálá t'áá azlį́į'gi naaki éí doodaii' táa'da shízhi' yee ahíikaigo, ákwe'é biníi'gi honishłǫ́.
Naal'a'í doo jooba'ii baa hane' bee ak'idi'dootį́įłii
21Ákohgo Peter hach'į' dah diiyáago áháłní, Bóhólníihii, shik'is shich'į' bąąhági ánát'įįhgoshą' díkwíidi bá yóó'anídideesh'áałgo doo bik'ijį' séł'ą́ą da doo? T'áá daats'í tsosts'idídi? 22Áko Jesus áháłní, T'áá tsosts'idídi éí doo nidishníi da, nidi tsosts'idiin tsosts'idi ahą́ą́h nániiláago.#Gen. 4:24; Lk. 17:3,4.
23Éí bąą yá'ąąshii bee bóhólníihgo bił haz'áanii díí bił ahąąh naa'nilgo baa nitsáhákees: éí aláahgo naat'áanii léi' bá nidaal'a'í yąąh hadeis'áago éí bá niná'doolyééł biniyé bá yídéeshtah niizį́į́'. 24Áko yá yi'ííníiłta'go neeznáadi mííl tálent#18:24 Béeso tálent wolyéhígíí t'ááłáhídi mííl béeso daats'í bíighahgo óolyé. bąąh háá'áhígíí bich'į' niidlóóz, 25nít'éé' doo niná'ódlééł át'éégóó biniinaa binanit'a'í kót'éego bá haadzíí', Hwe'asdzą́ą́ áádóó ha'áłchíní índa hwee hólónígíí t'áá ałtso t'áá bił nahodi'yoonih, áko éí bee niná'doolyééł. 26Nít'éé' naal'a'í nitsidinígo'go binanit'a'í náyookąąhgo ííłní, Shinanit'a'í, ha'íínílní, t'áadoo tsį́į́ł shíł'íní, t'áá ná niná'deeshdléełgo át'é. 27Áko naal'a'í éí binanit'a'í bik'édí silį́į'go bąąh hayííł'áhígíí t'óó yik'i adeezogo béidííchid. 28Nidi t'áá éí naal'a'í ch'íníyáago yił nidaal'a'ígíí ła' neeznádiin denériyas#18:28 Denériyas ła'a jį́įjį' nidaalnishgo nídayííłbįįh nít'éé'. yąąh hayííł'áhígíí yik'íníyá, áko éí yisiłgo kóníigo yizák'íidiiníihgo yaa nídiidzá, Nąąh hááł'áhígíí shá niná'nídlé, yiłní. 29Áko éí nitsidinígo'go nábooskango ábíłní, Ha'íínílní, t'áadoo tsį́į́ł shíł'íní, t'áá ná niná'deeshdléełgo át'é. 30Nidi t'áadoo íiniizį́į' da. Hąąh háá'áhígíí niná'jídláajį' t'óó yah ahóółt'e'. 31Áko yił nidaal'a'í áhóót'įįdígíí dayiiłtsą́ągo t'áá íiyisí yik'ee bíni' dei'a', áko binanit'a'í yaa yíkaigo t'áá át'é yee yił dahoolne'. 32Nít'éé' hananit'a'í hágo nááhodoo'niidgo áháłní, Naal'a'í doo yá'áníshóonii, ni nąąh háá'áhígíí baa náshiisíníkango t'óó ná bik'i'adízoh; 33da' doósh naa jiiséba' yę́ęgi át'éego ni ałdó' bił nidanil'a'ígíí baa jiidííbaał nít'éé'? 34Áko binanit'a'í báhóóchįįdgo hąąh háá'áhígíí ałtso niná'jídláajį' yah ada'iiníiłii yaa hodíní'ą́. 35T'áá éí bik'ehgo t'ááłá'í nootínígo nihik'is nihich'į' bąąhági ádaat'į́įgo nihijéí tł'ááhdę́ę́' doo t'áá aaníí bá yóó'anídahidoh'aahgóó, shiTaa' yá'ąąshdi hólóonii ałdó' t'áá ákónihił'į́į doo.
Currently Selected:
MATTHEW 18: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
