Cenisihs 29
29
Cekap Kiihtakohshink Eshitaanitc Lepanoon Omihshoomenshan
1Cekap (Jacob) tahsh eani papimi ayaatc piinihsh kiiani takohshin ahkiink waapanonk inahke kaakii ishi'ayaanitc pemaatisinitc. 2Mekwaa tahsh ehpimohsetc kiiotihtam mihshawaya'ii kaakii ishi'ayaanik onta'ipaan. Nihswewaan tahsh maanahcaanihsha' kiihpimihshino' waahkaaya'ii onta'ipaanink, mii aaniihsh i'imaa kaaonci minihkwenitc. Kihci'ahsiniin tahsh kiihkipaapihkihshinoon i'imaa onta'ipaanink. 3Ahpii hsa kiimaamawi takohshinowaatc maanahcaanihshak i'imaa onta'ipaanink, pinamaa hsa kaakiih kanawenimaawaatc maanahcaanihsha' ninkoci okii ishi tihtipinaawaan kihci ahsiniin, miitahsh payesh kaaishi mina'aawaatc omaanahcaanihshimiwaa', miinawaa tahsh okiih kiiwe kipaapihkihshimaawaan i'imaa onta'ipaanink.
4Cekap tahsh okii ishi kakwecimaa' i'i kaakii naanaakaci'aanitc maanahcaanihsha', “Niiciik, aaniinti kiinawaa wenciiyek?” okii'inaa'. O'o tahsh okii'ikoo', “Heran (Haran) ootenaank nintonciimin,” okii ishi nahkwehtaakoo'.
5Miitahsh kaa'inaatc, “Kikihkenimaawaa na Lepan (Laban) kaao'oshihsimikotc Nehoran (Nahor)?” O'o tahsh okii'ikoo', “Eya', ninkihkenimaanaan,” okii'ikoo'.
6“Mino'ayaa na Lepan?” tahsh okii ishi kakwecimaa'. O'o tahsh okii'ikoo', “Eya', mino'ayaa.” Miihsh kaa‑ani'ikotc, “Inashke inaapin, mii'osha'a Orehcal (Rachel) kaapinaakositc, Lepan otaanihsan, kaapiinaanitc omaanahcaanihshima',” okii'ikoo'.
7Cekap tahsh kii‑ihkito, “Keyaapi iitok ishpikiishikan, kaawiin mahshi ocihcihsehsinoon cimaawantoonintwaapan maanahcaanihshak. Inashke mina'ihkwak kimaanahcaanihshimiwaak, ishiwinaahkekwaanik tahsh weti keshi miiciwaatc mashkohsiin,” okii'inaa'.
8Miitahsh kaaishi nahkwehtaakotc, “Kaawiin nintaa kashkihtoohsiimin i'i ci‑ishihcikeyaank, paanimaa kahkina maanahcaanihshak kiihtakohshinowaatc o'omaa, a'a kaye ahsin ninkoci ishi tihtipinikaniwitc; miitahsh i'i payesh cimina'ankitwaa maanahcaanihshak,” okii'ikoo'.
9Mekwaa tahsh Cekap ehkakitotc, Orehcalwan kiihpi takohshinoon, ekiih piinaanitc oteten omaanahcaanihshimini kaakii ishi'ayaawaatc. Orehcal iitok kaye okiih kanawenimaa' maanahcaanihsha'. 10Ahpii tahsh Cekap kaawaapamaatc Orehcalwan ekiih piinaanitc omaanahcaanihshimini oshihshenshan Lepanoon, omaamaan otawemaani, kii‑ishaa onta'ipaanink. Miihsh ninkoci kaaishi tihtipinaatc ini kihci ahsiniin, ekii mina'aatc omaanahcaanihshimini. 11Cekap tahsh okii ociimaan Orehcalwan, ekii maacii mawitc kaa‑ahpiihci minwentank. 12Cekap tahsh okii wiintamawaan Orehcalwan ekii inawemaatc oteteni, ekii okosihsimikotc kaye Oripehkawan (Rebekah).
Miitahsh kaaishi maaciipahtootc Orehcal ekii awi wiintamawaatc oteten. 13Ahpii tahsh Lepan kaanoontank otooshiman Cekapoon onci, kiiahpahtoo ekii anta nakishkawaatc, ekiih kihkincikwepinaatc ekii ociimaatc. Miitahsh kaaishi ishiwinaatc owaahkaa'ikanink. Cekap tahsh okii wiintamawaan Lepanoon kahkina kekoon. 14Miihsh o'o kaaihkitotc Lepan, “Tepwe hsa iinsan pehsho kitinawentimin,” kii‑ihkito. Cekap tahsh peshiko kiisihs i'imaa kiiayaa.
Cekap Kii'anohkiihtawaatc Lepanoon Otaanihsini Onci
15Lepan (Laban) tahsh okii'inaan Cekapoon (Jacob), “Kaawiin iitok ishinaakwahsinoon anihshaa cianohkiihtamawiyampan mihsawaa ko einaweminaan. Aaniin tahsh minihk entawentaman citipa'amawinaan?” okii'inaan. 16Lepan tahsh kiiniishiwa' otaanihsa'. Kaakii omihsensimaawinitc Liiya (Leah) kii‑ishinihkaasowan. Ini tahsh kaakii ohshiimenshimaawinitc Orehcal (Rachel) kii‑ishinihkaasowan. 17Liiya tahsh kaawiin aahpici kiiwaapihsii. A'a tahsh wiin Orehcal kiiminowiiyawe, kiiminonaakosi kaye.
18Cekap tahsh okiih saaki'aan Orehcalwan, miihsh kaaihkitotc, “Niishwaahso (7) pipoon hsa kika anohkiihtawin meshkwac kitaanihs Orehcal,” okii'inaan.
19Lepanoon tahsh okii ishi nahkwehtaakoon, “Nawac iitok taonishihshin kiin cimiininaampaan a'a nintaanihs ahpiihc wiin pahkaan awiya inini cimiinakipan. Pisaan hsa o'omaa ayaan cianohkiihtawiyan,” okii'ikoon. 20Cekap tahsh kiianohkii niishwaahso (7) pipoon ekii wii ayaawaatc Orehcalwan. Taapishkoo tahsh ehta niishokon okii inentaan i'i niishwaahso pipoon, kaa‑ahpiihci saaki'aatc Orehcalwan. 21Cekap tahsh okii'inaan Lepanoon, “Miishihshin tahsh a'a kitaanihs kewiiwiyaan, cinaasihkawak ciwiihpemak. Mii iitok kiiocihcihsek minihk kaakii'ininaampaan ewii anohkiihtawinaan,” okii'inaan. 22Lepan tahsh kahkina awiya' okii antomaa', ekiih kwayaancihtaatc ewiih kihci wiitike wiihkwanketc. 23Eani onaakohshininik tahsh Lepan okii ishiwinaan otaanihsan Liiyawan eshi'ayaanitc Cekapoon. Miihsh Cekap kaa'ishi wiihpemaatc ini ihkwewan. 24Lepan tahsh kiimiikiwe ini opamiihtaakanihkweman Silpa (Zilpah) kaakii ishinihkaasonitc, ekii miinaatc Liiyawan ciwiici'ikonitc. 25Paanimaa tahsh ehkishepaawakaninik Cekap kaakiih kihkentank Liiyawan inankwana ini kaakii wiihpemaatc. Kii‑ishaa tahsh Lepanoon ekii'inaatc, “Etatawe kikihci tootaw o'o kaatootawiyan! Orehcal iitok kaakii onci anohkiihtawinaan. Wekonen tahsh wenci kihci wayeshimiyan?” okii'inaan.
26Lepanoon tahsh okii ishi nahkwehtaakoon, “Kaawiin i'i nintishihcikehsiimin o'omaa nihtam ciwiitike'ankitipan a'a kaaohshiimenshimaawitc cipwaa wiitikenitc ini omihsenhsan. 27Pinamaa hsa pii'on peshikotawahte ci‑ishkwaa ishihsek o'o kaakihci wiitike wiihkwantink. Miitahsh ahpii kemiininaan Orehcal cianohkiihtawiyan miinawaa niishwaahso pipoon,” okii'ikoon. 28Cekap tahsh pisaaniko kii‑inentam. Peshikotawahte tahsh kaaishkwaa ishihsenik ekii ishkwaa wiihkwantink, miihsh kaakii miinikotc ciwiiwitc ini otaanihsini Orehcalwan. 29Lepan tahsh kiimiikiwe ini opamiihtaakanihkweman Pilha (Bilhah) kaakii ishinihkaasonitc, ekii miinaatc Orehcalwan ciwiici'ikonitc. 30Cekap tahsh kaye okii wiihpemaan Orehcalwan. Orehcalwan tahsh nawac okiih saaki'aan ahpiihc wiin ini Liiyawan. Niishwaahso pipoon itahsh keyaapi okii anohkiihtawaan Lepanoon.
Cekap Oniicaanihsa' Ehtashinsonitc
31Ahpii tahsh kaaTipenciketc ewaapantank Liiyawan (Leah) esaakihcikaniwihsinik, okii ishi'aan cikakashkihtoonitc cioniicaanihsinitc. Orehcal (Rachel) tahsh kaawiin kiiotapinoonciishimihsi. 32Liiya tahsh kiihkikishkawaawahso, kwiiwisenhsan ekii ayaawaatc. Oroopin#29.32 Oroopin: I'iwe ishinihkaasowin Oroopin kaa'icikaatek, inashke wa'a okosihsimaa, shikwa owaapantaan eshi kakwaatakentamowak, mii 'owe enihtaakwaninik kaaishikiishwewaatc Hiiparoowak. (Reuben) tahsh okii ishinihkaanaan. O'o iitok kii‑ihkito, “KaaTipenciketc ohsha owaapantaan eshi kakwaatakentamowak; kehcinaac maawiin itahsh noonkom ninka saaki'ik ninaapem,” kii‑ihkito. 33Miinawaa tahsh kiihkikishkawaawahso kwiiwisenhsan ekii ayaawaatc, miitahsh kaaihkitotc, “KaaTipenciketc aaniihsh kiinoontam esaaki'ikoowaahsiwak, miitahsh kaaonci miishitc ono keokosihsiwak,” kii‑ihkito. Simiyan#29.33 Simiyan: I'iwe ishinihkaasowin Simiyan kaa'icikaatek, noontamowin, mii 'iwe enihtaakwaninik kaaishikiishwewaatc Hiiparoowak. (Simeon) tahsh okii ishinihkaanaan. 34Miinawaa tahsh kiiani kikishkawaawahso, kwiiwisenhsan ekii ayaawaatc. Miitahsh kaaihkitotc, “Miimaawiin nawac noonkom ninaapem pehsho cisakenimitc eshi'ayaawak, aaniihsh mii 'i nihsin (3) eayaawimak okosihsa',” kii‑ihkito. Liipaai#29.34 Liipaai: I'iwe ishinihkaasowin Liipaai kaa'icikaatek, kaakihciwihsink, mii 'iwe enihtaakwaninik kaaishikiishwewaatc Hiiparoowak. (Levi) tahsh okii ishinihkaanaan. 35Miinawaa tahsh kiikikishkawaawahso kwiiwisenhsan ekii ayaawaatc, o'o tahsh kii‑ihkito, “KaaTipenciketc hsa wiin noonkom ninka miikwehciwenimaa,” kii‑ihkito. Coota#29.35 Coota: I'iwe ishinihkaasowin Coota kaa'icikaatek, emiikwehciwenimaakaniwitc kaaTipenciketc, mii 'iwe enihtaakwaninik kaaishikiishwewaatc Hiiparoowak. (Judah) tahsh okii ishinihkaanaan. Miitahsh kaaishi poonoonshetc.
Currently Selected:
Cenisihs 29: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
