SUNDA 2
2
Musuk Lonara mba kay suu vina
1Buu ma luu ma Pantekotna ndak ndakŋi suu vina halaŋ tok tasi halaŋ hu lina dew. 2Li na gawni asi hum soora col ay kolo huulona ko babaa ma ŋgolna na, mba kasi hu zira asi laki hura. 3Asi wi vana mba kasi ko sin kura na, ɓorow ki kasi dew dew halaŋ. 4Asi halaŋ hurusi oy ki u Musuk Lonara, gijaŋ ɓak u vun ma daŋŋa daŋŋa zeɗ zeɗ ko va ma Musuk Lonara ɦasina a asi dira na.
5Suu Juif suu li ndaana u Lona ka hu Yerusalemma u suu mbay hu mbassa daŋga daŋga zeɗ zeɗ halaŋŋa lay. 6Hu li ma suuna hum soo ndaɗta na ni toki kay tasi dew dla ndaɗta mba kasi ni asi waɗ uɗ kaɗi, dukusi ni gegelay ɓakŋi u vun mamma mamma. 7U boy namma viɗ ki irisi ɦawa na viɗ asi di tasi ɗaŋŋi ana, «Suu ɓak ca asina ni ka suu Galilena belɗi su? 8Ni nanaba asi ɓakŋi aygi hum ki u vun maygina ni nanage. 9Dukuygi tani suu mbay hu mbassa Partesna kaa, suu Medina u Elamma, suu Mesopotamina, suu Yudena u suu Kappadosna, suu Pontna u suu ay hu vun mbassa Azira, 10suu Frigina u suu Pamfilina, Egiptena u keŋ mbassa vi Libi tok eg ndaŋgara Sirenda, suu mbay hu Romma ka hu lay. 11Suu Juifna u njaf suu daŋŋa suu vi Boy Lonana u vira vi suu Juifnara, suu Kretna u suu Arabina halaŋ aygi humusi asi ɓak boyna zeɗ zeɗ kay sunda ŋgola vi Lona.» 12Asi halaŋ boy namma su ki kasiya, umba dira ka irisiɗi. Asi joɓ tasi ana u boy namma ni ana mege? 13Suu daŋŋa pan suu vina ana asi ki ni guruɗi u summa.
Piyer paɗ bolla
14Piyer col kolo u suu doogo yam dewna, nam gijaŋ ɓakasi ha kolo u delemba eŋga maŋ suuna ana, «Agi suu Juif suu ka Yerusalem tanna, humugi va ma an min dagina ki jiviya. 15Suuna ca ni ka gurɗi ko agi saara naɗi, kay faɗta hol ki kolo ni baŋŋa ma yowna ɦawa tuwa. 16Dla ndaɗta faɗ ki ni vun boy ma sa ma jok vun Lona, Joel, damma. 17Gologiya ni va ma Lona dam kay buu ma hin li ay daganna,
An hin njay Musuk manda ki
kay suuna halaŋ.
Gor njufi magisina
u gorɓii magisina hin di ki
kay Boy Lonana.
Gorzoŋi magisina tlena
hin tak tasi ki irisiya,
suu magi suu maana
doyra hin dasiya.
18Ni na daŋ may an hin njay
Musuk manda ki kay suu sununna u
gorɓii suu sununna,
hu buu ma namma asi hin di ki
kay Boy Lonana.
19An hin li dlara mbuɗta
ha kolo huulona kaŋga kay ndaŋgara lay,
Li busuna u kura, ɗugulla u ndoosna,
20faɗta hin mbuɗ ki ndufunu,
tilna mbuɗ ki tlaw ko busuna na.
Tle asina li ki ni jew buu ma ŋgolna
vi Bu Suuna na,
ni buu ma ŋgolna u bibiŋilla.
21Ni suuna halaŋ gegelay
ma yi sem Bu Suunana hin suɗ kiyo.
22«Agi suu Israelna humugi va ma an min daginana, Yesu ma Nazaretna nammi sa ma Lona takagi ŋgol mamba kina. Lona li dlara mbuɗ mbuɗta, u dlara ndandalla, u takka daŋga daŋga ko agi kay tagira wi u irigira na lay. 23Sa namma agi vamu ɓalam ki kolo hu gu garakŋa cam ki ko suu cona na ni u ŋgara Lona ŋgaaɗ ay ki fok jewra. 24Lona colom ki kolo iiri hu ti tara vi miɗna, kay saɓakŋa vi miɗna ndak ka a vambi. 25Kay David di kam anaba,
An wi Bu Suuna fokon tew tew,
nam ka kay bikin ma njufna
kay an mba geŋeɗɗi.
26Kay ndaɗta hurun oy u jivira,
boy manna an damma oy u furira,
lini u maŋira vi mbalatan lay ni
an juɓ u ɗigilla.
27Aŋ ka hinin iiri manda ki
duk suu miɗinaɗi,
ka hin saaŋ ma teteɗna a loɗ kiɗi.
28Aŋ takan voɗta tuɗ hu iirira,
aŋ oyon u furira fokoŋu.
29«Gorsenna an fi voɗta a ɓakagi kay buy ma ŋgolna David, ka a tinigi vunɗi, nam miɗa, asi pamu, usum ka karam dukuygi tu lay. 30Nam ay ni sa ma jok vun Lona, nam wi ki kam ana Lona suu tam ki vi vunum u nam ana goom ma hu njafam maa dew nam hin ɦam mul mamba. 31David wi va ma hin mbay fok tuna ki jewe, nam di ki ni kay paɗta kolo iirira hu miɗna vi Sa Lona Fuurumma. Hu li ma nam di ana, Noyom ka ki hu lina vi suu miɗinaɗi, tliwim loɗ ka kiɗi. 32Sa ma an ɓak kam wanna Lona paɗam ki kolo iiriya, ni Yesu aygi halaŋŋi suu diki kamma. 33Lona tlam kolo hu bikim ma njufna, nam fi Musuk Lonara di ki kaɗ jewra ay ko Bumu. Nam hin njayaɗ ay ki kamiya, halaŋŋi va ma agi ka wam cecemi humum u humugiya. 34David u tamba kal ka kolo huulonaɗi nam di ana,
Bu Suuna di maŋ Bu Suu manna ana,
aŋ kak hu bikin ma njufna tani,
35gak gak an cukuŋ suu
maŋ suu gonokka kaŋga fokoŋu,
ko va tin semma kamma na.
36«Lini nanagelay ni suu Israelna halaŋŋi wam ki gasi, ni Yesu ma agi ɓalam ki hu gu garakŋana Lona mbuɗum Bu Suuna lay Sa Lona Fuurumma lay.»
37Hu li ma asi hum boy namma na ni hurusi haɗ cocoo. Asi joɓ suu vovoɗta suu hiŋŋa ana, «Gorsemina ami lini nanage?» 38Piyer hoŋosi dira ana, «Jokogi hurugi ki zeɗ, gege gegelay dukugi ni mba mbus ki batemma u sem Yesu Kristu. Kay coogira hin bulum kiyo, agi mba fi ɦala vi Lonara ni Musuk Lonara. 39Kay me ni vi vun ma vi Lonna, ni magi agi u goryogiya, maŋ suu ha ki egem dayna lay, maŋ suu Bu Suuna Lona mayna yasi halaŋŋa.»
40Piyer dasi boy ma daŋŋa cocoo kay a ɦasi eŋga, nam dasi ana, «Suɗugi tagi ki duk njaf suu ki baay asina.» 41Suuna ŋgolo vi u boy ma vi Piyerna, asi mbususi ki batemma lay, fali ndaɗta ni suu vina ii va ma bup bup hindi taɓ u suu jewna. 42Asi mba hu tokka tew tew a hum haɗta suu vovoɗta haɗasira. Kay a lak ko tasi taɓi dew, ti fu ma taɓi dewna a cen Lona tew tew may.
Suu vina taɓi dew
43Suuna halaŋ mbuɗi ndaa ŋgolo kay suu vovoɗta li dlara mbuɗta u takka cocoo. 44Suu vina halaŋ ay taɓi dew, tlegeyesi ay taɓi hu lina dew lay. 45Asi gus sene masina ki u tlegeyesi halaŋ tok yam gursura dew, ɓorowosi ki duk tasiya, gege gegelay ni u min mamba. 46Hu buuna tew tew ni asi tok tasi hu Ziŋ Lonara, ti funa vo hu zira dewra halaŋ ko tasiya, hurusi eg tasi jiviya. 47Asi geleɗ Lona, suuna halaŋ ŋgaasiya, hu buuna halaŋŋi Bu Suuna cuk suu ki suɗi wilina dukusiya.
Currently Selected:
SUNDA 2: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
