URA TIN AYRA 16
16
Vuɗta vi Ismael
1Sarai caŋ Abramba vuɗum goor kaɗi, ndaɗ u goo mbaɓura Egiptera varaɗu yaɗ ana Hagar. 2Sarai di Abram ana, «Yawe ɦan goo kaɗi, an ceneŋu mbay taɓ u mbaɓu manda, an li hin fi goor u ndaɗ kalage.» Abram hum vun caamba Sarai. 3Sarai vi mbaɓu maɗta Egiptera ɦaɗ maŋ njufuɗ Abram a cara, ni ko Abram li basara ki wa doogo hu mbassa Kanaanda. 4Abram buu u Hagar, ndaɗ vi wiina. Hu li ma Hagar wi taɗ u wiina na ni, gijaŋ pan malaɗta Sarai. 5Sarai di Abram ana, «Ŋgulla ŋgulun wanda hoŋŋi kaŋu. An ɦaŋ mbaɓu manda ni anu, hu li ma ndaɗ wi taɗ u wiina na ni gijaŋ pananu. Ko Yawe kaay ɓak ma duk ɦoŋayna ni namu.» 6Abram hoŋ dira ana, «Mbaɓu makka kok wanna, li va ma ndak minna u ndaɗu.» Sarai gijaŋ lasaɗ cocoo. Hagar pii tin yaɗ ki ŋgoo bagiya.
7Sa sunda huulona vi Yawe fi Hagar ha ki ŋgoo bagi fun zul yona hu voɗta Kura. 8Nam daɗ ana, «Hagar, mbaɓura vi Sarai, ndak col ay ni arage? Ndak tuɗ ni arage?» Ndaɗ hoŋ dira ana, «An tin yan ki day ko malanda Sarai.» 9Sa sunda huulona vi Yawe daɗ ana, «Hoŋ eg malakka, hom yak gaa fokoɗu.»
10Sa sunda huulona vi Yawe daɗ ana, «An hin zuluk gor ŋgologi maksina cocoo. Asi hin zul cocoo. Sa ndak a ndumusiɗi.» 11Sa sunda huulona vi Yawe daɗ ana,
«Gola ndak cemi u wiina, ndak hin vuɗ goona,
tinim sem ana Ismael
kay Yawe humuk tii mak ma hahawra wa.
12Nam hin li ni ko kor ma ŋgoo bagina na,
nam hin li ni sa gonokka u suuna halaŋ,
suuna halaŋ hin li ni suu gonokka u namma may.
Nam hin cuk ziim ki zeɗ eg gorsemma,
ka taɓ u asiɗi.»
13Hagar cen Lona u sem Yawe ma ɓak u ndaɗna ana, «Aŋŋi Lo ma wanna.» Kay ndaɗ di ana, «An wi sa ma wanna ni ka an na ɗowɗi.» 14Kay ndaɗta asi yi sem goloŋ ndaɗta ana, «Goloŋga Lo ma wanna.» Goloŋ ndaɗta ni duk ɦoŋ Kades u Bered.
15Hagar vuɗ go njufna maŋ Abram. Nam yam sem ana Ismael.#Gal. 4.22 16Hu li ma Hagar vuɗ Ismael na ni Abram basaɗam li ki dok-kalavandi yam karkiya.
Currently Selected:
URA TIN AYRA 16: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
