Marcos 4

Sa Pananglitan Mahitenged Hu Binhì

(Marcos 4:1-9; Mateo 13:1-9; Lucas 8:4-8)

1Amin panahun ha si Jesus migtudlù en paman duun hu kilid taena ha danaw. Tumenged ta madakel tungkay sa mga etaw ha nangaamul-amul diyà ta kandin mininuu haena duun hu barutu na sa mga etaw diyà dà ta gaun hu pagpaliliman kandin. 2Dayun madakel sa mga intudlù din kandan pinaagi hu mga pananglitan ha tagyanaen, 3“Magpaliliman kaw kanak. Amin etaw ha duminiyà ta uma hu pagpamegas. 4Su isawed din haena sa binhì amin diyà dà nakatanà ta dalan aman pinanukà hu mga tagbis. 5Amin daan binhì ha duun nakatanà hu batuwen. Saena laus dà lumineteb ta atiyuay dà sa pisà duun, 6ba su sildahan hu tungkay mapasù sagunà dà haena nangagangu ta hurà man panggamut. 7Amin daan binhì ha duun nakatanà hu sampiniten. Tuminubù daan haena ba naenep dà hu mga sampinit aman hurà pamunga. 8Ba amin binhì ha duun nakatanà hu balumbun ha bugtà. Saena tuminubù daan daw namunga gayed, sa duma tigkatluan sa bunga din amin daan tigkaeneman daw amin daan tignanggatus.”

9Dayun si Jesus minikagi pa, “Henhenaa nuy gayed sa napaliman nuy ha inikagi ku.”

Sa Katuyuan Hu Mga Pananglitan

(Marcos 4:10-12; Mateo 13:10-17; Lucas 8:9-10)

10Su maman-awà en diyà sa duma ha mga etaw, sa mga tinun-an hi Jesus daw sa duma pa, nanginginsà ta kandin mahitenged taena ha mga sanglitanan. 11Inikagiyan din sidan, “Sa inlilung su anay mahitenged hu pagharì hu Dios impadayag en inyu. Ba sa duma ha mga etaw tinudluan ku pinaagi hu mga pananglitan 12ta daw,

‘Mag-ahà sidan ba harì makaindan daw magpaliliman daan sidan ba harì makasabut, ta ku pakaindan pa daw pakasabut ngaay sidan maghinulsul gayed hu mga salà dan daw pasayluwen sidan hu Dios.’”

Sa Kahulugan Hu Pananglitan Mahitenged Hu Binhì

(Marcos 4:13-20; Mateo 13:18-23; Lucas 8:11-15)

13Inikagiyan hi Jesus sa mga tinun-an din, “Hurà nuy ba diay kasabut haena sa pananglitan? In-inuwen nuy sa pagpakasabut hu duma ha mga pananglitan? 14Saena ha insawed ha binhì hu namegas iyan sa lalang hu Dios. 15Su binhì ha diyà dà nakatanà ta dalan iyan su mga etaw ha nakapaliman hu lalang hu Dios ba sagunà pakauma si Satanas daw agawen din sa napaliman dan. 16Su binhì ha duun dà nakatanà hu batuwen iyan su mga etaw ha nakapaliman hu lalang hu Dios daw sagunà duminawat taena ha malipayen. 17Ba tumenged ta harì agpanggamut sa pagtuu dan saena harì en agkalugay. Ku makauma sa malegen ha alantusen daw pasipalahan sidan tumenged hu pagdawat dan hu lalang hu Dios sagunà dà sidan ag-endà hu pagtuu. 18Su binhì ha duun nakatanà ku sampiniten iyan su mga etaw ha nakapaliman en hu lalang hu Dios. 19Ba tumenged hu mga kasamukan dan dini ta kalibutan daw hu kabayà dan ha magsapian sidan daw hu kaayat hu madakel ha mga butang, sa lalang hu Dios agkalipatan dan dà aman harì en haena agpamunga diyà ta kandan. 20Ba su binhì ha duun nakatanà hu balumbun ha bugtà iyan su mga etaw ha nakapaliman hu lalang hu Dios daw nakasabut taena aman agpamunga. Sa duma agpamunga hu madakel, sa duma tumanan dà daw sa duma atiyù dà.”

Sa Sulù Duun Hu Ugsakà Ha Matangkaw

(Marcos 4:21-25; Mateo 5:15; 13:12; Lucas 8:16-18)

21Uminikagi si Jesus, “Hurà etaw ha tagtutud hu sulù ha bà din dà agpalangkebi hu bakag daw ku bà din dà ba daan igpadidalem duun hu katri, ba saena iluntud din gayed duun hu ugsakà ha matangkaw. 22Sa alan ha iglilung iman makahiwal dà asem ku malugay daw sa harì iman tag-ikagiyen mapaliman dà asem ku malugay. 23Henhenaa nuy gayed sa napaliman nuy ha inikagi ku.”

24Daw inikagiyan daan sidan hi Jesus, “Panday kaw gayed magpaliliman, ta ku inu kadakel sa ig-ila nuy iyan daan haena kadakel hu ig-ila inyu hu Dios daw labaw pa sa iila din dì hu kinahanglanen nuy. 25Sa etaw ha amin en kandin mailahan hu tungkay pa gayed madakel, ba saena ha hurà din en hu kandin bisan su iyan-iyan din dà agtimuen pa gayed haena diyà ta kandin.”

Sa Pananglitan Mahitenged Hu Pagtubù Hu Binhì

26Si Jesus uminikagi, “Sa pagharì hu Dios agkailing taini. Amin etaw ha namegas hu binhì duun hu uma din. 27Bisan daleman daw ku aldaw, ku tagtiduga su etaw daw ku pupukaw ba su binhì din agtubù gayed bisan ku harì din agkatun-an ku agkainu-inu ha paagi, 28ta agtubù haena hu kandin dà. Una lumeteb haena dayun mandahun human agpamunga. 29Ku mahinug en haena legtayen hu tag-iya duun.”

Sa Pananglitan Mahitenged Hu Pag-adagi Hu Tagharian Hu Dios

(Marcos 4:30-34; Mateo 13:31-32, 34; Lucas 13:18-19)

30Si Jesus minikagi, “Inu pa sa agpailingan ku hu pagharì hu Dios? 31Agkailing haena hu atiyuay gayed tungkay ha lisu ha impamegas. 32Ba ku tumubù en mabuhat ha tungkay kinaadagiyan ha pamulahen daw sa mga panga din mabuhat ha salagà hu mga tagbis.”

33Pinaagi hu madakel ha mga sanglitanan sa lalang hu Dios inikagi hi Jesus diyà ta kandan sumalà hu agkasabut dan. 34Sa alan ha inikagi din kandan pinaagi dà gayed hu mga pananglitan. Ba ku iyan dà sidan hu mga tinun-an din igsaysay din kandan sa kahulugan taena.

Sa Pagbaldeng Hi Jesus Hu Kalamag

(Marcos 4:35-41; Mateo 8:23-27; Lucas 8:22-25)

35Su mahapun en inikagiyan hi Jesus sa mga tinun-an din, “Lumayun kuy duun taini ha danaw.” 36Aman inawaan dan sa madakel ha mga etaw dayun impalulan hu mga tinun-an si Jesus duun ku barutu. Amin pa daan mga barutu ha namanduma kandan. 37Su taglulan en sidan tigkan namagyu aman nataguan hu wahig haena sa barutu na apit en sidan agkalened. 38Ba si Jesus tagtidugahà duun hu alunà diyà ta pulù taena ha barutu. Aman pinukaw hu mga tinun-an din hu kagi dan, “Manunudlù, harì ka ba agkasamuk ku mangalemes kuy?”

39Migbangun si Jesus daw baldenga sa kalamag daw mga baled aman sagunà migleneng.

40Inikagiyan din su mga tinun-an din, “Imbà kaw man agkangahaldek? Harì kaw ba diay agsalig kanak?”

41Sa mga tinun-an tungkay gayed nangahaldek daw migpainsaay, “Inu gid haini ha etawa ha bisan sa kalamag daw mga baled agtuu kandin?”

Currently Selected:

Marcos 4: bkd

Highlight

Copy