URA TIN AYRA 17
17
Sem Abram mbuɗ ki ana Abraham
1Hu li ma basa Abram li ki dok-dleeŋe yam dleeŋe ni, Yawe tak tam ki irim dam ana, «Anni Lona ma Saɓakŋa. Aŋ poy fokonu li ɗegee. 2An hin vi galamba u aŋu, an hin zuluŋ njafaŋ fok ŋgol cocoo.»
3Abram goɓ vogom kaŋga, Lona dam ana, 4«Gola ni Galamba an vaɗ u aŋga. Aŋ hin mbuɗ a bu dee suuna bolowo. 5Sa ka hin yaŋ ana Abram oloɗi, seŋ hin jok ki ni ana Abraham, kay an mbuɗuŋ a bu dee suuna bolow cocoo.#Rom. 4.17 6An hin mbuɗuŋ a sa zuli cocona, njaf suuna ŋgolo col ay ni egeŋu, u mulina ay ni egeŋ lay. 7An hin vi Galamba u aŋu, u njafaŋ ma hin ka ŋgoroŋ daganna lay, u deeresi zeɗ zeɗ halaŋ, hin li ni Galamba dindinda. An hin li ni a Looŋŋa, Lo ma vi njafaŋ ma ka ŋgoroŋ daganna lay.#Luk 1.55 8An hin ɦaŋ mbassa aŋ kagi kaɗ ŋgayra wanda maŋu, maŋ njafaŋ ma ka ŋgoroŋ daganna lay. Ndaŋgara Kanaanda halaŋŋi maŋ a fafaɗta. An hin li ni a Loosina.»#Sun. 7.5
Caw ɗiwra
9Lona di Abraham ana, «Aŋ u goryoŋ suu ka ŋgoroŋ daganna lay ŋgomon galam manda jiviya. 10Wanni galam manda agi hin li uɗ ndaɗta, ni duk ɦoŋon u agiya, njufiina halaŋ cawasi ɗiwisi kiyo u njafaŋ ma ka goroŋ daganna lay.#Sun. 7.8; Rom. 4.11 11Agi cawagi ɗiwigi kiyo, ndaɗ hin li duk ɦoŋoy a tak ki kay Galamba duk taygira. 12Gor njufii magisina halaŋ li ki buu kalavandi wa ni cawasi ɗiwisi kiyo. Ni kay njafagi ma ha fokŋa lay halaŋ. Lini mbaɓu ma vuɗ vo varaŋ vuɗina ɗowba gusum gusina lay, suu ka hu njafaŋgina lay. 13Lini nanagelay sa ma vuɗ varaŋŋa ma gusum ay gusina lay caw ɗiwisi kiyo. Galam man ndaɗta hin li eg tliwigi ni a Galamba dindinda. 14Go njuf ma caw ɗiwim kaɗina hinim duk njafam oloɗi, dikim ki dikiya. Kay nam ɓalak ki ni galam manda.»
Vi vunna kay vuɗta vi Isaak
15Lona di Abraham ana, «Yi caaŋga ana Sarai oloɗi, seɗ mbuɗ ni ana Sara. 16An hin paɗ vunun ki kaɗu, an hin ɦaŋ goo u ndaɗu, an hin paɗ vunun ki kaɗu, ndaɗ hin mbuɗ su suuna, su mulina lay.» 17Abraham cok yam kaŋga hin san hurum kurufu di ana, «Sa ma basaɗam ki kisna ndak vuɗ goo olo su? Sara basaɗaɗ ki dok-dleeŋe ni ndaɗ vuɗ goo olo su?» 18Abraham di Lona ana, «Ismael poy fokoŋŋi nam gawni ge.» 19Lona dam ana, «Ka naɗi, caaŋga Sara hin vuɗ goona ni gasi, aŋ hin tinim sem ana Isaak. An hin vi Galamba u namu, ni galam mayra dindinda. U njafam ma ka ŋgorom daganna lay. 20An humuŋ cen maŋga kay Ismaella. Ni an hin paɗ vunun ki kamu, an hin zulum njafam ha fok na gak gak a fafaɗta. Nam hin vuɗ mulina doogo yam mba', goryom ŋgolona hin zul cocoo, 21na may an hin vi galam manda u Isaak, ma Sara hin vuɗuŋŋa ha daa ko wanda nana.» 22Hu li ma Lona daɓ njaɗ mamba u Abraham daɓmi, nam hinimu, tuɗ koloo.
23Abraham tay goromma Ismael u gor njufii suu vuɗ vo varamma halaŋ u suu gususi u gursuna lay gor njufii suu vo vi Abrahamma halaŋ nam cawasi ɗiwisi ki hu buu namma bel bel, ko gaɗta Lona dambara na. 24Hu li ma Abraham caw ɗiwim kina ni basaɗam li ki dok-dleeŋe yam dleeŋe. 25Goomma Ismael caw ɗiwim mi hu basaɗamba doogo yam hindira may. 26Abraham u goomma Ismael caw ɗiwisi ki hu buu namma lay. 27Gor njufii suu vuɗ varamma halaŋ u suu gususi u gursuna ay hu li daŋŋana lay, caw ɗiwisi ki um hu buu namma lay.
Currently Selected:
URA TIN AYRA 17: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
