Lucas 14
14
Sa Pagbulunga Ku Agpangubuk
1Amin aldaw hu Sabadu ha su kumaen si Jesus duun hu balay ku nabantug ha Parisiyu pigbantayan hu mga etaw si Jesus. 2Duminiyà ta kandin sa etaw ha agpangubuk 3aman ininsaan hi Jesus su mga manunudlù hu Kasuguan daw sa mga Parisiyu, “Intugut ba hu Kasuguan ha mamulung kuy hu agkadaluwan ku Aldaw hu Paghimlay?” 4Ba hurà gayed sidan magtubag. Aman inibitan hi Jesus su agkadaluwan dayun naulian haena daw impaulì din.
5Inikagiyan din su mga etaw, “Ku amin nuy kabayu daw ku baka ba ha mahulug duun hu atabay ku Aldaw hu Paghimlay saena butwaen nuy gayed sagunà dì ba?”
6Ba hurà en sidan makatubag.
Sa Pagpaubus
7Su maahà hi Jesus ha sa mga inimbita agpamilì hu madagway ha pinun-ayà inikagiyan din sidan taini ha pananglitan ha tagyanaen, 8“Ku imbitahen kaw duun hu kaamulan harì kaw duun agpinuu hu madagway ha pinun-ayà ta kan ku amin inimbita ha labaw pa dì inyu 9daw ipahalin kaw ku mig-imbita inyu duun hu kenà maayad ha pinun-ayà dayun magayhaan kaw gayed. 10Ba ku imbitahen kaw duun kaw pinuu hu kenà maayad ha pinun-ayà daw angatan nuy ha su mig-imbita inyu umikagi, ‘Halin kaw duun taini ha madagway ha pinun-ayà’ dayun madayè kaw hu duma ha inimbita duun hu kaamulan. 11Ta bisan sin-u sa tagpalabaw-labaw igpaubus ba saena ha tagpaubus igpatangkaw.”
12Dayun inikagiyan hi Jesus su mig-imbita kandin, “Ku maggastu ka harì nu iyan dà imbitahen sa mga amigu daw sa mga kadumahan nu daw sa mga silingan nu ha sapian ta maimbita ka daan kandan daw makabales sidan ikaw. 13Ba ku maggastu ka iyan nu imbitahen sa makaluluuy daw sa kimay, sa pigket daw sa mga buta, 14ta ku buhaten nu haena malipayen ka gayed. Bisan ku harì sidan makabales ikaw ba sa Dios iyan magbales ikaw ku banhawen sa mga matareng.”
Sa Pananglitan Mahitenged Hu Kaamulan
(Lucas 14:15-24; Mateo 22:1-10)
15Su mapaliman haena hu sabuwa ha etaw ha tagpinuu diyà ta ubay hi Jesus inikagiyan din si Jesus, “Malipayen gayed sa etaw ha makaamul duun taena ha kaamulan duun hu tagharian hu Dios.”
16Inikagi hi Jesus haini sa pananglitan ha tagyanaen, “Amin etaw ha miggastu ha nangimbita hu madakel ha mga etaw. 17Su mauma en sa kaamulan pinaelegan din su mga inimbita daw ikagiyi, ‘Dumini kaw en ta napengahan en sa lamisa.’
18“Ba amin dan mga balibaran. Sa sabuwa minikagi, ‘Bà ad ikaw pasayluwa ta daw a pa nakapalit hu uma aman kinahanglan ha elegan ku pa haena ta ag-ahaen ku.’
19“Minikagi daan sa sabuwa, ‘Pasayluwa a ta daw a pa nakapalit hu sampulù ha baka na igsulay ku pa igdaru.’
20“Sa sabuwa minikagi, ‘Harì a makadiyan ta kalibag-u a pa.’
21“Aman uminulì su sinugù daw ikagiyi su agalen din. Dayun napauk su nangimbita aman sinugù din dà paman su suluguen, ‘Agpas ka daw imbitaha sa bisan sin-u ha etaw duun hu mga dalan, sa mga makaluluuy, sa kimay, sa mga buta daw sa pigket.’
22“Su makalikù su suluguen inikagiyan din su agalen, ‘Binuhat kud sa insugù nu ba hurà pa kapunù sa balay.’
23“Dayun inikagiyan taena ha agalen su suluguen din, ‘Elegi sa diyà ta kadiyuan daw hangyua sidan ha dumini ta daw mapanday mapunù haini sa balay ku. 24Ikagiyen ku inyu ha hurà gayed bisan sabuwa duun ku tinaganahan hu gastu taini ha kaamulan ha makakaen.’”
Sa Laus Ha Sumusunud Hi Jesus
(Lucas 14:25-33; Mateo 10:37-38)
25Duminayun si Jesus hu paghipanaw daw madakel tungkay ha mga etaw sa namanduma kandin. Sumininalu si Jesus diyà ta kandan hu kagi din, 26“Bisan sin-u sa tungkay din palanggà sa mga laas daw sa asawa din, sa mga batà daw sa mga suled din daw bisan sa kaugalingen din dì kanak, harì mabaluy ha sumusunud ku. 27Bisan sin-u haena sa harì agkabayà tag-antus hu alan ha mga malegen bisan duun hu kamatayen tumenged hu pagsunud kanak saena harì gayed mabaluy ha sumusunud ku.
28“Ku amin agkabayà tagbalay hu adagi ha balay harì din ba unahen haena kwintahen ku tumanan ba sa salapì din hangtud ha mapengahan haena sa balay? 29Ta ku bà din dà makapas-ek sa tukud ha harì en mapengahan, sa alan ha makaahà taena makapatawa 30daw mag-ikagi, ‘Saini ha etaw migbalay ngaay ba hurà din en kapengahi.’
31“Iling daan hu harì ha pakigsabà hu lain ha harì, harì din ba unahen henhenaen ku makadaeg ba haena sa sampulù ha libu ha mga sundalu din hu kaluwaan ha libu ha sundalu hu pakigsabà kandin? 32Ku matun-an din ha harì gayed makadaeg maayad pa ku pasuguan din haena sa pakigsabà kandin ta daw mahusay sidan. 33Iling daan taena ha harì gayed mabaluy ha sumusunud ku sa bisan sin-u inyu ku harì nuy awaan sa alan.
Sa Asin Ha Hurà Din Pulus
(Lucas 14:34-35; Mateo 5:13; Marcos 9:50)
34“Sa asin maayad ba ku maawà en sa kapait din in-inuwen pa paglikù hu nanam taena? 35Harì en daan haena mabaluy ha abunu ba bà dà paman iglambeg.
“Henhenaa nuy gayed sa napaliman nuy ha inikagi ku.”
Currently Selected:
Lucas 14: bkd
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
