Luk 4

Balik none Jises

(Metiu 4:1-11; Mak 1:12-13)

1Ano Jises udu gwa Jodan eme loken le badeh, iy idih na boto-on ta Malawin Ndrabun. Eme Malawin Ndrabun andrei iy iu ili kon lomale an. 2Udu loboho kon doh, balik none iy ta iy kataku udu bolo len ma hanoh (40). Udu bolo len doh Jises baimon se nyamon bwe, eme suniya len anya kano badeh, iy imeson.

3Eme balik tiye i ta Jises i buku doh, “I buku none ou anya, ou Nadu Kindrei, ou asehek sahou ki ta bek kede-eh, kasahan jabi ramen.”

4Eme Jises tiye i tan i buku doh,

“Ndratorowenei, ‘Lau winiyan balelei le jabi ramen ta samak bwe!’” Dutoronomi 8:3

5Ano ja, balik andrei iy uru ala loke, suwi suwi iy leheya iy ta kon tinan mari badu munyak, iri kabin atondrok. 6Eme ma balik tiye i ta Jises i buku doh, “Lakou mari ou atou nane kede-eh, udu minek. Eme ya jo winiyan edeu i tare lau na seken tek, ya eme idah kameh, jo edeu boto-on ma hawe lakou mwasin mari doh kameh i tam, 7i buku none ou atehei bwili ndru-um keme tek, ma atudun nyarak.”

8Eme Jises tiye i tan ja i buku doh, “Sahou ta Kindrei badeh, ndratorowenei ale,

‘Ou atudun le nyara Laban Kindrei tam, ma ou a-en hamon tan le ari kabwe.’ ” Dutoronomi 6:13

9Ano ja, balik andrei iy uru ala Jerusalem, eme ma balik atehei iy ales udu bwele-e no-o asiu tinan ta Kindrei loken on. Ano balik tiye i tan i buku doh, “Ou anya ou Nadu Kindrei handru eh, ou akahei ou ado dah ala andri. 10Tasah, i buku ndratorowenei,

‘Kindrei kameh edeu sahou batanau ili tiri angelo tan ame ta aseben ou ma atondrok ou. 11Ma idah kameh, iri bwese-ei ou, ma bek winiyan batahi katim bwe.’ ” Wari 91:11-12

12Jises tiye i buku doh i tan, “Sahou ta Kindrei badeh, ndratiye,

‘Ou satehei Laban Kindrei tam sala ta bolo none.’ ” Dutoronomi 6:16

13Ano balik none iy ta madasan mari, arile Jises banuhun iy bwe, ano iy ruwani iy ma iy iu, winiya len ari ja, iy barasahan.

Jises edek ili Galili ma iy amekes gok na boto-on ta Malawin Ndrabun

(Kalan 4:14–9:50)

Jises amekes lahou tan ma bwena udu Galili

(Metiu 4:12-17; Mak 1:14-15)

14Ano Jises eme hamon eme Galili, hawe boto-on ta Malawin Ndrabun udu hawen eme. Ya eme sahou ta nyala iri lakou iy amekes badeh, aseker ili winiya loboho doh. 15Ano iy leheya iri udu asiu ta atukum tiri Juwis, eme ma iri atudun iy.

Iri lau badu Nasaret bwale iri Jises

(Metiu 13:53-58; Mak 6:1-6)

16Ano Jises iu i hamon ja ili Nasaret, kon mene iy i tinan udu aliy. Eme i buku none len ta amunyau mari ndra-au, eme na len ta amunyau dah ja, Jises ili bolo asiu ta atukum tiri Juwis. 17Eme iy ales ere loke, iri atehei tarou ta Aisaya i minen. Ano iy sihi buk i ta sahou nane Aisaya atorou dah. Ano iy aloh:

18“Malawin Ndrabun ta Laban badeh, udu bwele-ek,

Tasah, iy suni jo ta atiye sahou ki tiri lau lakou bwe.

Iy suni jo ta tiye sahou ki tiri lau are bolo kou kame len,

Ma kamekes iri lau mada iri kaseu, kanyolom ja;

Ma ta talou malou tiri lau, ado ndra-in handru ka-au.

19Ma hawe ta tiye ta Laban kameh aseben iri lau tan na jaha doh.” Aisaya 61:1-2

20Ano Jises lukumwi buk nane dah, ya atehei i mine ndramak ta atondrok, ano ma iy udu andri leheya oro. Eme iri lau mari nane ado asiu ta ndrahu tukum tiri Juwis dah, mada oro asoh ili le tan. 21Ano iy tiye i toro, “Sahou nane ado ndranuhun badeh, ndrasahan handru na len dah.”

22Eme oro asehek anya, iy ndramak mwasin labai. Ya, mani oro atur, ma oro lomondra solo-an labai ta sahou mwasin iy asehek. Ya eme oro anya, “Iy kede-eh nadu Josep labai, neh?”

23Ano Jises tiye i toro, “Jo tanan labai, idah kameh ado anya, ‘Ou tiye sahou mwasin ki tam le. Ou badeh, ndramak ta amekes lau oh? Ou amekes kudu kon tam mwena op!’ Ya idah kameh, ado tiye eme tek ale anya, ‘Abo, ou none amekes lahou mene ou amekes udu Kapena-um kudu kon tam amwenen dah se.’ ” 24Eme Jises anya, “Jo katiye tado kamwenen, iri lau badu bolo kon tiri propet amwenen badeh, iri winiyan baseken iy bwe. 25Arile jo katiye tado kamwenen, kabatana Alaija, iri badih nyau badu Isra-el badeh, solo-an labai. Idoh, amwenen na len iri lau badu kon mari mene ameson, tasah ur badeh, bandruk se bwe, winiya jaha taloh ranah. 26Eme Alaija badeh, bala baselesen oro ari badu Isra-el bwe, arile iy le ili hawe badih nyau ari udu kon Sarepat, udu loboho kon Saidon. 27Ya na len propet Alaisa in ndra propet badeh, iri Isra-el solo-an badeh, sik lepra udu tiri. Ya udu bolo iri mari badeh, ndramak ari le badu Siriya, nyaran Naman badeh, Alaisa mesekei iy amwenen.”

28Eme iri mari nane ado bolo asiu ta atukum nane dah anuhun, ma iri abolosen. 29Eme iri ato-ou ame loken ma aluwi iy eme len ta kon. Eme iri seheyani iy ili loken bwele-e kiri mandrei, kon tinan nane udu aliy dah, ma iri anya kakeh iy ki andri. 30Arile, Jises asoh bolo ndrokowa iri iu.

Jises tikahei malawin ndra-in udu la-u ndramak ari iu

(Mak 1:21-28)

31Ano, na len ari ja, Jises edek iu ili andri i kon tinan ari aloh Kapena-um udu loboho Galili. Ma iy leheya iri lau mwan ma badih na len ta amunyau. 32Eme iri lau mani iri atur ta bolo leheya tan, tasah sahou tan badeh, nyarahan labai. 33Eme udu bolo asiu ta atukum nane dah, ndramak ari malawin ndra-in udu la-un. Eme iy aloh bohon i tinan, 34“Ei! Jises badu Nasaret, ou anya amekes sasah keme taso? Ou ame dah ta adai aso kamak ai? Jo tanan ou are handru kede-eh, ou badeh, ndramak ndrabun ta Kindrei!” 35Eme Jises tiye i ta malawi ndra-in anya, “Ou andru-uk ma ou ame len ta ndramak badeh!” Eme malawin ndra-in dah morahani ndramak dah i andri ndrokowa iri lau. Ma iri malawin ndra-in ame len ma au, udu mada iri lau mari nane dah. Iri bamesekei ari isi bala bada ndramak dah, bwe.

36Eme iri lau mani iri mari atur, ma iri asehek i tiri ari ari, “Saba lahou handru dah? Sahou tan nyarahan ma boto-on labai, tasah iy tiye sahou i ta malawin ndra-in le badeh, ma iri ame len!” 37Eme sahou ta nyala Jises aseker ili bolo kon mari badu loboho doh.

Jises amekes lau solo-an amwenen ja

(Metiu 8:14-17; Mak 1:29-34)

38Ano Jises udu asiu ta atukum tiri Juwis eme len ales ili asiu ta Saimon. Eme oro asehek i tan ta iy kaseben salahu Saimon. Tasah, iy badeh, ibo sik ma badan badeh, nyarahan nyarahan. 39Eme Jises edek ili ka-au sau hawen, ma tiye sahou nyarahan i ta sik nane dah. Ano ma badan anyala, ma iy suri iy le eme loke, ma iy amekes noro nyamon.

Jises bwidiy lau solo-an sik udu tiri amwenen ja

40Eme len ta amunyau ano, an anya ki andri, iri atiye iri lau solo-an, saba sik udu tiri ame hawe Jises. Ya eme iy edeu minen i la-u iri mari, ma iy mesekei iri amwenen ja. 41Ma hawe iri malawin ndra-in solo-an ado la-u iri lau anyar ame len, tiye i buku doh, “Ou badeh, Nadu Kindrei.” Arile, iy tiye iri kandru-uk le, tasah iri ndratanan, iy badeh, Krais.

Jises asehek sahou udu bolo asiu ta atukum tiri Juwis

(Mak 1:35-39)

42Ano na mandraben handru Jises udu kon tinan eme len, ili kon ari doh, lau bare aliy bwe. Eme iri lau takaleh iy, ma iri ala hawen. Ya eme iri ateu iy na sahou ta iy sa-au, iy badeh, kudu. 43Arile Jises tiye i tiri, “Bwe! Jo ki-iu kili katiye sahou mwasin ta nyala tondrok ta Kindrei ki tiri kon tinan rayah ja. Tasah, Kindrei suni jo eme dah ta atiye sahou tan.” 44Eme iy atiye sahou ili loboho Judiya, udu bolo asiu ta tukum tiri Juwis.

Currently Selected:

Luk 4: lidNTpo

Highlight

Copy