URA TIN AYRA 24
24
Isaak ɗum Rebeka
1Abraham mbuɗ ki maa cocoo, basaɗam ki ŋgolo, Yawe paɗ vunum ki kam u tlesuu nam lasina halaŋ. 2Abraham di saam ma ŋgol ma sunda, ma tlegeyem kom halaŋ halaŋŋa ana, «Kal koŋ ay gaa u ɓalanu. 3An min ana, aŋ suu taŋ ki fokon tani u Yawe, Lona ma li huulona u ndaŋgara layna ana, aŋ ka van cara maŋ goronna duk gorɓii suu kanaan suu an kagi dukusi wannaɗi. 4Tuɗ hu mbassan ta an vuɗ ay hura duk somoyonu, van cara ay maŋ goronna Isaak.» 5Saamma sunda hoŋom dira ana, «Lini cara an faɗta hin mbay un tanɗi kala, ni an ndak tayaŋ goroŋŋa un hu li ma aŋ mbay ki huna su?» 6Abraham dam ana, «Gol taŋ jiviya, tuɗun goronna ha ki hu tanɗi. 7Yawe, Lo ma Kolo huulona, ma kalan ay ki hu ziŋ bunna, duk suu manna na, ma suu tam fokon dan ana an hin ɦaŋ mbassa aŋ hu wanda ki maŋ njafaŋuma. Nam u tamba hin sun saam ma sunda huulona ha fokoŋu. Aŋ hin tlan cara ay maŋ goronna ni huwa. 8Lini cara mbay ka uŋgi ni aŋ buɗ ki hu suu manda an suuruŋga wanda wa. Ka aŋ tuɗ u goronnaɗi kama.» 9Sa sunda kal kom kaŋga u ɓal Abraham sa ŋgol mamma hin suu tam a li u dlara nam damba wanda.
10Sa sunda yow jamballa doogo duk jamballa vi sa ŋgol mamma, nam tuɗa, u begera daŋga vi sa ŋgol mammara kom hu lay. Nam col kolo tuɗ Mesopotami hu ɦoŋzi ma vi Nahorna. 11Nam buu jamballa kaŋga doŋ kaana a koɗoɗ taɗu tok eg goloŋga, ni faɗta fiɗigiya. Boyogina cuk ay ki a go yonara. 12Nam cen Lona di ana, «Yawe, Lona vi sa ŋgol manna, Abraham, ŋgafan u va ma an minimma karam ma ŋgafge, li jivira eg sa ŋgol manna, Abraham, na lige. 13An ka coli fun goloŋga tani, gorɓii suu hu ɦoŋzinana hin cuk ay ki a go yona. 14Goo mayra an hin joɓoɗ ana, Leŋen gegel maɗna ay gaa an ci yona. Ndaɗ hin hoŋ dira ana, Ciya, an hin ɦal maŋ jambal maŋsina layra ni, mayra aŋ manaɗ maŋ saaŋ ma sunda, Isaakka, gaw. Hu li namma an wi ana aŋ li jivira eg sa ŋgol manna wa.»
15Vunum bay ndi kaŋga a cenda tu may ni Rebeka kal ay ki u gegelna keleɗ gaw. Ndaɗ ni goora vi Betuel, ma goŋ Milkana, ta caŋ Nahorra, ma wayaŋ Abrahamma. 16Ndaɗ ni goora jivi cocora buu ka u sa njuf tuɗi lay. Ndaɗ ɗiŋ kaŋga hu goloŋga oy gegel maɗna ay oyni hin taɓa ay ki koloo. 17Sa sunda liŋ ha fokoɗ liŋŋi daɗ ana, «Goo wayra ɦan yo an ci gige?» 18Ndaɗ hoŋom dira ana, «Ciya, sa ŋgol manna.» Ndaɗ leŋem vun gegel maɗna ay kaŋga zak ana nam ciya. 19Hu li ma ndaɗ ɦam yona nam ci ki may ni, ndaɗ dam ana, «An go ay maŋ jambal maŋsina asi ci ndakasi ki may.»
20Ndaɗ vo yo ma hin koɗna ki hu bulla zak, hoŋ hu goloŋga zakŋi, go yona ay olo. Ndaɗ go ay maŋ jamballa halaŋ. 21Sana goloɗ na ni col ɦawa na jim ka di vaɗi, kay a wi ana lini Yawe hin mbuɗum karam koy mamba jivi kalage.
22Hu li ma jamballa ci yona ki halaŋ cini, sana tli walakka lor jivira, gus loɓma, kalaɗta ciniɗu, yowoɗ walakŋa del kona mba' ma gusum loɓma cukuɗna koɗ may. 23Sana joɓoɗ ana, «Ndakŋi goŋ gerage? Dan ay gige, li buuna ka vi buk su?» 24Ndaɗ hoŋ dira ana, «Anni goora vi Betuel, ma goŋ Milkana, ta caŋ Nahorra.» 25Ndaɗ hin dam olo ana, «Haɗna ka varami cocoo, li ma buuna ka lay.»
26Sana goɓ kaŋga gi deɓ Yawe, 27dam ana, «Gaŋ deɓpa, Yawe, Lona vi sa ŋgol manna, Abraham, aŋ hin jivi maŋga u ɗegeera aŋ laɗ kay sa ŋgol mannara ka kiɗi, Yawe tinin irinni hu ziŋ gorseŋ sa ŋgol mannana.»
28Goora liŋ zakŋi i cuɗ boy namma ki maŋ suu vo vi suɗna. 29Rebeka wayaɗ ma njufna ka dew yam ana Laban. Nam kal ay ki paɗ liŋŋa fun goloŋga eg sana. 30Hu li ma nam wi walakka cin wayamba Rebeka u walakŋa cuki koɗ na ni, nam hum boy ma Rebeka damma ana, «Sana njaɗan ay na.» Nam hin mbay eg sa namma eg jambal mamsina fun goloŋgana. 31Nam dam ana, «Mbay voo sa ma Yawe paɗ vunum ki kamma, aŋ col ka ki kiɗik na ni nanage? An min huu zira ka ki kaŋu, min lina ha ki kay jambal maŋsina lay.»
32Sana hin kal ay vo hu zina, nam hin buɗ tlena ki kay jamballa, asi ɦasi haɗ ma jivina may. Asi ɦal yona ay maŋ sa sunda vi Abraham u suu umma, asi mbus sesi kiyo. 33Ŋgoo dagan nam ɦasi tlena a tira. Sa sunda vi Abraham di ana, «An ka ti va ki jew boy ma an a dammaɗi.» Laban hin dam ana, «Njaɗ aya.»
34Nam gijaŋ njaɗta ana, «Anni sa sunda vi Abraham. 35Yawe paɗ vunum ki kay sa ŋgol manna cocoo. Nam mbuɗ ndaki ɦay. Yawe ɦam timigiina u mbutlina, doonora u lor, suu sunda njufiina u boyogina, jamballa u korra. 36Sara, caŋ sa ŋgol mannara, vuɗum go njufna u maa taɗu. Nam ɦam tlegeyem halaŋŋi mamu. 37Sa ŋgol manna suurun ay ana, Aŋ van cara maŋ goronna duk gorɓii suu Kanaanna suu an cuki dukusi wannaɗi. 38May ni aŋ tuɗ vam cara ay ni hu deera vi bunda hu njafanu. 39An dam ana, Sa ŋgol manna, ca ndaɗta hin mbay unɗi kalage? 40Nam hin hoŋon dira ana, Yawe, ma an kaa day tuɗ fokom wanna hin sun saam ma sunda huulona ha fokoŋu, koy maŋga hin li ay jiviya. Aŋ hin vi cara ay maŋ goronna ni hu deera vi bunda hu njafanu. 41Lini aŋ tew ha ki hu deera vi bunda wa ni asi ɦaŋ goo ay kaɗi ni, aŋ ki ni buɗi hu suura aŋ suu taŋ fokon wanda.
42«An tew karam fun goloŋga may ni di ana, Yawe, Lona vi sa ŋgol manna, Abraham, lini aŋ min a koy manda li jiviya ni, 43gola an coli fun goloŋga wanni, goora mbay a go yona, An ceneɗ ana, Ҥan yo ma hu gegel makŋa nde an ciya. 44Ndaɗ hin hoŋon dira ana, Ciya, an hin go maŋ jambal maŋsina lay, goo ndaɗta ni goora Yawe manaɗ maŋ goŋ sa ŋgol mannara gaw. 45Vunun bay ndi kaŋga tu may ni Rebeka kal ay ki u gegel maɗna keleɗ a go yona gaw. Ndaɗ ɗiŋ kaŋga hu goloŋga go yona aya, an hin joɓoɗ ana, Goo wayra, ɦan yo an ciya. 46Ndaɗ leŋ vun gegel maɗna ay kaŋga keleɗ zakŋi dan ana, Ciya, an hin ɦal maŋ jambal maŋsina may. An hin ciya ndaɗ hin ɦal maŋ jambal mansina may. 47An joɓoɗ ana, Ndakŋi goŋ gerage? Ndaɗ hoŋon dira ana, Anni goŋ Betuel, ma goŋ Nahor u Milkana. An hin kalaɗ walakka ciniɗ may, cukuɗ walak ma hiŋŋa koɗ may. 48An hin goɓ kaŋga cen Yawe. An gi deɓ Yawe, Lona vi sa ŋgol manna, Abraham, ma mbaaran ay tani ɗegee, a an vi goora vi wayaŋ, sa ŋgol manna Abraham, maŋ goromma. 49Cecemi lini agi min li jivira u ɗegeera maŋ sa ŋgol manna ni dangi ay gaw, Li kaɗi ni dangi ay an tuɗ hu li daŋŋa.»
50Laban u Betuel hoŋ dira ana, «Dla ndaɗta col ay ni ko Yawe, va ma ami dam kaɗi. 51Rebeka fokoŋ wanna vaɗ tuɗa. Ndaɗ mbuɗ a caŋ goŋ sa ŋgol maŋara ko Yawe dira na.»
52Hu li ma sa sunda vi Abraham humusi boy masina na ni, goɓ kaŋga fok Yawe. 53Sa sunda vi Abraham yow tlesuu ay komma ki kiɗiki, doonora, lor, u barawna ɦasi maŋ Rebeka. Nam ɦal tlena coco maŋ wayaɗna u suɗu. Ŋgoo dagan nam u suu ay umma tiya, ciya, asi hin buura.
54Maɗiira hin fo ki foni, sa sunda vi Abraham di ana, «Hinin voɗta an hoŋ vo eg sa ŋgol manna.» 55Wayaŋ Rebekana u sum di ana, «Hin goora buu egemi njok tuwa, ii buu goy doogo kalani ndaɗ hin tuɗa.» 56Nam hoŋosi dira ana, «Vangi yanɗi. Yawe njun un hu koy manda vi kan may ni, hiningi an hoŋ eg sa ŋgol manna.» 57Asi hoŋ dira ana, «Yaygi goora ay joɓoɗ tuwa.» 58Asi yi Rebeka ay yini, joɓoɗ ana, «Ndak min tuɗ u sana wanni su?» Ndaɗ hoŋ dira ana, «An min tuɗa.» 59Asi hin wayasira Rebeka u cara wuluɗta tuɗ u sa sunda vi Abraham u suu mamsina. 60Asi paɗ vunusi ki kay Rebeka di ana,
«Wayamira, ndak hin mbuɗ ni su suu buɓ buɓma,
njafak hin su kay mbassa vi suu babali masisina.»
61Rebeka u boyogi suu sunuɗna yow ful kay jamballa tuɗ u sa sunda vi Abraham, sa sunda tli Rebeka tani tuɗ gaw.
62Isaak ay fun goloŋga Lo ma wanna Lahai Roi nam ka cuki ni hu mbassa Negebpa. 63Fiɗigi taa dew Isaak kal ay ki a poy hu senena, nam tli irim gol ha na ni jamballa ka tuɗ aya. 64Rebeka tli iriɗ kolo na ni wi Isaak may ni ndaɗ cuk ki kaŋga gaw. 65Ndaɗ joɓ sa sunda vi Abraham ana, «Sa ma ŋgafay ay hu senena cowna ni gege?» Sa sunda hoŋoɗ dira ana, «Ni sa ŋgol manna.» Ndaɗ yow baraw maɗna baa yaɗ ki gaw. 66Sa sunda vi Abraham cuɗ dlara nam laɗ ayra ki maŋ Isaak halaŋ. 67Isaak tuɗ Rebeka ha hu mbutluɓ ma vi sum Sarana. Rebeka mbuɗ ki a caamba, nam miniɗu, ni ko ndaɗta na Isaak hurum heɓ kay dla maɗ sumu.
Currently Selected:
URA TIN AYRA 24: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
