Cenisihs 24
24
Aaisik Kii'onaapamimintc Kewiiwitc
1Aasha tahsh Eparahaam (Abraham) wiinke kiiahkiwensiiwi, ekiih kihci tahso pipoonwetc; kaaTipencikenitc itahsh misiwe inahke okii ishi shawenimikoon. 2Miitahsh Eparahaam kaa'inaatc otanohkii'aakanan maawac kaakiih sasiihkisinitc kaakii naakacihtoonitc kahkina otaya'iiman, “Taka ishi ninciinin shiipaa i'imaa nimpwaamink.#24.2 Taka ishi ninciinin shiipaa i'imaa nimpwaamink: Mii hsa 'i kaahtootamowaatc kekoon kiiwii ahpimowaatc kehcinaac iko cipiikonikaatehsininik. 3Kinantawenimin ciahpimoyan kaaTipenciketc, Kishemanitoo tepentank kiishik, ahkiini kaye, ciontinimaahsiwatc ninkosihs kewiiwitc ihkwewan cionciinitc i'imaa eshi'ayaanitc Kenan kaaonciinitc, oko mekweya'ii kaawiicitaamimak. 4Weti tahsh ishaan nintahkiimink, nintinawemaakanak kaaishi'ayaawaatc. Miitahsh weti keontinimatc kewiiwitc Aaisik (Isaac) ninkosihs,” okii'inaan.
5O'o tahsh okii'ikoon otanohkii'aakanan, “Kiishpin tahsh wiin a'a ihkwe wiihpishi kiiwe wiiciiwihsik o'omaa ahkiink; ninka ishiwinaa na kikosihs weti ahkiink kaakiih pi onciiyan,” okii'ikoon.
6Eparahaam tahsh okii ishi nahkwehtawaan, “Kehcinaac iko ishihciken ci‑ishi kiiwewinaahsiwatc weti ninkosihs. 7KaaTipenciketc, tepentank kiishik, ninkii onci saakici antomik ninteten otaawininiink, ahkiink kaye kaakiih tashi nihtaawikiwak. O'o tahsh ninkii'ik kiiahshotamawitc kiiahpimotc, ‘Kipiiwesiimak hsa nimiinaak o'o ahkiini.’ Mii hsa awe kaaTipenciketc keishinisha'waatc otencaliman ciniikaaniihtamawimihk, weti ishi naasihkawimatc ninkosihs kewiiwitc. 8Kiishpin tahsh wiin inentansik a'a ihkwe cipikiiwe wiiciiwihk, mii 'i iinsan cipoonihsek i'i nintahpimowin. Keko tahsh weti ishi kiiwewinaahken a'a ninkosihs,” okii'inaan. 9A'a tahsh anohkii'aakan kii‑ishi ninciini shiipaa opwaaminiink otookimaaman Eparahaaman, ekii ahpimotc citootank kaakii'ikotc ci‑ishihciketc.
10Miitahsh a'a anohkii'aakan kaaishi otaahpinaatc mitaahso (10) opihkwaawikane mihtatimoomini otookimaaman, ekii maacaatc. Okii maaciitoonan kaye pepahkaani kekoonan wenishihshininikin. Kii‑ishaa tahsh Mesopohtemiya (Mesopotamia) ahkiink, kihci ootenaank kaakii ishitaanitc Nehoran (Nahor). 11Ahpii tahsh weti tekohshink okii oshihshimaa' pihkwaawikane mihtatimoo' onta'ipaanink saakici ootena kaakii ayaanik. Aasha tahsh kiiani onaakohshinini, ahpii ihkwewa' kiinihtaa pi naata'ipiinitc. 12Miitahsh kaaishi anami'aatc, “Oo Tepencikeyan, weKishemanitoomihk nintookimaam Eparahaam, taka minohse'ishin noonkom kaakiishikahk, naakohtoon eminotootawatc nintookimaam Eparahaam. 13Inashke o'omaa niniipaw onta'ipaanink, iki tahsh oshkiniikihkwewak ootenaank wenciiwaatc, aasha pisaaka'amook ehpi naata'ipiiwaatc. 14O'o hsa peshik ninka inaa, ‘Taka niihsinan kitahtoopan ciminihkweyaan,’ Kiishpin itahsh ishitc, ‘Pisaan minihkwen, ninka mina'aak kaye kipihkwaawikane mihtatimoomak’, taka mii 'awe keaawitc kaaonaapamimatc ciwiiwitc kitanohkii'aakan Aaisik; miitahsh i'imaa keonci kihkentamaan enaakohtaawatc eminotootawatc nintookimaam,” kii‑ishi anami'aa.
15Cipwaa tahsh kiishi anami'aatc, ihkwewan Oripehkawan (Rebekah) kiihpi takohshin otinimaakaniniink ehpimiwitoonitc ahtoopaan. Oteten tahsh a'a ihkwe Pehtyoel (Bethuel) kii‑ishinihkaasowan. Oohkoman itahsh Milhka (Milcah) kii‑ishinihkaasowan, omihshoomihsan itahsh Nehor (Nahor) kii‑ishinihkaasowan. Eparahaam iitok kiiwiicihkiwe Nehoran. 16Ini tahsh ihkwewan wiinke kiiminonaakosiwan, kiihpehki oshkiniikihkwewiwan#24.16 Pehki'oshkiniikihkwe: Mii hsa wa'a tino ihkwe mahshi kaapapaamenimikohsik ininiwan. kaye mahshi wiihkaa ininiwan ekii wiihpemikohsinik. Kiiniihsaantawewan tahsh eshi moohkiciwaninik nipi, ekii mooshkinepatoonitc ahtoopaan, miinawaa tahsh ekiih pi ahkwaantawenitc. 17Anohkii'aakan tahsh kiiahpahtoo eanta nakishkawaatc ini ihkwewan ekii'inaatc, “Taka pankii kitahtoopaanink onci mina'ihshin,” okii'inaan.
18Miihsh kaa'ikotc, “Nintookimaam, pisaan minihkwen,” okii'ikoon. Miihsh kaaishi niihsinaminitc otahtoopaanini ekii mina'ikotc. 19Kaaishkwaa minihkwetc tahsh o'o okii'ikoon, “Ninka mina'aak kaye kipihkwaawikane mihtatimoomak, piinihsh ci‑ishkwaa minihkwewaatc,” okii'ikoon. 20Miitahsh kaaishi caaki siikinaminitc onipiimini i'imaa wentaakamancikenitc aya'aawihsha'. Miihsh kaaishi niihsaantawenitc miinawaa enaata'ipiinitc, piinihsh kahkina ekii mina'aanitc opihkwaawikane mihtatimooma'. 21A'a tahsh inini okiih kihci kanawaapamaan ekii noontaatihsik, ewiih kihkentank taka kaaTipencikenitc kaaminohse'ikookwen o'o kaakiih piishaatc.
22Ahpii tahsh kaaishkwaa minihkwenitc pihkwaawikane mihtatimoo', anohkii'aakan okii otaahpinaan osaawi shooniyaa waapihkowi oshankwane naapishkikanan kaakii aahkwakinsonitc, niishin kaye kihci osaawi shooniyaa waapihkowi naapinihkaancikana'. 23Miitahsh kaa'inaatc, “Taka wiintamawihshin, awenen wetaanihsimihk. Tawaa na kitete owaahkaa'ikanink keshi nipaayaankipan?” okii'inaan.
24O'o tahsh okii'ikoon, “Niin hsa Pehtyoel otaanihsan. Nintete tahsh omaamaan Milhka ishinihkaasowan. Oteten tahsh Nehor ishinihkaasowan,” okii'ikoon. 25O'o tahsh okii ani'ikoon, “Nimpaahtiinahtoomin ohsha mashkohsiwan, aya'aawihshimiicim kaye, nintayaamin kaye keshi nipe'ikooyan,” okii'ikoon.
26Anohkii'aakan tahsh kiiociciinkwanapiihtaa, ekii anami'ehtawaatc Kishemanitoon, 27o'o ekii ihkitotc, “Tamiikwehciwentaakosi kaaTipenciketc, kaaoKishemanitoomitc nintookimaam Eparahaam. Kaawiin hsa opooni minotootaakohsiin, tepwe kaye otootaakoon i'i kaakii'ikotc. Mayaa hsa tahsh iko niin kaaTipenciketc ninkiih pi ishiwinik eshi'ayaanitc nintookimaaman otinawemaakanini.”
28A'a tahsh ihkwe kiiahpahtoo omaamaan owaahkaa'ikaniniink ekii wiintamawaatc kahkina kaakii ishihsenik. 29A'a tahsh ihkwe Oripehka (Rebekah) okii ayaawaan otawemaan Lepan (Laban) ekii ishinihkaasonitc. Kiiahpahtoowan tahsh onta'ipaanink eshi'ayaanitc ini anohkii'aakanan. 30Shemaak iinsan iko ahpii ewaapamikotc otawemaan ehkikishkawaatc oshankwane naapishkikanan, naapinihkaancikana' kaye, ekii noontaakotc kaye ehtipaacimaatc ini ininiwan, shemaak okii anta waapamaani. Okii mihkawaani tahsh enaniipawinitc eshi'ayaanitc pihkwaawikane mihtatimoo' ciiki onta'ipaanink. 31O'o tahsh okii'inaani, “Pikiiwe wiiciiwihshin, kiin kaashawenimihk kaaTipenciketc! Wekonen o'omaa akwaciink wenci niipawiyan? Ninkiih kwayaancihtoon ohsha waahkaa'ikan, keshi'ayaawaatc kaye pihkwaawikane mihtatimook,” kii‑ihkitowan.
32A'a tahsh anohkii'aakan kiihpiintike i'imaa waahkaa'ikanink. Ini tahsh wiin Lepan eshinihkaasonitc okii kiihciwane'aani pihkwaawikane mihtatimoo', ekii miinaanitc mashkohsiwan, ekii ahshamaanitc kaye. Nipiini hsa Eparahaam otanohkii'aakanan kiihpiitamawaa, i'i kaye otininiima' cikisiipiikisitenitc. 33Ahpii kaa‑ahcikaatenik miicim enaahsamapitc ciwiihsinitc, mii 'i kaakii ihkitotc, “Kaawiin niwii wiihsinihsii, paanimaa kii‑ishkwaa wiintamawinakook o'o kaawii ihkitoyaan,” kii‑ihkito.
Lepanan tahsh okii'ikoon, “Wiintamawihshinaam.”
34O'o tahsh kii‑ihkito, “Niin ohsha Eparahaam otanohkii'aakanan! 35KaaTipencikenitc ohsha nintookimaam okihci minohse'ikoon, ekii ishi'ikotc ciwenootisitc. Okii miinikon maanahcaanihsha', pishihkiwa', pihkwaawikane mihtatimoo', maanshimihtatimoo' kaye. Okii miinikon kaye waapaapihko shooniyaan, osaawi shooniyaan kaye, anohkii'aakana' kaye eininiiwinitc, ehkwewinitc kaye. 36Nintookimaam tahsh wiiwan Sera (Sarah) eshinihkaasonitc ekihci aya'aawinitc okii ayaawaani okosihsan. Kahkina tahsh kekoon okii miinaan eyaatc ini okosihsan. 37Nintookimaam tahsh ninkii ishi'ik ciahpimowak o'o ekii'ishitc, ‘Keko ontinimaahken ninkosihs kewiiwitc ihkwewan cionciinitc i'imaa kaashi ayaanitc Kenan kaaonciinitc otahkiiminink kaaishitaawak. 38Weti hsa kika ishaa nintete kaakiih pi onciitc, kaashi ayaawaatc nintinawemaakanak, miihsh weti keontinimatc kewiiwitc ninkosihs.’ 39O'o tahsh ninkii ishi kakwecimaa nintookimaam, ‘Kiishpin tahsh wiin a'a ihkwe inentansik cipi wiiciiwitc?’ ninkii'inaa. 40O'o tahsh ninkii'ik, ‘KaaTipenciketc hsa kaana'ihtawak enaahsamiitc oka ishinisha'waan otencaliman ciwiiciiwimihk ciminohsewatc o'o kaamaacaawatc. Miitahsh weti keontinimatc kewiiwitc ninkosihs eshi'ayaanitc nintinawemaakanak, ninteten kaye owaahkaa'ikaniniink. 41Ahpii otihsatwaa nintinawemaakanak; miinihsinowihkwaa tahsh ini ihkwewan, kaawiin memwehc cikanawentaman i'i nintahpimowin. Miitahsh i'i cipoonenimikoyan nintahpimowin,’ ” ninkii'ik.
42“Noonkom tahsh kaakiishikahk kiihpi takohshinaan onta'ipaanink, o'o ninkii'ihkit, ‘Oo Tepencikeyan, oKishemanitooman nintookimaam Eparahaam, kiishpin tahsh noonkom wii minohse'iyan o'o kaapimi ayaayaan. 43Inashke, ninaniipaw o'omaa onta'ipaanink, taka mii 'awe keaawitc ihkwe o'omaa kepi naata'ipiitc o'o keinak, “Taka pankii onci mina'ihshin kitahtoopaanink.” 44O'o tahsh ninka'ik, “Pisaan minihkwen, ninka mina'aak kaye kipihkwaawikane mihtatimoomak,” taka mii 'awe ihkwe keaawitc kaaTipenciketc kaaonaapantamawatc kewiiwinitc nintookimaam okosihsan.’ 45Cipwaa ishkwaa kaakiikitoyaan tahsh ninte'ink, Oripehka (Rebekah) kiihpi takohshin, otahtoopaan ehpimiwitootc otinimaakanink. kiiniihsaantawe tahsh onta'ipaanink ekii naata'ipiitc. O'o tahsh ninkii'inaa, ‘Taka mina'ihshin.’ 46Shemaak itahsh okii niihsinaan otahtoopaan kaakiih piminiketc ekii'ishitc, ‘Minihkwen, ninka mina'aak kaye kipihkwaawikane mihtatimoomak.’ Miitahsh kaaishi minihkweyaan, ekii mina'aatc kaye nimpihkwaawikane mihtatimooma'. 47Ninkiih kakwecimaa tahsh awenenan wetetetc, ‘Awenen wetaanihsimihk,’ ekii'inak. O'o tahsh ninkii'ik, ‘Niin hsa Pehtyoel (Bethuel) otaanihsan. Noohkom tahsh Milhka (Milcah) ishinihkaaso, nimihshoomihs tahsh Nehor (Nahor) ishinihkaaso,’ ninkii'ik. Miitahsh kaaishi pihsihkamo'ak oshankwane naapishkikanan oshankwanaank, naapinihkaancikana' itahsh onihkink. 48Miitahsh kaakii animihkohtaayaan ekii anami'ehtawak kaaTipenciketc, ekii miikwehciwenimimak nintookimaam Eparahaam oKishemanitooman. Aaniihsh kwayahk ninkii ishiwinimik eshi'ayaanitc otinawemaakanini keontinimak ihkwewan kewiiwinitc okosihsan. 49Kiishpin tahsh noonkom wiiminotootawatc, tepwe kaye wiihtootawatc nintookimaam, wiintamawihshin. Kiishpin tahsh kaawiin, kihkentamooshihshin, miihsh cikihkentamaan keishihcikeyaan,” kii‑ihkito.
50Lepanan (Laban) tahsh ini kaye Pehtyoelwan o'o okii ishi nahkwehtaakoo', “Kaawiin iinsan niinawint i'i nintaa onentansiimin aaniihsh kaaTipencikehkaank o'o onciimakan. 51Inashke tahsh wa'a Oripehka, ani maaciihsh. Taka pisaan oka wiitikemikoon kitookimaam okosihsan, taapishkoo kaaTipenciketc kaakii ihkitotc,” okii'ikoo'. 52Ahpii tahsh anohkii'aakan Eparahaaman kaakii otookimaamitc enoontank o'o eihkitonitc, mihtahkamik kii‑ishi animihkohtaa enaahsamiinitc kaaTipencikenitc. 53Miitahsh a'a anohkii'aakan kekoon kaawaapaapihko shooniyaa waapihkowaninikin, kaaosaawi shooniyaa waapihkowaninikin itahsh kaye, kikishkikanan kaye, miihsh kaaishi miinaatc Oripehkawan. Kekoonan tahsh kaye kaa‑aahkwakintenikin okii miinaan otawemaani, omaamaani kaye.
54Miitahsh kaaishi wiihsinitc, ekii minihkwetc i'i kaye ininiwa' kaakii wiiciiwikotc. Kiinipaawak tahsh kaye imaa. Keshepaawakaninik tahsh ewanishkaawaatc o'o kii‑ihkito, “Taka pakitinihshik cinaasihkawak nintookimaam,” kii‑ihkito.
55Oripehka tahsh otawemaan, omaamaan kaye kii‑ihkitowa', “Taka hsanaa a'a ihkwe niishwaahsokiishik, komaa kaye mitaahso kiishik ninka wiici'ayaamikonaan, miihsh keishi maacaatc,” okii'ikoo'.
56O'o tahsh okii'inaa', “Keko ontamii'ihshihkek, kaaTipenciketc iitok ninkii minohse'ik o'o kaakiih piishaawak; taka pakitinihshik pisaan cianta waapamak nintookimaam,” okii'inaa'.
57Miihsh kaakii ihkitowaatc, “Taka antomaataa Oripehka, cikakwecimank enentamokwen.” 58Okii antomaawaan tahsh Oripehkawan ekii'inaawaatc, “Kitaa ani wiiciiwaa na wa'a inini.”
Miitahsh kaaishi nahkwehtaakowaatc, “Eya', ninkani wiiciiwaa,” kii‑ihkitowan.
59Miitahsh kaaishi maacinisha'waanitc otawemaani Oripehkawan ini ihkwewan kaawiici'ikonitc ciani wiiciiwaanitc ini Eparahaam otanohkii'aakanini, otaanihke anohkii'aakanimini kaye. 60Miitahsh kaaishi shawenimaanitc Oripehkawan o'o ekii'inaanitc, “Taka kiin, nintawemaanaan, aahpici tani kihci paahtiinowak kipiiwesiimak. Miiwak itahsh keshaakoocihtoowaatc ootenawan eshitaanitc kaashiinkenimikowaatc,” okii'inaani. 61Miitahsh Oripehka, i'i kaye ihkwewa' kaakii wiici'ikotc kaaishi onapiwaatc kaaishi pimiwanaasowaatc pihkwaawikane mihtatimoo', ekii ani kiiwe wiiciiwaawaatc Eparahaam otanohkii'aakanimini.
62Aaisik (Isaac) tahsh kiihpionci takohshin weti, ‘Otoonta'ipaan pemaatisitc kaawaapamitc’, kaakii icikaatenik. Shaawanonk inahke Kenan (Canaan) ahkiink Nekep (Negev) eshinihkaatenik hsa kii‑ishitaa. 63Eonaakohshininik tahsh Aaisik kiionaakohshi papaamohse mihshawahkamik. Einaapitc tahsh okii waapamaa' pihkwaawikane mihtatimoo' ehpinaakosinitc. 64Ahpii tahsh Oripehka ewaapamaatc Aaisikoon, kiiniihsaantawe pihkwaawikane mihtatimoonk. 65Miihsh kaaishi kakwecimaatc ini anohkii'aakanan, “Awenen tahsh a'a inini kaapi'anta nakishkawinank?” okii'inaan.
Miihsh o'o kaa'ikotc, “Mii hsa awe nintookimaam.” Miitahsh kaaishi otaahpinank otaakawiinkwepison, ekii aakawiinkwe'itisotc.
66Anohkii'aakan tahsh okii wiintamawaan Aaisikoon kahkina kaakii ishihciketc. 67Aaisik tahsh okiih piintikanaan Oripehkawan kaakii ishi opakwaanekamikonitc omaamaan Serawan, miihsh kaaishi wiiwitc. Ekii wiiwitc tahsh wiinke okiih saaki'aan; miitahsh imaa kaakii onci na'entank ekii wani'aatc omaamaan.
Currently Selected:
Cenisihs 24: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
