MATTHEW 20
20
Ch'il na'atł'o'ii bitahgóó nidaalnishí
1Jó, yá'ąąshii bee bóhólníihgo bił haz'áanii, éí díí nahalin: diné léi' kéyah bił haz'ą́ągi bee bóhólníihii bich'il na'atł'o'ii bitahgóó bá nidadoolnishii ła' t'ah abínídą́ą́' yíká dah diiyá. 2Nidaalnishí éí denériyas#20:2 Denériyas ła'a jį́įjį' nidaalnishgo nídayííłbįįh nít'éé'. ła'a jį́ yik'é nidaalnish doogo yił ahada'deest'ą́ą́dóó bik'ijį', bich'il na'atł'o'ii yitahjį' yi'níłnii'. 3Áádóó náhást'éigi daats'í oolkiłgo ch'ínáánádzá, nít'éé' nida'iiniih bá haz'ą́ągi náánáła' t'áadoo yaa nidaakaígóó t'óó nidaazį'go nááyiyiiłtsą́, 4áko áyidííniid, Nihí ałdó' nihílááh, shich'il na'atł'o'ii bitahgóó dadohkááh, áko t'áá néhébįįhígi át'éego ts'ídá t'áá ákwii át'éego nihich' į' nidi'yeeshłééł. Áko ákǫ́ǫ́ dah diikai. 5Áádóó ałní'ní'ą́ągo daats'í áádóó bik'ijį' táadi daats'í aleehgo ch'ínáánádzáago t'áá ákónáánádzaa. 6Áádóó ashdla'ígi daats'í oolkiłgo ch'ínáánádzá, nít'éé' náánáła' t'óó nináádaazį'go yik'ínáánádzá, áko ííłní, Ha' át'íishą' biniyé kwe'é shá bíighah t'áadoo baa nidaahkaígóó t'óó nidaahsį'? 7Nít'éé' ádahałní, Jó, diné doo ła' shá nidaałnish nihiłníi da. Áko ánéidoo'niid, Nihí ałdó' nihílááh, shich'il na'atł'o'ii bitahgóó dadohkááh [áko t'áá néhébįįhígi át'éego ts'ídá t'áá ákwii át'éego nihich'į' nidi'yoolyééł]. 8Áádóó i'íí'ą́ągo, ch'il na'atł'o'ii bee bóhólníihii éí bik'ehgo na'anishígíí ííłní, Nidaalnishí hágo bidiní, áádóó bich'į' nidi'yíílééł,#Lev. 19:13; Deut. 24:15. akée'di dadeeshnishígíí éí áłtsé, índa áłtsé dadeeshnishígíí éí akéédę́ę́'. 9Áko ashdla'ígi daats'í oolkiłgo naanish baa dadeest'ánígíí yíkaigo, t'ááłá'í nítínígo denériyas t'ááłá'í bich'į' nidahaasya'. 10Áko áłtsé dadeeshnishígíí neheeskaigo, éí aláahgo nihich'į' nidadoolyééł danízin, nít'éé' éí ałdó' t'ááłá'í nítínígo denériyas t'ááłá'í bich'į' nináádahaasya'. 11Áko nídeidiinilgo kéyah bee bóhólníihii yich'į' saad dahółǫ́ǫgo, 12ádaaní, Díí akée'di dadeeshnishgo t'ááłáhídi ahéé'ílkidjį' nidaashnishígíí t'áá nihik'ehgo bich'į' nida'iisya', nidi nihí t'éiyá shá bíighah hadoh bééda'ii'níihgo dayíníilníishgo i'íí'ą́. 13Áko ła' yich'į' haadzíi'go áyidííniid, Kwá'ásiní, da' doósh ákǫ́ǫ́ ániishłaa da? Shą́ą́', denériyas t'ááłá'ígo bee aha'di'niit'ą́ą ni'. 14Éí bąą yisíníłbánígíí nídii'aahgo nílááh yínááł; díí akée'diígíí t'áá nigi át'éego bich'į' ni'deeshłééłjí nisin. 15Da' shinaalye'éésh doo t'áá shí nisinígi ádeeshłíiłgo bee shá haz'ą́ą da? Da' shił hadlee'ígíísh biniinaa iiníłch'į́į́d? 16Éí bąą da'akéédę́'ígíí éí da'alą́ąjį' doo, índa da'alą́ąjį'ígíí éí da'akéédę́ę' doo.#Mt. 19:30; Mk. 10:31; Lk. 13:30. [Háálá lą'í bíká ádahodoo'niid, nidi t'áá díkwíí nídahaasdláá'.]
Jesus bidi'yoolyéłígíí yaa nááhálne'
(Mk. 10:32-34; Lk. 18:31-34)
17Nít'éé' Jesus éí Jerúsalem góde joogáałgo, naakits'áadahgo hódahooł'aahígíí bił ats'ádzískai, áko jookahgóó ábizhdííniid, 18Jó'akon, Jerúsalem góde deekai, áko Diné Silį́į'ii aláahgo nááda'iiłniihii índa bee haz'áanii yínda'niłtinii baa hodi'doot'ááł, áádóó éí hodi'yoolyéełjį' há nidahodoo'ááł, 19índa doo Jew dine'é danilíinii yaa dahodidoo'ááł, áko éí há nidahodoołt'ih áádóó nahóda'doołtsxis índa tsin ałnáoszid bikáa'jį' hoł ida'doołkał, índa tágí jį́ aleeh góne' dadziztsą́ą́dę́ę́' nááhodi'doodlááł.
James áádóó John adííkeed
(Mk. 10:35-45)
20Nít'éé' Zébedii biye'ké bimá yił haa yíkaigo t'áadoo le'é yíídóokił biniyé Jesus yich'į' nitsidinígo'. 21Áko Jesus áhodííniid, Ha'át'íishą' nínízin? Nít'éé' ábijiní, Díí shiyáázh nidilt'éego bee nóhólníihgo bił haz'áanii biyi'di, ła' ninish'náájí dah sidáa doogo índa ła' éí ninishtł'ají dah sidáa doogo bee bá handziih. 22Nidi Jesus haadzíi'go ashiiké áyidííniid, Yínóhkeedígíí doo nihił bééhózingóó ádóhní. Deeshdlį́įłgo sheíkáanii daats'í doohdlį́įłgo bínooł'ą́? [Áádóó bee shidi'doolzįhii daats'í bee nihidi'doolzįhgo bínooł'ą́?] Áko, Bíniil'ą́ą́ lą́ą, hodííniid. 23Áko ábijiní, Sheíkáanii lá t'áá aaníí doohdlį́į́ł ni, [áádóó bee shidi'doolzįhii lá bee nihidi'doolzįh ni,] nidi ła' shinish'náájí áádóó ła' shinishtł'ají dah soodáa dooleełígíí shí a'dideesh'áałgo doo bee shóhólníih da, nidi shiTaa' há hasht'eyiilaaígíí éí yee a'didoo'ááł. 24Áko neeznált'éhígíí éí deidiizts'ą́ą'go, t'áá ła' háá'ázhígíí yich'į' doo bił dahóózhǫǫd da. 25Nidi t'áá ádzíłtso Jesus hágo hodííniidgo áháłní, Nihił béédahózingo doo Jew dine'é danilíinii bindanit'a'í ayóogo ádídahólníihgo yindant'áa łeh, áko bitahgóó t'áá bí bidine'é ayóó ádaat'éii ída'niłkadgo bee bídahólnííh. 26Nidi nihí nihitahgóó éí doo ákót'ée da dooleeł,#Lk. 22:25,26. nidi t'áá háiida nihitahgóó ayóó át'éii deeshłeeł jinízinígíí éí nihá nijil'a' doo, 27áádóó t'áá háiida nihitahgóó shí alą́ąjį' dooleeł jinízinígíí éí nihinaalte' jílį́į doo:#Mt. 23:11; Mk. 9:35; Lk. 22:26. 28t'áá Diné Silį́į'ii doo bá na'al'a' da, nidi á naal'a' doo, índa be'iina' ninéidiní'ą́ągo daaztsánígíí yee lą'í ninéidiyoołnih yiniyé níyá.
Jesus éí diné doo oo'íinii nidilt'éego oo'į́ áyiilaa
(Mk. 10:46-52; Lk. 18:35-43)
29Áko Jérikodóó ch'íjíkaigo, diné ayóó át'é yíl'áhígíí hakéé' dah nídiizą́. 30Áádóó jó'akon, diné naaki doo oo'į́į́góó atiin bąąhgi sikéé lá, áko aadę́ę́' Jesus yigááł ha'níigo yidiizts'ą́ą'go kóníigo hadoolghaazh, Bóhólníihii, David biYe' nílíinii, nihaa jiiníbaah! 31Áko diné yíl'áhígíí, T'áadoo ádóhníní, dahałníigo hach'adahashké, nidi t'óó nówehda hanáázhdoolghaazhgo ájíní, Bóhólníihii, David biYe' nílíinii, nihaa jiiníbaah! 32Áko Jesus t'áá ákǫ́ǫ́ yiizį'go, hágo hodííniidgo áháłní, Ha'át'íí nihá baa nideeshaał shíínóh'ní? 33Áko ábijiní, Bóhólníihii, nihináá' bee iit'į́įgo ánihílééh. 34Áko Jesus haa a'ááh niizį́į'go hanáá' yideelchid, áko t'áá áko ajoo'į́ dzizlį́į́', áádóó bikéé' dashdii'áázh.
Currently Selected:
MATTHEW 20: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
