SUNDA 3
3
Sa ma gugufuna mbuɗ tuɗ ki jiviya
1Faɗta fiɗigi boyogina yow wa ma funa ni Piyer u Jaŋ tuɗ hu Ziŋ Lonara, cen Lona. 2Vun zira asi yaɗ ana «vun zira jivira» ni sa gugufuna ay u gorom day kaki fun zira, hu buuna tew tew ni asi tlam mbaaram huwa a nam cen gursura ko suu sel hu zira. 3Nam wi Piyer u Jaŋ a sel hu zira ni nam cenesiya. 4Piyer u Jaŋ ŋgaras irisi kamma ŋgaras ni, Piyer dam ana, «Golomi gige.» 5Sana golosi na ni ka juɓ ana asi hin ɦam karam vaa. 6Piyer dam ɗaŋi ana, «Gursu doonora u lorra ka konɗi, va ma ka kon an a ɦaŋŋa, ni u sem Yesu Kristu ma Nazaretna aŋ col kolo tuɗa.» 7Nam tlam kolo u komma njufna na zakŋi, sana gayam u ii kokot sem mbuɗ ki jivira gaw. 8Nam col kolo weɗ na vikŋi gi tam tuɗta gaw. Nam kal ko tam u asi hu Ziŋ Lonara u tuɗa, weɗ kolo geleɗ Lona. 9Suuna wam nam tuɗ na ni geleɗ Lona halaŋ halaŋ. 10Asi wi sa ma li kaki fun zira yaɗ ana «vun zira jivira» cen suuna na mbuɗ na ni, asi mbuɗ ndaana lakira na jim ko dlara li egem ndaɗta.
Piyer paɗ bolla hu Ziŋ Lonara
11Hu li ma sana ka eg gi Piyer u Jaŋ tu na ni, suuna halaŋ golom na ni lakira ɦawana jim tok ay egesi u mbutluɓma asi yam ana mbutluɓma vi Salomonna. 12Piyer wi suuna molira na ni nam dasi ana, «Agi lakira na jim kay boy ma vi sanna ni nanage? Agi gol ko ana ami mbuɗ sana tuɗa ni u saɓak mamina kay tamina, ɗowba u viimira u Lonara na ni nanage? 13Loŋ Abrahamma, Loŋ Isaakŋa, Loŋ Yakobma, Lo ma vi somoyoygina ɦal saɓakŋa maŋ saam ma sunda Yesu. Agi u tagira ɦam ki maŋ suu ŋgolona asi ɦam ki maŋ Pilat ni agiya, nam Pilat tin gin hurum a gamu. 14Agi noyogi sa ma Teteɗ ma Ɗegeena kiyo, hin joɓogi Pilat ana ɦagi sa ma ci maɗna maa ay ki dew. 15Ni agi cagi ki ni mala iirira. Lona paɗam ki kolo hu miɗna iiriya, ami ni suu diki kamma. 16Tinda tin huna kay sem Yesura u saɓak mamma. Gasi tinda tin huna kay Yesura sana garaɗ ki jivira karam fokogi halaŋ.
17«Kay ndaɗta gorsenna agi u suu magi suu ŋgolona lagi dla ndaɗta eg Yesu ni ko bay wira ɦawaa. 18Dla ndaɗta li ki ni u va ma Lona dam ki fok jew fun suu jokom vunumma ana, Sa Lona Fuurumma hin fi lassa. 19Jokogi iiri magira ki zeɗ, mbuɗugi irigi eg Lona a nam hin bulumugi coogira kiyo. 20Bu Suuna hin ɦal li ma koɗ tara ni namu, hin sunugi Sa Lona Fuurumma ma nam manam ki fok jewna aya, ni di ana Yesu. 21Cecemi wanni Yesu Kristu kak ha kolo huulona a juɓ buu ma tlena halaŋ hin mbuɗ ki wilina tuwa. Ko Lona di kam jew u vun suu jokom vunumma na. 22Ko Moiz di ana Bu Suuna Loogina hin sunugi sa ma jokom vunumma ay dew ko an na. Sa namma hin li ni hu njaf magina agi hum u va ma nam damma halaŋ. 23Sa ma ka hum u sa ma jok vun Lona nammaɗina dikim ha ki duk suu vi Lonna baam kiyo. 24Suu jok vun Lona gijaŋŋa ay u Samuel day suu kay ceremma lay ɓak kay buu namma. 25Galamba Lona vaɗ ay u suu jokom vunumma ni magi agiya, agi fi galamba Lona faɗaɗ vunuɗ ki u somoyoygi ta nam di maŋ Abraham kaɗta. An hin paɗ vunun ki kay njaf suu hu ndaŋgarana halaŋŋi u njafaŋu. 26Ni nam Lona tak Saam ma Sunda kini magi agi jewe, nam sunum ay kay a paɗ vunum ki kagiya, kay a agi hin dlaagira laɗ cora kiyo.»
Currently Selected:
SUNDA 3: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
