URA TIN AYRA 23
23
Abraham gus li ma pi Sara huna
1Sara basa kay ndaŋgara 127, basa Sara ni ko ndaɗta na. 2Sara miɗni hu Kiriyat-Arba ni Hebron hu mbassa Kanaanda. Abraham mba li hahaw Sara tiiriɗ lay. 3Abraham col kolo hin maɗna ka tani tuɗ joɓ goryoŋ Hetna ana, 4«Anni ŋgayna cuki ni dukugiya, ɦangi li maa nde, an a pi maɗ manna huwa.»#Heb. 11.9,13; Sun. 7.16 5Goryoŋ Hetna hoŋ dira maŋ Abraham ana, 6«Sa ŋgolna, humumi vunumi haa, Lona mbuɗuŋ dukumi ni ko mulna na, pi maɗ maŋŋa hu zul mami ta jivi taa dew ta aŋ minda. Sa dukumi ma dooroŋ kay zulla pi maɗ maŋŋa kaɗi.» 7Abraham col kolo a goɓ kaŋga fok suu hu mbas ndaɗta, suu goryoŋ Hetna. 8Nam dasi ana, «Lini agi min gasi ana an pi maɗ manna, ni joɓongi Efron, ma goŋ Soharna, aya. 9Nam ɦan zul goy mamba Makpela ta ha kolo kay yam sene mammara. Nam ŋgaanda gursuuɗ ki may, ndaɗ hin ki ni a liin ma pi maɗna dukugi a fafaɗta.» 10Efron ay kaki duk goryoŋ Hetna, nam hoŋ dira maŋ Abraham fok goryoŋ Hetna u suu mbay ka moli gaa fun grek mammana halaŋ lay, ana, 11«Ka naɗi, malanna, humun vunun haa, an ɦaŋ senena u zul goy mayra ka hura lay. An ɦaŋsina ni ii suu manna halaŋ, tuɗ pi maɗ maŋŋa.» 12Abraham goɓ kaŋga fok suu hu mbas ndaɗtana. 13Nam ɓak ki maŋ Efron fok suu hu mbas ndaɗtana halaŋ ana, «An ceneŋu humun vunun haa, an warakaŋ gus senena kiyo. Van gus man ndaɗta an hin pi maɗ manna huwa.» 14Efron hoŋ dira maŋ Abraham ana, 15«Malanna, humun vunun haa, li namma gusum mi sili kis kis fiɗi, va ma duk tayna ni mege? Tuɗ pi maɗ maŋŋa huwa.» 16Abraham hum fun Efron, nam hin ŋgaam gursura nam di kaɗ ki fok goryoŋ Hetna halaŋga, sili kis kis fiɗi hu coki ndaɗta ni ndaɗ ii suu paara jiviya. 17Sene ma vi Efron namma ka ni hu Makpela vok tam u Mamre, senena u zul goyra ka hurumba u ŋgusugi suu huna halaŋ, u vun sene ma tin ayna halaŋ. 18Mbuɗ kini vi Abrahammi fok goryoŋ Hetna u suu mbay moli gaa vun grek mammana halaŋ.
19Ŋgoo dagan Abraham tuɗ pi caamba Sara hu zul goyra hu sene ma Makpelana vok tam u Mamre ni Hebron hu mbassa Kanaanda. 20Ko ndaɗta na senena u zul goyra Abraham gususi ko goryoŋ Hetna mbuɗ ki ni varam a liim ma pi maɗna a fafaɗta.
Currently Selected:
URA TIN AYRA 23: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
