Mātaio 22
22
Te parabole o te 'ōro'a 'akaipoipo'anga
(Luka 14.15-24)
1Ē i te tuatua 'aka'ou'anga atu ki a rātou, kua 'āpi'i atura a Iēsū i a rātou nā roto i te parabole, nā kō atura, 2“E 'aka'āiteite'ia te bāsileia o te ao ra ki tēta'i tangata, 'uānga ariki, tei 'akatupu i te 'ōro'a 'akaipoipo'anga nō tāna tamaiti. 3E tono atura i tōna au tāvini, e tiki i te aronga i pati'ia ki te 'ōro'a 'akaipoipo'anga, kāre rā rātou i keu mai. 4Kua tono 'aka'ou atura aia i ēta'i tāvini kē, nā kō atura, ‘E 'akakite ki te aronga i pati'ia: Inā, kua oti i āku i te 'akate'ate'amamao i te umukai 'akaipoipo'anga. Tāku au puakatoro ē te au manu 'aka'āngai kua kō'ia, ē kua papa te au mea kātoatoa. E 'aere mai ki te umukai 'akaipoipo'anga.’ 5Kāre rā rātou i ma'ara i te reira, 'aere kē atura, tēta'i ki tōna 'ua'orāi kāinga, tēta'i ki tāna 'anga'anga kimi moni, 6ko te toenga o te tangata kua 'opu maira i te au tāvini, tākinga kino maira i a rātou ē kua tāmate rava atura.
7“Kua riri rava akera taua ariki ra; ē kua tono atura aia i tōna pupu va'e'au kia tā tākiri rava i taua aronga tā tangata ra ē kia ta'u atu i tō rātou 'ōire ki te a'i. 8Kua karanga atura aia ki tōna au tāvini, ‘Kua papa te 'ōro'a 'akaipoipo'anga nei, kāre rā te aronga i pati'ia e tau ra. 9Nō reira, e 'aere kōtou ki te au ara metua, ē e pati i te kātoatoa i kitea'ia e kōtou kia 'aere mai ki te 'ōro'a 'akaipoipo'anga.’ 10Ē kua 'aere atura taua au tāvini ra ki te au arāta'a ra ē kua arataki maira i te kātoatoa tā rātou i kite, ko te aronga kino ē te meitaki; ē kī akera taua 'ōro'a 'akaipoipo'anga ra i te manu'iri.
11“Ē kia 'aere maira te ariki ra ki roto i te 'ākara i te au manu'iri, kite i'ora aia i tēta'i tangata tei kore i 'a'ao i te kāka'u 'akaipoipo'anga. 12Ē kua ui mai te ariki ki aia, ‘E tama, i 'akapē'ea koe i te tomo'anga mai ma te kore 'e kāka'u 'akaipoipo'anga?’ Kua mūtēkī 'ua aia. 13#Māt 8.12; 25.30; Luk 13.28I reira, kua karanga atura te ariki ki te au tāvini, ‘E rī i ōna vaevae ē ōna rima, e 'uri atu i aia ki va'o i te pōiri ra, tei reira te auē'anga ē te pākati'angā ni'o ra.’
14“'E mānganui 'oki tei kāpiki'ia, 'e iti rā tei 'iki'ia.”
Te ui'anga nō runga i te tūtaki'anga tero
(Māreko 12.13-17; Luka 20.20-26)
15I reira, kua 'aere atura te au Phārīsea ē kua kimi rātou i tēta'i rāvenga kia tā'ē'ē i a Iēsū i tāna tuatua. 16Ē kua tono atura rātou i tā rātou au pipi ē te au Hērōdiāni ki a Iēsū, nā kō akera, “E te Pū'āpi'i, kua kite mātou ē, 'e tuatua tika tā'au, ē tē 'āpi'i nei koe i te mataara o te Atua ma te tuatua mou. Kāre koe i mataku i tēta'i 'ua atu tangata, nō te mea, kāre koe i piripiri atu ki te tangata. 17Nō reira, e 'akakite mai koe ki a mātou i tō'ou manako: 'e tika āina kia tūtaki tātou i te tero ki a Kaisara, e auraka āina?”
18Tē kite maira a Iēsū i tō rātou kino ē nō reira kua tuatua mai aia, “'E a'a kōtou i tīmata mai ei i āku, e te au tangata tāpikipiki ē? 19E 'akaāri mai ki āku i tēta'i moni tūtaki tero.” Kua 'apai maira rātou i tēta'i moni 'ārio. 20Kua ui atura aia ki a rātou, “Nō 'ai tēia tūtū ē te tātā'anga ki runga a'o?” 21Kua pa'u maira rātou ki aia, “Nō Kaisara.”
Kua karanga atura aia ki a rātou, “E 'apai māri i tā Kaisara ki a Kaisara, ē tā te Atua ra ki te Atua.”
22Ē i te 'akarongo'anga rātou i te reira, kua vā atura rātou. 'Akaruke i'ora rātou i aia ē 'aere kē atura.
Te ui'anga nō runga i te tū'aka'ou'anga mei te mate mai
(Māreko 12.18-27; Luka 20.27-40)
23 #
Anga 23.8
I taua rā ra, kua 'aere mai ki a Iēsū ēta'i Sādukea, ko rātou tei tuatua ē kāre 'e tū'aka'ou'anga, ē kua ui maira ki aia, 24#Deut 25.5nā kō maira, “E te Pū'āpi'i, i tuatua mai a Mōse ē, kia mate tēta'i tangata ē kāre 'e tamariki, e 'akaipoipo te teina i tāna va'ine, ē e 'aka'uānga i te tamariki nā te tuakana. 25E toko'itu tamāroa i ō mātou nei i te puna 'okota'i. 'Akaipoipo i'ora te tama mua i te va'ine, e mate atura, kāre 'e tamariki, vai'o i'ora tāna va'ine nā te teina. 26Pērā katoa te tokorua ē te tokotoru e tae 'ua atu ki te toko'itu. 27I muri ake i a rātou kātoatoa, mate katoa atura te va'ine. 28Ē tēianei, kia tae ki te tū'aka'ou'anga ra, e riro aia 'ei va'ine nā 'ai i taua toko'itu ra? 'E va'ine 'oki aia nā te toko'itu rava rāi!”
29Kua pa'u atura a Iēsū ki a rātou, nā kō atura, “Tē tārevakē nei kōtou nō te kitekore i te tuatua i tātā'ia ē i te mana o te Atua. 30Nō te mea, kia tae ki te tū'aka'ou'anga, kāre rātou e 'akaipoipo, kāre 'oki e 'ōronga kia 'akaipoipo'ia, e 'āite rātou ki te au 'āngela o te Atua i te ao ra. 31Nō runga rā i te tū'aka'ou'anga mei te mate maira, kāre āina kōtou i tatau ana i tā te Atua i tuatua mai ki a kōtou ra, ka nā kō mai ei ra ē, 32#Exo 3.6‘Ko au te Atua nō Āberahāma, ē te Atua nō Īsā'aka, ē te Atua nō Iākōba’? Kāre 'oki te Atua i te Atua nō tei mate, nō tei ora rā.”
33Ē i te 'akarongo'anga te au urupū tangata i te reira, kua vā ma'ata rava atura rātou i tāna 'āpi'i'anga.
Te 'akaue'anga ma'ata
(Māreko 12.28-34; Luka 10.25-28)
34I te 'akarongo'anga te au Phārīsea ē, kua mūtēkī i a Iēsū te au Sādukea, kua tā'okota'i maira rātou. 35Ē kua ui maira tēta'i o rātou, 'e Pū'āpi'i Ture 'oki aia, nā kō maira i te tīmata'anga mai i a Iēsū, 36“E te Pū'āpi'i ē, ko tē'ea te 'akaue'anga ma'ata o te Ture?”
37 #
Deut 6.5
Kua pa'u atura aia, “ ‘E 'inangaro atu koe i te 'Atu tō'ou Atua ra ma tō ngākau katoa, ē ma tō vaerua katoa, ē ma tō manako katoa.’ 38Ko tēia te 'akaue'anga mua ē te ma'ata rava atu. 39#Lev 19.18Ē mei te reira katoa te rua: ‘E 'inangaro atu koe i tō'ou tangata tupu mei a koe 'ua'orāi.’ 40#Luk 10.25-28I roto i tēianei ngā 'akaue'anga i ko'u'ia ai te au Ture kātoatoa ē tā te au peroveta au 'akaue'anga.”
Te ui'anga nō runga i te Mesia
(Māreko 12.35-37; Luka 20.41-44)
41Kua ui atura a Iēsū ki te au Phārīsea koi no'o kāpipiti mai ei i reira, 42nā kō atura, “'E a'a tō kōtou manako i te Mesia ra? 'E tamaiti aia nā 'ai?”
Kua pa'u maira rātou ki aia, “Nā Dāvida.”
43Kua ui atura a Iēsū ki a rātou, “I 'akapē'ea i reira a Dāvida i tuatua ai ma te Vaerua Tapu ē te tapa i aia ē, ‘'e 'Atu’, ka nā kō ei ra ē,
44 #
Sal 110.1
‘Kua tuatua te 'Atu ki taku 'Atu,
Ka no'o koe ki taku rima katau nei,
e kia 'akariro au i tō au 'enemi 'ei pange vaevae nō'ou’?
45Mei te mea ē, tē karanga ra a Dāvida ki aia ē ‘'e 'Atu’, i 'akapē'ea i'ora te Mesia i riro mai ei 'e tamaiti nāna?”
46Kāre atura i rauka i tēta'i tangata kia pa'u mai ki aia. Ē mei te reira maira, kāre atura tēta'i i tae 'aka'ou i te ui atu ki aia.
Currently Selected:
Mātaio 22: CIMRNT
Highlight
Share
Copy
Want to have your highlights saved across all your devices? Sign up or sign in
Cook Island Maori Revised New Testament © Bible Society of the South Pacific, 2021.
