MARK 8
8
Diné dį́įdi mííl yilt'éego ba'íltsood
(Mt. 15:32-39)
1Éí yoołkááł yę́ędą́ą́' t'óó ahayóí haa áłah náánásdlį́į'go t'áadoo dayóyą́'ígóó biniinaa Jesus hódahooł'aahii hágo bizhdííniidgo ábijiní, 2Díí diné yíl'áhígíí baa a'ááh nisin, háálá t'áá shaa áłah nilį́įgo k'ad táá' yiską́, áko t'áadoo dayóyą́'í da; 3t'áá dichin danilį́įgo hooghangóó béé'ayéłnii'go hooghan t'áá yi'oh dahidínóołnah, háálá ła' nízaadę́ę́' nidaakai. 4Áko hódahooł'aahii hach'į' hadaasdzíí', Díí doo naagháhígi háádę́ę'shą' bááh shóidoot'eełgo díí diné da'dooyį́įłgo hwiih dadooleeł? 5Áko, Díkwíishą' łees'áán nidaahjaah? jiníigo nabízhdééłkid. Áko ádahodííniid, Tsosts'id lą́ą. 6Áko diné yíl'áhígíí, Ni'góó dinohbįįh, bizhdííniid, áádóó łees'áán tsosts'idígíí nízhdiinilgo Diyin God bich'į' sozdilzingo baa ahéésniizį́į́', índa nijiitíihgo hódahooł'aahii bitaa jiniih, éí diné yitaa deidoonih biniyé, áko éí yíl'áhígíí yitaa deiznii'. 7Łóó' ádaałts'ísígíí ałdó' t'áá díkwíí nideijaah lá, áko éí bik'i sozdoolzingo hódahooł'aahii, Diné bitaa daahniih, bizhdííniid. 8Áko da'ííyą́ą'go hwiih daazlį́į́', áádóó bi'oh da'oodą́'ígíí náádadziisdláa'go ts'iizis tsosts'id hadazdeesbįįd. 9Da'ííyą́'ígíí dį́įdi mííl daats'í ánéelą́ą́'. Áko éí, Nídayínóhkááh, bizhdííniid, 10áádóó t'áá áko hódahooł'aahii bił tsinaa'eeł biih náájookaigo, Dalmanútha nahós'a'jį' tsé'naa hoł ni'ní'éél.
Bee ééhózinii daniidzin daaníigo dayííkeed
(Mt. 16:1-4)
11Férisii danilíinii neheeskaigo nidahódíłkidgo yaa nídiikai, áko hákada'iiłhilgo ádaaní, Yá'ąąshdę́ę́' nibee adziilii bee bééhózinii ła' dadíníil'įįł.#Mt. 12:38; Lk. 11:16. 12Jesus yéego ádił hadzoodzolgo ájíní, Ha'át'íí lá biniyé díí k'ad ahoolchíiłii bee ééhózinii hadeintá?#Mt. 12:39; Lk. 11:29. T'áá aaníígóó ánihidishní, Díí k'ad ahoolchíiłii bee ééhózinii doo ła' bá ádoolníił da. 13Áko bits'ą́ą́' dashdiiyáago tsinaa'eeł biih náádzoodzáago tsé'naa dah náádazh'diił'éél.
Férisii áádóó Hérad bidíík'ǫsh bee aniilyółí
(Mt. 16:5-12)
14Hódahooł'aahii łees'áán ła' dayíjáah doo yę́ę yaa dayooznah lá, áko łees'áán t'ááłá'í t'éiyá tsinaa'eeł biyi' si'ą́ą́ lá. 15Hazhó'ó ábizhdííniidgo ájíní, Férisii danilíinii bidíík'ǫsh bee taos'nii' niilyółí#Lk. 12:1. índa Hérad bidíík'ǫsh bee taos'nii' niilyółí bits'ąą ádaa ádahołyą́. 16Áko éí yaa nídaat'į́įgo áda'ahidi'ní, Łees'áán nihee ádin, éí biniinaa ánihidííniid. 17Áko Jesus éí yaa ákoniizį́į'go áháłní, Ha'át'íishą' biniyé łees'áán nihee ádinígíí baa nídaaht'į́? Da' t'ah doósh nihił éédahoozįįh da, doo nidi ak'ida'doohtįįh da? Da' nihijéísh doo binídahaz'áa da daazlį́į́'? 18Nihináá' dahólǫ́ǫ nidiísh doo bee da'ooh'į́į da? Nihijaa' dahólǫ́ǫ nidiísh doo bee da'doohts'a' da?#Jer. 5:21; Ezek. 12:2; Mk. 4:12. Índa doósh éédaałniih da? 19Diné ashdladi míildi ánéelą́ą'go łees'áán ashdla' bá nihéti' yę́ędą́ą'shą' ch'ínííłna'ígíí díkwíí ts'iizis hadadoołbįįd ni'? Áko ádahodííniid, Naakits'áadah lą́ą. 20Áádóó dį́įdi mííl jíl'áago łees'áán tsosts'id há nihéti' yę́ędą́ą'shą' ałdó' ch'ínííłna'ígíí díkwíí ts'iizis hadadoołbįįd ni'? Áko ánáádabizhdi'ní, Tsosts'id lą́ą. 21Áko ábizhdííniid, Da' ákoósh t'ah doo ak'ida'doohtįįh da?
Bethséyidadi diné doo oo'íinii oo'į́ ánábi'diilyaa
22Áko Bethséyida kin haal'áhídi jíkai. Áko diné doo oo'į́į da léi' haa deizlóozgo, Bididííłchił, dahałníigo nídahookąąh. 23Áko Jesus éí diné doo oo'ínígíí bíla' jiiłtsoodgo kintahdóó ch'íznílóóz, áko áadi binák'ezhdíízhée'go hála' t'áá ałch'ishjí bee bik'i dasdeesnii'go ábijiní, Ha'át'íhígíidaásh yíní'į́? 24Áko hajííghalgo ájíní, Diné éí tsin naazkaadii nidahalingo tádazhdikáahgo yish'į́. 25Áádóó Jesus éí diné bináá' yik'i náádiilnii', áko hazhó'ó k'éhézdon dzidéez'į́į'go hanáá' hadaałt'é násdlį́į́', áko t'áá ałtsoní nizhónígo daat'į́įgo jiiłtsą́. 26Áko Jesus hooghangóó dah náhodiił'a'go áháłní, T'ááká kintahjį' nídóódza' yíila', [áádóó ła'da bee bił hóólne' yíila'].
Peter éí, Christ Diyin God biYe' nílį́, yidííniid
(Mt. 16:13-20; Lk. 9:18-21)
27Áádóó Jesus hódahooł'aahii bił Sesaríya Fílipaigi kin dah naazhjaa'góó jíkai, áko ákǫ́ǫ́ jookahgo nabízhdééłkidgo ábijiní, Diné ádaaníigoshą' éí háí ájít'į́ dashiłní? 28Áko hoł dahoolne'go ádaaní, Ła' John Tó Yee Asį́įhii yę́ę át'į́; náánáła' éí Iiláíjah yę́ę át'į́, nidi náánáła' éí Diyin God yá halne'ii yę́ę ła' át'į́, daaní.#Mk. 6:14,15; Lk. 9:7,8. 29Áko ninááhózhdééłkidgo áhojiní, Nidi nihíshą' éí háí ájít'į́ dashidohní? Áko Peter hanáánáádzíi'go áhodííniid, Ni Christ ánít'į́.#Jn. 6:68,69. 30Áko hadzoodzíi'go áhojiní, T'ááká diné ła'da shee bił dahoołne' yíila'.
Jesus bidi'yoolyéłígíí yaa halne'
(Mt. 16:21-28; Lk. 9:22-27)
31Áko náhozhdíníitą́ą'go áhojiní, Diné Silį́į'ii ts'ídá lą'ígóó ti'hwiidoonih, áko diné yá aląąjį' naazíinii áádóó aláahgo nááda'iiłniihii índa bee haz'áanii yínda'niłtinii doo dahodínóozįįł da, áko hodi'yoolyééł, áádóó táá' yiską́ągo náázhdidoodááł. 32Díí t'áadoo nazhnił'iní bee hadzoodzíí'. Nít'éé' Peter ats'áhonílóozgo hodeezteh. 33Nidi nídzízyizgo hódahooł'aahii bik'izhnághalgo Peter dzideeztehgo ábijiní, Séítan nílíinii, shidinínáágóó aninááh, háálá doo Diyin God k'ehgo nitsíníkees da, nidi diné k'ehgo t'éí nitsíníkees.
34Áko diné yíl'áhígíí hódahooł'aahii bił hágo bizhdííniidgo ájíní, Diné t'áá háiida shikéé' dashdiigháahgo ádeizhdiyoo'nah, hatsin ałnáoszid nízhdidootį́į́ł áádóó shikéé' joogáał doo.#Mt. 10:38; Lk. 14:27. 35Háálá t'áá háiida jiinánígíí bąąh hą́ą́snízinii éí yóó'azhdootłish, nidi t'áá háiida shí shiniinaa índa hane' yá'át'éehii biniinaa jiinánígíí ninázhdiní'ą́ągo, éí jiináa dooleeł.#Mt. 10:39; Lk. 17:33; Jn. 12:25. 36Jó, diné ła'da nahasdzáán t'áá si'ą́ą́ nít'éé' hóó' dooleeł biniyé t'áá ákójínéehgo hwii' sizíinii yóó'azhdíí'ą́ągoshą', haa néelą́ą́' há bínéidoodił? 37Diné ła'da t'áá hó hwii' sizíinii ha'át'íí bił aheełt'éé shį́įshą' bił ałnázhdoolééł? 38Áko t'áá háiida díí adilyé bee índa bąąhági át'éego ahoolchíiłii biyi' ła' shizaad áádóó shí shaa yázniizį́'ígíí, t'áá éí Diné Silį́į'ii biTaa' bits'ádi'nílíidii yee diyingo nidaal'a'í yił yíkaigo haa yádínóozįįł.
Currently Selected:
MARK 8: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
