JAŊ 17
17
Yesu cen kay suu haɗi mamsina
1Yesu daɓ njaɗta daɓmi, tli irim kolo huulona di ana, «Bunu, lin ndak wa. Ҥal ŋgolla ay maŋ Goroŋŋa a Goroŋŋa hin ɦaŋ ŋgolla may. 2Kay aŋ ɦam saɓakŋa kay suuna halaŋ, a nam ɦal iirira ka daɓ kiɗira maŋ suu aŋ ɦamsina na. 3Iirira ka daɓ kiɗira ni ana asi waŋ ana, aŋŋi Lo ma gasina dew, wi Yesu Kristu ma aŋ sunum ayna may. 4An takaŋ ŋgol maŋga ki hu duliyara, an faɗ vun dlara aŋ dan ana an laɗura ki lay. 5Cecemmi Bunu, ɦan ŋgolla fokoŋu ta aŋ ɦanda ay jew bay duliyara min tura.
6«Suu aŋ manasi ay ki duk suu hu duliyarana, ɦansina, an takaŋ ki masi wa. Asi li ay ni maŋsina, aŋ ɦansina, asi hum u boy maŋŋa. 7Cecemmi asi wi ana tlesuu aŋ ɦansina col ay ni koŋu. 8Ni kayra an haɗasi boy ma aŋ danna ayna. Asi vamu. Asi wi gasi ana an col ay ni egeŋu, asi vi ana aŋ sunun ay ni aŋu.
9«An ceneŋ kasiya ka kay suu halaŋŋaɗi, ni kay suu aŋ ɦansinana, kayme asi ni maŋsina. 10Tlesuu konna halaŋŋi maŋsina, tlegeyeŋ halaŋŋi mansina may. Ŋgol manda hin tak kini usiya. 11An ka hu duliyara oloɗi, asi ka duk suu hu duliyarana tuwa. An tuɗ ha ni egeŋu. Bun ma teteɗna, golosi u saɓak seŋu, seŋ ma aŋ ɦannana, a asi li dew ko aŋ u an ay dewra ni na. 12Hu li ma an li ay u asina ni, an golosi ni u saɓak seŋu. Ni u semma aŋ ɦannana. An golosiya, maa dew viɗ ka kiɗi, viɗ ki ni ma magara di kam ana nam a viɗ kiyona. Nam viɗ ki kay a faɗ kini vun dla mayra ay ɓiiri jewra. 13Cecem wanda, an tuɗ ha ni egeŋu. An ɓak na ni kay an ka hu duliyara tura, a furi manda hin ka hurusi ŋgolo. 14An ɦasi boy maŋŋa wa. Suu hu duliyarana noyosi kiyo, kay asi ka varasiɗi, ko an ka varasiɗira na may. 15An cecemmi ka ceneŋ ana aŋ yowosi ki hu duliyara naɗi, ni ana aŋ golosi ko Sa ma Cona. 16Asi ka vi suu hu duliyaranaɗi, ko an ka masiɗira na may. 17Aŋ mbuɗusi ki teteɗ u gasira. Boy maŋŋa ni gasira. 18Ko aŋ sunun ay hu duliyara, an sunusi ni na may. 19Anu, an mbuɗ tan ki teteɗ ni kasiya, kay asi lay mbuɗ ki teteɗ hu gasira.
20«An ceneŋŋi ka kasi holɗi, ni kay suu hin tin hurusi kan u boy ma asi hin dasinana. 21An ceneŋ kay ana asi taɓ dew, a asi taɓi u ay dew ko aŋ ka hurun may, an ka huruŋ mayra na. A asi taɓ dew a suuna wi ana aŋ sunun ay ni aŋu. 22An ɦasi bibiŋilla aŋ ɦandara wa a asi li taɓi dew ko ay taɓi dewra na may. 23An u asiya, aŋ u an may, a asi li gasi dlaɓi dew a suuna wi ana aŋ sunun ay ni aŋu, aŋ minisi ko aŋ mininda na.
24«Bunu, aŋ ɦansina, an min ana asi li u an hu li ma an hin kak huna, a asi wan bibiŋil manda. Bibiŋilla aŋ ɦandara, kayme aŋ minin ay ki fok jew bay duliyara liya. 25Bun ma ɗegeena, suuna ka waŋgi. Anu an waŋu. Suu asina wi ana aŋ sunun ay ni aŋu. 26An takaŋ ki masiya, an hin takaŋ ki olo kay a minda aŋ mininda li hurusiya, an u tanda li hurusi may.»
Currently Selected:
JAŊ 17: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
