MATTHEW 19
19
Jesus ałts'á'iildééh yeinít'į́
(Mk. 10:1-12)
1Jesus díí saad ałtso bee hadziisdzíi'go, Gálilii kéyahdóó dashdiiyáago Jórdan tooh wónaanídi Judíya nahós'a'di jiníyá; 2áadi diné t'óó ahayóí hakéé' nánísą́ągo, ákwe'é nááhizdiisá.
3Nít'éé' Férisii danilíinii ła' haa yíkaigo hákada'iiłhilgo nidahódééłkidgo ádaaní, Da' dinéésh t'áá azlį́'ígíí biniinaa be'asdzą́ą́ yóó'iidoołt'eełgo t'áá bee haz'ą́? 4Áko bich'į' hadzoodzíi'go ábijiní, Da' díísh t'ah doo dayínółta' da? Hodeeyáádą́ą́' diné áyiilaii éí biką'ii índa bi'áadii áyiilaago#Gen. 1:27; 5:2. 5ádííniid,
Éí bąą diné jílíinii éí hazhé'é
índa hamá bits'ą́ą́' dashdidoogáałgo,
hwe'asdzą́ą́ t'éiyá bił jiináa doo,
áko nizhdilt'éhígíí ats'íís t'ááłá'í jidooleeł.#Gen. 2:24.
6Áko éí áádóó doo t'áá ał'ąą da, nidi ats'íís t'ááłá'í jileeh. Éí bąą Diyin God ahiidiinilii éí diné doo ałts'áidoonił da. 7Nít'éé' ádahałní, Ákoshą' ha'át'íí biniyé Mózes éí naaltsoos bik'ehgo ałts'á'doot'ashígíí hadilyaago, índa ła'da hwe'asdzą́ą́ yóó'azhdidoo'ááł níigo yee has'ą́ą́ nít'éé'?#Deut. 24:1-4; Mt. 5:31. 8Áko ábijiní, Nihijéí doo binídahaz'áhígíí biniinaa niheda'asdzą́ą́ yóó'adahidoh'aahgo Mózes t'áá yee nihá has'ą́ą́ nít'éé', nidi hodeeyáádę́ę́' éí doo ákót'ée da nít'éé'. 9Áádóó ánihidishní, T'áá háiida hwe'asdzą́ą́ doo adiléégóó yóó'azhdíí'ą́ągo, áádóó náánáła' asdzání bá náá'dzísgehgo, éí azhdííláago át'é#Mt. 5:32; 1Cor. 7:10,11. [índa t'áá háiida asdzání yóó'abi'doot'ánígíí bá'dzízyehii, éí ałdó' azhdíílá].
10Áko hódahooł'aahii ádahałní, Diné áádóó be'asdzą́ą́ yił ałch'į' ákót'éego t'áadoo asgehjígo la' yá'át'ééh lá. 11Nidi ábizhdííniid, Diné t'áá ałtso díí kóhá'nínígíí doo deidoots'ą́ą́' át'ée da, nidi t'áá baa dadeest'ánígíí t'éiyá. 12Háálá diné ła' doo da'dooyehgóó nidabi'diizhchį́, áádóó ła' doo da'dooyehgóó diné ádabiilaa, índa ła' yá'ąąshii bee bóhólníihgo bił haz'áanii biniyé doo da'dooyeh da. T'áá háiida ákójínéehgo bízhneel'ánígíí, háni'dii éí ákójínééh.
Jesus éí áłchíní yázhí yik'ijidlí
(Mk. 10:13-16; Lk. 18:15-17)
13Nít'éé' áłchíní yázhí ła' bik'i dah dahizhdidoolnih áádóó bá sozdidoolzįįł biniyé haa dayii'éésh. Nít'éé' hódahooł'aahii éí deideezteh. 14Nidi Jesus ázhdííniid, Bíni'dii áłchíní shaa hakááh, t'áadoo shich'į' nidanoh'iní, háálá ákódaat'éhígíí yá'ąąshii bee bóhólníihgo bił haz'áanii bíí' ádaat'é. 15Áko bik'i dah dahizdeesnii'go, índa dashdiiyá.
Dinééh at'íinii
(Mk. 10:17-31; Lk. 18:18-30)
16Nít'éé' jó'akon, dinééh ła' haa níyáago áhodííniid, Na'nitiní, ha'át'íí yá'át'éehii shį́įshą' baa niséyáago iiná doo ninít'i'ii shee hodooleeł? 17Áko ábizhdííniid, Ha'át'íishą' biniyé ha'át'íida yá'át'éehii bínashídíłkid? T'áadoo yá'át'éhí da. Diyin God t'éiyá yá'át'éehii nilį́. Iiná biih deeshááł nínízingo, Diyin God yee has'áanii bik'eh honíł'į́. 18Áko dinééh áhodííniid, Háidíígíishą' ááhdiní? Áko Jesus ánááhodoo'niid, Diné ts'ídá doo diyííłhéeł da,#Ex. 20:13; Deut. 5:17. Ts'ídá doo adidííléeł da,#Ex. 20:14; Deut. 5:18. Ts'ídá doo adíníí'į́įł da,#Ex. 20:15; Deut. 5:19. Doo t'áá ádzaagóó hólne'í da,#Ex. 20:16; Deut. 5:20. 19Nizhé'é índa nimá nił nilį́įgo íínísin,#Ex. 20:12; Deut. 5:16. áádóó, T'áá ni ádíí'ní'nínígi át'éego bił kééhót'íinii ayóó'ííní'ní.#Lev. 19:18. 20Nít'éé' dinééh áháłní, Eiidí lá t'áá ałtso bik'eh honish'į́įgo hoolzhiizh; ha'át'éegishą' t'ahdii shich'į' anáhóót'i'? 21Jesus ábidííniid, Ts'ídá t'áá ákogi ánísht'ée doo nínízingo, nílááh nídídáahgo nee hólónígíí t'áá ałtso naa nahóniihgo, bee shóisíníłt'e'ígíí badahojoobá'íígíí bitaa díínih, áko yá'ąąshdi naalye'é ílíinii nee hólǫ́ǫ dooleeł, ákohgo índa dah diináahgo shikéé' yínááł. 22Nidi dinééh éidíígíí yidiizts'ą́ą'go, t'áá íiyisí yąąh bíni'go dah diiyá, háálá t'áá íiyisí at'į́.
23Áko Jesus éí hódahooł'aahii ábizhdííniid, T'áá aaníígóó ánihidishní, Diné at'íinii yá'ąąshii bee bóhólníihgo bił haz'áanii yiih doogáłígíí bá niłdzil. 24Áádóó ánáánihidish'ní, Ghą́ą́'ask'idii tsah bighá'ált'ih góne' ch'ídoogáałgo doo bá bohónéedzą́ą da, nidi diné ajit'íinii Diyin God bee bóhólníihgo bił haz'áanii biishdoogáłígi agháago doo há bohónéedzą́ą da. 25Áko hódahooł'aahii éidíígíí deidiizts'ą́ą'go t'áá íiyisí t'óó bił adahayóigo ádaaní, Ákoshą' háí yisdádooltééł? 26Nidi Jesus honíł'į́įgo áháłní, Éí diné ts'ídá t'áadoo bee bá bohónéedzą́ą da, nidi Diyin God t'áá ałtsoní bee bá bohónéedzą́. 27Nít'éé' Peter hanáánáádzíi'go áhodííniid, Jó, nihí nihee dahólǫ́ǫ́ nít'é'ígíí ałtso bits'ą́ą́' dah dahidiikaigo, nikéé' dayíníikááh. Ákoshą' ha'át'íí nihíí' dadooleeł? 28Jesus áhodííniid, T'áá aaníígóó ánihidishní, Nihí shikéé' dah dahidoohkaígíí, łahgo náhodeesdzáadi Diné Silį́į'ii bibikáá'dóó nahat'áii bits'ádi'nílíidii yikáá'dóó dah neezdáago,#Mt. 25:31. nihí ałdó' bikáá'dóó nidahat'áii naakits'áadahgo bikáá'dóó dah nisoodáago, Ízrel dine'é naakits'áadahgo bindanoht'áa doo.#Lk. 22:30. 29Áko t'ááłá'í jinítínígo dahakin nít'ée'ii, doodaii' hak'isóó, doodaii' halahkéí, doodaii' hazhé'é, doodaii' hamá, [doodaii' hwe'asdzą́ą́,] doodaii' ha'áłchíní, doodaii' dahakéyahda shízhi' biniinaa bits'ą́ą́' dah dahizhdiikaii, éí hwee dahólǫ́ǫ́ nít'é'ígíí neeznádiindi ahą́ą́h nániiláago haa nídoolyééł, índa iiná doo ninít'i'ii hwee hodooleeł. 30Nidi lą'í da'alą́ąjį'ígíí éí da'akéédę́ę' doo, índa da'akéédę́'ígíí da'alą́ąjį' doo.#Mt. 20:16; Lk. 13:30.
Currently Selected:
MATTHEW 19: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
