Wəza net Masləŋɗe 3
3
Məmbəl gəni vədal
1Pay maɓɓani Piyer də Zaŋ tay toŋgoŋ adəv gəla metiŋ naw zuliya*, də moskoyo də təbəs hoku, pay naw zuliya. 2Gu'o də madamba məs adawyaŋ na madamba mogoni, ɗəf taya daka vədalli daga muwani. Də mompum pak ɗii nan tahəŋ wəslanəni, wəkiyən a madamba naka, vi dəŋgəl gən sazlaga avet ɗii məzu toŋgoŋ adəv gəla metiŋ naw zuliya. 3Yaŋ awle maay Piyer də Zaŋ adawtoŋgoŋ, aŋgələk sazlaga aveti. 4Piyer də Zaŋ aziyənək heret akani, Piyer apsən na: Awlum ɗa. 5Vədal awlek lewlewi, azanna wapsənən zəga. 6Piyer apsəna: Seede tahəŋ avam ɓa sam, amma wampsuk zəga ana vamə: Də sembe na Zezu Krestu məs na Nazaret, əntatə nah suko: Asili adawə. 7Yaŋ Piyer arma van dəzəŋ, adawsil gəni, go'ləŋ tələn arahək sembe. 8Azla gənək zəni, aziwke, atəŋgək wədawa, yaŋ atoŋ dənɗaŋ adəv gəla metiŋ naw zuliya, tay dawa, tay gakdakan Maŋgəlva. 9Ɗii pak awlanənka, tay dawa tay gakdakan Maŋgəlva. 10Net bo asənənək na vədal məzu san amadamba mogon na gəla metiŋ naw zuliya, məzəŋgla sazlaga naki, agətaŋka.
Piyer apelik wən adəv gəla metiŋ naw zuliya*
11Yaŋ ɗəf nak dəŋgəm wəzar səza Piyer də Zaŋ ɓa, ɗii pak anzoŋko adoŋguk azeti amba genzek məs adawyaŋ na genzek na Salmoŋ, agətaŋgək sawɓa. 12Adan Piyer awle, apsit na: Munokum ɗii na Israyel, vimi kəda gətaŋ di? Vimi kədawləmən vakəmna mənam də sembe nami mədaw gəni di? Walla vi məsler də Maŋgəlvayi sa? 13Maŋgəlva na Abraham, na Isak, na Zakub, Maŋgəlva net migilmə apsənək gakdak sən gawla nan Zezu. Munokum sən kikum kəkanənək Zezu sit ɗii gugiriɗe, kə wəliyənək aba Pilatu, ko də Pilatu aŋgəl wəppan zlaŋ. 14Kəppanənək ɗəf məs salala məs təstəssə, yaŋ kəssohonən Pilatu dəppan sukum gən məbay gəbaya. 15Vaski kan kəbayən affən wəkoho. Amma Maŋgəlva asil gənək sətəki əmta. Nam bo saydawiɗ na wənnan mənani. 16Vədaləŋka arahək sembe də sembe na Zezu, an məs kulaŋ an məs kəsənaŋ, vi iya na Zezu də wətafa zəgas agəɗə, də wəɗi maɗulam aka Zezuwi ɗəffəŋ ambəl ama horokum pakə.
17Yo milmiŋgiɗwa, nəsənək an məs kəɗɗaŋ sənən Zezu, munokum dit ɗii gugiriɗ nokum, vi kəsənən ɓayi kəɗɗanən vaskəŋka. 18Daga far lahəŋki Maŋgəlva arban də met məs kleŋɗe, dewle Messiya* wazəm saha, an məs apel farəŋka, gesiŋgi kakaŋka. 19Mətubiyə məkpaŋgan makrokum aza Maŋgəlva, waviyan sukum mambray nokum. 20Ɗəfdaya wapsukum sembe narma wənnani, waslən sukum Zezu ndəni bo Messiya məs awel sukum daga laŋka. 21Dewle Zezu wasan a disiŋ tagay, ha payan Maŋgəlva aɗi dəgrak gəni məs akpaŋgan zəga pak meleketeni. Va anah də met məs kleŋɗe en salala laŋka. 22Vasna Moyis anahək na: Maŋgəlva Ɗəfdaya waslən sukum, aweleŋgit milmiŋgiɗkum məs kleŋ va aslənwa. Say kəpprəmən gən mani an məs adaw nah sukum pakə. 23Ɗəffan məs dəpprəm man ɓa, kawgohni səzet ɗii na Maŋgəlva, wazə. 24Məs kleŋɗe daga səza Samuyel ha dit məs dəzoŋ dərɓagan pakə, apelinək wənnani agəɗək də payan azam kakaŋka. 25Wən məs Maŋgəlva aynan dit məs kleŋɗeŋ na, vikumi, kətoŋgoŋguk adəv wən məs minan sit migilkum. Va anahsən Abraham: Wanəɗɗa barka aket ɗii namba dələv pak vi wənna əlfa noko. 26Vaski bo Maŋgəlva awel gawla nan vikum dabəŋ ki wəslən sukum, dəgəɗ sukum gən zəzay kəkpaŋgaŋ gəni də wəppan mambray nokum.
Currently Selected:
Wəza net Masləŋɗe 3: GDRNT85
Highlight
Share
Copy
Want to have your highlights saved across all your devices? Sign up or sign in
Gidar New Testament © Bible Society of Cameroon, 1985.
