Luka 22

Te kimi'anga rāvenga pikika'a kia tāmate'ia a Iēsū

(Mātaio 26.1-5; Māreko 14.1-2; Ioane 11.45-53)

1 # Exo 12.1-27 Tē vaitata maira te 'Ōro'a i te Kai 'Aka'ōpuekore'ia ra, ko tei tuatua'ia ra ē 'e Pāsa. 2Ē tē kimikimi ra te kau ta'unga nunui ē te au Pū'āpi'i Ture ē, 'akapē'ea rātou i te tāmate ngaro i a Iēsū, nō te mea, tē mataku ra rātou i te tangata.

Tē 'akatika nei a Iūda kia tuku atu i a Iēsū

(Mātaio 26.14-16; Māreko 14.10-11)

3Kua uru i'ora a Sātani ki roto i a Iūda, ko tei tapa'ia ra ko Ikariota, ē ko ia katoa tēta'i o te tino nga'uru mā rua ra. 4Ē 'aere atura aia ē kua tuatua atura ki te kau ta'unga nunui ē te au rangatira ē 'akapē'ea aia i te tuku'anga atu i a Iēsū ki a rātou. 5Kua mareka rava akera rātou ē kua 'akatika i'ora ē, ka 'ō mai i te moni nāna. 6Kua 'āriki aia, ē kua kimi i'ora aia i te rāvenga nō te tuku atu i a Iēsū ki a rātou kia kore rā 'e tangata e kite i te reira.

Tē 'akate'ate'amamao nei a Iēsū nō te kai'anga i te Pāsa

(Mātaio 26.17-25; Māreko 14.12-21; Ioane 13.21-30)

7E tae akera ki te rā o te Kai 'Aka'ōpuekore'ia ra, 'ei reira e tā'ia ai te au punua māmoe o te Pāsa. 8Kua tono atura a Iēsū i a Pētero rāua ko Ioane, nā kō atura, “Ka 'aere, ka 'ākonokono i te Pāsa nō tātou, kia kai tātou.”

9Kua ui maira rāua ki aia, “I 'ea tā'au i anoano kia 'ākonokono māua?”

10Kua pa'u atura aia ki a rāua, “Inā, mē tomo kōrua ki roto i te 'ōire ra, e 'ārāvei mai tēta'i tangata i a kōrua, tē 'apai ra i te 'āriki vai. E āru atu kōrua i aia ki roto i te 'are tāna e tomo ra. 11Ka karanga atu ei kōrua ki te pū o te 'are, ‘Tē ui maira te Pū'āpi'i, tei 'ea te pi'a manu'iri kia kai au i te Pāsa ē taku au pipi katoa?’ 12Ē nāna e 'akakite mai ki a kōrua i tēta'i pi'a ma'ata tei runga, kua papa. 'Ei reira kōrua e 'ākonokono ei.”

13'Aere atura rāua, ē kua kitea'ia e rāua mei tāna i 'akakite atu ki a rāua ra. Ē kua 'ākonokono i'ora rāua i te Pāsa.

Te 'ōro'a a te 'Atu

(Mātaio 26.26-30; Māreko 14.22-26; 1 Kōrīnētia 11.23-25)

14E tae akera ki te ora, no'o atura a Iēsū ē te au 'āpōsetolo ki te kaingākai ra. 15Ē kua tuatua atura aia ki a rātou, “'E anoano ma'ata tikāi tōku i te kai i tēianei Pāsa, ko au ē ko kōtou katoa, i mua ake i tōku mamae'anga. 16E 'akakite atu 'oki au ki a kōtou nei, kāre rava au e kai 'aka'ou i te reira, e tae 'ua atu ki tōna tupu'anga tikāi i roto i te bāsileia o te Atua ra.”

17Kua rave i'ora a Iēsū i te kapu, ē 'akameitaki atura, nā kō atura, “Ka rave mai i tēia, ka tu'a nā kōtou. 18Tē 'akakite atu nei 'oki au ki a kōtou, mei tēianei atu kāre au e inu 'aka'ou i tō te 'uā vine e tae 'ua mai te bāsileia o te Atua ra.”

19Kua rave i'ora aia i te varāoa, 'akameitaki atura, vāvā'i i'ora ē tuku atura ki a rātou, nā kō atura, “Ko tōku kōpapa tēia, ko tei 'ōronga'ia atu nō kōtou. Kia 'akapērā kōtou 'ei 'akama'ara'anga i āku.” 20#Ier 31.31-34Ē kua pērā katoa i'ora i te kapu, kia oti ake te kai'anga, nā kō atura, “Tēianei kapu ko te kōreromotu 'ōu ia i tōku nei toto te ka 'akamaringi'ia nō kōtou nei.

21 # Sal 41.9 “Inārā, tei runga katoa 'oki te rima o te tangata e tuku pikika'a i āku i tēianei kaingākai. 22Tē 'aere nei rāi 'oki te Tamaiti a te Tangata nei mei tei 'ākono'ia nōna ra. Ko taua tangata rā e tuku pikika'a mai i aia ra, 'e 'ae 'oki aia!”

23Ē kua 'akamata i'ora rātou rātou 'ua'orāi i te uiui ē, ko 'ai i a rātou te ka rave i te reira.

Te tau'ētono'anga ē, ko 'ai tei ma'ata rava atu

24 # Māt 18.1; Mār 9.34; Luk 9.46 'E tau'ētono'anga 'oki tei tupu i rotopū i te au pipi ē, ko 'ai i a rātou tei manako'ia ē, ko ia tei ma'ata rava atu. 25Kua karanga atura a Iēsū ki a rātou, “Tē tūtara nei te 'ui ariki o te au 'ētene ki runga a'o i a rātou ra, ē ko te aronga i mana i runga i a rātou ra, tē tapa nei rātou i a rātou 'ua'orāi ē, ‘'e aronga tākinga meitaki’. 26#Māt 23.11; Mār 9.35#Māt 20.25-27; Mār 10.42-44Ko kōtou rā, auraka kia 'akapērā. Inārā, ko tei ma'ata i roto i a kōtou na, kia 'āite ia ki tei iti, ē ko tei 'aka'aere ra kia 'āite ia ki tei tāvini ra. 27#Ioa 13.12-15Ko 'ai tei ma'ata atu, ko tei no'o i te kaingākai āinei, mē ko tei raverave ra? Kāre āinei ko tei no'o i te kaingākai? Ko au rā i rotopū i a kōtou 'ei raverave ia au.”

28“Ko kōtou ko te aronga e no'o tāmou ia ki āku i tōku au tīmata'anga nei. 29Ē ka 'ōronga atu au ki a kōtou i te tika kia 'aka'aere, mei tā tōku Metua i 'ōronga mai ki āku i taua tika'anga ra, 30#Māt 19.28kia kai kōtou ē kia inu 'oki i taku kaingākai i tōku bāsileia ra, ē kia no'o ki runga a'o i te au terōno i te 'akavā'anga i te au kōpū e tino nga'uru mā rua o Īserā'ela ra.”

Tē toto'u nei a Iēsū i tō Pētero 'u'una'anga

(Mātaio 26.31-35; Māreko 14.27-31; Ioane 13.36-38)

31“E Simona, e Simona, inā, i pati ana a Sātani i te rūrū i a kōtou mei te sītona ra. 32Inārā, i pure ana au nō'ou kia kore tō'ou 'akarongo e ngaro. Ē mē 'aka'āriu'ia mai koe ra, e 'akamāro'iro'i i tō 'ai taeake.”

33Kua pa'u atura a Pētero ki aia, “E te 'Atu, kua 'akate'ate'amamao au i te āru atu i a koe ki roto i te 'are 'āuri ē ki te mate katoa.”

34Kua tuatua maira a Iēsū, “E Pētero ē, tē 'akakite atu nei au ki a koe, kāre te moa e kākaoa ā tēia pō, ka tūtoru ō'ou 'u'una'anga ē kua kite koe i āku.”

Te kiri moni, te pūtē ē te koke

35 # Māt 10.9,10; Mār 6.8,9; Luk 9.3; 10.4 Kua ui atura a Iēsū ki tāna au pipi, “I āku i tono atu i a kōtou ma te kore 'e kiri moni ē te pūtē ē te tāmaka, i ngere āinei kōtou i tēta'i mea?” Kua pa'u maira rātou, “Kāre rava!”

36Kua 'akakite atura a Iēsū ki a rātou, “Inārā, i tēianei, 'e kiri moni tāna ra e 'apai ia, pērā katoa te pūtē. Ē tēta'i 'ua atu kāre āna koke, e 'oko atu ia i tōna pereue 'ei 'oko mai i tēta'i koke nāna. 37#Isa 53.12Nō te mea, tē 'akakite atu nei au ki a kōtou ē, ko tēia mea tei tātā'ia ē, ‘Kua kāpiti katoa'ia aia ki te aronga rave kino’, kia tupu ia i āku nei e tikāi; nō te mea, tē tupu anake nei te au tuatua i tātā'ia nōku nei.”

38Kua tuatua maira rātou, “E te 'Atu, inā, e rua koke i konei.”

Kua pa'u atura aia ki a rātou, “Ka rava 'ua.”

Tō Iēsū pure'anga i runga i te Maunga o te Ōlive

(Mātaio 26.36-46; Māreko 14.32-42)

39Tomo atura a Iēsū ki va'o, 'aere atura ki te Maunga o te Ōlive mei tāna rāi i mātau, ē kua āru atura te au pipi i aia. 40Ē kia tae atura aia ki taua ngā'i ra, kua karanga atura aia ki a rātou, “E pure kia kore kōtou e roko'ia e te tīmata'anga.”

41Ē kua 'akaātea atura aia mei a rātou mei te ātea o te toka kia pē'i'ia ra te mamao. Kua tuturi i'ora aia ki raro ē pure atura, 42nā kō atura, “E taku Metua, kia tika i a koe ra, e 'apai kē atu mei āku nei i tēianei kapu; inārā, auraka kia tupu tōku anoano, māri rā ko tō'ou ra.” 43Kua mama maira tēta'i 'āngela nō te rangi mai ki aia e 'akamāro'iro'i maira i aia. 44Nō te mea 'oki ē, kua ma'ata rava tōna mamae ngākau, kua ma'ata rava atura tāna pure 'akatenga; ē mei te tōpatapata toto ra tōna 'ou i te topa'anga ki runga i te one.

45E tū maira aia ki runga mei tāna pure'anga ra, e tae maira ki te au pipi ra, ē kitea maira tē moe ra rātou nō te taitaiā. 46Ē kua tuatua atura aia ki a rātou, “'E a'a kōtou i moe ei? E tū ki runga, e pure, kia kore kōtou e roko'ia e te tīmata'anga.”

Tē 'opu'ia nei a Iēsū

(Mātaio 26.47-56; Māreko 14.43-50; Ioane 18.3-11)

47Ē tē tuatua 'ua ra a Iēsū, inā, tēta'i urupū tangata ē tēta'i nō te tino nga'uru mā rua ra, ko tei tuatua'ia i a Iūda ra, i te 'aere'anga mai nā mua i a rātou, ē kua 'aere 'ua maira aia e vaitata a'o ki a Iēsū e 'ongi i aia. 48Kua ui atura rā a Iēsū ki aia, “E Iūda, tē tuku pikika'a āinei koe i te Tamaiti a te Tangata nei nā roto i te 'ongi?”

49Ē i te kite'anga ra tō tei vaitata a'o i a Iēsū ra i te ka tupu mai, kua ui atura rātou ki aia, “E te 'Atu, ka tāpotu āinei mātou ki te koke?” 50Kua tāpotu atura tēta'i o rātou i te tāvini o te Ta'unga Ma'ata ra, ē motu kē atura tōna taringa katau.

51Kua tuatua atura a Iēsū, nā kō atura, “Kua oti 'ua tēnā.” Kua 'akatūkia 'ua atura aia i te taringa, ē kua meitaki tākiri atura taua tāvini ra.

52Kua karanga atura a Iēsū ki te kau ta'unga nunui, te au rangatira o te 'iero ē te aronga pakari tei 'aere mai ki aia ra, “Kua 'aere mai āinei kōtou ma te au koke ē te au rākau mei te mea ē 'e tangata 'akatupu 'ōrure'au? 53#Luk 19.47; 21.37I rotopū 'oki au i a kōtou i te au rā kātoatoa i roto i te 'iero, ē kāre kōtou i 'opu mai i āku. Inārā, nō kōtou 'oki tēia ora nei ē te mana o te pōiri.”

Tō Pētero 'u'una'anga i a Iēsū

(Mātaio 26.57-58,69-75; Māreko 14.53-54,66-72; Ioane 18.12-18,25-27)

54Kua 'opu mai rātou i a Iēsū, e arataki atura ki roto i te 'are o te Ta'unga Ma'ata ra. Ē kua āru atura a Pētero i muri roa. 55Kua ta'u i'ora rātou i te a'i i rotopū tikāi i te koro ē kua no'o kāpiti anake i'ora rātou ki raro, ē kua no'o katoa atura a Pētero ki rotopū i a rātou ra. 56Kite maira tēta'i tāvini va'ine i aia i te no'o'anga i te pae a'i ra, ē tīroi matariki maira i aia, kua nā kō akera, “Ko tēia tangata katoa nei tēta'i rātou ko Iēsū.”

57Kua 'u'una atura rā a Pētero, nā kō akera, “E mā'ine, kāre au i kite i aia.”

58E roa poto akera, kua 'ākara maira tēta'i tangata kē i aia, nā kō maira, “Ko koe katoa tēta'i nō rātou.” Kua pa'u atura a Pētero, “E tama, kāre au.”

59Ē mei te 'okota'i ora akera i topa, kua mārō maira tēta'i kē atu, nā kō akera, “'E tika tikāi, nō Iēsū tēianei tangata, nō te mea, 'e tangata Galilea 'oki aia.”

60Kua pa'u atura a Pētero, “E tama, kāre au i kite i tā'au i tuatua maina.” Ē kāre akera i mamia i te tuatua'anga atu aia ra, kākaoa i'ora te moa. 61Kua 'āriu maira te 'Atu ē kua 'ākara maira ki a Pētero, ē kua ma'ara akera a Pētero i te tuatua a te 'Atu tāna i 'akakite mai ki aia ē, “I mua ake ka kākaoa ai te moa ākōnei, ka tūtoru ō'ou 'u'una'anga mai i āku.” 62Kua 'aere atura a Pētero ki va'o ē kua auē ma'ata atura aia.

Tē 'āviri'ia nei ē tē pāpā'ia nei a Iēsū

(Mātaio 26.67-68; Māreko 14.65)

63Ē ko te au tangata i tiaki i a Iēsū ra i 'āviri maira i aia, ē i pāpā maira i aia. 64Kua 'akapūroku i'ora rātou i ōna mata ē kua ui maira, nā kō maira, “E toto'u mai ē, ko 'ai tēia e pāpā nei i a koe?” 65'E mānganui rāi tā rātou au tuatua 'akakino i tuatua mai ki aia.

Tē tū nei a Iēsū ki mua i te Kōnitara

(Mātaio 26.59-66; Māreko 14.55-64; Ioane 18.19-24)

66Ē tei te ao'anga, kua putuputu maira te aronga pakari o te 'iti tangata, te kau ta'unga nunui ē te au Pū'āpi'i Ture, ē kua arataki rātou i a Iēsū ki mua i tā rātou 'uipā'anga kōnitara, 67nā kō akera, “Mē ko te Mesia āinei koe? Ka 'akakite mai ki a mātou.”

Kua pa'u atura a Iēsū ki a rātou, “Mē 'akakite atu au ki a kōtou, kāre rāi kōtou e 'irinaki mai; 68ē mē ka ui atu au, kāre kōtou e pa'u mai. 69Mei tēianei atu rā ka no'o te Tamaiti a te Tangata nei ki te rima katau o te Atua Mana Kātoatoa.”

70Kua ui maira rātou kātoatoa, “Ko koe tikāi i reira te Tamaiti a te Atua?”

Kua pa'u atura a Iēsū ki a rātou, “Ko tā kōtou e tuatua maina, ko au ia.”

71Ē kua tuatua i'ora rātou, “'E a'a 'ua atu rāi tātou ka 'inangaro ei i te au kite? Kua 'akarongo 'oki tātou 'ua'orāi mei roto mai i tōna va'a tikāi!”

Currently Selected:

Luka 22: CIMRNT

Highlight

Copy