Mateo 27

Sa Pag-uwit Ki Jesus Diyà Ki Pilato

(Mateo 27:1-2; Marcos 15:1; Lucas 23:1-2; Juan 18:28)

1Su maselem en sa alan ha mga labaw ha sinaligan hu paghalad daw sa mga magulang miglalang-lalang daw mig-uyun ha himatayan dan si Jesus. 2Aman binakus dan haena daw itugyan diyà ki Pilato ha gubirnadur.

Sa Pagbasul Hi Judas

(Mateo 27:3-10; Mga Buhat 1:18-19)

3Su matun-an hi Judas ha si Jesus hinukuman en hu kamatayen nakagbasul gayed haena hu paglimbung din. Aman luminikù duun hu mga labaw ha sinaligan hu paghalad daw mga magulang ta iglikù din ngaay haena sa katluan ha salapì 4daw minikagi, “Nakasalà a gayed ta piglimbungan ku sa etaw ha hurà din salà.”

Ba saena ha mga agalen tuminubag, “Hurà day en labet ta ikaw dà hayana ha kasamuk.”

5Aman inlambeg hi Judas su salapì diyà ta Timplu daw awà diyà dayun mighiket.

6Su matimù hu mga labaw ha sinaligan hu paghalad su salapì minikagi sidan, “Masupak taw sa Kasuguan ku saini ha salapì iugsak taw duun hu talaguay hu salapì dini ta Timplu ta saini imbayad en para hu paghimatay hu etaw.” 7Aman nauyunan dan ha saena ha salapì ipalit dan hu bugtà taena ha mamumuhat hu tadyaw ta agbuhaten ha panlebengà hu mga langyaw. 8Iyan haena hinengdan ha pigngaranan hu Bugtà ha Pigbayaran hu Langesa hangtud iman ha panahun. 9Aman natuman sa lalang hu Dios ha impaikagi din ki Jeremias sa prupita ha tagyanaen, “Tinimù dan su katluan ha salapì ta iyan haena nauyunan hu mga kaliwatan hi Israel 10daw impalit dan hu bugtà taena ha mamumuhat hu tadyaw.”

Sa Pagbistiga Ki Jesus Hi Pilato

(Mateo 27:11-14; Marcos 15:2-5; Lucas 23:3-5; Juan 18:33-38)

11Su diyà en si Jesus ta atubangan ku gubirnadur ininsaan din si Jesus, “Iyan ka ba Harì hu mga Judio?”

Tuminubag si Jesus, “Iyan ad en su inikagi nu.”

12Su magsumbung sa mga labaw ha sinaligan hu paghalad daw sa mga magulang diyà ki Pilato hurà en magtubag si Jesus. 13Dayun inikagiyan haena hi Pilato, “Harì nu ba agkapaliman sa alan ha mga sumbung dan mahitenged ikaw?” 14Ba hurà en gayed magtubag si Jesus aman su gubirnadur tungkay gayed nabeleng.

Sa Paghukum Ki Jesus Hu Kamatayen

(Mateo 27:15-26; Marcos 15:6-15; Lucas 23:13-25; Juan 18:39—19:16)

15Ku agsaulugen sa Aldaw hu Paglabay iyan naanadan hu gubirnadur sa amin sabuwa ha prisu ha aglibriyen din sumalà hu agpanayuen hu mga etaw. 16Duun taena ha panahun amin nabantug ha prisu ha tagngaranan ki Barabas. 17Aman su maamul-amul en sa mga etaw ininsaan sidan hi Pilato, “Sin-u sa agkabayaan nuy ha libriyen ku? Iyan ba si Barabas daw ku iyan ba si Jesus sa tagngaranan daan ki Cristo?” 18Natun-an hi Pilato ha si Jesus intugyan hu mga agalen diyà ta kandin tumenged hu kasina dan kandin.

19Su duun en si Pilato taena ha pinun-ayà hu maghuhukum nakauma daan sa sulat hu asawa din ha tagyanaen, “Harì ka maglabet-labet taini ha etaw ha hurà din salà ta ganina ha daleman mig-antus a hu damugu ku mahitenged kandin.”

20Ba pigdasig sa mga kaet-etawan taena ha mga labaw ha sinaligan hu paghalad daw mga magulang ha iyan dan panayuen si Barabas ha libriyen daw himatayan si Jesus.

21Minisab nanginginsà su gubirnadur, “Sin-u duun taini ha daruwa sa agkabayaan nuy ha libriyen ku?”

Sa mga etaw tuminubag, “Iyan si Barabas.”

22Nanginginsà dà paman si Pilato, “In-inuwen ku diay si Jesus sa tagngaranan daan ki Cristo?”

Alan sidan tuminubag, “Ilansang hayana duun hu krus.”

23Ba minikagi si Pilato, “Imbà nuy igpalansang hayana? Inu diay sa nabuhat din ha madaet?”

Ba bà dà nasì uminiseg sa kulahì hu mga etaw, “Ilansang hayana.”

24Su matun-an hi Pilato ha hurà en pulus hu pag-ikagiyà din ta agkagubut en sa mga etaw tuminimù haena hu wahig daw henawi sa alima din duun hu atubangan taena ha mga etaw hu kagi din, “Inyu en haini ha salà aman sa langesa taini ha etaw diyan en ta alima nuy ta nangenaw ad en hu kanak.”

25Tuminubag sa alan ha mga etaw, “Iyan kay en agpanubag tayana daw sa mga kaliwatan day.”

26Dayun impaguwà hi Pilato si Barabas. Ba si Jesus pinalagkutan din daw itugyan duun hu mga etaw ta daw makalansang dan duun hu krus.

Sa Pagpasipala Ki Jesus Hu Mga Sundalu

(Mateo 27:27-31; Marcos 15:16-20; Juan 19:2-3)

27Impaseled si Jesus hu mga sundalu duun ku balay hi Pilato dayun inamul-amulan haena hu kasundaluwan. 28Linebasan dan si Jesus daw pinaksuyi hu maligà ha manggad. 29Tuminimù daan sidan hu gawed ha dugiyen ha binangkulà daw insuup dan diyà ta ulu hi Jesus. Dayun impabalabad dan sa kawanan ha alima din hu sugkud daw luminuhud sidan diyà ta kandin hu pagtameyes kandin ha naman-ikagi, “Mabuhì sa Harì hu mga Judio.” 30Inileban dan si Jesus daw binunalan dan sa ulu din ku sugkud din. 31Su mapengahan dan en sa pagtameyes ki Jesus inawà dan dà su maligà ha manggad daw ilikù diyà ta kandin su pinaksuy din. Dayun inuwit dan si Jesus duun hu lugar ha duun dan iglansang hu krus.

Sa Paglansanga Ki Jesus Duun Hu Krus

(Mateo 27:32-44; Marcos 15:21-32; Lucas 23:26-43; Juan 19:17-27)

32Su diyà en sidan ta dalan nasal-aw dan sa etaw ha taga-Cirene ha tagngaranan ki Simon, dayun pineges dan ha tiangen din su krus hi Jesus. 33Nakauma sidan duun hu lugar ha tagngaranan hu Golgotha ha sa kahulugan taena Tul-an hu Ulu hu Etaw. 34Diyà igpainum dan ngaay si Jesus hu binu ha inamulan hu bulung ha mapait, ba su mananam din haena hurà din en inuma. 35Su ilansang dan en si Jesus duun hu krus binahin taena ha mga sundalu sa pinaksuy din pinaagi hu ripa.

36Dayun mininuu sidan daw binantayan dan si Jesus. 37Sa sampaw ta ulu din sinulatan hu sumbung mahitenged kandin ha tagyanaen, “Iyan haini si Jesus ha Harì hu mga Judio.” 38Inlansang daan sa daruwa ha tulisan duma ki Jesus, sa sabuwa diyà dapit ta kawanan din daw sa sabuwa diyà ta gibang din.

39Sa mga etaw ha agpamanagad tagkuyeng-kuyengà hu pagtameyes ki Jesus ha tagyanaen 40“Kagi nu man ha agkagasen nu sa Timplu ta agbalayen nu dà duun hu tatulu ha aldaw. Ku laus ka ha Batà hu Dios libriya sa kaugalingen nu daw lugnà ka duun tayan ha krus.”

41Iling daan taena sa pagtameyes hu mga labaw ha sinaligan hu paghalad daw hu mga manunudlù hu Kasuguan daw mga magulang, kagi dan, 42“Aglibriyen din man gid sa duma ha mga etaw ba sa kandin ha kaugalingen harì din agkalibri. Ahaen taw hayana sa Harì hu mga kaliwatan hi Israel ku lumugnà ba iman duun tayan ha krus daw makatuu kuy kandin. 43Iyan man kun hayan Batà hu Dios daw tagsalig duun hu Amay din. Aman ku agkabayaan hu Dios ipalibri en kandin.” 44Saena ha mga tulisan ha inlansang duma kandin migtameyes en daan kandin.

Sa Pagpatay Hi Jesus

(Mateo 27:45-56; Marcos 15:33-41; Lucas 23:44-49; Juan 19:28-30)

45Su maugtu en sa aldaw suminukilem sa tibuuk ha kalibutan hu tatulu ha uras. 46Su agkabalalay en sa aldaw nangulahì si Jesus, madaging ha tagyanaen, “Eli, Eli, lama sabaktani?” ha tagkahulugan, “Dios ku, imbà a ikaw bay-ani?”

47Su mapaliman haena hu duma ha mga etaw ha tagtiyadeg diyà ta ubay din minikagi sidan, “Tag-umawen din gid si Elias sa prupita.”

48Sa sabuwa kandan sagunà tuminimù hu manggad ha inteleb duun hu sukà daw ibedbed duun hu panga dayun insungit din ki Jesus. 49Ba sa duma ha mga etaw minikagi, “Bay-ani hayan ta ag-ahaen taw pa ku makahiwal ba si Elias hu paglibri kandin.”

50Uminisab nangulahì si Jesus dayun nabugtù sa gahinawa din.

51Su makepal ha manggad ha in-elang diyà ta Timplu sagunà naliwarà nayahà sugud ta sampaw payanaen ta sagayadan taena. Miglinug daan daw nangabengkag sa mga adagi ha batu. 52Sa mga liyang ha panlebengà nangapuwaan daw amin nangabanhaw ha mga etaw hu Dios. 53Su mabanhaw en si Jesus su mga etaw ha nangabanhaw daan namandiyà ta Jerusalem daw madakel sa nakaahà kandan diyà.

54Su mga sundalu daw sa kapitan dan ha migbantay ki Jesus nangahaldek gayed su magedam dan sa linug daw su maahà dan sa duma pa ha nahitabù daw nakaikagi sidan, “Laus gayed ha Batà haini hu Dios.”

55Madakel sa mga bahi ha tagbantay ki Jesus ba diyà dà sidan ta madiyù. Duminuma sidan ki Jesus ha nangapuun ta Galilea hu pag-alima kandin. 56Sa duma kandan iyan si Maria Magdalena daw si Maria ha inay hi Santiago daw hi Jose daw sa asawa hi Zebedeo.

Sa Paglebeng Ki Jesus

(Mateo 27:57-61; Marcos 15:42-47; Lucas 23:50-56; Juan 19:38-42)

57-58Su mahapun en duminiyà ki Pilato sa sabuwa ha sumusunud hi Jesus ha iyan si Jose sa sapian ha taga-Arimatea daw panayua sa lawa hi Jesus. Insugù hi Pilato ha saena iila kandin ta daw makalebeng din. 59Aman tinimù hi Jose sa lawa hi Jesus daw bungkusi hu bag-u daw maputì ha manggad 60daw itagù din duun hu bag-u din pa pinabangbangi ha dampiyas. Inipelan din haena hu adagi ha batu dayun minipanaw. 61Si Maria Magdalena daw su sabuwa ha Maria tagpinuuwà sidan atbang taena ha lebeng.

Sa Pagbantay Hu Lebeng

62Su maisab ha aldaw daw Aldaw en hu Paghimlay namandiyà ki Pilato sa mga labaw ha sinaligan hu paghalad daw sa mga Parisiyu 63hu kagi dan, “Natiman-an day sa inikagi taena ha limbungan su bubuhay pa ha mabanhaw dà kun ku maiwas sa tatulu ha aldaw. 64Aman palig-eni nu haena sa lebeng din taman hu tatulu ha aldaw ta daw harì matakaw sa lawa din hu mga tinun-an din, ta kan ku ikagiyan dan sa mga etaw ha nabanhaw dà daw dayunan dan limbungan sa mga etaw labaw pa dì su anay.”

65Tuminubag si Pilato, “Dumaha nuy sa mga sundalu daw lig-eni gayed su lebeng.” 66Aman inelegan dan haena sa lebeng daw lig-eni pinaagi hu pag-ugsak hu timaan duun ku batu daw pinabantayan hu mga sundalu.

Currently Selected:

Mateo 27: bkd

Highlight

Copy