LUK 22

Mulina vi vunusi kay Yesu

(Matiye 26.1-5; Mark 14.1-2; Jaŋ 11.45-53)

1Luu ma asi ti fu ma bay kuffa umma, yam ana Pakŋa, ndak ndakŋi, 2muli suu li ɓivunna u suu haɗ gaɗta hal yalna a vi Yesu a cam kiyo. Na may asi li ndaana ko suuna.

Yudas min a ɦal Yesu ki maŋ muli suu li ɓivunna

(Matiye 26.14-16; Mark 14.10-11)

3Satanna kal hu Yudas ma yam ana Iskariyotna. Nammi sa ay duk suu haɗi suu doogo yam mbana. 4Yudas tuɗ eg muli suu li ɓivunna u muli suu hu Ziŋ Lonara, tuɗ njaɗasi kay dlara nam a ɦasi Yesu kira. 5Asi hurusi li furira cocoo, ana asi hin ɦam gursura. 6Yudas hurum mina. Nam gijaŋ hal mbeleŋŋa a ɦasi Yesu bay suuna wi duku.

Yesu ti mappa ma Pakka u suu haɗi mamsina

(Matiye 26.17-25; Mark 14.12-21; Jaŋ 13.21-30)

7Buu luu ma asi ti fu ma bay kuffa dukumma ndak ndakŋi, asi ŋgaɗ timigii suu Pakŋa ni huwa. 8Yesu sun gi Piyer u Jaŋ, nam dasi ana, «Tuɗugi minigi tlesuu aygi hin tasi u luu ma Pakŋa.» 9Asi joɓom ana, «Aŋ min ana ami minisi ni arage?» 10Nam dasi ana, «Agi kal ha ki ɦoŋzina wa ni, hin ŋgaf sana u gegel ma yona kamu. Agi cukugi tagi umu, hu zi ma nam kal huna. 11Agi di malaŋ zina ana, Malaŋ Haɗta joɓoŋ ay ana zira nam hin a ti fu ma Pakŋa u suu haɗi mamsina ni arage? 12Nam hin takagi zira ŋgolla kolo kay ndaraɗta u tlena ki mini huruɗ halaŋ. Ni hu li ma agi hin min tlesuu tira huna.» 13Suu haɗina hin tuɗ wanni, fi tlena halaŋ ko Yesu dasira na may. Asi min tlesuu Pakŋa huwa.

Funa vi Bu Suuna

(Matiye 26.26-30; Mark 14.22-26; 1 Korintna 11.23-25)

14Lina ndak ndakŋi, Yesu kak a ti funa u suu mam suu vovoɗta. 15Yesu dasi ana, «An hurun min a ti fu ma Pakŋa u agi fok lassa asi hin a lasanda. 16Kayme an dagi ki gaw, an ka a ti fu ma namma u agi oloɗi gak gak jivi mamba tuɗ ndak ki hu Mul Lonara.» 17Nam tli va cira kom tani, gi deɓ Lona kayami dasi ana, «Vagina, ɓorowom duk tagiya. 18An dagi hana hu cecemba ni, an ka a ci sum#22.18 summa Vin, fruit de la vigne. namma oloɗi gak gak bay Mul Lonara mbaagi baɗi.» 19Nam tli funa kom tani, gi deɓ Lona kamu, mbulukum irim ki duk mbulukŋi, ɦasina ana, «Ni tliwin [ma ɦam ki kagina, lagi ka na tew tew a humugi gagi kanda.» 20Nam ɦasi va cira ma li komma ŋgoo funa dagani, hin dasi ana, «Va Cira wanni banara wilira u Lona vunuɗ faɗ ki u busuun ma vo ki kaŋga kagina.»]

21«Agi gologiya, sa ma ɦan kina ka kaki tani ti funa u an hu ŋgotta dewra. 22Gasi Goŋ Sanna hin miɗa ko Lona hurum vira na. Hahawra ka kay sa ma ɦal Goŋ Sanna ki na di ŋgeŋŋa kanna.» 23Suu haɗina gijaŋ joɓ duk tasi ɗaŋi ana, Sa dukusi hin a li dla ndaɗtana ni gege?

Sa ma ŋgolna ni gege?

24Suu haɗina gijaŋ ciwayra a wi ki ana sa dukusi a ŋgollana ni gege? 25Nam Yesu di ɗaŋi ana, «Muli suu kay ndaŋgarana, ŋgolo masira ni suu susi dlara ki kasi su ni, hin pereɗ ana asi ni suu lasi jivina. 26Dla ndaɗta ka a li dukugi naɗi. Ni na ɗow ana ma ŋgol dukugina hin li tammi ko ma goona na. Sa ma dukugi a ŋgolla na hin lagi sunda ni namu. 27Ma a ŋgollana ni manage, ma kaki a ti funana ɗowba ma ɦamma ay kina su? Ni ma kak a tamma naɗi su? Na may ni an dukugi ni ko sa ɦal funa ayna na.

28«Agi may ni wi dlara li egenda ki halaŋ. 29Ko Bun min Mul mamba kanu, an may ni minigira kagi na may. 30Agi hin ti tina u an hu ŋgotta dewra hu Mul manda may. Agi hin kak hu dlamba mulla a kaɓakŋa maŋ dee suu Israel suu doogo yam mbana.»

Yesu ana Piyer hin tin vunum kamu

(Matiye 26.31-35; Mark 14.27-31; Jaŋ 13.36-38)

31Yesu di ana, «Simon, Simon, Satan joɓ saɓakŋa ay ana hin kisikigi ko ndal suuna kisik ii wana ki duk barra na. 32May ni an joɓ Lona kaŋu ana huruŋ ma tinina kaɗakaŋgi. Hu li ma aŋ hin hoŋ ay egen wanni mbuɗ gorseŋŋa ki saɓak may.» 33Piyer dam ana, «Bu Suuna, tan ki mini a tuɗ daŋgayna u aŋu a miɗ u aŋ lay.» 34Yesu hoŋom dira ana, «Piyer an ka daŋ ha kiyo, golok tlekŋa ka hel karam bay aŋ a tin vunuŋ kan yaŋŋa hindi ana aŋ ka wanɗiraɗi.»

Dlara vi gursura, mbumbura u ɓaginara

35Yesu dasi ana, «Mayra an sunugi bay gursura kogira, mbumbu kaɗi lay, tuɓuru kaɗi layra, va hin kaɗakagi ay su?» Asi hoŋom dira ana, «Ҥawaa.» 36Nam dasi ana, «Hu cecemba ni, sa ma gursu mamma kana, yowom komu. Ma mbumbumba kana li na lay, sa ɓagi ka kombina gus baraw mamma ki, hal kom dew. 37An dagi anaba. Boy ma ki ɓiirina vunum faɗ ki ni u anu. Asi ndumum ki ni duk suu li dla cora, ni dla mayra ay ɓiiri kanda hin li ki ni na.» 38Suu haɗina hoŋom dira ana, «Bu Suuna, ɓagina ca ni mba'.» Nam hoŋosi dira ana, «Ni ndaka.»

Yesu cen Lona kay ɦinira conora

(Matiye 26.36-46; Mark 14.32-42)

39Yesu tuɗ kay ɦinira Conora ko ndal nam tuɗ kaɗ tew tewra na. Suu haɗi mamsina tuɗ ha um may. 40Asi tew hu li namma may ni, nam dasi ana, «Cenegi Lona kaa hin tagi hu ndembaɗi.» 41Nam maɗ duk ɦoŋom ki u asi na nde ni, goɓ kaŋga a cen Lona. 42Nam di ana, «Bunu, lini aŋ mina ni, hahaw ndaɗta aŋ hininda kanɗi. Ҥawaa, ka ko an minda naɗi, li ko aŋ minda na.» [43Hu li namma sa sunda huulona tak tam irim a ɦam saɓakŋa. 44Ndaana su ki kam lay ni, nam cen Lona gak gak. Zamalla soo um ko busuna na.]

45Nam hin li cenda ha ki tani, mba fi suu haɗi mamsina buu senna ko hurusi ma haɗta. 46Nam dasi ana, «Agi buurugi senna ni kay mege? Yowogi koloo. Cenegiya, ka hin tagi hu ndembaɗi.»

Suuna vi Yesu

(Matiye 26.47-56; Mark 14.43-50; Jaŋ 18.3-11)

47Vunum ma ɓakŋa bay ndi kaŋga tu may ni, suu vamma mbay ni na gaw. Yudas sa haɗina duk suu doogo yam mbana tinisi ay ni namu. Nam Yudas ɦuɗ tam eg Yesu a mboɗom hurumu. 48Yesu dam ana, «Yudas ni deɓpa aŋ gaɗ a ɦal Goŋ Sanna kira su?» 49Suu vi Yesuna wi ana dlara ka li na ni, asi joɓom ana, «Bu Suuna, ami gijaŋ kaasi u ŋgewegina su?» 50Sa ma li sunda fok mul ŋgol ma li ɓivunna, sa ma dew duk suu vi Yesuna kaam humumba njufna kiyo. 51Yesu hoŋ dira ana, «Hinigiya, ni ndak wa.» Nam tin kom kay hum sana na ni, ndaɗ cil gaw.

52Yesu hin hoŋ irim eg muli suu li ɓivunna u muli suu hu Ziŋ Lonara u suu ŋgolo suu mbay a vamma ana, «Agi mbay u ŋgewegina u tokolora kogi a vanda ni, an ni sa kulna su? 53An ay egegi hu buuna tew tew hu Ziŋ Lonara agi van kaɗi may nige? Na liigina ndak ay kogi wa ni u saɓak ma vi ndufundana.»

Piyer tin vunum kay Yesu

(Matiye 26.57-58,69-75; Mark 14.53-54,66-72; Jaŋ 18.12-18,25-27)

54Asi vi Yesu tuɗum vi mul ŋgol ma li ɓivunna, Piyer ay ŋgorom dagan day. 55Asi ŋgal kura hu taraŋga vi mulna a hol tasi wanni, Piyer mba kak dukusiya. 56Goora li sunda vi mulnara wam nam kakira fun kura hol tamu, ndaɗ ŋgaras iriɗ ha egem di ana, «Sana wanni ay ko tam u namu.» 57Piyer tin vunum ki ana, «Cara, an ka wambi.» 58Kak ew ni, sa ma daŋŋa wam olo, dam ana, «Aŋ ay ni dukusi layɗi su?» Piyer dam ana, «Ka anɗi.» 59Kak na jokŋi, sa ma daŋŋa dam ana, «Gasi sana wanni ay u namu. Kayme nammi sa Galilena.» 60Piyer hoŋom dira ana, «An ka wi va ma aŋ dammaɗi.» Vun Piyer bay ndi kaŋga tu may ni, tlekŋa hel gaw. 61Bu Suuna pereɗ irim gol Piyer na ni, Piyer humum gam kay boy ma nam damma ay jewna ana, «Aŋ hin tin vunuŋ kan yaŋŋa hindi jew tlekŋa a hella, ana aŋ ka wanɗi.» 62Piyer kal ki buru u tiina irimu.

Asi ŋgul Yesu cam poŋga

(Matiye 26.67-68; Mark 14.65)

63Suu gol u Yesuna ŋgulum may, cam poŋga may. 64Asi dugum irim ki dugŋi, camu, hin joɓom ana, «Sa caŋŋa ni gege? Aŋ dami ay gige.» 65Asi panam u njaf boyna bolowo.

Yesu fok mul ŋgol ma kaɓakŋa

(Matiye 26.59-66; Mark 14.55-64; Jaŋ 18.19-24)

66Maɗiira fo ki foni, suu ŋgolo suu Juifna u muli suu li ɓivunna u suu wi magaara gaɗta tok tasiya. Asi yi Yesu ay ki fok suu asina, 67joɓom ana, «Dami aya, aŋŋi Sa Lona Fuurumma su?» Nam hoŋosi dira ana, «An li dagi haa ni, agi ka humun vununɗi. 68An joɓogi ha wani, agi ka hoŋon diraɗi lay. 69U wandara agi hin wagi Goŋ Sanna kagi kay ko Lona ma njufna ma saɓakŋa kom halaŋŋa.» 70Suuna halaŋ tum vunna um ana, «Ni aŋ Goŋ Lonna ɗaŋ su?» Nam dasi ana, «Di ni agi na diɗi, ni an ɗaŋ may.» 71Asi suuna ana, «Aygi halaygi ge duk ologe? Humuygina vunum ki ni u taygiraɗi su?»

Currently Selected:

LUK 22: BMS

Highlight

Copy