Mātaio 21

Te tomo'anga pāpānunui ki roto i a Iērūsalēma

(Māreko 11.1-11; Luka 19.28-40; Ioane 12.12-19)

1Kia vaitata maira a Iēsū ē tāna au pipi ki Iērūsalēma, e tae maira ki Betephage, ki te Maunga o te Ōlive ra, kua tono atura a Iēsū i e tokorua pipi, 2nā kō atura ki a rāua, “E 'aere kōrua ki roto i te 'ōire i mua mai i a kōrua na, ē ka kite vave atu kōrua i tēta'i 'āsini kua 'erekia i reira, ma te punua i te pae i aia. E tatara mai ma te taki mai ki konei ki āku nei. 3Ē kia tuatua tēta'i 'ua atu tangata ki a kōrua, e karanga atu kōrua, ‘'E anoano tō te 'Atu nō rāua,’ ē nāna e tuku mai i a rāua i taua 'ati'anga rāi.”

4Kua tupu 'oki tēia au mea kātoatoa nei 'ei 'akatupu i tā te peroveta i tuatua ana i te nā kō'anga mai ē,

5 # Zek 9.9 “E 'akakite atu ki te tamā'ine a Siona,

Inā, tē 'aere maira tō'ou Ariki ki a koe na,

ma te 'aka'aka ē te no'o ki runga a'o i tēta'i tāngutu 'āsini,

'e punua nā tēta'i tīnana.”

6Kua 'aere atura ngā pipi ra, ē kua rave atura mei tā Iēsū i 'akaue atu. 7Kua taki maira i te 'āsini ē te punua ra, kua tuku i'ora i tō rāua kāka'u ki runga a'o i ngā 'āsini ra, ē kua 'akano'o i'ora i a Iēsū ki runga a'o. 8Kua to'ato'a te urupū tangata ma'ata i tō rātou kāka'u ki runga i te arāta'a. Kua tīpū atura tēta'i pāpāki i te au rārā rākau ē kua 'ārikiriki atura ki runga i te arāta'a. 9#Sal 118.25,26Ē te urupū tangata tei nā mua ra ē tei āru mai nā muri ra, kua kāpiki maira, nā kō maira, “Hōsāna, e te tamaiti a Dāvida! Kia 'akameitaki'ia aia tei 'aere mai ma te ingoa o te 'Atu! Hōsāna i te rangi teitei!”

10Ē, i te tomo'anga atu a Iēsū ki roto i a Iērūsalēma, kua keukeu kātoatoa'ia i'ora te 'ōire, nā kō akera, “Ko 'ai tēia?” 11Kua karanga atura te au urupū tangata ra, “Ko Iēsū tēia, te peroveta nō Nāzarēta mai o Galilea ra.”

Tē 'aere ra a Iēsū ki roto i te 'iero

(Māreko 11.15-19; Luka 19.45-48; Ioane 2.13-22)

12Kua tomo atura a Iēsū ki roto i te 'iero, ē kua tuaru kātoatoa atura ki va'o i te aronga i 'oko atu ē i 'oko mai i roto i te 'iero ra. Ē kua tātīpoki atura 'oki i te au kaingākai a te aronga tiēni moni ra ē te au no'o'anga o te aronga i 'oko i te au kūkupa ra, 13#Isa 56.7; Ier 7.11ma te karanga atu ki a rātou ē, “Kua oti 'oki i te tātā'ia ia, ‘E karanga'ia tōku 'are ē, 'e 'are pure'anga’, kua 'akariro'ia i'o nei rā e kōtou 'ei ana nō te aronga keikeiā.”

14Kua 'aere maira te au matapō ē te au pirikoki ki aia i roto i te 'iero ra, ē kua 'akaora atura aia i a rātou. 15Kia kite mai rā te kau ta'unga nunui ē te au Pū'āpi'i Ture i te au mea ūmere i rave'ia e ia, ē te au tamariki i te kāpikipiki'anga i roto i te 'iero, ē te nā kō'anga ē, “Hōsāna ki te tamaiti a Dāvida,” kua mākitakita rava akera rātou, 16#Sal 8.2ē kua tuatua maira ki aia, “Tē 'akarongo na koe i tā rātou e tuatua ra?”

Kua pa'u atura a Iēsū ki a rātou, “Āe. Kāre āina kōtou i tatau ana ē, ‘Mei roto mai i te va'a o te tamariki meangiti ē te kaiū i rauka ai i a koe te 'akapa'apa'a'anga nunui’?”

17Kua vai'o atura aia i a rātou, ē 'aere atura ki va'o mai i te 'ōire ki Bētānia, ē kua moe atura i taua pō ra ki reira.

Tauma'a i'ora a Iēsū i te pū suke

(Māreko 11.12-14,20-24)

18Ē i te pōpongi roa, kua 'oki maira a Iēsū ki te 'ōire, ē kua pongi aia. 19E kite atura aia i tēta'i pū suke i te pae arāta'a ra, kua 'aere atura aia ki taua pū suke ra, ē kāre 'e 'ua ō runga i kitea mai, māri ko te au rau anake 'ua. Kua karanga atura aia ki te pū suke ra, “Auraka rava atu 'e 'ua 'aka'ou i runga i a koe na e tuātau 'ua atu.” Mae tākiri rava atura te pū suke i taua 'ati'anga rāi!

20Ē kia kite akera te au pipi ra, vā 'ua atura rātou, nā kō akera, “I 'akapē'ea i viviki ei te mae'anga o te pū suke?”

21 # Māt 17.20; 1 Kōr 13.2 Kua pa'u atura a Iēsū, nā kō atura ki a rātou, “Koia mou tāku e karanga atu ki a kōtou nei, mē 'e 'akarongo tō kōtou ē kāre 'e 'ēkōkō, kāre ē ko te semeio 'ua o te pū suke te ka rauka i a kōtou i te rave, māri rā kia karanga atu kōtou ki tēianei maunga ē, ‘Kia kiriti'ia koe ē kia titiri'ia atu koe ki roto i te tai,’ ka tupu ia. 22Ē te au mea kātoatoa ra tā kōtou e pati 'ua atu nā roto i te pure ma te 'irinaki tikāi, ka rauka ia i a kōtou.”

Tē ui'ia nei te mana o Iēsū

(Māreko 11.27-33; Luka 20.1-8)

23Kia tae maira a Iēsū ki roto i te 'iero ra, kua 'aere maira te kau ta'unga nunui ē te aronga pakari o te 'iti tangata ki vaitata a'o i aia e 'āpi'i ra, nā kō maira, “Nō 'ai te mana i rave ei koe i tēianei au mea? Ē nā 'ai i 'ōronga mai i tēianei mana ki a koe nei?”

24Kua pa'u atura a Iēsū, nā kō atura ki a rātou, “Ka ui katoa atu au i tēta'i mea ki a kōtou, ē mē rauka i a kōtou i te 'akakite mai ki āku, ka 'akakite katoa atu nei au ki a kōtou ē, nō 'ai te mana e rave nei au i ēia mea nei. 25Nō 'ea mai te bāpetīto'anga a Ioane nei? Nō te rangi mai āina, mē nō te tangata mai āina?”

Kua 'uri'uri manako i'ora rātou ki a rātou 'ua'orāi, nā kō akera, “Mē karanga atu tātou ē, ‘Nō te rangi mai’, e riro aia i te tuatua mai ki a tātou ē, ‘'E a'a i reira kōtou i kore ei i 'irinaki atu i aia?’ 26Mē karanga rā tātou ē, ‘Nā te tangata mai’, tē mataku nei tātou i te tangata, nō te mea, tē manako ra te tangata kātoatoa ē, 'e peroveta a Ioane.” 27Kua pa'u maira rātou ki a Iēsū, nā kō maira, “Kāre mātou i kite.”

Kua karanga atura a Iēsū ki a rātou, “Kāre katoa au e 'akakite atu ki a kōtou ē, nō 'ai te mana i rave ei au i ēia nei mea.”

Te parabole o ngā tamariki tamāroa tokorua

28Kua tuatua katoa a Iēsū ki te kau ta'unga nunui ē te aronga pakari, “'E a'a rā tō kōtou manako? Ko tēta'i tangata e tokorua āna tamariki tamāroa, ē kua 'aere atura aia ki te tama mua, ē kua karanga atura, ‘E tama, e 'aere koe i tēia rā e 'anga'anga ki roto i taku kāingā vine.’ 29Kua pa'u maira aia, nā kō maira, ‘Kāre au e 'aere.’ I muri 'ua akera, kua tatarā'ara i'ora aia, 'aere atura. 30Kua 'aere katoa atura te metua ki te teina, kua tuatua 'akapērā katoa atura. Kua pa'u maira aia, nā kō maira, ‘Ka 'aere au, e taku 'atu.’ Kāre rā aia i 'aere. 31Ko 'ai i a rāua i 'ākono i te 'inangaro o tō rāua metua ra?”

Kua nā kō maira rātou ki aia, “Ko te tama mua.”

Kua karanga atura a Iēsū ki a rātou, “Koia mou tāku e karanga atu ki a kōtou na, ko te au tangata ko'i tero ē te au va'ine 'akaturi te ka nā mua i a kōtou ki roto i te bāsileia o te Atua ra. 32#Luk 3.12; 7.29,30I 'aere mai 'oki a Ioane ki a kōtou nei ma te tuatua tika, ē kāre ake nei kōtou i 'irinaki atu i aia. Ko te aronga ko'i tero ē te au va'ine 'akaturi rā, kua 'irinaki rātou i aia. I muri ake i tō kōtou kite'anga, kāre rāi kōtou i tatarā'ara ē ka 'irinaki atu ei i aia.

Te parabole o te aronga tope vine

(Māreko 12.1-12; Luka 20.9-19)

33 # Isa 5.1,2 “E 'akarongo 'aka'ou mai rāi ki tēta'i parabole. 'E tangata tēta'i, 'e tangata 'atu kāinga, tei tanu i tēta'i kāingā vine, ē kua 'akapini i'ora i te reira ki te koro. Kua kō i'ora i tēta'i taomi'angā vine ki roto ra, 'akatū i'ora i tēta'i 'are tāpapa'anga, tāra'u atura ki te aronga tope vine, ē kua 'akaruke maira i te 'enua. 34E tae maira te tuātau kokoti'angā vine ra, kua tono maira aia i tōna au tāvini ki te aronga tope vine ra kia 'ō mai rātou i tāna tu'angā vine o te reira ra. 35Kua 'opu i'ora te aronga tope vine i tōna au tāvini ra, kua pāpā i'ora rātou i tēia, kua tāmate tākiri rava atura i tēta'i, ē kua pē'i atura rātou i tēta'i ki te toka. 36Kua tono 'aka'ou maira aia i tēta'i aronga tāvini kē, 'e ma'ata atu i te 'aerenga mua, ē kua 'akapērā katoa'ia rātou.

37“Ē i te 'openga i'ora, kua tono maira aia i tāna tamaiti ki a rātou nā kō akera, ‘Ka riro rātou i te 'akangāteitei mai i taku tamaiti.’ 38Kia kite atura rā te aronga tope vine ra i te tamaiti, kua tuatua i'ora rātou ki a rātou 'ua'orāi, ‘Ko te kauono tangata kāinga tēia. 'Aere mai, ka tā tātou i aia, ē ka tāpū mai ei i tōna tu'anga kāinga.’ 39Kua 'opu atura rātou i aia, ē kua titiri atura ki va'o mai i te kāingā vine ra, ē kua tāmate tākiri rava atura i aia.

40“Ē kia 'aere maira te 'atu o te kāingā vine ra, ka 'akapē'ea maira aia i ēia tangata tope vine ra?”

41Kua nā kō maira rātou ki aia, “Ka tāmate rikarika tākiri rava atu aia i taua aronga kino ra, ē ka tāra'u atu ei i te kāingā vine ki tēta'i aronga tope vine kē, te ka 'ōronga mai ki aia i tāna tu'angā vine i te au tuātau tikāi.”

42 # Sal 118.22,23 Kua karanga atura a Iēsū ki a rātou, “Kāre āina kōtou i tatau ana i tei tātā'ia ra ē,

‘Ko te toka i 'akaruke'ia e te aronga patu 'are ra,

ko ia tei 'akariro'ia 'ei toka ti'avā.

Nā te 'Atu tēia i rave,

ē 'e mea ūmere'ia ia e tātou’?

43“Nō reira 'oki, tē karanga atu nei au ki a kōtou: E 'apaina kē'ia atu te bāsileia o te Atua mei a kōtou na, ē ka tuku'ia atu ki tēta'i 'iti tangata te ka 'aka'ua mai i te au 'ua ra.”#21.43 Kua tātā'ia te 'īrava i roto i ēta'i pōkaikai tuatua, kāre rā i roto i te au pōkaikai ta'ito tikāi: 44 Ē ko ia tei 'inga ki runga a'o i tēia toka nei, e 'ati'ati rava'ia aia; kāreka tei topa'ia e te reira toka ra, e 'aka'unga'ungātītī rava'ia aia.

45Kia 'akarongo te kau ta'unga nunui ē te au Phārīsea ra i tāna au parabole, kua kite rātou ē, ko rātou tāna e tuatua ra. 46Tē 'inangaro ra 'oki rātou i te 'opu atu i aia, kua mataku rā rātou i te au urupū tangata, nō te mea, kua 'āriki rātou i aia ē 'e peroveta.

Currently Selected:

Mātaio 21: CIMRNT

Highlight

Copy