Wəza net Masləŋɗe 2

Wəprike na Əmpəs Salala*

1Yaŋ kan pay wəzləra məs adawyaŋ na Pentekosta* agapə, ɗii na Maŋgəlva pak akkalaŋgək atəki taka. 2Go'ləŋgə apprəmənək geŋgere wəzzan sə disiŋ va ɓaɓəlmet barkataŋ məs də sembe. Aknahənək gəla məs asoŋ adəvən. 3Yaŋ awlanən zəga wərban zən va anzil offo tay traya, asanək aket taka taka pakə. 4Ndəɗaŋ pak aknahaŋgək də Əmpəs Salala, yaŋ ndəɗaŋ pak atəŋgaŋgək wəpel də ma temtemi, va Əmpəs apsit sembe nani.

5Yahudiyenɗe meɓɓet tahəŋ məs dəda soŋ a Zerusalem məzu zuliyaŋ sənən Maŋgəlva, məs dəzoŋ səka dələv na duniya pakə. 6Adan apprəmən geŋgere vaska, vadaysa net akkalaŋgək adaka. Maɗulet pak agəɗək gərəŋgə, vi ko naway suweleŋgit pak tayəpprəm ɗii na Maŋgəlva dawpeleŋ də ma nani. 7Agətaŋgək sawɓa, aɓɗaŋ na: Ɗii məzu peleŋ maŋki, ɗii na Galile həŋ ɓa sa? 8Səŋgay kan ko naway pak adapprimitən daw peleŋ ma nanəŋ di? 9Yaŋ nam bo səka dələv na Partiya, Mediya, Elmiya, Mesopotomiya sə Zude sə Kappadosiya, daga Pontus də Asiya, 10daga sə Firigiya gəm Pamfiliya, maay sə Misra, maay səkla Libiya səmaŋgava Sirene, məde. Ɗii meɓɓet suwalaŋgəm bo, sə Roma azoŋ. 11Ɗii nam meɓɓet bo, sə Kereta azoŋ gəm sə Arabiya. Ɗii meɓɓet bo, Yahudiyenɗe gəm məzu toŋgoŋ wəsban Maŋgəlva net Yahudiyenɗe həŋ. Amma, mənam tatəpprimit tay peleŋ də ma namə, ndəni wəza metiŋgin məs Maŋgəlva agəɗə. 12Sokene nan agəɗsitik gərəŋ sit ɗiiyi, ha assohonənək ziti: Aŋ labara miyaŋ di? 13Amma yaŋ ɗii meɓɓet amasaŋ aket ɗii na Maŋgəlva, aɓɗaŋ na: Mbazla dəbeye.

Piyer taypel wənna Maŋgəlva

14Piyer asilik dit gewleɗ klaw kiyit taka neki, aziweŋke, atəŋgaŋgək wəpel sit ɗii də sembe, amna: Munokum Yahudiyenɗe, ɗii na Zerusalem, məpak sləmokum məpprəma nənah sukum wənnəŋka. 15Ɗiiyeŋki, mbazla dəbey va kəda ɗumoŋgəŋ ɓa, vi pay dəɓəl wəsɓəta tagay ɓa. 16Vaski bo, amma agəɗ vas na vi an məs kleŋ Zuwel anah dəsan gən gesiŋ anahə:

17Maŋgəlva amna an məs dədaɗɗa pay wəgrak nani:

Wanəɗi Əmpəs naw aket ɗii pakə.

Kirtukum mezeŋgilleket dit mugiliŋgiti, waɗɗaŋ kleŋ.

Gewleɗ nokum wawlaŋ hənhən,

ɗii gugiriɗ nokum wasineŋ.

18Asna məɗɗaŋ wəza naw mazeŋgilleket dit mugiliŋgit

wanəɗi Əmpəs naw aketi,

pay nani, wakpaŋgaŋ məs kleŋɗe.

19Wanəgəɗ sokeneɗ a disiŋ,

də aka dəlva fuŋ pakə,

mbeli də offo də guzli titir net enene wagəɗə.

20Amma pay an metiŋgin

də gakdak na Ɗəfdaya adazani, pay wasərətə,

təla wasan preŋ va mbeli.

21Konaway dəya iya na Ɗəfdaya wakohu.

22Munokum Israyelɗe, məpprəm wənnawəŋ ɗa: Zezu məs na Nazaret, masləŋ na Maŋgəlvayi, kəsənənka, vi awaloŋkumi Maŋgəlva arban sokene də sembe nani məs agəɗ də Zezu. 23Daga farə Maŋgəlva aŋgələk kapsukum Zezu. Yaŋ nokum bo kəbayənni, yaŋ kənah sitin ɗii məs mambrayɗe dəkpa'ən gən aka wəlaŋga məzliwrihe. 24Amma yaŋ Maŋgəlva asil gən sətəki net ɗii mimtiti, yaŋ akoh gən səma wəssiya na əmta, vi əmta tay də sembe narman ɓa. 25Yaŋ Davit anah aka wənan na:

Intatula Ɗəfdaya baw pay pakə,

tayaka va dəzəŋ nawa, vi nədaw geslne ɓa.

26Vi vaski makraw tay əneke,

maw bo tayəpel Wən Nenekeni.

Vasna də wədak na gəɓa zuwəŋ zlaŋ na,

wanəfet zamə, də wəgani.

27Vaski aw Ɗəfdaya kəsganna zeŋgillew atəki net ɗii mimtit ɓa,

kəppana gəbay na gawla nok dəŋ gən gən ɓa.

28Kərban suwək tive nawmbat atəki nawkoho,

vi istat də ina, əntat də wənneken zu diiɗa.

29Milmiŋgiɗwa, nəŋgəl kawnah sukum kotak aka wənna dəhəm Davit, amtəka, məndəkni. Ha kakaŋka magamas nan tayaŋka. 30Məs kleŋgi asənək wən məs Maŋgəlva aynan səni: Maŋgəlva amna: Waɗi ɗəf taka ka məlya, səza zemvini va Davit van azəm mələya. 31Davit asənək an Maŋgəlva aŋgəl naɗɗa. Ndəni kan apel wənna silyo na Messiya* sətəki əmta, amna:

Dəppan atəki net ɗii mimtit ɓa,

gəbay nan dəŋ gən ɓa.

32Zezu wəŋka Maŋgəlva asil gənək səzet ɗii mimtiti, mənam pak mənam tatəɗɗa saydawa aka wənnani. 33Maŋgəlva agakdakanək Zezu, aɗiyək aka van dəzəŋ. Maŋgəlva ɗəfdaya apsənək Əmpəs Salala va anah daga farə. An məs kədawlaŋ də an məs kədapprəmaŋ, Zezuwi dədaɗɗan awalaŋkum. 34Vi Davit sən kiyən dəpeŋ a disiŋ ɓa, amma amna:

Ɗəfdaya, anahsən Ɗəfdaya naw na:

Asok aka vaw dəzəŋ,

35wakəzəm məlĩ aket məzuzel kuni.

36Vi vaski say Israyelɗe pak dəsənən gesiŋ na, Zezu wəŋka, ndəni məs kəkpa'aŋ aka wəlaŋga məzliwrihe, ndəni Maŋgəlva aziw gəni dəsan gən Ɗəfdaya Messiya.

37Adan ɗii apprəmən vaska, makret azlaka, apsənən Piyer dit masləŋɗe meɓɓet na: Mambar mədaɗɗa kandi milmiŋgiɗmə? 38Piyer azlansitike: Mətubiyə, məppan mambray nokum, mətaf baptem də iya na Zezu Krestu. Asna Maŋgəlva waviyan mambray nokum, wapsukum Əmpəs nan an Salala. 39Vi Maŋgəlva aynan sukumək wənnani, dit kirtukum ɗiiyen Maŋgəlva ayə ko naway səŋga pakə.

40Piyer aməsək wəpel sit də wən diiɗa, akkemetike: Duɗakanən gən zit səzet ɗii məzeti. 41Ɗii diiɗa atafənək wəpel nani, atafənək baptem, ɗii uzine hoku dətafaŋ baptem dəpaska. 42Asokunək zit aza wəpprəm wən məs masləŋɗe adawpeleŋ sitini, asapaŋka, akpaŋgaŋgək taka ko də wəɗɗa zəga pakə, ko də wənna uɗakan waya, də wəkkaman Maŋgəlva bo.

Va ɗii na Maŋgəlva asoŋgu

43Maŋgəlva apsitik tive sit masləŋɗe aɗɗaŋgək sokeneɗ diiɗa ha ɗii agətaŋgək sawɓa. 44Ɗii na Maŋgəlva pak tahəŋ va zəga taka asapanənək arya net pakə atəki taka. 45Avələnək zəga net pak vi kaw ɗeket deleɗ nan awalaŋ ziti, aza wəray neti. 46Ɗii na Maŋgəlva pak tahəŋ wəkalaŋ adəv gəla metiŋ naw zuliya* də gəla net pak adakalaŋ adawzəmaŋ. Tahəŋ wəzəmaŋ də wənneken ziti, də makret taka. 47Tahəŋ wə gakdakanən Maŋgəlva, ɗii pak aŋgluwənək wənneti. Ɗəfdaya tay ki ɗii nan aket pay pakə.

Currently Selected:

Wəza net Masləŋɗe 2: GDRNT85

Highlight

Copy