Mātaio 20
20
Te aronga 'anga'anga i roto i te kāingā vine
1“E 'āite te bāsileia o te ao ra ki tēta'i tangata 'atu kāinga ra, ko tei 'aere atu ki va'o i te pōpongi metua e o'u i te aronga 'anga'anga ki roto i tōna kāingā vine. 2Kua 'akatika akera aia ki te aronga 'anga'anga ē kia takita'i moni 'ārio i te rā 'okota'i, ē kua 'akaunga atura aia i a rātou ki roto i tōna kāingā vine. 3Ē 'aere atura aia ki va'o mei te ora iva ra, kite atura aia i ēta'i tangata i te tū 'ua'anga ma te kore e 'anga'anga i te ngā'i 'oko'oko'anga, 4ē kua karanga atura aia ki a rātou, ‘Ka 'aere katoa kōtou ki roto i te kāingā vine ra, ē nāku e 'ōronga atu i te mea tau tikāi nā kōtou.’ 'Aere atura rātou. 5'Aere 'aka'ou atura aia ki va'o mei te avatea pū ē te ora toru ra, kua pērā 'aka'ou atura aia. 6Ē 'aere atura aia ki va'o mei te ora rima, kite atura aia i ēta'i tangata i te tū 'ua'anga ma te 'anga'angakore, ē kua karanga atura aia ki a rātou, ‘'E a'a kōtou i tū 'ua ai ma te 'anga'angakore i konei e 'ope 'ua atu te rā nei?’ 7Kua nā kō maira rātou ki aia, ‘Nō te mea, kāre 'e tangata i o'u mai i a mātou.’ Kua karanga atura aia ki a rātou, ‘E 'aere katoa kōtou ki roto i te kāingā vine.’
8 #
Lev 19.13; Deut 24.15 “Ē a'ia'i i'ora, kua karanga atura te 'atu kāingā vine ra ki tōna 'aka'aere, ‘E kāpiki atu i te aronga 'anga'anga, e tūtaki atu i tā rātou moni 'anga'anga, 'akamata mai mei te aronga 'openga ra e tae 'ua atu ki te aronga mua ra.’ 9Ē te aronga tei tae mai mei te ora rima ra, rauka i'ora tā rātou e ta'i moni 'ārio i te tangata 'okota'i. 10Ē kia tae maira ki tō mua ra, manako i'ora rātou ē, ka ma'ata atu tā rātou e rauka mai. Kua rauka mai rā i a rātou tātakita'i e ta'i moni 'ārio. 11Ē tei te rauka'anga maira, kua tarotaro i'ora rātou i te 'atu kāinga ra, 12nā kō maira, ‘Tēia aronga 'openga ra, 'okota'i 'ua ō rātou ora i te 'anga'anga'anga, ē kua 'aka'āiteite koe i a rātou ki a mātou nei, tei 'apai i te 'apainga ē te veravera o te rā.’
13“Kua pa'u atura aia ki tēta'i o rātou, ‘E tama, kāre au i tārevakē ki a koe. Kāre āina koe i 'akatika mai ki āku i te tuatua ē kia 'okota'i ā'au moni 'ārio? 14Ka rave i tā'au, ka 'aere. Kua 'inangaro 'oki au i te 'ōronga atu ki tēia aronga 'openga nei mei tā'au katoa na. 15Kāre āina e tau i āku kia rave au i tāku i 'inangaro i tāku au 'apinga? Mē kāre rā, tē kino ra tō'ou mata, nō te mea, tē meitaki nei au?’
16 #
Māt 19.30; Mār 10.31; Luk 13.30 “E riro rāi te 'openga ra nō mua, ē tō mua ra 'ei 'openga ia.”
Te toru o tō Iēsū tuatua'anga nō tōna mate'anga
(Māreko 10.32-34; Luka 18.31-34)
17Ē tē 'aere atura a Iēsū ki Iērūsalēma, kua arataki atura aia i te au pipi tino nga'uru mā rua ra ki te pae ra, nā kō atura ki a rātou i te arāta'a, 18“Inā, tē 'aere nei tātou ki Iērūsalēma, ē e tuku'ia te Tamaiti a te Tangata nei ki te kau ta'unga nunui ē te au Pū'āpi'i Ture, ē ka 'akautunga rātou i aia ki te mate. 19Ē ka tuku 'oki rātou i aia ki te au 'ētene kia 'āviri'ia, kia pāpā'ia ē kia 'akasātauro'ia 'oki. Ē i te toru o te rā ra e tū 'aka'ou maira aia.”
Te pati'anga a tēta'i metua va'ine
(Māreko 10.35-45)
20Kua 'aere maira te metua va'ine o ngā tamariki a Zebedaio ki a Iēsū ra ē āna puke tamariki, kua tuturi i'ora ki mua i aia e pati maira i tēta'i mea ki aia ra.
21Ē kua ui atura a Iēsū ki aia, “'E a'a tā'au e 'inangaro?”
Kua pa'u maira aia, “E 'akatika mai koe kia no'o āku tamariki nei, tēta'i ki tō'ou rima katau, tēta'i 'oki ki tō'ou rima kaui i roto i tō'ou bāsileia.”
22Kua pa'u atura a Iēsū, nā kō atura, “Kāre kōtou i kite i tā kōtou i pati mai nei. Ka rauka āina i a kōrua kia inu i te kapu tāku e vaitata nei i te inu, ē kia bāpetīto'ia kōrua ki te bāpetīto e bāpetīto'ia ai au nei?”
Kua tuatua maira rāua ki aia, “Ka rauka'ia i a māua.”
23Ē kua karanga atura a Iēsū ki a rāua, “E inu tikāi kōrua i tāku kapu, ē e bāpetīto'ia rāi kōrua ki te bāpetīto e bāpetīto'ia ai au nei. Inārā, ko te no'o ki taku rima katau ē ki taku rima kaui, kāre ia 'e tika i āku kia 'ōronga atu, māri rā, nō rātou tā taku Metua i 'akate'ate'amamao.”
24Ē kia 'akarongo akera te tino nga'uru ra, kī akera rātou i te riri i aua taeake ra. 25#Luk 22.25,26Kua kāpiki atura a Iēsū i a rātou ki aia, ē kua nā kō atura, “Kua kite 'oki kōtou ē, tē tūtara nei te 'ui ariki o te au 'ētene ki runga a'o i a rātou, ē te aronga nunui ra tē mana ra ia i runga a'o i tō rātou. 26#Māt 23.11; Mār 9.35; Luk 22.26Kāre e tika kia 'akapērā kōtou i rotopū i a kōtou. Ko tei 'inangaro rā kia ma'ata aia i ō kōtou na, kia riro aia 'ei tāvini nō kōtou. 27Ē ko tei 'inangaro kia riro aia ki mua 'ua rāi i ō kōtou na, kia riro aia 'ei tāvini 'aka'aka nō kōtou. 28Kāre 'oki te Tamaiti a te Tangata nei i 'aere mai kia tāvini'ia aia, 'ei tāvini rā ē kia 'ōronga i tōna ora 'ei 'oko nō te tangata 'e mānganui.”
Tē 'akaora nei a Iēsū i ngā tangata matapō
(Māreko 10.46-52; Luka 18.35-43)
29Ē i tō rātou 'akaruke'anga i a Iēriko, 'e urupū tangata ma'ata tei āru atu i aia. 30Ē inā, tē no'o ra 'e tokorua tangata matapō ki te pae arāta'a, 'akarongo akera rāua ē, tē 'aere ra a Iēsū nā reira mai, kua kāpiki maira rāua, nā kō maira, “E aro'a mai koe i a māua, e te 'Atu, e te tamaiti a Dāvida!”
31Kua kauvae atura te tangata tini i a rāua kia mūtēkī 'ua. Inārā, kua ma'ata atu akera tā rāua kāpiki'anga, nā kō maira, “E aro'a mai i a māua nei, e te 'Atu, e te tamaiti a Dāvida!”
32E tū 'ua i'ora a Iēsū, kua kāpiki atura i a rāua, nā kō atura, “'E a'a tā kōrua e 'inangaro kia rave atu au nō kōrua?”
33Kua nā kō maira rāua ki aia, “E te 'Atu, kia pu'era ō māua mata.”
34E tangi atura a Iēsū i a rāua, kua 'āmiri atura i ō rāua mata. Ē i reira rāi, pu'era akera ō rāua mata, ē kua āru maira rāua i aia.
Currently Selected:
Mātaio 20: CIMRNT
Highlight
Share
Copy
Want to have your highlights saved across all your devices? Sign up or sign in
Cook Island Maori Revised New Testament © Bible Society of the South Pacific, 2021.
