JAŊ 16

1«An dagi boy namma ha ni a agi viɗ hurugi ma tini kanna kiɗi. 2Asi hin dikigi ki hu Zira Tokka lay. Ni buu maa hin mbaa, suu cagi kina hin saa ana asi li ni sunda vi Lonara hu dla ndaɗta. 3Asi hin li dla ndaɗta na ni kayra asi ka wi bunɗi lay ka wan anɗi layra. 4An dagi boy namma na ni a buu masi namma ndak wa a asi li dla ndaɗta ni, agi wi kagi ana an dagi ki fok jewe.»

Sunda vi Musuk Lonara

«An dagi tle asina ay ka jewɗi ni kayra an ka u agira. 5Cecem wanda an tuɗ ni eg sa sunun ayna, sa dukugi ma joɓon ana, Aŋ tuɗ ni arage kaɗi. 6Hurugi haɗ ni kay an dagi boy nammara. 7Na may an dagi ni gasira a agi fi jivira ni an tuɗ kiyo, lini an tuɗ ka kiɗi ni, sa njunugina ka mba egegiɗi. An tuɗ wa ni, hin sunugina aya. 8Nam hin mba wa ni, mal ii suuna kiyo takasi kay dlara asi ka viɗ tasi hu cora, kay dlara ɗegeera, kay ɓakŋa vi Lona lay. 9Asi viɗ tasi hu cora ni kayra asi ka tin hurusi kanɗira. 10Asi viɗ tasi kay tlesuu ɗegeena ni kay an tuɗ eg Bunu, agi hin ka wan oloɗi. 11Asi viɗ tasi kay ɓakŋa vi Lona ni kay mulna vi duliyara ɓakŋa ki kaay kam da.

12«Tlen kon coco a dagiya, cecemmi agi ndak ka a ziirisi bel tuɗi. 13Musukka gasira mba wa ni, ndaɗ hin tinigi hu dlara gasira halaŋ. Ndaɗ ka ɓak kay saɓak maɗna kay taɗɗi, ndaɗ di ni dlara ndaɗ humuɗta, ndaɗ hin dagi dlara hin mbara may. 14Ndaɗ hin ŋgaan kay tlesuu col ay konna, ndaɗ hin dagi tle asina. 15Tlen vi Bun halaŋŋi varan an may, kay ndaɗta an dagi ana tlesuu col ay konna ndaɗ hin fasiya, hin dagisina.»

Yoora hin mbuɗ ki furira

16«Kakŋa ew ni, agi ka wan oloɗi, ŋgoo dagan ew ni, agi hin wanu.» 17Suu ɦiw duk suu haɗi mamsina njaɗ tasi ana, «Boy namma ni ana mege? Nam daygi ana kak na njokŋi, agi ka wan oloɗi, kak na njokŋi, agi hin wanu, ni kayra an tuɗ eg Bunda. 18U boy ma ana kak ewna ni ana mege? Ay ka wi u boy ma nam dam wannaɗi.» 19Yesu wi ana asi hal a joɓomu ni, nam dasi ana, «An dagi ana, Kak njokŋi, agi ka wanɗi, kak ew ni, agi hin wan olo, agi joɓ duk tagi ni kay boy namma su? 20An dagi ni gasi, Agi hin tiirigiya, yoo tagi lay. Suu hu duliyarana hin furiya, agi hin kak u yoora may, yoo magira hin mbuɗ ki furira. 21Hu li ma cara tiliɗ ndak wa a vuɗta ni, ndaɗ yoo taɗ coco kay ndaɗ wi ana buuruɗ ma wihawra hin tok. Ndaɗ vuɗwa ni, humuɗ maa ki kay wihaw maɗta gaw. Ndaɗ li ayra kay gooɗ ma ndaɗ vuɗum wilina. 22Cecemmi agi hu yoora ni na may. Agi wan wa ni, hurugi hin furiya, furi magi ndaɗta sa ndak ka a ɓaɗagira ki kogiɗi.

23«Buu namma hin mba wa ni, agi ka joɓon kay va dew oloɗi. An dagi ha ni gasira, Bun hin ɦagi tlesuu agi joɓosi u senna halaŋ. 24Gak gak cecemmi, agi bay joɓ va u sen tuwa. Joɓogiya agi hin fiya, furi magira hin mbuɗ ŋgolo.»

Yesu su kay suu hu duliyara halaŋ

25«An dagi tlena halaŋ u ndal boyna. Hin fok na nde ni, an ka dagi dla u ndal boyna oloɗi. An hin dagi dlara col ay eg Bunda ki kiɗik ɗal ɗal. 26Li namma hin mba wa na, agi joɓ joɓ magira eg Bun u senu. An dagi ka ana an hin cenem ay kagiya naɗi su, 27kayme Bun u tamba minigiya, kay agi mininu, vi ana an col ay ni vi Lona. 28An col ay ni vi Lona, mba kaŋga hu duliyara, cecem wanda ni, an hin duliyara hoŋ kolo eg Bunu.»

29Suu haɗi mamsina dam ana, «Cecem wanda ni, aŋ ɓak dlara ki teteɗ bay ndal boyna. 30Cecemmi ami wi ana aŋ wi tlena halaŋ. Ami ndak ka a joɓoŋ kay va joɓi oloɗi. Kay ndaɗta, ami vi ana aŋ col ay ni vi Lona.» 31Yesu hoŋosi dira ana, «Agi tin hurugi kan wa ɗaŋ su? 32Lin hin tok a mbaa, nam mba wa ɗow, agi hin njay ki dew dew halaŋ, gegelay tuɗ hu ziimu, agi hin hinin ni vaydegen dew, ɦawaa, an ka vaydegenɗi, Bun ka u anu. 33An dagi na ni kay duk ɦoŋogi li heɓpa u anu. Agi hin wi hawra duk suuna. Na may, vagi hurugi eŋe, an su kay duliyara.»

Currently Selected:

JAŊ 16: BMS

Highlight

Copy