Luka 13

Ìì pɛ́n tɛ́m íí ra; síngə́, val dá ii kíìn koràá

1Sɛŋ də rú rə, nɛ́b kam kùm wərə̀ kə̀ Yéésù tá. Bə̀ bààù in aa taà nɛ́b kam Galili yɛ́b bə bə̀ yílə́ roó. Pilatu yaà lòd nɛ́b Galili bə̀ bəraa rə kúnú, sɛŋ aa bə̀ tə́ Vɛnɛ́b pɔ̀bm̀ doó. Pilatu yaà wál nɛ́b bəraa rə nyɛ̀lə́m kə̀ gɔ̀g bəraa ìì mà' kə̀ sadaka rə nyɛ̀lə́m tá. 2Yéésù kè' í' bə̀, bàà: «Íí sèl lə, íí bə̀ nɛ́b Galili bə̀ bəraa bə̀ í' bə̀ búúd kə̀ aakíin yérə, í' tə́ baànmbə̀ ìì kùmsə̀n nɛ́b invaksə́ bə̀ ma'ǹ gbàád bərá, bít ìì kànsə̀n nɛ́b Galili bə̀ kam bəraa nyɛ́d deè? 3Ə́ùwə́, mə́ tə́ ii kíìn baanàá, zá íí pɛ́n tɛ́m íí bàg Vɛnɛ́b síngə́, val dá ii kodǹ íí kóólé, kìínmbə̀ boò kíni. 4Bít íí sèl lə, íí bə̀ nɛ́b bəd kób zè dàgwà aa wúl gbà'á Silowe bə̀ wɔb boò yílú, val kòd bə̀ rə, ìì kànsə̀n nɛ́b kam bəraa Urusalima bìlú rə kóólé kə̀ invaksə́ ma'ǹmbèì? 5Ə́ùwə́, mə́ tə́ ii kíìn baanàá, zá íí pɛ́n tɛ́m, íí bàg Vɛnɛ́b síngə́, val dá ii kodǹ íí kóólé, kìínmbə̀ boò kíni.»

Gààm aa lɛ̀b yɛb síndə zagəmá

6Bítsɔ̀ŋ, Yéésù bàà bə̀ zagəm aa yóo: «Nɛ́ŋ váàndo nə́ŋ̀ ləg gààm nyìì oò lɛsú, zá' yaà gààm yɛb yɛbm̀bìá. Zá yaà bɔ̀b gààm də lɛ̀b sé. 7Bàà nɛ́d lɛ' bə̀ nwáàn kə̀ aakíin: ‹Ǹ ɛ̀g núùá, bə́ŋyée mà'ì zèd toora, mə́ yaaì gààm yɛb yɛbm̀bə̀ gààm aa nyìírú gə́, mə́ bɔ̀b wàà bə gá. Dùb m̀ lɛ́'ù kúnú. Kə̀ níìbə̀ dìì tə́ taà zɔ̀ŋ daŋ̀ tɛdńní gú?›

8«Zá nɛ́d lɛ' bə̀ nwáàn kè' í'ù, bàà: ‹Gbàároá, ǹ dààù zèraa yée sɔ̀ŋ. Má dɛ́l gbə'ǹ kaàl oò dùú, bít máù yɛ́b lììmkè kə́ràá. 9Kàandə, kam nə́ŋ̀ gə́, dá yɛb kíìn lɛbm̀ kéénzèd kiná. Lɛ̀b sín gə́, ń dáù taà dubm̀ lɛ́'nàá.› »

Yéésù gáŋ nɛ́ŋ kéèndo nə́ŋ̀ pɛŋ, nyàm nyi'ǹmbə̀ sɛŋú

10 Nyàm nyi'ǹmbə̀ sɛŋú, Yéésù sán nɛ́b bəd in Yahudu bəd wúlwáàlbə̀ bərú. 11Sɛŋ də, nɛ́ŋ kéèndo mad bə̀ nə́ŋ̀ kùm wərà' mà'ì zèd kób zè dàgwà, kə̀ nwul vaksə́ nə́ŋ̀ naú, tɔ̀' sááù pɛŋ naú, bán pɛŋ wɔ̀'ǹmbə̀ lɛgə́ gá. 12Zɔ̀ŋ aa Yéésù bé'ù kàangə́, dɛ̀rə̀ kúnú, bít bààù: «Wàà kéèná, si' ń gágì marú.» 13Zíg nɛɛ̀n oò yílə́ gə́, bít kə̀ nwɔŋ aa nuù yée kíinní, zá' dìì gə̀ə̀nì lɛgú, bít pìì Vɛnɛ́b káŋ̀mbìá.

14Zá nɛ́ŋ gbàáro Yahudu bəd wúlwáàlbə̀ rú bə̀ rə, tɛ́m làmə̀ kə̀ tùsaa Yéésù yaà mà' kə̀ nɛ́ŋ kéèndo aa si' gáŋ̀mbə̀ marú, nyàm nyi'ǹmbə̀ rú yérə sé. Kàanyée gə́, bàà nɛ́b zùúm aa kùm wərə̀ rə kə̀ aakíin: «Sɛŋ bəraa íí dá kə̀ tù' ma'ǹ də, tə́ nɔ̀ŋgɔ̀s. Sɛŋ bəraa rə ba, yaà ìì gáŋ taà si' íí bərá, zá nyàm nyi'ǹmbə̀ sɛŋə́ gá!»

15Báátììkpɛ̀ŋ kè' í'ù kə̀ nwɔŋ aa yóo: «Aíra, íí nɛ́b gú' bàrə̀b bə̀ bəraa yóo! Nyàm nyi'ǹmbə̀ bə gə́, kóó nɛ́ɛ̀réè bìnlɛ́' nàà oò ságú, sínkɔ̀ bìnlɛ́' vɔɔmlə̀ oòra, ààù nwuurú, wəl dáàn nyə́ə̀nmbə̀ géè? 16Bít nɛ́ŋ kéèndo aa yérə, Abraham kuná. Satan tabə̀, mà'ì zèd kób zè dàgwà. Sɔ̀ɔ̀n oò bə̀ biìn lɛ́'ǹmbə̀ nyàm nyi'ǹmbə̀ bə sínì?»

17Nwɔŋ aa Yéésù kè' í' yée, pii ɔ̀dmáàn oò bəd kóólé sə́ə́mnúùì gbàákù. Zá nɛ́b zùúm bəd kóólé, ìì nyìì kə̀ tɛ́m làmkèá, tù' sɔ̀ɔ̀n bəraa Yéésù mà' rə bòórú.

Yéésù bàà zagəm nwɔŋ ɔ̀d, kpànwà lɛ̀ɛ́ŋə̀ yílú

(Mata 13.31-32; Markus 4.30-32)

18Yéésù bàà: «Sɛŋ aa Vɛnɛ́b dá Gààd ləə̀n dú nɛ́b bəd yílə́ rə, lúŋ tə́ níì gú? Máù də́'ǹ kə̀ níì gú? 19Vɛnɛ́b Gààd lúŋ tə́ kpànwà lɛ̀ɛ́ŋke aa nɛ́ŋ váàndo nə́ŋ̀ pà', bít dá wùù oò lɛsə́ rə kíin. La' yàá, kàŋ bíl tééì gə́, bít núú lɛgə́ paà bə̀ bəd yaà bə̀ kùd wàsàg nɛɛ̀n oò bəd də ba.»

Inváàndo zagəmá

(Mata 13.33)

20Yéésù bàà sɔ̀ŋ: «Kə̀ níì má taà báàn Vɛnɛ́b Gààd də́'ǹmbə̀ gú? 21Vɛnɛ́b Gààd lúŋ tə́ inváàndo aa nɛ́ŋ kéèndo nə́ŋ̀ pà', bít páá nyágə́l zəəm kílo laa nə́ŋ̀ zè núnə̀ rú roó. Wál dɔ̀g, bɔ̀b oò zá' zəəm oò wùb kíìn kə̀ zɔ̀ŋtá.»

Nɛ́ɛ̀réè dá sə̀n piìn Vɛnɛ́b gààrə́ gú?

(Mata 7.13-14, 21-23)

22Yéésù tə́ sɛ̀ɛ́n kpaŋ̀ oò ɛɛ̀m Urusalima bìlə́ yée gə́, taà pìì bìl gbàád bərú, kə̀ bìl bɛ̀ŋ́sə̀ yɛbú, bít sán nɛ́b bəd Vɛnɛ́b nwɔŋá. 23Nɛ́ŋə̀ nə́ŋ̀ dɛ̀rə̀: «Báátììkpɛ̀ŋá, nɛ́b aa Vɛnɛ́b dá bə̀ súùn də, ìì tə́ zɔ̀gɔ̀ níì?»

Yéésù kè' í' bàà: 24«Ìì nɔ̀ŋ piìnmbə̀ waàl bo'kè rú, Vɛnɛ́b gààrú. Kàandə, mə́ tə́ ii kíìn baanàá, nɛ́b bəd zùúm bə̀ dá saàn piìnmbə̀ rú wərà, bít ìì bán gá.

25«Màìgə́ nɛ́d ligə̀ bə̀ zá'ì lɛgú, bít ke' waàlì gə́, íí dá kuùm gbarú, íí dá piìn waàl tɔɔ̀mbìá, bít íí dá baàn: ‹Gbàároá, ǹ kèd bə́ waàlá.› Dáiyà ke'ǹ í'ǹnà wúu nuú: ‹Mə́ gàb zɔ̀ŋ aa íí vúgà bərə sé!›

26«Bítsɔ̀ŋ, aí kɔ̀ íí dáù sɔ̀dǹ baànmbə̀: ‹Bə́ líí in, bə́ nyəə wəl kə̀ ám tá, ń sán nɛ́b bəd in kpaŋ̀ bəraa bə́ bìlə́ rə ba.›

27«Bít dá ii baàn sɔ̀ŋ: ‹Mə́ gàb zɔ̀ŋ aa íí vúgà bərə sé. Ìì gbad kíìn máá sunú, nɛ́b aa íí tə́ invaksə́ bəd ma'ǹ yóo!›

28«Íí dá Abraham, Isiyaku, Yakubu, bít kə̀ Vɛnɛ́b gbantumsə̀ bəd tə́ kóólé, bé'ǹ zɔ̀ŋ aa Vɛnɛ́b dá gààd ləə̀n bəroó. Zá aí gə́, lɛ́' bə̀ dá ii daàn gbaarú. Kàandə, íí dá taà kpəənàá, bít íí dá taà nə́gə́l fu'nàá! 29Nɛ́b bəd dáà vúgǹnà nyàm go' ba, bít kə̀ nyàm pìì ba, kál ba, bít kə̀ pɛ́rə̀ gúuú, yaà ìì dá wálke gbèd kuùm líìn zɔ̀ŋ aa Vɛnɛ́b dá gààd ləə̀n bəroó. 30Bít kàanyée gə́, nɛ́b kam bəraa nyàam bə̀ yɛb bɛ̀ŋ́sə̀ bəd də, bə̀ dá kuùm nɛ́b yíl bə̀ bərá, bít nɛ́b aa nyàam bə̀ nɛ́b yíl bə̀ bəd də, bə̀ dá kuùm yɛb bɛ̀ŋ́sə̀ bərá.»

Nɛ́b Urusalima bə̀ bəd bə̀ zɛ̀ŋ Yéésù sé

(Mata 23.37-39)

31Sɛŋ aarə bərə, Farisa bəd gə̀b kam gbarà Yéésù sunú, bít ìì bààù: «Ǹ zá' kíìn zɔ̀ŋə, ǹ ɛ̀m yɛ́b nə́ŋ̀ gɔ̀ŋ ba. Kàandə, gààd Hirudus í' n tə́ lo'ǹmbìá.»

32Yéésù kè' í', bàà bə̀: «Ɛ̀m dáá ìì bàà nɛ́ŋ váàndo tɔ̀ɔ̀l bə̀ ma'ǹ aa yée: ‹Ìì kìì nwɔŋ máà kúnú. Nyà'aa yóo, kə̀ nwúndùá, má nwul vaksə́ bəd niŋàá, bít má nɛ́b mad bə̀ bəd si' gáŋàá; bít sɛŋ toorə bə gə́, má tù' mə́ ma'ǹ bɛ́'nàá.› 33Zá má kpaŋ̀ mə́ ɛɛ̀m dáàn kə̀ númú, nyà'aa yóo, nwúndùá, kə̀ kééná. Kàandə, sɔ̀ɔ̀n Vɛnɛ́b gbantumsə̀ lo'ǹmbə̀ bìl bòórú sé; boò lò'ù Urusalima bìlú.»

34«Káiya, íí nɛ́b Urusalima bìlə́ bə̀ bərá, nɛ́b aa lòd íí sáá Vɛnɛ́b gbantumsə̀ bəd, bít íí tə́ nɛ́b aa Vɛnɛ́b tùmà rə laàn lodǹ kə̀ bəŋ doó! Mà'ì sɛŋ leè, mə́ í' taà nɛ́b ḿ bəd dɛdǹ wáàlǹmbə̀ máá sunú, kìínmbə̀ kòò wàà bə̀ dɛ̀d tə́ yɛb oò bəd wáàl oò bɛgə̀l dùù rə kíin gú? Zá aí gə́, íí í' sé! 35Ìì ɛ̀ga! Wúl íí yaà dá kuùm ígá. Bít mə́ tə́ ii kíìn baanàá' Íí bé' mə́ gá, yaà dá wə́ə̀n sɛŋ aa íí dá baàn: ‹Vɛnɛ́b oò zíg màn aa tóò yaànà Báátììkpɛ̀ŋ nə́gə́lə́ rə nɛɛ̀n yílə́ rə bə zé!› »

Currently Selected:

Luka 13: SLNT98

Highlight

Copy