JAŊ 19

1Pilat ɦasi Yesu ana asi poŋom u balafna. 2Suu asgaana cil jumba mulla wayara, tiniɗ kay Yesu. Cukum baraw tlaw ma ŋgolna egemu. 3Asi ɦuɗ tasi egemu sesi bolowo dam ana, «Gaŋ deɓpa, mulna fi suu Juifna.» Asi cam irim piŋ.

4Pilat hoŋ ay ki buru olo, di suuna ana, «An gagina ay ki buruwa a agi hum ana an fi va ma co ma ci sa namma kamma kaɗi.» 5Yesu kal ay ki buru u jumba mulla wayara kamu u baraw ŋgol ma tlawna cuki egem may. Pilat dasi ana, «Gola ni namu.» 6Muli suu li ɓivunna u suu asgaana wam na ni tum soora ana, «Ɓalam kiyo. Ɓalam ki eg gu garakŋa! Ɓalam ki eg gu garakŋa.» Pilat dasi ana, «Agi vagina i ɓalam u tagira kay an fi dlara cam ki kaɗta kaɗi.» 7Suu Juifna hoŋom dira ana, «Hu dlara gaɗ mamira ni, ami ndak cam kiyo kay nam di ana nammi Goŋ Lonna.»

8Pilat hum boy namma na ni mbuɗ ki ndaana su jewra. 9Nam kal ha taraŋ joɓ Yesu ana «Aŋ col ay ni arage?» Yesu dam va ka dukgi. 10Pilat dam ana, «Aŋ ka min ɓakanɗi su? Aŋ ka wi ana an ndaki a gaŋ ki lay a ɓalaŋ kolo layɗi su?» 11Yesu hoŋom dira ana, «Lini Lona ɦaŋ saɓakŋaɗi ni, aŋ ndak ka a li va egenɗi. Ni kay ndaɗta sa ɦan ay ki maŋŋa, coomba su kay maŋga.» 12Hu li namma gaw ni, Pilat hal mbeleŋŋa a gi Yesu kira. Suu Juifna tum soora ana, «Lini aŋ gi sa namma ki wa ni, aŋ ka banaŋ Sesarɗi. Sa ma di ana nammi mulna ni babali Sesar.»

13Pilat hum boy namma na ni, gasi Yesu ay ki buru gaw. Nam kak hu li kaɓakŋa, li namma yam ana li mbuyna (u vun masina yam ana Gabbata). 14Ni faali, fok buu ma li luu ma Pakŋa. Pilat di suu Juifna ana, «Gola, ni mul magina.» 15Asi tum soora ana, «Cam kiyo! Cam kiyo! Ɓalam ki eg garakŋa!» Pilat dasi ana, «An ɓalagi mul magina ki kolo su?» Muli suu li ɓivunna hoŋom dira ana, «Mul may ma daŋ kaɗi, mulna ni Sesar dew.» 16Pilat hin ɦasi Yesu ana asi tuɗ ɓalam ki koloo.

Asi ɓal Yesu ki kolo hu gu ma garakŋa

(Matiye 27.32-44; Mark 15.21-32; Luk 23.26-43)

Asi vi Yesu na gaw. 17Yesu kal ay ki doŋ kaana, tli guum ma garakŋa kamu tuɗ hu li ma yam ana ŋgot yamba (u vun masina yam ana Golgota). 18Hu li namma, suu asgaana ɓal Yesu hu gu ma garakŋa. Asi ɓal suuna kolo egem mba', ii hiŋŋa dew may, ko hiŋŋa dew may, Yesu duku.

19Pilat dasi ana asi ɓii kam kolo hu guna ana, «Yesu ma Nazaretna, Mulna vi suu Juifna.» 20Boy namma ɓiiri ni u vun Hebrena may, u vun Latinna may, u vun Grekŋa may. Suu Juifna ndum ɓii ndaɗta coco kay hu li ɓal Yesu huna ni doŋ kaana na tok. 21Muli suu li ɓivunna suu Juifna di Pilat ana, «Ɓii ana mul ma vi suu Juifna naɗi. Ɓii ana sa namma di ana, Anni mul ma vi suu Juifna.» 22Pilat dasi ana, «Va ma an ɓiirimma ni ɓiiri da!»

23Suu asgaana ɓal Yesu ki kolo hu gu ma garakŋa ɓal ni, asi ɓorowom baraw mamma ki kosi dew dew halaŋ, asi fiɗi. Asi yowom baraw mamma ŋgolna ɗerem ka ɗeriɗi, cilim ciliya cuk ay kolo day, mba ki kay ŋgoo semu. 24Suu asgaana ɓak duk tasi ana, «Haraygi baraw ma ŋgol namma kiɗi. Gaygina ɓelera, sa vamma hin ɦamma.» Dla ndaɗta faɗ ki ni vun boy ma ay ki ɓiiri hu magaara jewra di ana,

«Asi ɓorowon baraw manna ki kosiya,

asi gan baraw manna ki ɓelera.»

Ni dlara suu asgaana laɗta.

25Asi coli eg gu ma garakŋa ma asi ɓal Yesu huna, ni sum may wayaɗta Mari caŋ Klopassa, u Mari cara Magdalara may. 26Yesu wi sum u sa haɗi ma nam minimma coli egeɗ may. Nam di sum ana, «Cara, gola ni goroku!» 27Nam hin di sa haɗina ana, «Gola, ni suŋu!» Hu li namma ni, sa haɗina vaɗ varammi na gaw.

Miɗ ma Yesu miɗna

(Matiye 27.45-56; Mark 15.33-41; Luk 23.44-49)

28Ŋgoo dagan Yesu wi ana dlara daɓ wa ni, nam a faɗ vun dlara ɓiiri hu magaara kira ni, di ana, «Laara canu.» 29Hu li namma sum dlayna oy egesi hu doyra. Suu asgaana tluɓ va mbus ŋgottina ay duk mbo namma njunum fun ŋgayra kalam ha fun Yesu. 30Yesu soɓ mbo namma ha na ni, di ana, «Tlen halaŋ daɓwa!» Nam cok yam kaŋga na ni, ɦal ŋgus mamba kiyo.

Sa asgaana cok pay Yesu

31Ki fok buu ma vi Lona jewe, suu Juifna ka min ana maɗ suu miɗina li kolo hu gu ma garakgina hu buu ma vi Lonnaɗi. Buu ma vi Lon namma ni buu ma ŋgolna. Asi joɓ Pilat hinisi asi kus sem suu ɓali kolona ki kus ni yowosi maɗasi kiyo. 32Suu asgaana mba kus sem suu ɓali kolo eg Yesuna kiyo. Asi kus sem ma jewna ki kusni, hin kus sem ma mbana ki may. 33Asi mba kay Yesu ni, fam ki ni miɗi gaw. Ni kay ndaɗta asi kusum sem ka kiɗi ni na. 34Sa asgaa maa dew kusum payam u saɓpa. Busuna u yona ɓaɗ ay ki ni na gaw. 35Sa ma ɓak dla ndaɗta na wi tle asina. Dlara nam daɗta ni gasi. Nam wi ana nam di ni gasira a agi tin hurugi kay boy namma may. 36Dla ndaɗta li ni kay a faɗ vun dlara ki ɓiiri hu magara fok jew di ana, «Asi hin ka a kusum sokom ma ki dewɗi.» 37Hiŋga di olo ana, «Asi hin gol sa ma asi cokom payamma.»

Asi pi maɗ Yesu

(Matiye 27.57-61; Mark 15.42-47; Luk 23.50-56)

38Ŋgoo dagan dla ndaɗta, Yosef sa ma Arimatena joɓ Pilat ana hinim nam tli maɗ Yesu (Yosef ay ni sa haɗina vi Yesu ka gi u tam kiɗi, kay nam li ndaana ko suu Juifna). Pilat hinim ana nam tlamu. Yosef mbay tli maɗ Yesu. 39Nikodem ma mbay eg Yesu njeŋgena mbay ha mbul ma hisna irim tlumi u guna, mbul namma nekem ŋga ii kelewna dok hindi. 40Suu mba' asina tli maɗ Yesu tani, cuk barawna ay duk mbulna ca ni, ɗuɗumma egemu, ni ko ndal suu Juifna li pi saa ni lira na may. 41Li ma asi ɓal Yesu huna senena ka huwa, hu sene namma zulla wilira veki duk ɦinira bay gi sa huruɗ tuwa. 42Buu ma vi Lonna hin tok may ni, asi gi Yesu hu zulla veki wili ndaɗta.

Currently Selected:

JAŊ 19: BMS

Highlight

Copy