Cenisihs 23
23
Sera Ahpii Kii'ishkwaapimaatisitc
1Sera (Sarah) hsa ninkotwaahk niishtanashiniishwaahso (127) ehtahso pipoonwetc mii hsa 'i kaakii ishkwaa pimaatisitc. 2Weti tahsh Kiriaht Arpa (Kiriath Arba), Hiiparan (Hebron) kaye ecikaatek Kenan (Canaan) ahkiink kiihtashi ishkwaa pimaatisi. Eparahaam (Abraham) hsa kii‑ishaa weti ekii mawimaatc Serawan.
3Kiihpasikwii tahsh ekii onci maacaatc eshi pimihshininitc ini wiiwan ekii ishaatc eshi'ayaanitc Heht (Heth) kaatinowinitc pemaatisinitc. Miihsh o'o kaa'inaatc, 4#Heb 11.9,13; Act 7.16. “Nimpiiwitew iitok o'omaa ewiicitaaminakook. Taka kika ataamininim ahki keshi na'inakwaa keishkwaa pimaatisiwaatc.”
5Miihsh o'o Eparahaam kaa'ikotc Heht kaa'inimintc, 6“Nintookimaam, kiniikaanentaakos iitok o'omaa ahkiink. Pisaan ihsa koonaapantan maawac wenishihshinkin na'initiiwikamikoon keshi na'ihshimatwaa nepowaatc. Kaawiin hsa awiya kaatahshiyaank kitaa anwehtaakoohsii kaashi na'ahsankitwaa nepowaatc, wii ishi na'ahsatc kaakii ishkwaa pimaatisitc kiwiiw.”
7Miihsh Eparahaam kaaishi animihkohtaatc enaahsamiinitc Heht kaatinowinitc i'imaa otahkiiminink. 8Miihsh o'o kaa'inaatc, “Kiishpin hsa inentamek pisaan cina'ihshimak kaakii ishkwaa pimaatisitc, taka hsa kanootamawihshik ciawi kanoonek a'a Iihparan (Ephron) wetetetc Soohaar (Zohar) enimintc, 9eantawentamaan ciataamak i'i kaatipentank piintaapihk Maahkpila (Machpelah) eshinihkaatek eyaanik weti wiihkweya'ii mihshawahkamik. Kakwecimihk minihk iko enakintank ewii misiwe tipa'amawak enaahsamiiwek. Niin itahsh ewiih tipinawewisiyaan i'i na'initiiwikamik.”
10A'a hsa Iihparan okii wiitapimaa' i'i kotak Heht kaatinowinitc weti ootenaank eonaahkonikewaatc. Miihsh o'o kaashi nahkwehtank Eparahaaman cinoontaakotc kahkina Heht kaatinowinitc i'imaa eyaanitc. Miihsh o'o kaaihkitotc: 11“Nintookimaam, kika miinin hsa kahkina i'i mihshawahkamik i'i kaye piintaapihk. Mii hsa piko 'i emiininaan enaahsamiiwaatc oko kahkina nimpimaatisiimak. Kimiinin citipinawewisiyan keshi na'inatwaa kinipoomak.”
12Miitahsh miinawaa Eparahaam kaaishi animihkohtaatc enaahsamiinitc i'i Heht kaatinowinitc. 13Miihsh o'o kaa'inaatc Iihparanoon kahkina i'imaa eyaanitc cinoontaakotc, “Taka pisintawihshik. Ninka misiwe tipa'aan ihsa enakintek i'i mihshawahkamik. Otaahpinan o'o nintipa'ikewin pisaan itahsh wa'a cina'ihshimak kaakii ishkwaa pimaatisitc.”
14Iihparan hsa tahsh okii'inaan Eparahaaman, 15“Nintookimaam, pisintawihshin, niiwaahk (400) minihk waapaapihko shooniyaak hsa ahpiihtentaakwan i'i mihshawahkamik. Kaawiin maawiin kekoon kitaa inentansiimin. Pisaan na'ihshim kaakii ishkwaa pimaatisitc.” 16Eparahaam hsa kii‑inentam, miihsh kaaishi tipa'amawaatc ini Iihparanoon kaakii ishi wiintamaakotc minihk kaainakintenik. Heht kaatinowiwaatc iitok kiinoontamok minihk kaainakitenik. Niiwaahk (400) minihk waapaapihko shooniyaan minihk hsa kii‑ishi tipa'ike. Mii hsa 'iwe nahke ataawewikimaak kaa‑aapacihtoowaatc i'i tino tipa'ikewin.
17Mii hsa tahsh o'o nahke Eparahaam kaakii ani onci tipentank i'i ahkiini waapanonk inahke eyaanik Mamri, ciikaya'ii inahke kaashi ayaak Maahkpila (Machpelah) eshinihkaatenik. Kaye hsa mihshawahkamik, i'i kaye piintaapihk kiihtako miinaakaniwi, i'i kaye kahkina mihtikoo' kaakiih patahkisonitc i'imaa waahkaaya'ii. Mii hsa 'oweni Iihparan (Ephron) kaakiih tipentankipan ahkiini. 18Mii hsa tahsh kaakii inakintaminitc kahkina Heht kaatinowinitc wenaahkonikenitc iinsan Eparahaam ehtipinawewisitc i'i ahkiini.
19Miitahsh Eparahaam kaakii ishi na'inaatc wiiwan Serawan (Sarah) i'imaa piintaapihk Kenan (Canaan) ahkiink. 20I'i hsa mihshawahkamik tepentaminihpan i'i Heht kaatinowinitc, i'i kaye piintaapihk. Miitahsh Eparahaam kiihtipinawewisitc i'i piintaapihk ewii inaapacihtootc na'initiiwikamik.
Currently Selected:
Cenisihs 23: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
