URA TIN AYRA 22
22
Abraham hal a li ɓivunna u Isaak
1Ŋgoo dagan tlesuu li ay ki wanna, Lona tuk Abraham dam ana, «Abraham». Nam hoŋ dira ana, «An wanni».#Heb. 11.17-19 2Lona dam ana, «Tay goroŋŋa, Isaak, ma dew ma aŋ minimma, tuɗ hu mbassa Moriya, ha ki hu li namma aŋ lan ɓivun ma ŋgalam kina u goroŋŋa kay ɦinira an hin takaŋgara».#2 Dlaŋ 3.1 3Abraham col kolo maɗii feɗet, gan kor mamba, yow suu sun um mba', tay goromma Isaak may. Nam wak gu ma tuɗ li ɓivun ma ŋgalam kina kasiya, tuɗ hu li ma Lona dam kamma kay ɦinira dew. 4Hu buu ma hindina Abraham gol irim ha na ni wi li namma ha na day. 5Abraham di suu sun mamsina ana, «Lakagi ka tani eg korra, ami u goozoŋŋa tuɗ ta ta tana a goɓ Lona, ami hin hoŋ ay egegiya.»
6Abraham njun gu ma li ɓivun ma ŋgalam kina kay goromma Isaak, nam tli kura kom u ŋgewra may. Asi tuɗ u tasi jak. 7Isaak yi bum Abraham dam ana, «Bunu». Nam hoŋom dira ana, «An wanni goonna». Isaak hin dam ana, «Gola, kura ka may, guna ka may ni, timii ma li ɓivun ma ŋgalam kina u namma ni arage?» 8Abraham hoŋom dira ana, «Goonna, Lona hin ɦal timii ma li ɓivun ma ŋgalam kina ay ni u tamba». Asi tuɗ fok u tasi jak.
9Asi tew hu li ma Lona dam ay kamma tewni, Abraham min givin ma togolla, nja guna kolo kamu. Nam ɗag goromma, Isaak, gam kolo kay guna hu givin ma togolla.#Jak 2.21 10Abraham maɗ kom tli ŋgewra a ŋgaɗ goromma kira. 11Sa sunda vi Yawe yam ay kolo ana, «Abraham, Abraham». Nam hum ana, «An wanni». 12Sa sunda vi Yawe dam ana, «Hin goona, lam va egembi, kay cemmi an wi ana aŋ li ndaa Lona. Aŋ doo ka kay goroŋ ma dewna a ɦanna kiraɗi». 13Abraham gol irim ŋgorom dagan na ni, wi gamlana vii ga u mekem duk bubura. Abraham tuɗ vi gamla namma vini li ɓivun ma ŋgalam kina u nam kay sem goromma, Isaak. 14Abraham tin sem li namma ana, «Yawe wiya,» ni kay ndaɗta suuna di cemi ana, «Kay ɦinira Yawe wiyara.»
15Sa sunda huulona vi Yawe yi Abraham ay kolo a yamba mbara, 16dam ana, «An suu u tanda, Yawe di na. Kay mege, aŋ li na, aŋ doo ka kay gooŋ ma dewna a ɦanna kiraɗi.#Heb. 6.13-14 17An hin paɗ vunun ki kaŋu, zuluŋ njafaŋ ko ciciwra kolo huulonara na, ko ŋgetl ma doŋ lum ŋgolnana na may. Njafaŋ hin su kay suu babali masisina.#Heb. 11.12 18Suu kay ndaŋgarana halaŋ hin fi paɗvunna ni u njafaŋu kay aŋ humun vununu.»#Sun. 3.25
19Abraham hoŋ ay eg suu mam suu sunda hoŋŋi, asi yow kolo halaŋ hoŋ Berseba, kay Abraham ka cukira ni hu Berseba.
Njaf Nahor
20Ŋgoo tlesuu li asina ɗaŋŋi, asi di Abraham ana, «Gola, Milka, caŋ wayaŋŋa, Nahorra, vuɗum gorra may. 21Goom ma ŋgolna ni Us, wayamma ni Buz u Kemuel ma bu Aramma may. 22Kessed, Hazo, Pildak, Yidlaf u Betuel». 23Betuel vuɗ Rebeka. Ni gor suu kalavandi suu Milka vuɗusi maŋ Nahor ma wayaŋ Abrahamma. 24Caamba mbara yaɗ ana, Reuma, vuɗum gorra may, Teba, Gaham, Tahak u Maaka.
Currently Selected:
URA TIN AYRA 22: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
