Cenisihs 30
30
1Ahpii tahsh Orehcal (Rachel) ewaapantank ekii ayaawaahsik Cekapoon (Jacob) oniicaanihsini, okii ontenimaan ini tipinawe wiicihkwewan. Miitahsh kaakii'inaatc Cekapoon, “Taka miishihshin apinoonciishak, komaa meshkwac ninka nip,” okii'inaan.
2Okii nishki'aan tahsh Cekapoon ekii'ikotc, “Kaawiin niin ninKishemanitoowihsii, wiin iitok kaaishi'ihk ciayaawimaahsiwatc apinoonciishak,” okii'ikoon.
3Miihsh o'o kaa'inaatc, “Ina wa'a Pilha (Bilhah) kaapamiihtawitc ihkwe. Naasihkaw ciwiihpematc ciayaahtamawitc apinoonciisha'. Mii hsa imaa keniin keonci ayaawakwaa apinoonciishak,” okii'inaan. 4Miitahsh kaaishi miinaatc onaapeman ini opamiihtaakanihkweman Pilhawan. Miitahsh Cekapoon kaaishi wiihpemaanitc. 5Pilhawan tahsh kiihkikishkawaawahsowan ekii okosihsinitc. 6Orehcal tahsh kii‑ihkito, “KaaTipenciketc hsa ninkii naatamaak, tepwe hsa ninkii noontaak, ekii miishitc keokosihsiwak.” Ten (Dan) tahsh okii ishinihkaanaan ini kwiiwisenhsan. 7Orehcal tahsh opamiihtaakanihkweman Pilhawan miinawaa kiihkikishkawaawahsowan, mii 'i niishin (2) keokosihsinitc ekii ontinaanitc Cekapoonk. 8Orehcal tahsh kii‑ihkito, “Miitahsh o'o eshi kakwe shaakooci'itiyaank tipinawe niicihkwe, niin tahsh nimpahkinaake,” kii‑ihkito. Naapihtalaai#30.8 Naapihtalaai: I'iwe ishinihkaasowin Naapihtalaai kaa'icikaatek, miikaasowin, mii 'iwe enihtaakwaninik kaaishikiishwewaatc Hiiparoowak. (Naphtali) tahsh okii ishinihkaanaan.
9Ahpii tahsh Liiya (Leah) ehkihkentank ehpoonoonshetc, okii otaahpinaan opamiihtaakanihkweman Silpa (Zilpah) eshinihkaasonitc, okii miinaan tahsh Cekapoon ciaanihke wiiwinitc. 10Liiya tahsh opamiihtaakanihkweman Silpawan okii ayaahtamawaani Cekapoon eokosihsinitc. 11Liiya tahsh kii‑ihkito, “Etatawe minohsewin nintootihsikon,” kii‑ihkito. Kaat#30.11 Kaat: I'iwe ishinihkaasowin Kaat kaa'icikaatek, minohsewin, mii 'iwe enihtaakwaninik kaaishikiishwewaatc Hiiparoowak. (Gad) tahsh okii ishinihkaanaan. 12Miinawaa tahsh opamiihtaakanihkweman Silpawan kiihkikishkawaawahsowan. Mii 'i niishin (2) ekii ayaawaanitc keokosihsinitc Cekapoonk onci. 13Liiya tahsh kii‑ihkito, “Etatawe niminwentam! Ihkwewak hsa ninka ishinihkaanikook, ‘Kaaminwentank,’ ” kii‑ihkito. Aahshar (Asher) tahsh okii ishinihkaanaan.
14Mekwaa eshihsenik ahpii kiimanishikenk, Oroopin (Reuben) kii‑ishaa mihshawahkamik, okii mihkaanan tahsh kihtikaanan kaaonci oshihcikaatek minwentaakosii mashkihki#30.14 Minwentaakosii mashkihki: Mii hsa 'i kihtikaan minwentaakosii mashkihki kii‑ishinihkaate kaakii ishi tepwehtamonaaniwank keonci otapinoonciishimink. Miihsh kaainwaatek minwentaakosii mashkihkiink. Taapishkoo kaye shiiwimiicim kaakii nihtaawikink pikwacaya'ii. Miitahsh kaakii inentamowaatc ihkwe miicitc cikashkihtootc ciayaawaatc apinoonciishan. (mandrake) kaaishinihkaatek. Okiih kiiwewitoonan tahsh ekiih piitamawaatc omaamaan Liiyawan. Liiya okii'ikoon Orehcalwan, “Taka miishihshin ini aaninta kikosihs minwentaakosii mashkihki kaa‑ayaatc,” okii'ikoon.
15O'o tahsh okii'inaan, “Kaawiin ina pankii kitinentansii ekii mahkamiyan ninaapem? Kiwii mahkamaana kaye ninkosihs ominwentaakosii mashkihki?” okii'inaan.
Orehcalwan tahsh okii'ikoon, “Cekap hsa meshkwac kika wiihpemik onaakohshininik kiishpin miishiyan ini kikosihs kaa‑ayaatc minwentaakosii mashkihki,” okii'ikoon.
16Ahpii tahsh Cekapoon mihshawahkamik ekiih pionci takohshininitc eonaakohshininik, Liiya okii anta nakishkawaan ekii'inaatc, “Mii hsa 'i eshinaakwahk ciwiihpemiyan, aaniihsh kikiih tetipa'on ekii aapacihtooyaan ninkosihs kaa‑ayaatc minwentaakosii mashkihki,” okii'inaan. Miitahsh kaaishi wiihpemikotc i'i ehtipihkaninik.
17Kishemanitoon tahsh Liiya okii noontaakoon, miihsh kaakiih kikishkawaawahsotc. Miitahsh i'i naanan ekii ayaawaatc keokosihsitc Cekapoonk onci. 18Liiya tahsh kii‑ihkito, “Kishemanitoo hsa nintipa'amaak, aaniihsh ninkii miinaa ninaapem nimpamiihtaakanihkweman,” kii‑ihkito. Isahkaar#30.18 Isahkaar: I'iwe ishinihkaasowin Isahkaar kaa'icikaatek, inini kaa‑anohkii'aakaniwitc, mii 'iwe enihtaakwaninik kaaishikiishwewaatc Hiiparoowak. (Issachar) tahsh okii ishinihkaanaan. 19Miinawaa tahsh Liiya kiihkikishkawaawahso. Mii 'i ninkotwaahso ekii ayaawaatc keokosihsitc Cekapoonk onci. 20Miitahsh kaaihkitotc, “Kishemanitoo hsa etatawe onishihshinini kaamiishitc; noonkom maawiin ninaapem ninka kihci inenimik, aaniihsh mii 'i aasha ninkotwaahso eyaahtamawak okosihsa',” kii‑ihkito. Sepiyolan#30.20 Sepiyolan: I'iwe ishinihkaasowin Sepiyolan kaa'icikaatek, miinikoowin, mii 'iwe enihtaakwaninik kaaishikiishwewaatc Hiiparoowak. (Zebulun) tahsh okii ishinihkaanaan. 21Naanaake tahsh eani ishihsenik kiiotaanihsi, Taaina (Dinah) ekii ishinihkaanaatc.
22Kishemanitoo tahsh okiih tootawaan Orehcalwan (Rachel) kaakii ishi anami'ehtaakotc, miitahsh kaakii ishi'aatc cikashkihtoonitc ciotapinoonciishiminitc. 23Orehcal tahsh kiihkikishkawaawahso ekii okosihsitc, miihsh kaaihkitotc, “Kishemanitoo hsa ninkiih tootaak ciotapinoonciishimiwak, miihsh kaaonci pooni miihkinsomikoowak,” kii‑ihkito. 24Coosap (Joseph) tahsh okii ishinihkaanaan o'o ekii ihkitotc, “Taka kaaTipenciketc ninka miinik kotak keokosihsiwak,” kii‑ihkito. 25Ahpii tahsh Coosapoon kaaishkwaa nihtaawikinitc, Cekap okii'inaan Lepanoon (Laban), “Taka pakitinihshin nintahkiimink cishi kiiweyaan. 26Miishihshin niwiiwak, niniicaanihsak kaye kaakashkihtamaasoyaan kaapi anohkiihtawinaan, miihsh cipakitiniyan cini maacaayaan. Kikihkentaan iitok weweni ehpi anohkiihtawinaan.”
27Miihsh o'o Lepanoon kaa'ikotc, “Kiishpin ihsa menwaapamiwanen, keko maacaahken. Nanaanta kihkencikewinink ohsha nintoonci kihkentaan kaaTipenciketc ehshawenimitc kiin onci.” 28Miihsh kaye kaa'ikotc, “Wiintan keshi tipa'amawinaan, miihsh i'i keshi tipa'amawinaan.”
29O'o tahsh Cekap kii‑ihkito, “Kikihkentaan iitok aaniin pemishi anohkiihtawinaan, eani paahtiinowaatc kaye kitawahkaanimak kenawenimakwaa. 30Cipwaa takohshinaan hsa pankii ehta kekoon kikii ayaan, noonkom itahsh etatawe kiwenootis. KaaTipenciketc hsa wiinke kishawenimik aanti piko pemi ayaawak. Miitahsh eocihcihsek niin iko cikashkihtamawakwaa eyaawaatc nintaawinink.”
31Miihsh o'o kaa'ikotc Lepanoon, “Wekonen itahsh kemiininaan?”
O'o tahsh okii'inaan, “Kaawiin kekoon ninantawentansiin cimiishiyan. Mii hsa ko 'i keshi naanaakaci'akwaa kitawahkaanak kiishpin inentaman o'o kaawii ihkitoyaan. 32Pakitinihshin noonkom kaakiishikahk misiwe cipapaa ishaayaan eshi'ayaawaatc kitawahkaanak cikakiikinakwaa kahkina mehkatewisiwaatc maanahcaanihshenhsak, iki kaye kaamamaantitowaatc kaapaahpaahtewisiwaatc. Iki tahsh kaye kaapaahpaahtewisiwaatc maanatihkwak. Mii hsa 'iwe eshi antawentamaan cishi tipa'amawiyan. 33Miihsh i'i nahke kenishi kihkentaman kiishpin tepweyentaakosiwaanen ahpii pianta kihkentaman eshi tipa'amawiyan. Kiishpin ayaawakwaa kaapaahpaahtewisihsikwaa, iki kaye kaamasinisihsikwaa maanahcaanihshak, iki itahsh kaye kaapaahpaahtewisihsikwaa, kaamasinisihsikwaa maanatihkwak, mii 'i iinsan cikihkentaman ekiih kiimootiyaan.”
34O'ohsh Lepanoon okii'ikoon, “Mii hsa 'i keishihcikeyank i'i ehkitoyan.” 35I'i tahsh ehkiishikaninik Lepan okii otaahpinaa' kahkina ayaape maanatihkwa' kaapehpehshisinitc, kaapaahpaahtewisinitc, i'i kaye noonshe maanatihkwa' kaamasinisinitc, pepankii kaawaapinaakosinitc kaye. Kahkina kaye mehkatewi naakosinitc maanahcaanihshenhsa' okii otaahpinaa'. Okosihsa' itahsh okiih kanawenta'aa'. 36Nihsokiishik itahsh minihk kii‑ishi maacaa eshi'ayaanitc Cekapoon pepahkaan ciayaawaatc. Cekap itahsh okiih kanawenimaa' i'i kotak Lepanoon otawahkaanini.
37Cekap iinsan okii otaahpinaan ashkaahtiko watihkwanan ekii ontinank asaatiiwaahtikonk, almaant tinowaahtikonk, nipiiwaahtikonk kaye. Miitahsh kaaishi pehpehshaapihshakaahkopitootc ini watihkwanan. Kiihpehpehshinaakwanoon itahsh ini watihkwanan ekii naakwahkin eshi mihtikowankin. 38Miiwan itahsh ono watihkwanan kaakiih pihshakaahkopitootc kaakii ahtootc eshi nihtaa minihkwenitc awahkaana'. Kiipi anta minihkwenitc ihsa ko kiinihtaa awahkaanenhsihkewa' ekii aamanoosonitc. 39Miitahsh iki awahkaanak kaahtashi awahkaanenhsihkewaatc i'imaa eshi ahtenikin watihkwanan. Awahkaanak itahsh okii nihtaawiki'aawaa' awahkaanenhsa' kaapehpehshisinitc, kaamasinisinitc, kaye tahsh kaapaahpaahtewisinitc.
40Miitahsh Cekap pepahkaan okii ishi ahsaa' maanatihkwa', maanahcaanihsha' kaye. Miihsh kaye kaaishihciketc ekii inaahsamikaapawi'aatc eshi'ayaanitc inahke Lepanoon otawahkaanimini kaamasinisinitc, kaamahkatewi naakosinitc kaye. Miitahsh o'o nahke kaaishi nenaawinaatc wiin iko otawahkaana', ini tahsh kaye Lepanoon otawahkaanini.
41Ahpii tahsh eawahkaanenhsihkenitc kaasoonkaatisinitc awahkaana', mii hsa 'i kaaishi ahtootc ini watihkwanan eshi minihkwenitc awahkaana'. Miitahsh i'imaa kaahtashi aamanoosonitc mekweya'ii eawahkaanenhsihkenitc. 42Kaawiin itahsh wiin mecentaakosinitc awahkaana' i'imaa okii ahtoohsiinan ini watihkwanan. Miihsh i'i nahke Lepanoon kaaonci miinaatc awahkaanini kaamacentaakosinitc, wiin itahsh wiin Cekap kahkina menowe'ayaanitc ekii ayaawaatc. 43Miitahsh o'o nahke Cekap kaakii ani onci wenootisitc ekii ayaawaatc niipiwa' awahkaana', maanshi mihtatimoo' kaye, pihkwaawikane mihtatimoo' kaye. Kiihpaahtiinowa' kaye otanohkii'aakana' eniniiwinitc, ehkwewinitc kaye.
Currently Selected:
Cenisihs 30: OJBR
Highlight
Share
Copy
Want to have your highlights saved across all your devices? Sign up or sign in
Ojibwe Shorter Bible (Roman Script) © 2008 Canadian Bible Society
