Wəza net Masləŋɗe 1

Ɗəfdaya waslən Əmpəs nani

1Baynaw Tewfilu, adəv ɗerewel naw madabəŋ nəver sukuk wən an Zezu agəɗɗə gəm an arban daga ətəŋ nan pakə 2ha gap pay an ateŋ a disiŋ. Daga dəɓəl wəteŋ a disiŋ ɓa, asəɓ sitik masləŋɗe en məs awel də sembe na Əmpəs Salala*. 3Dərɓaga əmta nani arbanək zən azeti, də wərbansit təstəs na madarani, gap wəvoŋ kaklaw poɗo adarban zən azet də wəpel sit wənna məlĩ na Maŋgəlva. 4Pay akkal dənɗaŋ, anah sitik na adaw zaraŋ sə Zerusalem ɓa, amma dəganən gən an məs Affən anah na wapsiti, va anah sukum farə. 5Vi baptem na Zaŋ də iŋkileyi, amma nokum abe suɗike akərəhaŋ baptem də Əmpəs Salala.

Wəteŋ na Zezu a disiŋ

6En məs dəkkalaŋ də Zezu atokonənka: Ɗəfdaya daski kədawzaɓan məlĩn net Israyelɗe sa? 7Zezu azlansitike, wən nokum taya za əsən uvoŋ nan də pay nan məs Affən aɗi də gakdak nan ɓa. 8Amma nokum akərəhaŋ sembe pay Əmpəs Salala adawpriken akokum, akəkpaŋgaŋ saydaweɗ naw a Zerusalem gəm a Zude a Samariya ha aket meŋge na dələv nan pakə. 9Adan anah sit vaska, apeŋke a disiŋ tahəŋ ulanənni slay buwən azanək sə ma hereti.

10Gala adawlaŋ kəla disiŋ dəkki məs Zezu apeŋgi ɗii sula aziweŋgik go'o dənɗaŋ. 11Assohotinke: Munokum ɗii na Galile vimi kədawlaŋ a disiŋ di? Zezu məs dəteŋ a disiŋ sə walaŋkuməŋka, wamil va ateŋ a disiŋgəŋka.

Matiyas məwelin a gəla Zudas

12Yaŋ masləŋɗe amilyoŋ a Zerusalem səka massorgo an adawyaŋ na mosorgo na hereme gu'o də Zerusalem va kilometər taka. 13Adan agapaŋ a Zerusalem ateŋgeŋgək adəv gəla atəki adakkalaŋ ɗayɗay adəv gəla ma sula'ən a disiŋ. Piyer də Zaŋ, gəm Andre, gəm Filipi, gəm Tomas, gəm Bartolomi gəm Matiye, də Zak wətən Halfa, gəm Simoŋ məs dəŋglu dələv nani, gəm Zuda wətən Zak. 14Ndəɗaŋ pak asapanənək met taka aka wənnakkama, dit gil pak may Mari ma Zezu gəm milmiŋgiɗin Zezu.

15Daska Piyer asilik aweleŋgit milmiŋgiɗin ɗii məkkalit gap səkat də kaklaw sula neki, anahka: 16Munokum milmiŋgiɗwa, kətana, an məs Əmpəs Salala anah adəv ɗerewel dəsan gən gesiŋ, apel də ma Davit dabəŋ daga farə, aka Zudas məs dəzəm ki Zezu. 17Zudas ndəni ɗəf sə walaŋmə, arahək haran nan sədəv wəza namə.

18Zudas albəhək guli dit deleɗ en arah də wəza mambray nani, adaki əmta aslba, gədəvən aɓaka, herɗen agulyoŋguk appaka. 19Ɗii na Zerusalem pak apprəmənək wənnani, ndəni ayanən guli nan na: Akeldama də ma net na: Guli net mbeli. 20Vi wənnan məverni adəv ɗerewel na Davit:

Gəla nan dəsan ki məskiya,

ɗəf adasan adak ɓa.

Vaski wənnan məverin:

Say ɗəf mbərən dəgəm wəza nani.

21-22Vi vaski say ɗəf mbərən də sap azam dəgəɗ gən saydawa na əsilya na Ɗəfdaya səka əmta. Ɗəf nan dəsan gən sə walaŋgit ɗii məzəbalaŋ də mənam gala Zezu adabal də mənam a təki pakə, təŋ səza arah baptem səva Zaŋ ha gap pay an Zezu apeŋ a disiŋ sə walaŋmə. 23Yaŋ arbanən iya net ɗii sula: Zozef məs adawyaŋ na Barsabas məlvan na Zustus, gəm Matiyas. 24Ndəɗaŋ pak akkamaŋgək vaŋka: Ɗəfdaya is məs kəsən mekret ɗii pakə, arban səmə naway kəwel suweleŋgit ɗii suleŋ di? 25Nagəm wəza an məs Zudas apələŋka ambatək va an dəslə azani. 26Yas kan aɗɗanən də kevile aza veti də wəbalan aket ɗii sula neki, abətək aka Matiyas atoŋguk aweleŋgit ɗii klaw kiyit sula ka masləŋɗe.

Currently Selected:

Wəza net Masləŋɗe 1: GDRNT85

Highlight

Copy