MARK 2
2
Jesus éí diné bitah doo nahwii'náanii néidiisá
(Mt. 9:1-8; Lk. 5:17-26)
1T'áá díkwíida yiską́ągo Kapérniyamgi náádzídzá, áko hooghangi dzizdá ha'níigo dadideezdláád. 2T'óó ahayóí áłah silį́į'go ch'é'étiinjį' nidi doo hoo'a' da, áko Diyin God bizaad bee bił hojoolne'. 3Nít'éé' diné dį́lt'éego diné bitah doo nahwii'náa da léi' hach'į' dayíłtsóós. 4Áko hach'ą́ą́h dáázhdeel'áago doo hach'į' ajókááh át'éégóó biniinaa Jesus éí kin biyi' góne' sidáagi bighą́ą́'dę́ę́' ąą dazdeeznilgo#2:4 Hooghan bikáa'gi éí tsin áádóó hashtł'ish bee ádaalyaa, áko bighá'í'nííł doo nantł'a da nít'éé'. diné bitah doo nahwii'náa daígíí bik'i antéhí t'áá bee Jesus bidáahjį' hadah adahodzizlo'. 5Áko bida'oodlą' yee aa dadzólíii jiiłtsą́ągo diné bitah doo nahwii'nánígíí ábizhdííniid, Shiye', ádił ni'iyínílzí'ígíí ná yóó'adoot'ą́. 6Áko nít'éé' bee haz'áanii yínda'niłtinii ła' ákwii nidaháaztą́ągo t'áá dabiyi'ídi t'óó bił daahaadago nitsídaakees, 7Ha'át'éegoshą' díí diné ákóní? Diyin God í'díl'į́! Háishą' t'éiyá ádił ni'iidzííh á yóó'iidii'aah? Diyin God t'áá bí t'éiyá. 8T'áá áko t'áá dabiyi'ídi ákót'éego nida'ídíłkidígíí Jesus hoł bééhoozingo ábijiní, Ha'át'éegoshą' t'áá danihijéí biyi'ídi t'óó nihił daahaadago díidíígíí baa nitsídaahkees? 9Háidíígíishą' doo nantł'agóó díí diné bitah doo nahwii'nánígíí bich'į' bee ha'doodzih, Ádił ni'iyínílzí'ígíí ná yóó'adoot'ą́, ha'nííjí daats'í, éí doodago, Nídii'néehgo bik'i nítéhí nídiiłtsóosgo dah diinááh, ha'nííjí daats'í? 10Nidi nahasdzáán bikáa'gi Diné Silį́į'ii ádił ni'iidzííh á yóó'iidii'aah yee bóhólníhígíí nihił béédahózin doo nisin, jidííniidgo bitah doo nahwii'nánígíí ábizhdííniid, 11Nídiidááh, nidishní, áádóó bik'i nítéhí nídiiłtsóosgo nighangóó nídídááh. 12Áko nízhdii'na', áádóó t'áá áko bik'izhnitéhí nízdiiłtsoozgo t'áá ałtso dabinááł ch'ízhníyá, áko éí bik'ee diné t'áá ałtso t'óó bił adahóóyóí áádóó Diyin God yaa dahaniihgo ádaaní, T'ah doo ákóhánéehgo deiiltséeh da!
Líívai, Shikéé' yínááł, bi'doo'niid
(Mt. 9:9-13; Lk. 5:27-32)
13Áádóó Jesus éí be'ek'id bąąhgóó anáádzoodzáago, áadi diné t'áá yíl'áá nít'éé' haa áłah silį́į'go nazneeztą́ą́'. 14Áádóó joogááł, nít'éé' Alfíyas biye', Líívai wolyéhígíí, tax nahalyéhígi sidáago jiiłtsą́, áko ábizhdííniid, Shikéé' yínááł. Áko nídii'na'go hakéé' dah diiyá.
15Nít'éé' Líívai bighan góne' Jesus ajiyą́ągo dzizdá, nít'éé' tax nahalyéhígíí yiniyé naazdáii t'óó ahayóí Jesus áádóó bídahooł'aahii yił nidaháaztą́ągo da'ayą́, háálá éí t'óó ahayóí hakéé' tádíkááh. 16Áko bee haz'áanii yínda'niłtinii Férisii yich'ijí danilínígíí Jesus éí bąąhági ádaaníiłii índa tax nahalyéhígíí yiniyé naazdáii bił da'jiyą́ągo dahoołtsą́ągo hódahooł'aahii ádeidííniid, Ha'át'éegoshą' tax bich'į' nidahalyéii áádóó bąąhági ádaaníiłii bił da'jiyą́? 17Jesus éí yidiizts'ą́ą'go áhodííniid, Diné doo bąąh dah nidahaz'ánígíí éí azee' ííł'íní doo yich'į' dadikáah da, nidi bąąh dah nidahaz'ánígíí t'éiyá; ts'ídá t'áá ákogi ádaat'éii doo bíká ádideeshniił biniyé níyáa da, nidi bąąhági ádaaníiłii, Łahgo át'éego Diyin God bich'į' tsíńdadohkeesgo nihibąąhági át'éii bits'áhóhkááh, bidideeshniił biniyé níyá.
Hodílzingo doo adą́ągi bína'ídíkid
(Mt. 9:14-17; Lk. 5:33-39)
18John bídahooł'aahii índa Férisii danilíinii dahodísingo doo da'ayą́ą da nít'éé', áko diné ła' haa yíkaigo ádahodííniid, Ha'át'éegoshą' John bídahooł'aahii áádóó Férisii danilíinii bídahooł'aahii hodílzingo doo adánígíí yee ádá nídahool'aah, nidi ni nídahooł'aahii doo ákódaat'į́į da? 19Áádóó Jesus áhodííniid, Iiyehii t'ah bił nijikaigo iigehgi neheeskaígíísh dahodísingo doo da'dooyį́įł da? Iiyehii t'áá hataagháhájį' da'jiyą́ą doo. 20Nidi beidoołkááł, iiyehii hats'ą́ą́' nídidooltééł, áko éí bijį́įdi índa dahozdísingo doo dazh'dooyį́įł da. 21Diné ła'da ha'éé' haastihgo, adanídadit'a'í ániidíígíí doo bidanídazhdidoo'áał da; ákódziidzaago adanídadit'a'í ániidíígíí ha'éé' haastihígíí bits'ádoodlałgo ha'éé' ídládígíí t'óó yówehda adoodlał. 22Índa diné ła'da wáin ániidíígíí tó abid hadaastihii doo yiih yikaah da; ákódziidzaago wáin éí tó abid deidoołdoh, áko wáin éí yóó'íína' doo, índa tó abid éí t'áá ádzaaí dadooleeł, nidi wáin ániidíígíí tó abid ádaaniidíígíí biih yikááh.
Jesus bídahooł'aahii háá'áyį́į́h jį́į́ góne' tł'oh naadą́ą́' deinizh
(Mt. 12:1-8; Lk. 6:1-5)
23Háá'áyį́į́h jį́ azlį́į'go Jesus hódahooł'aahii bił tł'oh naadą́ą́' bitahgóó jookah, nít'éé' hódahooł'aahii tł'oh naadą́ą́' yida'niinizh.#Deut. 23:25. 24Áko Férisii danilíinii ádahodííniid, Shoo, ha'át'éegoshą' háá'áyį́į́h jį́į́ góne' doo bee haz'ánígíí baa nijikai?#Ex. 34:21. 25Áko ábizhdííniid, David índa yił naakaígíí dichin daazlį́į'go ádaadzaa yę́ęgi da' éísh doo baa da'íínółta' da? 26Shą́ą́', Abáíyathar aláahgo náá'iiłniihii nilį́į́dą́ą́', David éí Diyin God bikin góne' yah ajííyáago Diyin God bich'į' bááh nááhániihii jííyą́ą́', hoł naakaígíí ałdó' ła' baz'níłtsood, éí nááda'iiłniihii t'éiyá yidooyį́įłgo bee haz'ą́ą́ nít'éé'.#Lev. 24:9; 1Sam. 21:1-6. 27Áádóó ánéídoo'niid, Háá'áyį́į́h jį́ éí diné bá ályaa, nidi diné éí háá'áyį́į́h jį́ doo bá áho'diilyaa da; 28éí bąą Diné Silį́į'ii háá'áyį́į́h jį́ nidi bee bóhólnííh.
Currently Selected:
MARK 2: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
