SUNDA 4
4
Piyer u Jaŋ fok suu ŋgolo suu kaɓakŋa
1Piyer u Jaŋ ɓak suuna wanni, muli suu li ɓivunna suu ŋgolo suu hu Ziŋ Lonara u suu Sadusenna mba fasiya. 2Hu li ma asi hum suu vovoɗta ka haɗ suuna ana Yesu paɗ ki kolo iiriya ni, di ana suu miɗina paɗ ki kolo iiriya ni, asi hurusi ɓeŋ egesi gaw. 3Asi yowosi cukusi daŋgayna a juɓ buu ma vinna tuwa, kay lina kal ki wa. 4Fali ndaɗta ni suu hum boy nammana ŋgolo tin hurusi kay Yesu. Suu vina zul ŋgolo ii va ma bup bup vadl.
5Vin maɗiira wanni muli suu vi suu Juifna u suu ŋgolo suu wi magaara gaɗta tok tasi ha Yerusalem. 6Hu li namma ni Aan, mul ŋgol ma li ɓivunna, u Kaif u Jaŋ u Aleksandre, asi suu hu njafna vi mul ŋgol ma li ɓivunna tok tasiya. 7Asi yow suu vovoɗta fokosi joɓosi ana, «Agi mbuɗ sana ki jivira na ni u sem gege? U saɓak vi gege?» 8Piyer hurum oyra u Musuk Lonara dasi ana, «Agi mulina u suu ŋgolona, 9ami ka karam fun ɓakŋa ni kay sa ma dagi ma mbuɗ ki jivina, asi ka joɓomi kam ana sana mbuɗ ki jivira ni nanage? 10Agi halaŋ wagiya suu Israelna halaŋ wagi kiyo, sa namma ka coli dukugi wanni u saɓakŋa vi sem Yesu Kristu ma Nazaretna, nam ma agi ɓalam ki kolo hu gu garakŋa, Lona colom ki kolo iirina. 11Yesu ni sa ma magaara di kam ana,
Ҥinira agi suu min zira noyoɗ kira
mbuɗ a ɦinira garaŋga ni ndaɗu.
12Nam dew daŋŋi Sa ma Suɗta, hu duliyara halaŋŋi Lona ɦal sem sa ma daŋ ma suɗuygi kaɗi.»
13Suu ŋgolona wi ɦiŋga vi Piyer u Jaŋ na ni asi mbuɗ lakira na jim, asi wi kasi ana asi ni suu ɦawana, haɗ magaara ka ŋgolɗi lay, asi hin wi kasi na daŋŋi, ana asi ni suu poy u Yesu jewna. 14Asi gol irisi na ni wi sa ma garaɗ ki namma coli egesi zow ni asi ka fi va ma diɗi. 15Asi cukusi ki buru hin lina vi suu ŋgolo suu kaɓakŋa ki tani gijaŋ ciwayra duk tasiya. 16«Suu asina aygi mba li me u asi nige? Suu hu Yerusalemma halaŋ wi dlara mbuɗta asi laɗta ki u irisiya, aygi ka ndak a doorosi oloɗi may. 17A boy namma zul ki duk suuna oloɗira wanni, lasasi las lasni dasi ana asi di boy namma maŋ sa ma daŋ u sem Yesu oloɗi.» 18Asi yasi ay yini gaɗasi ana, asi di boy namma ki oloɗi, haɗ sa u sem Yesu oloɗi lay a fafatɗa.
19Piyer u Jaŋ hoŋosi dira ana, «Agi saa u tagira tu gige, lini jivi fok Lona a humugi vunugi suumu ni. 20Ami tamira ka ndak a tin vunumi kay va ma ami wam u irimi lay, humum u humumi laynaɗi.» 21Suu ŋgolona hoŋ lasasi las lasni cukusiya, asi fi boy may ma cukusi daŋgayna kamma kaɗi, kay suuna halaŋ geleɗ Lona kay boy ma li namma. 22Sa ma garaɗ ki namma basaɗam su va ma dok fiɗi.
Suu vina cen Lona a nam ɦasi ɦiŋga
23Hu li ma asi cukusi kina ni, Piyer u Jaŋ tuɗ eg ndarayasina dasi boy ma muli suu li ɓivunna u suu ŋgolona dasina ayna. 24Asi hum boy namma na ni suu vina halaŋ gijaŋ cen Lona ko tasi dew ana, «Mala Suuna aŋŋi sa ma li huulona lay, li ndaŋgara lay, li mbo lumma ŋgolona u tlesuu hurumma layna. 25Aŋŋi sa ma di fun bumi David saaŋ ma sunda hu Musuk Lonara ana,
Suuna yow kolo
ŋga tasi na ni kay mege?
Suuna saa
saara dadamba na ni kay mege.
26Muli suu ŋgolo
suu kay ndaŋgarana halaŋ col duuna,
suu mulina halaŋ tok tasiya
duu u Bu Suuna u Saam ma Suɗta lay.
27Herod u Pilat taɓ vunusi u suu hu ɦoŋzi ma ŋgolna u suu daŋŋa, u suu hu njafna vi suu Israelna halaŋ duu saaŋ ma sunda Yesu ma aŋ manamma ni gasi. 28Asi li dlara aŋ u saɓak maŋŋa u min maŋga saa ki kaɗ jew a laɗta ki wa. 29Cecemi Bu Suuna wi lassa vi suu maŋŋa, ɦasi eŋga a di boy maŋŋa ki u ɦiŋga. 30Maɗ koŋ ki kay ami li dlara mbuɗ mbuɗta, garaɗ suu tuguɗira kiyo, li takka u sem saaŋ ma sunda Yesu ma teteɗna.» 31Asi daɓ cenda may ni li ma asi laki huna geŋeɗ na jik jik. Asi oy ki u Musuk Lonara gijaŋ ɓak Boy Lonana u ɦiŋga.
Suu vina taɓ tlegeyesi ki ko tasi dew
32Suu vina tok tasi halaŋ, hurusi taɓi dew, saa masira dew, sa ma dukusi ma di ana vaamma ni kay tamu kaɗi, tlegeyesi halaŋ taɓi dew. 33Suu vovoɗta fi saɓakŋa a di boyna kay paɗta kolora vi Bu Suuna Yesu, Lona paɗ vunum ki kay dlaasira asi laɗta halaŋ. 34Dukusi wanni sa haw va cam kaɗi. Suu senena u ziginina kosina gususi kiyo, mbaa gursu ndaɗta aya, 35mba ɦal gursu ndaɗta maŋ suu vovoɗta. Asi ɓorow gursu ndaɗta maŋ suuna u va ma asi min a lamma.
36Ko Yosef ma Levina nammi goo ma Siprena, suu vovoɗta tinim sem ana Barnabas (ni di ana sa ma gaɗ suuna), 37nam gus sene mamma ay kiyo mbaa gursura fok suu vovoɗta.
Currently Selected:
SUNDA 4: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
