Luka 23

Tē tū nei a Iēsū ki mua i a Pilato

(Mātaio 27.1-2,11-14; Māreko 15.1-5; Ioane 18.28-38)

1Kua tū anake ra taua aronga ma'ata katoa ra ki runga, arataki atura i a Iēsū ki a Pilato ra. 2Kua tāpepe atura rātou i aia, nā kō atura, “Kua kite ake nei mātou i tēianei tangata i te tārurikē'anga i tēianei 'enua, ē te ārai'anga i te tero nā Kaisara, ē te 'akakite'anga i aia 'ua'orāi ē, ko te Mesia aia, ko te Ariki.”

3Kua ui maira a Pilato ki a Iēsū, nā kō maira, “Ko te Ariki āinei koe o te Ngāti Iūda?” Kua pa'u atura aia, “Koia tika tā'au i tuatua maina.”

4Kua 'akakite atura a Pilato ki te kau ta'unga nunui ē ki te tangata tini ra, “Kāre rava au i kite i tēta'i tumu tau tikāi nō te 'akautunga i tēianei tangata.”

5Pāketaketa atura tō rātou mārō i te nā kō'anga atu ē, “Tē tāoriori nei aia i te 'iti tangata i tāna 'āpi'i'anga i te 'enua katoa o te Ngāti Iūda, mei Galilea mai e tae rava mai nei ki tēianei ngā'i.”

Tō Iēsū tono'anga'ia ki a Heroda

6E 'akarongo akera a Pilato i te reira, kua ui akera aia ē, mē 'e tangata Galilea āinei tēia. 7E kite akera aia ē, nō tō Heroda 'akatere'anga a Iēsū, kua tono atura aia i aia ki a Heroda ra, nō te mea, tei Iērūsalēma katoa aia i te reira tuātau. 8Mareka rava akera a Heroda i te kite'anga atu i a Iēsū, nō te mea, kua roa ake nei te tuātau tōna 'inangaro'anga kia kite i aia, nō te tuatua ma'ata tāna i 'akarongo nōna, ē i mānakonako aia kia kite i tēta'i 'akairo ūmere'ia i te rave'anga'ia e ia. 9Kua uiui maira aia ki a Iēsū, 'e mānganui te ui'anga. Kāre rava rā a Iēsū i kī 'ua atu ki a Heroda. 10Tē tāpepe tāmou nui mārie maira te kau ta'unga nunui ē te au Pū'āpi'i Ture i aia. 11Kua 'aka'āuouō maira a Heroda ē tōna au va'e'au i a Iēsū, 'āviri maira, 'akakāka'u maira i aia ki te kāka'u pū mānea tikāi, ē kua 'aka'oki maira i aia ki a Pilato. 12I taua rā rāi, i 'aka'oa atu ei a Heroda rāua ko Pilato; i no'o 'enemi 'ua ana 'oki rāua i muatangāna.

Tē 'akautunga'ia nei a Iēsū ki te mate

(Mātaio 27.15-26; Māreko 15.6-15; Ioane 18.39—19.16)

13E 'akaputuputu maira a Pilato i te kau ta'unga nunui, te au tūtara ē te tangata tini ra, 14ē kua karanga atura ki a rātou, “I arataki mai ana kōtou i tēianei tangata ki āku nei, mei te mea ē, i tārurikē'ia te 'enua e ia. Ē inā, i kimi i'o nei 'oki au i aia ki mua i tō kōtou aroaro, ē kāre au i kite i tēta'i tumu tau tikāi nō te 'akautunga i aia, nō te au mea tā kōtou e 'aka'apa nei i aia. 15Ē kāre katoa 'oki i kitea e Heroda, nō te mea, kua 'aka'oki mai aia i aia ki a mātou. Inā, kāre rava āna 'anga'anga i rave e tau ei i aia te mate. 16Ē tēianei, e pāpā au i aia, ka tuku 'ua atu ei.”#23.16 Kua tātā'ia te 'īrava i roto i ēta'i pōkaikai tuatua, kāre rā i roto i te au pōkaikai ta'ito tikāi: 17 E tuku 'oki aia i tēta'i i taua 'Ōro'a ra e tikāi.

18Kua kāpiki ta'i atura rātou rava rāi, nā kō atura, “Taia atu tēnā! Ko Bāraba tā'au e tuku mai!” 19Nō te kaitamaki i taua 'ōire ra ē nō te tā tangata i titiri'ia ai a Bāraba ki roto i te 'are 'āuri.

20Nō tō Pilato 'inangaro i te tuku atu i a Iēsū, kua pati 'akatenga 'aka'ou maira aia ki a rātou. 21Kua kāpiki 'ua atura rā rātou, “E 'akasātauro, e 'akasātauro atu i aia!”

22Kua tuatua 'aka'ou maira aia ki a rātou, ko te tūtoru 'oki tēia, “'E a'a 'oki tāna kino i rave? Kāre rava au i kite i tēta'i tumu tau tikāi nō te mate. Ē tēianei, e pāpā au i aia, ka tuku 'ua atu ei.”

23Kua kāpikipiki ma'ata atura rātou ma te mārō i te pati'anga atu kia 'akasātauro'ia a Iēsū. E tupu atura taua 'inangaro nō rātou ra. 24Kua 'akatika maira a Pilato i tā rātou i 'inangaro ra. 25Kua tuku maira aia ki a rātou i tā rātou i pati ra, ko taua tangata ra i titiri'ia ki roto i te 'are 'āuri nō te kaitamaki ē te tā tangata; ē kua tuku katoa maira aia i a Iēsū ki tō rātou 'akakoro'anga ra.

Te 'akasātauro'ia'anga o Iēsū

(Mātaio 27.32-44; Māreko 15.21-32; Ioane 19.17-27)

26Ē tei te arataki'anga atu rātou i a Iēsū, kua 'opu atura rātou i a Simona nō Kurene mai, tē 'aere maira ki roto nei mei va'o mai i te 'ōire, ē kua tuku atura rātou i te sātauro ki runga a'o i aia kia 'apai atu nā muri i'o i a Iēsū.

27'E urupū tangata ma'ata tei āru atu i a Iēsū, ē te au va'ine i te auē'anga ē te iri'ea'anga i aia. 28Kua 'āriu maira a Iēsū ki a rātou, kua nā kō maira, “E te au tamā'ine nō Iērūsalēma nei, auraka e auē mai i āku, ka auē rā i a kōtou 'ua'orāi ē i tā kōtou tamariki. 29Inā 'oki, tē vaitata maira te tuātau e tuatua'ia ai ē, ‘'E ao tō te va'ine pā, ē te kōpū kāre i 'ānau, ē te ū kāre i ngote'ia.’ 30#Hos 10.8; Apo 6.16'Ei reira rātou e tuatua ai ki te au maunga, ‘E topa mai ki runga a'o i a mātou!’ ē ki te au tuā'ivi ra, ‘E tāpoki mai i a mātou!’ 31Nō te mea, mē ko tā te tangata rāvenga tēia ki te rākau mata nei, ka 'akapē'ea'ia ra te rākau marō?”

32E rua tangata rave kino tei arataki katoa'ia ma ia katoa ra kia tāmate'ia. 33E tae atura rātou ki te ngā'i i tuatua'ia ra ē ko “Te Katu Tangata,” 'akasātauro i'ora rātou i aia i reira, ē ngā tangata rave kino ra, tēta'i ki te rima katau ē tēta'i ki te rima kaui. 34#Sal 22.18Kua karanga atura a Iēsū, “E taku Metua, e 'akakore mai koe i tā rātou 'ara, kāre 'oki rātou i kite i tā rātou e rave nei.”

Ko rātou rā, kua tu'a kērero rātou i tōna kāka'u. 35#Sal 22.7Tē tū 'ua ra te tangata tini, tē 'ākara 'ua atura. Kua 'āviri katoa maira te au tūtara i aia, nā kō akera, “Ko ēta'i kē ra tāna i 'akaora! E 'akaora aia i aia 'ua'orāi mē ko te Mesia aia, te mea 'iki'ia e te Atua ra.”

36 # Sal 69.21 Kua 'āviri katoa maira te au va'e'au i aia, 'aere maira ē 'apai mai i te vinika nāna, 37nā kō maira, “Mē ko te Ariki koe o te Ngāti Iūda ra, ka 'akaora ana i a koe 'ua'orāi!”

38Kua tātā'ia 'oki tēta'i tuatua i runga a'o i aia ē, “Ko te Ariki tēia nō te Ngāti Iūda.”

39Kua 'akakino akera 'oki tēta'i i aua tangata rave kino i 'akasātauro katoa'ia ra, nā kō akera, “Ko te Mesia āinei koe? Ka 'akaora i a koe 'ua'orāi, ē i a māua katoa 'oki.”

40Kua pa'u maira tēta'i ma te māinaina atu i aia, nā kō maira, “Kāre ō'ou mataku i te Atua, i te mea ē, tei roto anake koe i taua 'akautunga'anga nei? 41Kua tika 'oki tō tāua nei, nō te mea, ko te tūtaki 'oki tēia i tā tāua i rave ra; kāreka tēianei tangata, kāre rava āna kino i rave.” 42Kua karanga atura aia, “E Iēsū, e 'akama'ara mai koe i āku kia tae koe ki tō'ou bāsileia.”

43Kua pa'u maira a Iēsū ki aia, “Koia mou tāku e karanga atu ki a koe nei, 'ei Pārataito tāua katoa i tēianei rāi rā.”

Te matenga o Iēsū

(Mātaio 27.45-56; Māreko 15.33-41; Ioane 19.28-30)

44 # Exo 26.31-33 Kua tae pa'a ki te avatea pū, ko te pōiri i'ora ia ki runga i taua 'enua katoa ra, e tae rava akera ki te ora toru. 45'Akapōiri'ia i'ora te rā, ē nga'ae rava akera ā rotopū te ārai o te nao ra. 46#Sal 31.5Kua kāpiki atura a Iēsū ma te reo ma'ata, nā kō atura, “E taku Metua, tē tuku atu nei au i tōku vaerua ki ō rima na.” E oti akera taua tuatua ra, 'akaruke maira tōna vaerua i aia.

47E kite akera te rangatira 'ānere i taua mea i tupu ra, 'akakakā atura i te Atua, nā kō atura, “'E tangata tuatua tika tikāi tēia.”

48Ē te tangata tini rava rāi ko tei putuputu mai e 'ākara ra, kite akera i te tū tikāi i aua mea i tupu ra, 'oki anake atura ma te papaki i tō rātou umauma nō tō rātou mamae. 49#Luk 8.2,3Ē te au tangata katoa i mātau i a Iēsū ra, ē te au va'ine i āru mai i aia mei Galilea maira, tū 'ua maira ia i te ātea kē i te 'ākara 'ua'anga i aua mea ra.

Te tanumanga o Iēsū

(Mātaio 27.57-61; Māreko 15.42-47; Ioane 19.38-42)

50Ē inā, tēta'i tangata ko Iōsēpha te ingoa, 'e mema kōnitara aia, 'e tangata meitaki ē te tuatua tika. 51Kāre aia i 'akatika i tā te kōnitara tika ē tā rātou i rave ra. Nō Ārīmātea aia, 'e 'ōire Ngāti Iūda. Tē tāpapa katoa ra aia i te bāsileia o te Atua. 52'Aere atura aia ki a Pilato, ē pati atura i te kōpapa o Iēsū. 53Kua tuku i'ora aia i te kōpapa ki raro, va'ī i'ora ki te kāka'u, e tuku atura ki roto i te mēnema i pao'ia ki roto i te mato ra, kāre rava 'e tangata i va'o'ia ake ki reira. 54Ko te rā 'akate'ate'amamao'anga te reira, tē vaitata maira 'oki te Sābati.

55Ē te au va'ine tei 'aere mai rātou ko Iēsū mei Galilea maira, āru atura i a Iōsēpha, kite atura i te mēnema ra, ē te tū o te vai'o'anga'ia te kōpapa nōna ra. 56#Exo 20.10; Deut 5.14Kua 'oki atura rātou ki te kāinga ē kua 'akate'ate'amamao i'ora i te rākau kakara ē te manongi. E 'akangāro'i i'ora i te Sābati mei tei 'akaue'ia maira.

Currently Selected:

Luka 23: CIMRNT

Highlight

Copy