Yohana 17

Yéésù nyɛ̀m Vɛnɛ́b tə́ nɛ́b sáànmbə̀ oò bəd yílú

1Zɔ̀ŋ aa Yéésù gám bɛ́' nwɔŋ aa kàangə́, zá' núù lɛgə́ poú, bít bàà: «Báá, sɛŋ wə́ə́ì Wàà ń kaŋsɛ́l piìnmbìá, bɔ̀b Wàà ń kɔ̀, oò pii n kaŋsɛ́lá. 2Kàandə, ń piiù kpɛŋsɛ́lì nɛ́b bəd yílə́ kóólé, bɔ̀b oò kɔ̀ oò pii nɛ́b bəraa ḿ piiù rə, gɔ̀ŋsə́ aa bɛ́d bə gá roó. 3Gɔ̀ŋsə́ aa bɛ́d bə gá rə, aa yóo' nɛ́b bəd boò gàb kúnú, ámda ń kùmsə̀n Vɛnɛ́b vɛ́nà bìá, ám nə́ŋ̀ní, bít boò gàb Yéésù Krístù, nɛ́ŋə̀ aa ń tùmà roó. 4Mə́ ì' kaŋsɛ́l ámbə̀ì zɔ̀ŋə yɛ́b ba, kə̀ ma'ǹ bɛ́'ǹmbə̀ tùsaa ń pii máà, máà mà' roó. 5Bə́ŋyée gə́, Báá, ǹ káŋ mə́ kíìn ám númú, kə̀ kaŋsɛ́l laa nyɛdkè aa mə́ bɔ̀bà ám naà, bɔ̀b bə́ŋ̀ yɛ́b séé síndoó.

6«Ń pii mə́ nɛ́b kam zɔ̀ŋə yɛ́b bə bə̀ bərá, mə́ ì' bə̀ nɛɛ̀n aa ń kùm dú roó. Nɛ́b aarə, bə̀ kùmà nɛ́b ḿ bərá, bít ń pii bə̀ sə̀n máá nɛɛ̀n tɛ́mú. Bə̀ ləə insánke ń yàá. 7Bə́ŋyée bə̀ gàb yàá, in aa ń pii máà rə gə́ kóólé, vúgà ám naà vɛ́nà. 8Kàandə, nwɔŋ bəraa ń pii máà rə, mə́ sán bə̀ yàá, bít bə̀ kè' yàá. Bə̀ kè' yàá vɛ́nà, mə́ vúgà ám sunú, bít bə̀ kè' yàá, ámda ń tùm máà sùnú.

9«Mə́ tə́ən nyɛɛ̀m kə̀ boò ra. Mə́ nyɛ̀m m yɛ́b bə̀ gá, zá mə́ tə́ən nyɛɛ̀m nɛ́b bəraa ḿ pii máà rə bìá. Kàandə, nɛ́b aarə, nɛ́b ḿ bərá. 10In aa mə́ kə̀ naà rə gə́ kóólé, ám bìá. Bít in aa ń kə̀ naà rə gə́ kóólé, máá bìá. Kaŋsɛ́l mə́ i'míìn tə́ boò rú. 11Máá mə́ kùm zɔ̀ŋə yɛ́b bə sɔ̀ŋ sé. Zá boò gə́, bə̀ tə́ zɔ̀ŋə yɛ́b ba. Bə́ŋyée mə́ tə́ ɛɛ̀m ám sunú. Báá Gìdńná, ǹ nwán bə̀ kə̀ kpɛŋsɛ́l ám nɛ́gə́lə́ bìá. Kpɛŋsɛ́l ám nɛ́gə́lə́ bə̀ aa ḿ pii máà roó, bɔ̀b boò kùm nə́ŋ̀ní, kìínmbə̀ máá kə̀ ám tá, bə́n kuùm nə́ŋ̀ní rə kíin. 12Sɛŋ aa mə́ kùm kə̀ boò tə́ rə, mə́ nwán bə̀ kə̀ Kpɛŋsɛ́l ám nɛ́gə́lə́ bə̀ aa ń pii máà roó. Kóó nɛ́ŋə̀ nə́ŋ̀má bɔ̀b sé, sìná nɛ́ŋə̀ aa dá bɔ̀bm̀, bɔ̀b nwɔŋ aa bádmíìn Núúboòd Gìdńnú rə, oò ma'míìn kíìn vɛ́nà roó. 13Zá bə́ŋyée mə́ tə́ ɛɛ̀m ám sunú. Bə́ŋ̀ mə́ tə́ zɔ̀ŋə, mə́ gám taà nwɔŋ aa kàani, bɔ̀b tɛ́m boò oò nyìì kə̀ làmkè mə́ra. 14Mə́ sán bə̀ nwɔŋ ń da, bít nɛ́b zɔ̀ŋə yɛ́b bə bə̀ zèè bə̀ kúnú. Kàandə, bə̀ nɛ́b zɔ̀ŋə yɛ́b bə bə̀ gá, kìínmbə̀ máá kɔ̀ mə́ nɛ́d zɔ̀ŋə yɛ́b bə bə̀ gá rə kíin. 15Mə́ nyɛ̀m m də, bɔ̀b ǹ vú' bə̀ kíìn zɔ̀ŋə yɛ́b bə gá, zá mə́ í' ǹ súú bə̀ Nɛ́ŋə̀ Vaksə́ nɛɛ̀n tɛ́mú. 16Bə̀ nɛ́b zɔ̀ŋə yɛ́b bə bə̀ gá, kìínmbə̀ máá kɔ̀ mə́ nɛ́d zɔ̀ŋə yɛ́b bə bə̀ gá rə kíin. 17Ǹ mà' vɛ́nà ń oò mà' tù' boò rú, bɔ̀b boò bíl nɛ́b ḿ bərá. Nwɔŋ ń tə́ vɛ́nà. 18Mə́ tùm bə̀ zɔ̀ŋə yɛ́b ba, kìínmbə̀ ám kɔ̀ ń tùm máà zɔ̀ŋə yɛ́b bərə kíin. 19Mə́ pii yíl mə́ tə́ boò bòórú, bɔ̀b vɛ́nà ń oò bí' bə̀ nɛ́b ḿ bərá.

20«Mə́ nyɛ̀m m nɛ́b sáànmbə̀ bəraa yée yílə́ ní sé. Zá mə́ nyɛ̀m m kə̀ nɛ́b aa bə̀ dá mə́ bagǹ, nwɔŋ bəraa nɛ́b sáànmbə̀ bəd bə̀ tə́ baàn də bòórú roó. 21Mə́ tə́ən nyɛɛ̀m, bɔ̀b nɛ́b bəd kóólé, boò kùm nə́ŋ̀ní. Báá, boò wál kə̀ obə́n tá, kìínmbə̀ ám kɔ̀ ń wál kə̀ máá tá, máá kɔ̀ mə́ wál kə̀ ám tə́ rə kíin. Mə́ tə́ən nyɛɛ̀m boò kùm nə́ŋ̀ní, bɔ̀b nɛ́b zɔ̀ŋə yɛ́b bə bə̀ bəd boò gàb kúnú, ámda ń tùm máà sùnú. 22Mə́ pii bə̀ kaŋsɛ́l aa ḿ pii máà roó, bɔ̀b boò kùm nə́ŋ̀ní, kìínmbə̀ ń kə̀ máá tá, bə́n kuùm nə́ŋ̀ní rə kíin. 23Mə́ tə́ boò rú, kìínmbə̀ ámkɔ̀ ń tə́ máá rú rə kíin. Kə̀ aakíin də, bə̀ dá taà kuùm nə́ŋ̀ní vɛ́nà. Kàanyée gə́, nɛ́b zɔ̀ŋə yɛ́b bə bə̀ dá taà gabàá, ń tùm máà sùnú. Bə̀ dá gabm̀ gə́, ń í' bə̀ tə́ kúnú, kìínmbə̀ nɛɛ̀n aa ń í' mə́ rú rə kíin.

24«Báá, ń pii mə́ bə̀ yàá, mə́ í' rə, boò kùm kə̀ máá tá, zɔ̀ŋ aa má kuùm bərə ba. Mə́ í' boò bé' kaŋsɛ́l laa nyɛkè aa mə́ kə̀ naà roó. Ń í' mə́ kúnú, ḿ pii máà taà kaŋsɛ́l laa nyɛdkè aa roó, bɔ̀b bə́ŋ̀ yɛ́b séé sé. 25Báá wɔ̀ɔ̀làá, nɛ́b zɔ̀ŋə yɛ́b bə bə̀ gàb m sé. Zá máá gə́, mə́ gàb m yàá, bít boò kɔ̀ bə̀ gàb yàá, ń tùm máà sùnú. 26Mə́ mà' boò gàb nə́gə́l ń da, nɛɛ̀n aa ń kùm dú roó, bít má diìn boò bə̀ baàn bə̀ ní sɔ̀ŋ, nɛɛ̀n aa ń kùm dú roó. Kə̀ aakíin də, í'sɛ̀l lùm nə́ŋ̀ní bə̀ dá taà bɔbàá, í'sɛ̀l aa ń kə̀ máá roó; bít má kuùm boò rú.»

Currently Selected:

Yohana 17: SLNT98

Highlight

Copy