LUK 21
21
Cara donora ɦal gursura maŋ Lona
(Mark 12.41-44)
1Yesu hu Ziŋ Lonara wanni, nam gol irim egemu, wi suu ɦizina cuk ɦal masira hu zandukka. 2Nam wi cara donora cuk sili mba' may. 3Nam di ana, «An dagi ha ni gasira, cara donora wanni, cukŋi su suu hiŋŋa halaŋ. 4Suu hiŋŋa ɦal ni u ŋgol begera ki kosi duk ɦawara. Ndaɗ u hahaw maɗta cuk ki ni ma ndaɗ ti gin vunuɗ u namma halaŋ.»
Yesu di ana Ziŋ Lonara Yerusalem wanda hin to kiyo
(Matiye 24.1-2; Mark 13.1-2)
5Suuna molira wanni, suu ɦiw di ana, «Ziŋ Lonara mini jivi coco ɦay, u ɦinira u tlesuu asi ɦasi ay maŋ Lonna.» Ɗaŋŋi Yesu hin di ana, 6«Buu maa dew hin mbaa, ɦinira agi waɗ wanda ta dew hin ka a li jaki kolo kay ndaraɗɗi. Ndaɗ hin njay ki vereŋ vereŋ.»
Ndaŋgara a daɓ kira ni hahawra hin mbay kay suuna ki fok jewe
(Matiye 24.3-14; Mark 13.3-13)
7Asi hin joɓ Yesu ana, «Dla ndaɗta hin li ni saɓage? Va ma tak ki kay dla ndaɗta a mbara ni mege?»
8Yesu di ana, «Gologi tagi jiviya, viɗigi ii tagiɗi. Kayme suuna hin mba u sen ŋgolo. Gegelay hin di ana nammi Sa Suɗta, lina ndak wa, ni agi tuɗugi usiɗi. 9Lini agi ka hum dla duuna zeɗ zeɗ ni, lagi ndaaɗi. Dla ndaɗta hin mba ki fok jew tuwa. Ndaŋgara ka daɓmi na zak gawɗi.» 10Yesu hin di hu ana, «Mbassa dewra hin duu u mbassa hiŋga may. Mulla hin duu duk taɗu. 11Ndaŋgara hin dlak ŋgolo. Bakdarra ŋgolla u tuguɗira cora hin mbaa, li ki hu mbassa zeɗ zeɗ. Dlara mbuɗ tara ndaana hin liya, u tlesuu mbuɗta ay kolo huulona hin li lay.
12«Fok dla ndaɗta wanni, suuna hin yowogiya, hin lasagiya, hin tuɗugi fok suu kaɓakŋa hu Zira Tokka, hin cukugi daŋgayna, hin tuɗugi fok mulina u suu ŋgolona kan anu. 13Hu li namma agi hin fi voɗta kay a di ki kanda. 14Asi yowogi ha wa ni, haɗ hurugi kay dlara agi a daɗ a doo kay tagiraɗi. 15An tanda hin ɦagi nera u boy ma agi damma, babali magisina ka a ci way funugiɗi. 16Somoyogi u gorsegina hin ɦagi ki maŋ suuna ni asi tasira u banayagina hin ci maɗna ugi coco lay. 17Suuna halaŋ hin tinigi ira ki kanu. 18Tlimiɗ yagi na dew lay ni ka viɗ kiɗi. 19Lagi tagi jiviya agi hin suɗ iiri magira ki ni na.»
Yesu di ki ana zi Yerusalemma hin hawaɗ kiyo
(Matiye 24.15-21; Mark 13.14-19)
20«Agi wagi suu duuna ŋguy yam zi Yerusalem wa ni, agi wi ana nam hin tok a hawaɗ kira. 21Suu hu mbassa Yude ki keŋŋa hin njay piira kay ɦinira. Suu ka vo Yerusalemma hin mbee lay. Suu ki bagina ka hoŋ ay hu zi ŋgolna oloɗi. 22Buu namma hin li ni buu ma wi hawra. Li ni boy ma ki ɓiiri fok jewna. 23Boyogi suu wiina u suu gorra kosi fun ponana, hu buu namma asi hin mbuɗ ki hahawra na holiyok. Wihawra ŋgolla hin li hu mbas ndaɗta. Lona hurum hin ɓalak kay suu asina. 24Suuna hin casi ki u ɓagina hin yowosi, njayasi ha ki daŋgayna duk njaf suuna zeɗ zeɗ. Suu ɦawana kay to zi Yerusalemma ki ni toy na gak gak bay liisina ndak na baɗi.»
Mbara Goŋ Sanna hin mbara
(Matiye 24.29-31; Mark 13.24-27)
25«Dlara mbuɗta hin li kay faɗta u tilna u ciciwra lay. Suu kay ndaŋgara hin yoo tasiya, hurusi hin haɗ kay soora bil mbona soo cocora. 26Suuna hin miɗ lay ko ndaa tlesuu kay ndaŋgarana, saɓak ma huulona hin geŋeɗ lay. 27Na ɗaŋi Goŋ Sanna hin mbay duk ɗugulla u saɓak ŋgolla vi bumba. 28Lini dla ndaɗta gijaŋ mbara wa ni, ɗoɓogi tagi ki duk ɗaŋ, tlagi yagi ki koloo. Ni agi hin tok a puruɗ kira.»
Haɗta kay tulumma
(Matiye 24.32-35; Mark 13.28-31)
29Yesu tinisi ndal boyna ana, «Gologi ɦoyna u ŋgusugi suu daŋŋa halaŋ. 30Agi gijaŋ wasi asi ɗuf wa ni, ndolla hin ni tok. 31Ni na may agi li wi tle asina gijaŋ liya ni, Mul Lonara hin tok. 32An dagi ni gasira, suu njaf namma ka daɓ ki miɗna bay wi dla ndaɗta mbaɗi. 33Huulona u ndaŋgara hin daɓ kiyo, boy manna ka daɓ kiɗi.»
Tlesuu doo sana a juɓ Yesuna
34«Gologi tagi jiviya. Hinigi hurugi tin ki kay luu ma ɦawanaɗi, kay guruɗta summaɗi lay, kay tlesuu kay ndaŋgaraɗi lay. Li ka naɗi ni buu namma hin kafagi kagi ni kafiya. 35Buu namma hin mba ŋguf kay suu kay ndaŋgarana halaŋ ko bayna na. 36Buurugi senɗi. Joɓogi Lona tew tew a fi saɓak ma puruɗ tagi ki ko dlara hin mbayra. Ni agi col fok Goŋ Sanana may.»
37Yesu haɗ suuna hu Ziŋ Lonara faaliya. Fiɗigi wanni nam tuɗ a buu kay ɦinira Conora. 38Maɗii feɗet ni suuna mbay hu Ziŋ Lonara a humum boy mamma.
Currently Selected:
LUK 21: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
