MARK 7
7
Jew dine'é bizází yę́ę bi'é'él'į'
(Mt. 15:1-9)
1Áko Férisii danilíinii áádóó bee haz'áanii yínda'niłtinii ła' Jerúsalemdę́ę́' neheeskaígíí Jesus yaa áłah silį́į'go, 2hódahooł'aahii ła' Jew dine'é binahagha' bik'ehgo yílá tánágisígíí t'áadoo yida'aléhí ida'niiyą́ą́' nít'éé', éí dayiiłtsą́ągo [doo bił adaaníi da]. 3Háálá bizází yę́ę bi'é'él'į' bik'ehgo Férisii áádóó Jew dine'é danilíinii t'áá ałtso bíla' t'áadoo táádeigisí doo da'ayą́ą da, 4áádóó ałdó', nida'iiniihdę́ę́' nináhákáahgo binahagha' bik'ehgo t'áadoo tá'ádadigisí doo da'ayą́ą da, áádóó bizází yę́ę bi'é'él'į' ałdó' lą'í yida'ał'į́, jó, éí bee adlání áádóó łeets'aa' índa łeets'aałtsooí tánágis ádaat'éiida. 5Áko Férisii índa bee haz'áanii yínda'niłtinii nidahódééłkidgo ádaaní, Ha'át'éegoshą' nídahooł'aahii nihizází yę́ę bi'é'él'į' doo yik'ehgo dayíkááhgóó bíla' t'áadoo táádeigisí da'ayą́? 6Áko ábijiní, T'áá bee ak'e'ashchínígi át'éego nihí t'óó ádahodoł'íinii, Aizéíyah ts'ídá niheełt'éego t'áá nihítséedi nihaa hoolne':
Díí diné t'áá bizábąąhídóó t'éiyá yee shił danilį́,
nidi dabijéí doo yee shit'áhíjį' ádaat'ée da.
7Na'níle'dii shich'į' dahodísin,
háálá diné yee nahas'áanii bina'nitin danilį́įgo yee nida'nitin.#Is. 29:13.
8Diyin God yee has'áanii nahjį' kódaał'į́įgo diné bi'é'él'į' dayínóhtą'. [Jó, Jew dine'é binahagha' bik'ehgo łeets'aa' áádóó bee adlání táádaahgis, áádóó ákódaat'éhígíí lą'í ádaał'į́.]
9Áko ánáábizhdoo'niid, Nihí daohchįįhgo nihi'é'él'į' t'áá dayínóhtą' doo biniyé Diyin God yee has'áanii nahjį' kódaał'į́! 10Háálá Mózes ádííniid,
Nizhé'é índa nimá nił nilį́įgo íínísin,#Ex. 20:12; Deut. 5:16.
áádóó,
T'áá háiida bizhé'é, doodaii' bimá yiyíídzí'ígíí ts'ídá bidiyoolyééł,#Ex. 21:17; Lev. 20:9.
níigo yee has'ą́, 11nidi nihí diné ła'da bizhé'é, doodaii' bimáda, T'áá ha'át'íhída bee níká adeeshwoł yę́ę éí Kórban át'é, yiłnínígíí, éí binahjį' bizhé'é áádóó bimá doo bił nilį́į da nidi, éí t'áá áko dadohní. (Kórban éí Diyin God baa deet'ą́ jiníigo óolyé.) 12Áko bizhé'é índa bimáda yíká adoolwoł yę́ę dooda dadohní. 13Ákót'éego nihí nihi'é'él'į' yił ahoolchíiłii éí bee Diyin God bizaad doo idééłníígóó ádaał'į́. Áádóó ákódaat'éhígíí lą'í baa naahkai.
Diné bidoołchxǫǫłii
(Mt. 15:10-20)
14Áádóó diné yíl'áhígíí hágo náábizhdoo'niidgo ábizhdííniid, Dashíínółts'ą́ą́', t'ááłá'í nootínígo, áádóó díí bik'ida'doohtįįh: 15ha'át'íhída t'áá bikáá'dę́ę́' diné biih hwiileehii éí doo nibiiłchxǫǫh da, nidi bii'dę́ę́' hahwiileehii t'éiyá nibiiłchxǫǫh. 16[Diné ła'da hajaa' hólǫ́ǫgo azdiits'a'ígíí háni' ajíists'ą́ą́'.] 17Áko áłah ílínígíí bits'ą́ą́' kin góne' yah ajííyáago, hódahooł'aahii hane' bee ak'idi'dootį́įłii baa níjít'į́į́ nít'é'ígíí yíndahódééłkid. 18Áko ábizhdííniid, Da' nihíísh ałdó' t'áá ákót'éego doo ak'ida'doohtįįh da? Da' díísh doo nihił béédahózin da? Ha'át'íhída t'áá bikáá'dę́ę́' diné biih hwiileehgo doo bółchxǫǫh át'ée da, 19háálá éí hajéí doo yiih hwiileeh da, nidi habid t'éiyá yiih hwiileeh áádóó haghá hwiileeh. (Kózhdííniidígíí bee ch'iyáán t'áá ałtso t'áadoo át'éhígóó yidą́ jidííniid.) 20Áko ánáázhdí'ní, Diné bii'dę́ę́' hahwiileehii éí diné niyiiłchxǫǫh. 21Háálá diné bii'dę́ę́', bijéí bii'dę́ę́' nichxǫ́'ógo nitsáhákees hahwiileeh, adilyé, na'ageh bee tsi'na'adá, diné naatseed, 22ani'į́į́', adáhonooní, bąąhági áhoonííł, na'adlo', tsi'na'adá, ooch'į́į́d, baa'ihgo áyáti', ádaa ha'niih, áhodiigis. 23Díí t'áá ałtso doo yá'ádaashxóonii diné bii'dę́ę́' hadahwiileehgo nidabiiłchxǫǫh.
Sáirofiníishiya dine'é asdzání nilíinii bi'oodlą'
(Mt. 15:21-28)
24Áko Jesus nízhdii'na' áádóó dashdiiyá, áko Táir índa Sáídan nahós'a'di jiníyá. Áadi kin léi' biyi' góne' yah ajííyáago diné ła' doo yidoonih da jinízin, nidi ch'ééh na'ázhdinil'in. 25Nít'éé' t'áá áko asdzání ła', bich'é'é áłts'ísí léi' éí níłch'i nichxǫ́'í bii' hólǫ́ǫgo haa hóónii' lá, áko haa níyáago hach'į' nitsidinígo'. 26Éí asdzání Gríik dine'é nilį́įgo Sáirofiníishiya hoolyéedi bi'dizhchį́. Áko náhookąąhgo áhodííniid, Níłch'i bi'iiníziinii shich'é'é bii'dę́ę́' haníłchééh. 27Áko Jesus áhodííniid, Bíni' áłchíní átsé hwiih daaleeh, háálá áłchíní bich'iyą' łééchąą'í bich'į' ajiiłtł'iidgo doo aaníi da. 28Nidi asdzání ánááhodoo'niid, T'áá aaníí ákót'é, Bóhólníihii, nidi bikáá' adání bikáá'dę́ę́' łees'áán bizéí áłchíní bílák'ee hadandéhígíí łééchąą'í deiyą́. 29Áko asdzání ánáábizhdoo'niid, Jó, yá'át'éehgo háínídzíí'. Nílááh náádááł; jó, níłch'i bi'iiníziinii nich'é'é biyi'dę́ę́' hahóóle'. 30Áko hooghangóó nídzídzá, nít'éé' at'ééd tsásk'eh yikáá' sitį́įgo jiiłtsą́, níłch'i bi'iiníziinii biyi'dę́ę́' hahóóle' lá.
Jesus éí diné bijééhkał áádóó ałt'andzihii hadaałt'é ánáyiidlaa
31Áko Jesus éí Táir índa Sáídan nahós'a'dóó dah náázdiidzáago, Diikápolis biyi' góne' ch'ízhníyáago Gálilii be'ek'idi jiníyá. 32Áko diné ła' bijééhkał índa ałt'andzihgo yił haadaaskaigo, Bik'i dah didíílnih, dahałníigo nídahookąąh. 33Áko jíl'áhígíí bits'ą́ądi t'áá sáhí hoł nizhní'áázh, áko áadi bijeeyi' góne' azhdoolchid áádóó azhdíízhée'go bitsoo' bizhdeelchid, 34áádóó yá'ąąshgóó dzidéez'į́į'go ádił hadzoodzolgo áhojiní, Éfatha, éí, Ąą ánínééh, jiníigo óolyé. 35T'áá áko hajeeyi' aní'díídláád índa hazaad doo át'éhígóó t'áá bééhózínígo hadzoodzíí'. 36Áko, T'ááká diné ła' bee bił dahoołne' yíila', bizhdííniid; t'áá ákóbijiníi nidi, t'óó yówehda yee haa tádahodoolne'. 37Áko nádį́'ídi t'óó hoł adahayóigo ádajiní, T'áá ałtso yá'át'éehgo áyiilaa; bijééhkałii nidi adiits'a'go, índa doo yáłti'ii nidi yáłti'go ánáyoodlííł lá.
Currently Selected:
MARK 7: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
