Mātaio 23
23
Te 'akamatakite'anga nō runga i te Pū'āpi'i Ture ē te au Phārīsea
(Māreko 12.38-39; Luka 11.43,46; 20.45-46)
1I reira kua 'akakite atura a Iēsū ki taua urupū tangata ma'ata ra ē ki tāna au pipi, 2nā kō atura, “Tē no'o nei te au Pū'āpi'i Ture ē te au Phārīsea i te no'o'anga o Mōse. 3Nō reira, te au mea kātoatoa tā rātou e 'akakite mai, e 'ākono ē e rave; inārā, auraka e āru i tā rātou au 'anga'anga; nō te mea, tē tuatua 'ua ra rātou, kāre rā rātou e rave. 4Tē tāpeka nei 'oki rātou i te 'apainga teia'a ē te marangakore ē tē tuku nei ki runga i te paku'ivi o te au tangata; inārā, kāre rātou i 'inangaro i te tāki i te reira ki tō rātou rima. 5#a: Māt 6.1; b: Deut 6.8; c: Num 15.38Ē tē rave ra rātou i tā rātou au 'anga'anga kātoatoa kia 'ākara'ia rātou e te tangata: koia 'oki, tē 'akaātea nei rātou i tā rātou philatēri,#23.5 E au pūtē rikiriki tēia, e tāpeka'ia ana ki runga i te mīmiti mē kāre ki te rima, 'ei vairanga nō tēta'i au 'īrava tuatua nō roto mai i te Bibilia. ē tē 'akama'ata atu nei i te veruveru o tō rātou tapa kāka'u. 6Ē tē nanave tikāi nei rātou i te ngā'i ngāteitei i te au kaingākai ē te no'o'anga ngāteitei katoa i te au sūnago ra; 7ē kia aro'a'ia 'oki i te ngā'i 'oko'oko'anga, ē kia tūoro'ia e te tangata ē, ‘E Rabi, e Rabi.’ 8Ko kōtou rā, auraka kia tūoro'ia, ‘E Rabi’, nō te mea, 'okota'i rāi 'oki ō kōtou Pū'āpi'i. 'E taeake anake 'oki kōtou katoa na. 9Ē auraka kōtou e 'akametua i tēta'i tangata i tēianei ao, nō te mea, 'okota'i rāi ō kōtou Metua, ko tei no'o i te rangi. 10Auraka kōtou kia tapa'ia ē 'e arataki, nō te mea, 'okota'i ō kōtou arataki ko te Mesia. 11#Māt 20.26,27; Mār 9.35; 10.43,44; Luk 22.26Tei ma'ata rā i rotopū i a kōtou nei, kia riro ia 'ei tāvini nō kōtou. 12#Luk 14.11; 18.14Ko tei 'akateitei i aia 'ua'orāi ka tā'aka'aka'ia ia, ē tei tā'aka'aka i aia 'ua'orāi ka 'akateitei'ia ia.”
Tē 'aka'apa'ia nei te tū tāpikipiki o te au Pū'āpi'i Ture ē te au Phārīsea
(Māreko 12.40; Luka 11.39-42,44,52; 20.47)
13“Auē kōtou, e te au Pū'āpi'i Ture ē te au Phārīsea tāpikipiki ē! Tē tōpiri nei kōtou i te bāsileia o te ao i te tangata nei. Kāre kōtou 'ua'orāi i tomo ki roto, ē tē tāpū nei kōtou i tei 'inangaro i te tomo ra. #23.13 Kua tātā'ia te 'īrava i roto i ēta'i pōkaikai tuatua, kāre rā i roto i te au pōkaikai ta'ito tikāi: 14 Auē kōtou, e te au Pū'āpi'i Ture ē te au Phārīsea ipōkirita ē! Tē pou nei i a kōtou i te au ngutu'are o te au va'ine taka'ua, ē tē 'akaroa na 'oki kōtou i te pure 'ei tāpikipiki'anga. Nō reira, 'e ma'ata 'ua atu tō kōtou 'akavā'anga.
15“Auē kōtou, e te au Pū'āpi'i Ture ē te au Phārīsea tāpikipiki ē! Tē teretere nei kōtou i te tai ē te 'enua, kia rauka tēta'i pipi; ē kia rauka ra, e 'akariro kōtou i aia 'ei tangata tau nō te pō e rua taime ma'ata 'ua atu i a kōtou 'ua'orāi.
16“Auē kōtou, e te au arataki matapō ē! Tē tuatua nei kōtou ē, ‘Ko tei taputo'u ki te nao ra, kāre ia e tika, inārā, tei taputo'u'ia ki te 'auro o te nao ra, e tika ia.’ 17E te au nēneva ē te matapō ē! Ko tē'ea tei ma'ata, ko te 'auro āina, mē kāre, ko te nao tei 'akatapu i taua 'auro ra? 18Pērā katoa, ‘Ko tei taputo'u'ia ki te 'atarau ra, kāre ia e tika; ko tei taputo'u'ia rā ki te 'apinga 'ōronga ki runga a'o, e tika ia.’ 19E te matapō ē! Ko tē'ea tei ma'ata, ko te 'apinga 'ōronga, mē kāre, te 'atarau tei 'akatapu i taua 'apinga 'ōronga ra? 20Ko tei taputo'u ki te 'atarau ra, kua taputo'u aia ki te reira, ma te 'apinga katoa ki runga a'o. 21Ē ko tei taputo'u ki te nao ra, kua taputo'u aia ki te reira, ē ko tei no'o ki roto ra. 22#Isa 66.1; Māt 5.34Ē ko tei taputo'u ki te rangi ra, kua taputo'u aia ki te terōno o te Atua, ē ko tei no'o ki runga a'o.
23 #
Lev 27.30
“Auē kōtou, e te au Pū'āpi'i Ture ē te au Phārīsea tāpikipiki ē! Tē 'ōronga nei kōtou i te tu'anga nga'uru o te minete ē te 'āneto ē te kūmino, ē tē 'akaruke nei kōtou i te au mea pu'apinga mama'ata o te Ture, koia te 'akatere'anga tau tikāi, te aro'a ē te 'ākono mou tikāi. Ko tēia 'oki tā kōtou kia 'ākono, ē auraka katoa e 'akaruke i tērā. 24E te au arataki matapō ē, tē tā'au atu nei kōtou i te namu, tē 'āpuku 'ua nei rā i te kāmela.
25“Auē kōtou, e te au Pū'āpi'i Ture ē te au Phārīsea tāpikipiki ē! Tē tāmā nei kōtou i a va'o i te kapu ē te mereki, kāreka ā roto tē kī nei i te noinoi 'apinga ē te kakī nui. 26E te Phārīsea matapō ē! E nā mua i te tāmā i a roto i te kapu ē te mereki, ē ka mā katoa ā va'o.
27 #
Anga 23.3
“Auē kōtou, e te au Pū'āpi'i Ture ē te au Phārīsea tāpikipiki ē! Tē 'āite nei kōtou ki te au mēnema 'akateatea'ia nei, tei 'aka'ie'ie i te 'ākara'anga ki va'o, inārā, ko ā roto rā, kua kī ia i te ivi turuma ē te au mea vi'ivi'i katoa. 28Pērā katoa kōtou, te 'ākara'anga ki va'o, mei te aronga tuatua tika, inārā, ko ā roto rā, tē kī nei ia i te tū tāpikipiki ē te kino.”
Te 'akautunga'anga o te au Pū'āpi'i Ture ē te au Phārīsea
(Luka 11.47-51)
29“Auē kōtou, e te au Pū'āpi'i Ture ē te au Phārīsea tāpikipiki ē! Tē patu nei kōtou i te au tanumanga o te au peroveta ē tē 'akamānea nei i te au mēnema o te aronga tuatua tika, 30ē tē tuatua nei kōtou, ‘Nāringa mātou katoa i te tuātau o tō mātou 'ai metua ra, kāre mātou e piri ki a rātou i te tā'anga i te au peroveta.’ 31E pērā rāi, ko kōtou 'ua'orāi 'oki tei 'akatika ē, ko kōtou te tamariki a te aronga i tā i te au peroveta ra. 32Ē kōtou mā, e 'akaoti i tā tō kōtou 'ai metua i rave ra! 33#Māt 3.7; 12.34; Luk 3.7E te au 'ōvī nei, te 'anaunga vīpera! 'E 'akapē'ea kōtou e ora ai i te 'akautunga'anga o te pō? 34Ē nō reira, tē tono atu nei au i te au peroveta ē te au tangata pakari ē te au Pū'āpi'i Ture ki a kōtou. Ē e tā kōtou i tēta'i pāpāki, ē e 'akasātauro; ē e pāpā 'oki i tēta'i pāpāki ki roto i tō kōtou au sūnago, ē e tākinga kino atu mei tērā 'ōire ki tērā 'ōire. 35#a: Gen 4.8; b: 2 Par 24.20,21Nō reira, ka tae mai ki runga i a kōtou te toto 'arakore katoa i 'akamaringi'ia ki runga i te 'enua nei, mei te toto mai rāi o Ābela tuatua tika, e tae roa ake ki te toto o Zākāria te tamaiti a Barakia, tā kōtou i tā i rotopū i te 'atarau ē te nao ra. 36Koia mou tāku e karanga atu ki a kōtou na, tēia au mea kātoatoa ka tae mai ki runga i tēianei uki.
Tē tangi nei a Iēsū i a Iērūsalēma
(Luka 13.34-35)
37“E Iērūsalēma, e Iērūsalēma ē, tei tā i te au peroveta ē tei pē'i 'oki ki te toka i te aronga i tonokia atu ki a koe na! 'E mānganui tōku anoano'anga i te 'akaputuputu mai i tō tamariki mei te moa e 'akako'uko'u i tāna 'anaunga ki raro ake i tōna pē'au, kāre rā kōtou i 'inangaro i te reira! 38#Ier 22.5Inā, ka vai'o tane'a'ia tō kōtou nei 'are. 39#Sal 118.26Ē tē karanga atu nei au ki a kōtou, kāre rava kōtou e kite mai i āku mei tēianei atu e tae 'ua atu ki te rā e tuatua ai kōtou ē, ‘Kia 'akameitaki'ia aia ko tei 'aere mai ma te ingoa o te 'Atu.’ ”
Currently Selected:
Mātaio 23: CIMRNT
Highlight
Share
Copy
Want to have your highlights saved across all your devices? Sign up or sign in
Cook Island Maori Revised New Testament © Bible Society of the South Pacific, 2021.
