JAŊ 20

Yesu paɗ ki kolo iiriya

(Matiye 28.1-8; Mark 16.1-8; Luk 24.1-12)

1U damas maɗii feɗet, lina bay garaɗ ki tu ni, Mari ta Magdalara tuɗ kay ussa. Ndaɗ i fi ni ɦinira ki lagaɗi fun zulla. 2Ndaɗ hoŋ liŋŋa i fi Simon Piyer u sa haɗi ma Yesu minimma dasi ana, «Asi tli Bu Suuna ay ki hu zulla gammi ara kala, ami ka wi li ma asi gammaɗi.» 3Piyer u sa haɗi ma hiŋŋa tuɗ kay ussa. 4Asi yow liŋa u dlaasira jakka. Sa haɗi ma hiŋŋa liŋ feɗ su Piyer tuɗ tew fun zulla jewemu. 5Nam goɓ yam ha fun zulla na ni, fi ni baraw ma ganam u namma cuki kaŋgaa. Nam kal ka hu zullaɗi. 6Piyer mbay ŋgoo dagan wani, kal ha ga hu zulla gaw. Nam wi baraw ma ganam u namma cuki kaŋgaa. 7U baraw ma ay ɗagi kay yam Yesuna cuki keŋ may. Baraw namma ay gi cuki kay tam zeɗ u ma ganam u namma. 8Sa haɗi ma mba vun zulla jewna kal ha hu may. Nam wiya, hin tin hurumu. 9(Suu haɗina bay hum u ɓiira di ana Yesu miɗ wa ni, hin paɗ ay ki kolo iiriyara tuwa). 10Suu haɗi suu mbana hoŋ ay voo.

Yesu tak tam ki ii Mari ta Magdalara

(Matiye 28.9-10; Mark 16.9-11)

11Mari col ki fun zulla buru tiira. Ndaɗ tii na ni, goɓ yaɗ gol hu zulla. 12Ndaɗ wi suu sunda huulona mba' u baraw ma haɓma tasiya kaki hu li ma Yesu li gi huna, hiŋŋa kaki hu li sem li cuki huna, hiŋŋa hu li ma yamba li gi huna may. 13Suu sunda joɓoɗ ana, «Cara, ndak tii ni kay mege?» Ndaɗ hoŋosi dira ana, «Asi tlan Bu Suuna manna wa, an ka wi li ma asi gam hunaɗi.» 14Ndaɗ di boy namma na ni pereɗ iriɗu ni, wi Yesu coliya, ndaɗ ka wi ana ni Yesuraɗi. 15Yesu joɓoɗ ana, «Cara ndak tii ni kay mege? Ndak halni gege?» Ndaɗ saa ana li ka ni sa gol u senena, ndaɗ dam ana, «Aŋ tlam ha ni aŋu ni takan lii aŋ gam huna, an tuɗ tlamu.» 16Yesu daɗ ana, «Mari!» Ndaɗ pereɗ iriɗ, dam u vun masina ana, «Rabbuni» (ni ana Mala Haɗta). 17Yesu daɗ ana, «Ŋgen kok egenɗi an bay tuɗ ay eg Bun tuwa. Ndak tuɗ di gorsenna ana an tuɗ kolo eg Bunu, nammi Bugi may eg Lo manna, nammi Loogina may.» 18Ndaɗ Mari ta Magdalara tuɗ di maŋ suu haɗina ana, «An wi Bu Suuna aya.» Ndaɗ njaɗasi dlara nam daɗtara kiyo.

Yesu tak tam ki ii suu haɗi mamsina

(Matiye 28.16-20; Mark 16.14-18; Luk 24.36-49)

19Fiɗigira Damas ndaɗta may ni, suu haɗina tok tasi hu zira, gi vun goŋga kasiya kayme asi li ndaana ko suu Juifna. Yesu mba col dukusi dasi ana, «Heɓpa ka u agiya.» 20Nam dasi boy namma di ni, hin takasi duk kom u payam may. Suu haɗina wi Yesu na ni, asi furi cocoo. 21Yesu hoŋosi dira olo ana, «Heɓpa kak u agiya, ko Bun sunun ay na ni, an sunugi ni na may.» 22Ŋgoo dagan boy namma nam fo musuk mamma ha kasiya, dasi ana, «Fagi Musuk Lonara. 23Suu agi daɓasi coosira kina, ndaɗ ki ni daɓi may. Suu agi min ka a daɓasi coosira kiɗina, ndaɗ ka daɓ kiɗi may.»

Yesu u Tomas

24Tomas ma duk suu doogo yam mbana (yam ana Ŋgonina), hu li ma Yesu mba na ni, nam ka dukusiɗi. 25Suu haɗi suu hiŋŋa dam ana, «Ami wi Bu Suuna!» Tomas hoŋosi dira ana, «Lini an wi huɗuk mbil ma komma, tin kon ka huɗi ni, u ma payamma, tin kon ka huɗi lay ni, an ka tin hurun kambi.»

26Li buuna dagan kiɗisiya ni, suu haɗi suu vi Yesuna tok hu zira olo, buu namma Tomas ay dukusiya. Vun goŋga dugi kasiya. Yesu kal ay mba col dukusiya, dasi ana, «Heɓpa li u agiya.» 27Nam di Tomas ana, «Ҥuɗ koŋ aya, golon huɗuk konu, ɦuɗ koŋ ay tin koŋ payanu. Hin huruŋ ma mbambana kiyo, tin huruŋ kanu.» 28Tomas hoŋom dira ana, «Bu Suuna, Lo manna!» 29Yesu dam ana, «Ni kayra aŋ wan u iriŋu tin huruŋ kan ni na su? Furira ka kay suu tin hurusi kan bay wan u irisina.»

San ɓii magaara ndaɗta ni kay mege?

30Yesu li dlara mbuɗta daŋga coco fok suu haɗi mamsina olo. Tle asina ka ɓiiri hu magaa ndaɗta halaŋgi. 31Tlesuu ɓiiri hu magaa ndaɗtana ni ana agi tin hurugi kay Yesu a nammi Sa Lona Fuurumma, Goŋ Lonna. Lini agi tin hurugi kam wa ni, agi hin fi iirira umu.

Currently Selected:

JAŊ 20: BMS

Highlight

Copy